ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃទី១៦ ខែមីនា បានប្តេជ្ញាថានឹង «កាន់កាប់» ប្រទេសគុយបា ខណៈដែលប្រទេសដីកោះកុម្មុយនីស្តមួយនេះ បានធ្លាក់ចូលក្នុងភាពងងឹតសូន្យសុង ដោយសារការដាច់ចរន្តអគ្គិសនីទាំងស្រុង ដែលពាក់ព័ន្ធនឹងការហាមឃាត់ការនាំចូលប្រេងយ៉ាងធ្ងន់ធ្ងរ បង្កឡើងដោយទីក្រុងវ៉ាស៊ីនតោន។
បន្ទាប់ពីបានប្រឆាំងនឹងសហរដ្ឋអាមេរិកអស់រយៈពេលជិត ៧ ទសវត្សរ៍មក រដ្ឋាភិបាលកុម្មុយនីស្តនៅទីក្រុងឡាហាវ៉ាន កំពុងស្ថិតក្រោមសម្ពាធយ៉ាងខ្លាំងពីសំណាក់រដ្ឋបាលលោក ត្រាំ ដែលប្តេជ្ញាចិត្តក្នុងការបង្កើតប្រវត្តិសាស្ត្រថ្មីសម្រាប់ប្រទេសដីកោះមួយមនេះ។
លោក ត្រាំ បានប្រាប់អ្នកយកព័ត៌មាននៅសេតវិមានថា៖ «អ្នកដឹងទេ ពេញមួយជីវិតរបស់ខ្ញុំ ខ្ញុំបានឮឥតឈប់ឈរអំពីសហរដ្ឋអាមេរិក និងគុយបា។ តើនៅពេលណាដែលសហរដ្ឋអាមេរិកនឹងធ្វើវា?»។
លោក ត្រាំ បានបន្តថា៖ «ខ្ញុំជឿជាក់ថា ខ្ញុំនឹង… មានកិត្តិយសក្នុងការកាន់កាប់គុយបា»។
លោកបន្ថែមថា៖ «មិនថាខ្ញុំរំដោះវា ឬកាន់កាប់វា ខ្ញុំគិតថាខ្ញុំអាចធ្វើអ្វីគ្រប់យ៉ាងដែលខ្ញុំចង់បានចំពោះវា បើអ្នកចង់ដឹងពីការពិត។ ឥឡូវនេះ ពួកគេគឺជាប្រទេសដែលកំពុងតែចុះខ្សោយយ៉ាងខ្លាំង»។
នេះគឺជាការគំរាមកំហែងយ៉ាងច្បាស់បំផុតមួយរបស់លោក ត្រាំ ហើយវាបានកើតឡើងនៅពេលដែលប្រទេសដីកោះក្នុងតំបន់ការីបៀន ដែលមានប្រជាជន ៩,៦ លាននាក់នេះ កំពុងប្រឈមមុខនឹងការដាច់ចរន្តអគ្គិសនីទ្រង់ទ្រាយធំម្តងទៀត។
សេចក្តីថ្លែងការណ៍របស់ក្រុមហ៊ុនអគ្គិសនីជាតិគុយបា (UNE) បានឱ្យដឹងថា ការដាច់ចរន្តអគ្គិសនីនេះបណ្តាលមកពី «ការបិទប្រព័ន្ធបណ្តាញអគ្គិសនីជាតិទាំងស្រុង»។
ប្រព័ន្ធផលិតថាមពលអគ្គិសនីដ៏ចំណាស់របស់គុយបាកំពុងស្ថិតក្នុងសភាពទ្រុឌទ្រោម ដោយការដាច់ចរន្តអគ្គិសនីរហូតដល់ ២០ ម៉ោងក្នុងមួយថ្ងៃ បានក្លាយជារឿងធម្មតាទៅហើយនៅតាមផ្នែកខ្លះនៃកោះនេះ។
ប៉ុន្តែចាប់តាំងពីសហរដ្ឋអាមេរិកបានទម្លាក់សម្ព័ន្ធមិត្តកំពូលរបស់គុយបា គឺលោក Nicolas Maduro នៃប្រទេសវេណេស៊ុយអេឡា កាលពីថ្ងៃទី៣ ខែមករាមក សេដ្ឋកិច្ចរបស់កោះនេះកាន់តែរងការវាយប្រហារបន្ថែមទៀត ខណៈដែលលោក ត្រាំ នៅតែបន្តការរារាំងការនាំចូលប្រេងជាក់ស្តែង។
មិនមានប្រេងត្រូវបាននាំចូលទៅកាន់កោះនេះទេ ចាប់តាំងពីថ្ងៃទី៩ ខែមករា ដែលបានប៉ះពាល់ដល់វិស័យថាមពល ហើយក៏បានបង្ខំឱ្យក្រុមហ៊ុនអាកាសចរណ៍កាត់បន្ថយជើងហោះហើរទៅកាន់កោះនេះផងដែរ ដែលជាការវាយប្រហារយ៉ាងខ្លាំងដល់វិស័យទេសចរណ៍ដ៏សំខាន់បំផុត។
ក្នុងគោលបំណងដើម្បីកាត់បន្ថយសម្ពាធសេដ្ឋកិច្ច និងឆ្លើយតបតាមការទាមទាររបស់សហរដ្ឋអាមេរិក មន្ត្រីសេដ្ឋកិច្ចជាន់ខ្ពស់ម្នាក់នៅគុយបាបានប្រកាសកាលពីថ្ងៃទី១៦មីនាថា ជនជាតិគុយបាដែលរស់នៅក្រៅប្រទេស នឹងអាចវិនិយោគ និងមានសិទ្ធិកាន់កាប់អាជីវកម្មនៅទីនោះបានហើយ។
លោក Oscar Perez-Oliva ដែលជារដ្ឋមន្ត្រីក្រសួងពាណិជ្ជកម្មក្រៅប្រទេស និងជាឧបនាយករដ្ឋមន្ត្រីផងនោះ បានប្រាប់ NBC News ថា៖ «គុយបាបើកចំហរក្នុងការមានទំនាក់ទំនងពាណិជ្ជកម្មដ៏រលូនជាមួយក្រុមហ៊ុនអាមេរិក» និង «ជាមួយជនជាតិគុយបាដែលរស់នៅក្នុងសហរដ្ឋអាមេរិក រួមទាំងកូនចៅរបស់ពួកគេផងដែរ»។
កាសែត New York Times បានរាយការណ៍កាលពីថ្ងៃ១៦មីនា ដោយផ្អែកលើប្រភពមិនបញ្ចេញឈ្មោះថា មន្ត្រីរដ្ឋបាលលោក ត្រាំ បានផ្ដល់សញ្ញាទៅកាន់មន្ត្រីគុយបាថា សហរដ្ឋអាមេរិកចង់ឱ្យប្រធានាធិបតី Miguel Diaz-Canel ចុះចេញពីតំណែង៕
