ប្រជាពលរដ្ឋមួយចំនួន ក្នុងចំណោមពលរដ្ឋជាង៦០គ្រួសារ មានផ្ទះនៅជាប់ពីមុខរបងអាកាសយានដ្ឋានអន្តរជាតិខេត្តព្រះសីហនុ ស្នើសុំអាជ្ញាធរខេត្ត និងរដ្ឋាភិបាល ពន្យាការចុះរុះរើ ដោយសំអាងថាមិនទាន់មានលទ្ធភាពកសាងជម្រកនៅទីតាំងថ្មី ខណៈអាជ្ញាធរតម្រូវឱ្យរុះរើឱ្យអស់ត្រឹមថ្ងៃទី១៥ ខែមីនានេះ។
ប្រជាពលរដ្ឋ បានអះអាងថា ពួកគេបានមករស់នៅទីតាំងខាងលើ ចាប់តាំងពីឆ្នាំ១៩៨៥មក ក្រោមការរៀបចំរបស់អាជ្ញាធរ។ នេះបើតាមការចុះផ្សាយរបស់កាសែតក្នុងស្រុកមួយ កាលពីថ្ងៃព្រហស្បតិ៍។
បើតាមប្រភពនោះ បច្ចុប្បន្នអាជ្ញាធរខេត្តព្រះសីហនុតម្រូវឲ្យរុះរើផ្ទះចេញពីទីតាំងធ្លាប់រស់នៅជាង ៤០ឆ្នាំ។ បើតាមប្រជាពលរដ្ឋ ទីតាំងនោះស្ថិតក្នុងសង្កាត់រាម ក្រុងកំពង់សោម ប្តូរទៅទីតាំងថ្មី ដែលមិនទាន់មានប្រព័ន្ធទឹកភ្លើង ត្រឹមត្រូវនៅឡើយ។ ជាពិសេសទីតាំងដី ដែលចែកជូននោះ គឺមានទីតាំងខ្លះ មិនអាចសង់ផ្ទះកើតទេ ដោយសារសណ្ឋានដីមិនរាបស្មើ។
ត្រង់ចំណុចនេះ ពលរដ្ឋមួយចំនួន សំណូមពរដល់ លោក ម៉ាង ស៊ីណេត អភិបាលខេត្តព្រះសីហនុ ជាពិសេស និងរដ្ឋាភិបាល ជួយពន្យាពេលរុះរើ ដើម្បីឲ្យពួកគាត់មានពេលគ្រប់គ្រាន់ សម្រាប់រុះរើផ្ទះចាស់ និងសង់ផ្ទះថ្មី។ ដ្បិតរាល់ថ្ងៃនេះ នៅមូលដ្ឋានពួកគាត់ កំពុងរស់នៅមានភ្លៀងធ្លាក់ និងរលឹមជាប់មិនដាច់។
លោក ជ័រ សាប៊ុន បញ្ជាក់ថា ពួកគាត់បានទទួលយកសំណង និងដីសង់ផ្ទះនៅទីតាំងថ្មី តាមការរៀបចំរបស់រដ្ឋបាលខេត្ត ប៉ុន្តែពួកគេពេលនៅនេះមិនទាន់រៀបចំទីតាំងនៅទីតាំងថ្មីរួចរាល់ទេ ទើបសុំអាជ្ញាធរពន្យាពេល ។
លោកថា៖ «ជួយកូនចៅផង កុំឲ្យកូនចៅប្រញាប់រុះរើពេកព្រោះជារដូវភ្លៀងផង។ គង់តែរុះរើទេ ខែបួនខែប្រាំ ខ្ញុំរុះរើអស់ហើយ សុំឲ្យដោះស្រាយតែប៉ុណ្ណឹងទេ។ ខ្ញុំគង់តែចេញទេ តែក្នុងខែហ្នឹងខ្ញុំចេញអត់ទាន់ទេ ឲ្យប្រជាពលរដ្ឋ ទៅសង់លំនៅឋាននៅកន្លែងថ្មីសិនទៅ។ លុយឲ្យហើយ ជំពាក់គេសងគេ ប្រាំ ប្រាំមួយពាន់ហ្នឹងធ្វើអីចេញ សងគេអស់ហើយ។ សុំតែប៉ុណ្ណឹងទេ ចេញគង់តែចេញទេ មិនជំទាស់ទេ។ ខ្ញុំ អាជ្ញាធរចែកឲ្យក្បាល១០គុណនិង២៥ម៉ែត្រ និងសរុបលុយ ១ម៉ឺនដុល្លារ។ ឥឡូវនេះ ខ្ញុំចាប់ផ្តើមរុះរើផ្ទះចាស់ជាបណ្តើរៗហើយ សុំទុកពេលខ្ញុំរុះរើនិងសង់ផ្ទះថ្មីសិន។ អាជ្ញាធរកំណត់ថ្ងៃឲ្យរុះរើថ្ងៃទី១៤–១៥ ខែមីនានេះហើយ ខ្ញុំរុះរើមិនទាន់ទេ»។
