ប្រធានាធិបតី លោក ដូណាល់ ត្រាំ បានមានប្រសាសន៍កាលពីថ្ងៃទី១៥ខែមីនាថា រដ្ឋបាលរបស់លោកកំពុងពិភាក្សាជាមួយប្រទេសចំនួន ៧ អំពីការជួយការពារសន្តិសុខនៅច្រកសមុទ្រហ័រមូស (Strait of Hormuz) ចំពេលមានសង្គ្រាមរវាងសហរដ្ឋអាមេរិក-អ៊ីស្រាអែល ប្រឆាំងនឹងប្រទេសអ៊ីរ៉ង់ ដោយលោកបានអំពាវនាវឱ្យប្រទេសទាំងនោះជួយការពារនាវាដែលធ្វើដំណើរក្នុងផ្លូវទឹកដ៏សំខាន់នេះ ដែលទីក្រុងតេអេរ៉ង់បានបិទខ្ទប់ភាគច្រើនមិនឱ្យនាវាដឹកប្រេងឆ្លងកាត់។
ខណៈជម្លោះនេះកំពុងបង្កឱ្យមានភាពចលាចលនៅទូទាំងមជ្ឈិមបូព៌ា និងរង្គើទីផ្សារថាមពលពិភពលោកក្នុងសប្តាហ៍ទី៣នេះ លោក ត្រាំ បានទទូចថា បណ្តាប្រទេសដែលពឹងផ្អែកខ្លាំងលើប្រេងពីតំបន់ឈូងសមុទ្រ មានទំនួលខុសត្រូវក្នុងការការពារច្រកសមុទ្រនេះ។
លោក ត្រាំ បានប្រាប់អ្នកយកព័ត៌មាននៅលើយន្តហោះ Air Force One ក្នុងអំឡុងពេលធ្វើដំណើរពីផ្លរីដា ទៅកាន់វ៉ាស៊ីនតោនថា៖ «ខ្ញុំទាមទារឱ្យប្រទេសទាំងនេះចូលមកការពារដែនដីរបស់ពួកគេ ពីព្រោះវាគឺជាដែនដីរបស់ពួកគេ»។
ទោះបីជាលោកបានបដិសេធមិនបញ្ជាក់ឈ្មោះ រដ្ឋាភិបាលដែលរដ្ឋបាលរបស់លោកបានទាក់ទងក៏ដោយ ក៏លោក ត្រាំ បាននិយាយកាលពីចុងសប្តាហ៍នេះថា លោករំពឹងថាប្រទេសជាច្រើននឹងបញ្ជូននាវាចម្បាំង ដើម្បីអនុញ្ញាតឱ្យមានការដឹកជញ្ជូនតាមច្រកសមុទ្រហ័រមូស ដែលជាផ្លូវឆ្លងកាត់សម្រាប់ ២០% នៃប្រេងរបស់ពិភពលោក។
លោកបានលើកឡើងនៅក្នុងការបង្ហោះលើបណ្តាញសង្គមថា លោកសង្ឃឹមថា ប្រទេសចិន បារាំង ជប៉ុន កូរ៉េខាងត្បូង អង់គ្លេស និងប្រទេសផ្សេងៗទៀតនឹងចូលរួម។
លោក ត្រាំ ក៏បានមានប្រសាសន៍ផងដែរថា ទីក្រុងវ៉ាស៊ីនតោនកំពុងមានទំនាក់ទំនងជាមួយអ៊ីរ៉ង់ ប៉ុន្តែលោកបានសម្តែងការសង្ស័យថា ទីក្រុងតេអេរ៉ង់បានត្រៀមខ្លួនសម្រាប់ការចរចាដើម្បីបញ្ចប់ជម្លោះនេះឬយ៉ាងណា។
មន្ត្រីសហរដ្ឋអាមេរិកដែលឆ្លើយតបទៅនឹងភាពមិនច្បាស់លាស់នៃសេដ្ឋកិច្ចជុំវិញតម្លៃប្រេងខ្ពស់ បានព្យាករណ៍កាលពីថ្ងៃទី១៥ខែមីនាថា សង្គ្រាមលើអ៊ីរ៉ង់នឹងបញ្ចប់ក្នុងរយៈពេលប៉ុន្មានសប្តាហ៍ទៀត ហើយការធ្លាក់ចុះនៃតម្លៃថាមពលនឹងកើតមានឡើងជាបន្តបន្ទាប់ បើទោះបីជាមានការអះអាងពីអ៊ីរ៉ង់ថាខ្លួននៅតែ «មានស្ថិរភាព និងរឹងមាំ» និងត្រៀមខ្លួនការពារខ្លួនក៏ដោយ។
កាសែត Wall Street Journal បានរាយការណ៍ដោយស្រង់សម្ដីមន្ត្រីអាមេរិកដែលមិនបញ្ចេញឈ្មោះថា រដ្ឋបាលលោក ត្រាំ គ្រោងនឹងប្រកាសយ៉ាងឆាប់នៅសប្តាហ៍នេះថា ប្រទេសជាច្រើនបានយល់ព្រមបង្កើតសម្ព័ន្ធភាពដើម្បីអមដំណើរនាវាឆ្លងកាត់ផ្លូវទឹកដ៏ចង្អៀតនេះ ប៉ុន្តែពួកគេនៅតែពិភាក្សាគ្នាថាតើប្រតិបត្តិការទាំងនោះគួរចាប់ផ្តើមមុន ឬក្រោយពេលបញ្ចប់អរិភាព។ សេតវិមានមិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។
លោក ត្រាំ ដែលកាលពីថ្ងៃទី១៣ខែមីនា បាននិយាយថា កងទ័ពជើងទឹកអាមេរិកនឹងចាប់ផ្តើមអមដំណើរនាវាដឹកប្រេង «ក្នុងពេលឆាប់ៗនេះ» បានលើកឡើងថា អ៊ីរ៉ង់ចង់ចរចា ប៉ុន្តែរដ្ឋមន្ត្រីការបរទេសអ៊ីរ៉ង់ លោក Abbas Araqchi កាលពីថ្ងៃទី១៥ខែមីនា បានបដិសេធការអះអាងនោះ។
លោក Araqchi បានប្រាប់កម្មវិធី “Face the Nation” របស់ទូរទស្សន៍ CBS ថា៖ «យើងមិនដែលស្នើសុំការឈប់បាញ់ទេ ហើយយើងក៏មិនដែលស្នើសុំសូម្បីតែការចរចាដែរ។ យើងត្រៀមខ្លួនរួចជាស្រេចដើម្បីការពារខ្លួនយើងដរាបណាមានការចាំបាច់»។
ខណៈពេលដែលតម្លៃប្រេងឆៅកំពុងស្ថិតនៅក្បែរ១០០ដុល្លារក្នុងមួយបារ៉ែល មន្ត្រីរដ្ឋបាល លោក ត្រាំ បានទទូចថា សញ្ញាទាំងអស់ចង្អុលបង្ហាញពីការបញ្ចប់ជម្លោះក្នុងរយៈពេលដ៏ខ្លី៕
