តំណាងជនជាតិដើមភាគតិចព្នង ១៥៦គ្រួសារ រស់នៅក្នុ្ងងភូមិពូលុ និងភូមិពូទឺត ឃុំប៊ូស្រា ស្រុកពេជ្រាដា បានចួបប្រជុំគ្នាជាមួយអាជ្ញាធរខេត្តមណ្ឌលគិរី និងតំណាងក្រុមហ៊ុន អ៊ីសាន លីហួរ (Isan Li Hor Co., Ltd) ដែលជារបស់ឧកញ៉ា អ៊ឹង ស៊ីតានវីរៈ ហៅឧកញ៉ា លក្ខណ៍ នៅព្រឹកថ្ងៃទី១៨ ខែមីនា។
លទ្ធផលកិច្ចប្រជុំនោះ អ្នកភូមិទាមទារឱ្យអាជ្ញាធរប្រគល់ដី ឱ្យសហគមន៍ជនជាតិដើមភាគតិចព្នងមានទំហំជាង ៨រយហិកតា (៨.៦២០) ឋិតនៅចំណុចអូរខិតពុត និងអូររណាវ ក្នុងឃុំប៊ូស្រា ។
តំណាងសហគមន៍ឃុំប៊ូស្រា អ្នកស្រី កប់ លេត ប្រាប់វីអូឌីនៅថ្ងៃទី១៨ ខែមីនាថា អ្នកភូមិ ១៥៦ គ្រួសារ មានដីចម្ការចន្លោះកន្លះហិកតា រហូតជាង ៤ ហិកតា ដែលអាស្រ័យផលជាច្រើនឆ្នាំមកហើយដោយដាំដំណាំកាហ្វេ ផ្លែប័រ កៅស៊ូ និងស្រូវ ជាដើម ហើយប្រសិនបើអាជ្ញាធរយកដីដែលពួកគាត់កំពុងអាស្រ័យផលជូនក្រុមហ៊ុន អ្នកភូមិនឹងគ្មានដីអាស្រ័យផលចិញ្ចឹមជីវិតទៀតឡើយ។
អ្នកស្រី កប់ លេត និយាយថា៖ «ជំហររបស់សហគមន៍ទុកដីហ្នឹងឱ្យពួកខ្ញុំ ប្រើប្រាស់អាស្រ័យផលបន្តទៀត បើសិនជាឱ្យក្រុមហ៊ុនពួកខ្ញុំបានកន្លែងណាធ្វើអូន..។ ពួកខ្ញុំរស់រាល់ថ្ងៃដោយសារស្រែចម្ការ បើអត់ចម្ការពួកខ្ញុំមានអីប្រើប្រាស់ទៀត។ ឱ្យដីទៅគេ ពួកខ្ញុំស៊ីឈ្នួលគេអត់មានកម្លាំងទេ»។
កាលពីថ្ងៃទី១៧ ខែមីនា ជនជាតិដើមភាគតិចជិត ១០០នាក់ បានលើកគ្នាឃាត់គ្រឿងចក្ររបស់ក្រុមហ៊ុន អ៊ីសាន លីហួរ (Isan Li Hor Co., Ltd) របស់ឧកញ៉ា លក្ខណ៍ គ្រោងនឹងឈូសឆាយដីស្រែចម្ការរបស់ពួកគាត់។ មកទល់ពេលនេះ ក្រុមហ៊ុនបានផ្អាកសកម្មភាពឈូសឆាយ ដោយសារពលរដ្ឋជាច្រើននាក់លើកគ្នាតវ៉ារារាំង និងព្រមានដុតគ្រឿងចក្រចោល ប្រសិនបើក្រុមហ៊ុនមិនផ្អាក ។
អភិបាលរងខេត្តមណ្ឌលគិរី លោក លន់ សុភាព បានថ្លែងក្នុងកិច្ចប្រជុំជាមួយតំណាងសហគមន៍ថា អាជ្ញាធរនឹងចុះពិនិត្យផលប៉ះពាល់ជាក់ស្តែងនៅពេលឆាប់ៗនេះ ប្រសិនបើមានដំណាំរបស់ពលរដ្ឋ មន្ត្រីនឹងសិក្សាកាត់ឆ្វៀលចេញ ក៏ប៉ុន្តែប្រសិនបើតំបន់នោះ ជាដីព្រៃអាជ្ញាធរនឹងប្រគល់ដីជូនក្រុមហ៊ុនវិនិយោគ ស្របតាមសេចក្ដីសម្រេចរបស់រដ្ឋាភិបាល ដែលវិនិយោគឱ្យក្រុមហ៊ុនជាង ១ពាន់ហិកតា (១.១១៧) កាលពីពេលកន្លងទៅ។