ប្រហាក់ប្រហែលគ្នានេះដែរ ស្ត្រីវ័យចំណាស់ អ្នកស្រី ប៉ុក សំអាត និយាយថា ការកំណត់ថ្ងៃឲ្យរុះរើផ្ទះ ត្រឹមថ្ងៃទី១៥ ខែមីនា គឺវាលឿនពេក ព្រោះពួកគាត់មានតែពីរនាក់ប្តីប្រពន្ធ និងមានវ័យចំណាស់ទៀត។ គាត់ថា មិនទាន់មានកន្លែងស្នាក់នៅទេ ដែលគាត់សុំពន្យាពេលរុះរើ។
អ្នកស្រីថា៖ «សម្តេចជួយកូនចៅផង ឥឡូវកំពុងតែវេទនាហើយ នៅហាលភ្លៀងហាលរលឹម។ សូមជួយពន្យាពេល ទម្រាំខ្ញុំបានធ្វើកន្លែងជ្រកហើយ។ គេចេះតែមកតឿនយើងរហូត ខ្ញុំពីរនាក់តា គាស់រុះរើផ្ទះចាស់ហ្នឹង អត់មានកន្លែងជ្រកទេ ចេះតែមកដេញឲ្យគ្នាចេញ »។
ចំណែក យុវជនពីរនាក់ផ្សេងទៀត ក៏សំណូមពរដល់ថ្នាក់ដឹកនាំរដ្ឋបាលខេត្តព្រះសីហនុ និងនាយករដ្ឋមន្ត្រី ជួយពន្យាពេលរុះរើផ្ទះ ដល់បំណាច់ខែមីនានេះផង ព្រោះកំណត់ថ្ងៃរុះរើ ត្រឹមថ្ងៃទី១៥ ខែមីនា ពលរដ្ឋពួកគាត់រៀបចំមិនទាន់ទេ។
ចំណែក យុវជនពីរនាក់ទៀតក៏បានលើឡើងពីបញ្ហានេះដូចគ្នា។
គាត់ថា៖ «ខ្ញុំសំណូមពរដល់សម្តេចបវធិបតី ហ៊ុន ម៉ាណែត ឲ្យជួយទុកពេលវេលាឲ្យប្រជាពលរដ្ឋ ត្រឹមចុងខែមីនាហ្នឹងទៅ ដើម្បីរុះរើផ្ទះ។ ប៉ុន្តែបើសិនជាដល់ខែមេសា ពួកខ្ញុំអត់រុះរើ សូមឲ្យរាជរដ្ឋាភិបាល ឬថ្នាក់ដឹកនាំខេត្តខាងលំនៅឋាននេះ សូមមានចំណាត់ការចុះ។ តែពលរដ្ឋពួកខ្ញុំ សុំសង់ផ្ទះនៅកន្លែងថ្មី ដើម្បីមានដំបូលជ្រក។ ឥឡូវភ្លៀងចាប់ផ្តើមកក់ខែហើយៗពលរដ្ឋខ្លះ បានចាប់ផ្តើមរុះរើផ្ទះ ហើយមិនទាន់មានដំបូលជ្រកផងទេ។ អញ្ចឹងហើយសូមឲ្យសម្តេចបវរធិបតី ហ៊ុន ម៉ាណែត ជួយសម្រួលឲ្យពលរដ្ឋ នៅមូលដ្ឋាននេះ គាត់មានរយៈពេលក្នុងការរុះរើ និងប្តូរទីតាំងថ្មី។ ខ្ញុំ ឈ្មោះ មាស តារា សំណូមពរដល់ សម្តេចបវរធិបតី ហ៊ុន ម៉ាណែត សូមជួយសម្រួលដល់កូនចៅ កុំឱ្យអាជ្ញាធរឆាប់រុះរើពេក សុំទុកពេលវេលាឲ្យពួកខ្ញុំផង។ ឲ្យបានដាច់ខែមីនានេះក៏បានដែរ ហើយបើដល់ខែមេសា ពួកខ្ញុំអត់រុះរើ អាជ្ញាធរចង់ធ្វើអីក៏បានដែរ »។
អ្នកស្រី ជុំ ឡឹក វិញ និយាយថា គ្រួសារគាត់ទទួលបានសំណងពីរដ្ឋបាលខេត្តចំនួន ៥ពាន់៥រយដុល្លារ និងដីទទឹង ១០ម៉ែត្រគុណ ២៥ម៉ែត្រ។ ប៉ុន្តែថា ទីតាំងដីរបស់គាត់ទាល់តែទិញដីមកចាក់បន្ថែមទើបអាចសង់ផ្ទះបាន។ ប៉ុន្តែគាត់ថា អាចម៌ដីមានតម្លៃខ្ពស់រហូតដល់ ២៥ដុល្លារក្នុងមួយឡាន ហើយត្រូវចាក់រាប់សិបឡានឯណោះ។
ស្ត្រីដែលមានកូន១០នាក់ ក្នុងបន្ទុករូបនេះ ក៏បានសំណូមពរដល់អាជ្ញាធរជួយដឹកអាចម៌ដី ចាក់ពង្រាបនៅលើទីតាំងដី ដែលចែកឲ្យគាត់សង់ផ្ទះនោះឲ្យបានរាបស្មើផង ព្រោះគ្រួសារគាត់មានជីវភាពក្រីក្រខ្លាំង គ្មានលុយទិញដីចាប់បំពេញនៅទីតាំងថ្មីនោះទេ។
អ្នកស្រីថា៖ «សូមសម្តេចនាយករដ្ឋមន្ត្រីជួយកូនចៅ ដីធ្វើផ្ទះ ឬសង់ផ្ទះអត់កើត ស្នើឲ្យរដ្ឋមន្ត្រីជួយ ប្រជាជនអត់មានអីទេ អត់លុយមួយរៀលទេ សូមជួយប្រជាជនផង កូនចៅក្រណាស់។ សំណូមពរជួយចាក់ដីឲ្យស្មើឲ្យប្រជាជនធ្វើផ្ទះកើត។ សំណូមពរដល់ចៅហ្វាយខេត្ត សម្តេចជួយប្រជាជនផង ឲ្យដីនោះសង់ផ្ទះកើត។ សូមបងជួយទៅមើលដីរដ្ឋចែកឲ្យនោះជាក់ស្តែងផង ដីសង់ផ្ទះអត់កើតទេ។ ឲ្យខ្ញុំរុះរើផ្ទះយ៉ាងម៉េចទៅនៅហាលភ្លៀងយ៉ាងម៉េច។ ឲ្យលុយប្រាំពាន់ជាហ្នឹង ធ្វើអីចេញ ហើយខ្ញុំ កូនឡើងដប់នាក់ឯណោះ ហើយឲ្យលុយប្រាំពាន់ប្រាំរយដុល្លារ។ ឥឡូវខ្ញុំ អត់មានលុយចាក់អាចម៌ដី ដើម្បីសង់ផ្ទះទេ។ រកមួយថ្ងៃហូបមួយថ្ងៃ ខ្ញុំទៅធ្វើខ្ញុំគេ ស៊ីឈ្នួលលាងចានឲ្យគេទេ »។
ទោះជាបែបនេះក្តី វីអូឌី នៅមិនទាន់អាចសុំការបញ្ជាក់ពី លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ ជុំវិញការលើកឡើងរបស់ពលរដ្ឋនេះ។ ប៉ុន្តែ លោក នួន ប៊ុនថុល អភិបាលក្រុងកំពង់សោម និយាយប្រាប់សារព័ត៌មានក្នុងស្រុកថា អាជ្ញាធរបានដោះស្រាយជូនពលរដ្ឋទាំងនោះរួចរាល់អស់ហើយ។ ហើយថា ការសម្រេចពន្យាចុះរុះរើអាស្រ័យលើថ្នាក់ដឹកនាំខេត្ត។