មេភូមិពូទឺត ឃុំប៊ូស្រា ឈ្មោះ ស្រេង អៀត ប្រាប់វីអូឌីថា ពលរដ្ឋចំនួន ១៥៦ គ្រួសារ បានដាំដុះដំណាំកសិកម្មរួមមាន កៅស៊ូ ម្រេច ដំឡូង និងចេក ជាច្រើនឆ្នាំមកហើយ ដើម្បីចិញ្ចឹមជីវិត។ ហេតុនេះថ្នាក់លើគួរតែឆ្វៀលតំបន់នោះជូនពលរដ្ឋអាស្រ័យផល ដើម្បីកាត់បន្ថយភាពក្រីក្រ។
លោកបញ្ជាក់ថា ប្រសិនបើពលរដ្ឋមានដីដាំដុះចិញ្ចឹមជីវិត នឹងជួយលើកកម្ពស់ជីវភាពសហគមន៍។
លោក ស្រេង អៀត និយាយថា៖ «ឆ្វៀលឱ្យពួកគាត់វិញ កុំឱ្យគាត់ពិបាកចិត្តធ្វើអាស្រ័យផលអ៊ីចឹង។ បើគាត់ធ្វើយូរឆ្នាំហើយ ជាង ១០ ឆ្នាំហើយ។ អភិបាលខេត្តបាននិយាយដែរ ម៉េច ម៉ាឆ្វៀលរបស់គាត់ត្រង់ណាៗ បោះព្រំទុកឱ្យហើយ»។
វីអូឌីមិនទាន់អាចទាក់ទងឧកញ៉ា អ៊ឹង ស៊ីតានវីរៈ ហៅឧកញ៉ា លក្ខណ៍ ម្ចាស់ក្រុមហ៊ុន អ៊ីសាន លីហួរ (Isan Li Hor Co., Ltd) បាននៅឡើយទេ គិតត្រឹមម៉ោងផ្សាយនេះ។
ជុំវិញរឿងនេះ មន្ត្រីសម្របសម្រួលសមាគមការពារសិទ្ធិមនុស្សអាដហុកខេត្តមណ្ឌលគិរី លោក រ័ត្ន ថាវី យល់ថា ការឈូសឆាយ និងហ៊ុមព័ទ្ធយកដីដែលសហគមន៍អាស្រ័យផលជារឿងខុសច្បាប់ ហើយអាជ្ញាធរត្រូវរកដំណោះស្រាយជូនពលរដ្ឋ ដោយត្រូវប្រគល់ដីជូនសហគមន៍ប្រើប្រាស់វិញ។
លោក រ័ត្ន ថាវី និយាយថា៖ «អាជ្ញាធរត្រូវដុតជើងដុតដៃ ដើម្បីដោះស្រាយជូនពលរដ្ឋឱ្យបាន ធ្វើម៉េចទប់ស្កាត់កុំឱ្យក្រុមហ៊ុនឈូស ហើយយកដីទាំងអស់ហ្នឹងប្រគល់ឱ្យពលរដ្ឋវិញ»។
តាមការស្រាវជ្រាវរបស់វីអូឌី (VOD)ក្រុមហ៊ុន អ៊ីសាន លីហួរ (Isan Li Hor Co., Ltd) របស់អ្នកឧកញ៉ា អ៉ឹង ស៊ីតាតវិរៈ ហៅឧកញ៉ា លក្ខណ៍ មិនទាន់ឃើញមានទិន្នន័យលម្អិតផ្សព្វផ្សាយជាសាធារណៈ បំពេញលក្ខណៈសម្បត្តិគ្រប់គ្រាន់ បង្ហាញពីទំហំដីវិនិយោគជាក់លាក់ជាផ្លូវការនៅក្នុងបញ្ជីគម្រោងវិនិយោគ របស់ក្រុមប្រឹក្សាអភិវឌ្ឍន៍កម្ពុជា(CDC)នៅឡើយទេ។
តែយ៉ាងណា សហគមន៍ថា ក្រុមហ៊ុននេះវិនិយោគវិស័យអភិវឌ្ឍន៍អចលនទ្រព្យ និងកសិឧស្សាហកម្ម ក្នុងតំបន់ភូមិភាគឦសាន្ត ជាពិសេសក្នុងខេត្តមណ្ឌលគិរី៕