លោកថា៖ «រូបលោកមិនមានអត្ថាធិប្បាយអ្វីទេ លើសំណូមពរពលរដ្ឋខាងលើនេះទេ ព្រោះរឿងនេះ អាជ្ញាធរបានរៀបចំជូនពលរដ្ឋ អស់ពេលយូរមកហើយ។ ហើយរាល់សេចក្តីសម្រេចផ្សេងៗ គឺសម្រេចនៅលើថ្នាក់ដឹកនាំនៃរដ្ឋបាលខេត្តព្រះសីហនុឯណោះ។ ហើយរដូវនេះ មិនមែនជារដូវភ្លៀងទេ គ្រាន់តែដោយសារតែការបម្រែបម្រួលអាកាសធាតុទេ »។
យ៉ាងណា លោក ស្រេង វ៉ាន់លី អ្នកឃ្លាំមើលសិទ្ធិមនុស្សអង្គការលីកាដូខេត្តព្រះសីហនុ ចង់ឃើញអាជ្ញាធរខេត្តព្រះសីហនុទុកពេលឱ្យពលរដ្ឋទាំងនោះ មានពេលគ្រប់គ្រាន់ ដើម្បីរុះរើ និងសង់ផ្ទះទៅទីតាំងថ្មីជាមុនសិន។ លោកបញ្ជាក់ថា ព្រោះពួកគាត់ក៏បានយល់ព្រមទទួលសំណង និងទទួលយកចំណែកក្បាលដី ដែលរដ្ឋបាលខេត្ត បានផ្តល់ជូននោះរួចហើយដែរ ដោយគ្រាន់តែស្នើសុំពន្យាពេលរុះរើឲ្យបានវែងជាងនេះតែប៉ុណ្ណោះ។
លោកថា៖ «ពួកគាត់ស្នើសុំបន្តរហូតដល់ចុងខែមីនាហ្នឹង អាជ្ញាធរគួរតែយល់ព្រមទៅតាមការស្នើសុំរបស់ពួកគាត់ ដើម្បីឲ្យពួកគាត់មានពេលវេលាគ្រប់គ្រាន់ ក្នុងការរុះរើផ្ទះទៅសង់ទីលំនៅថ្មី។ យើងឃើញថា ប្រសិនបើរុះរើផ្ទះភ្លាមៗ និងសង់ផ្ទះថ្មីមិនទាន់ហើយទេវាអាចប៉ះពាល់ពួកគាត់។ ព្រោះថា ប៉ុន្មានថ្ងៃមកនេះ អាកាសធាតុមានភាពអាប់អ៊ួរ អាចមានភ្លៀងកក់ខែអីហ្នឹង ដែលអាចប៉ះពាល់ដល់ការរស់នៅរបស់ពួកគាត់ ជាពិសេសក្មេងៗដែលគាត់នៅតូច»។
បើតាមមន្ត្រី ប្រជាពលរដ្ឋ ដែលមានផ្ទះរស់នៅមុខរបងព្រលានយន្តហោះខេត្តព្រះសីហនុ សរុបមានចំនួន ៤៨ខ្នងផ្ទះ និងមានពលរដ្ឋចំនួន ៦៤គ្រួសារ។
ចំណែក ពលរដ្ឋវិញ ឱ្យដឹងថា ក្នុងចំណោមពួកគាត់ គឺមានអ្នកខ្លះមករស់នៅទីតាំងនេះ ចាប់តាំងពីឆ្នាំ១៩៨៥មកម៉្លេះ ពោលគឺជាង ៤០ឆ្នាំ ដែលថ្នាក់ដឹកនាំរដ្ឋបាលខេត្តព្រះសីហនុជំនាន់នោះ បាននាំពួកគាត់ ឲ្យមកសង់ផ្ទះនៅលើទីតាំងនេះ ដើម្បីអាចជួយធ្វើជារនាំង ឬរបងនៃទ័ពព្រៃខ្មែរក្រហម។ ហើយសន្យា នឹងចេញបណ្ណកម្មសិទ្ធិដីធ្លីជូនពួកគាត់ថែមទៀតផង។
តែជាក់ស្តែងនៅពេលនេះ អាជ្ញាធរមិនបានផ្តល់បណ្ណកម្មសិទ្ធិឱ្យពួកគាត់ ដូចការសន្យាទេ ហើយពេលនេះ ថែមទាំងត្រូវឱ្យពួកគាត់ចេញទៅទីតាំងថ្មីទាំងបានរៀបរយឱ្យទៅវិញ៕
