ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃទី១៧ខែមីនា បានមានប្រសាសន៍ថា សហរដ្ឋអាមេរិកទទួលបានការជូនដំណឹងពីសម្ព័ន្ធមិត្តអង្គការណាតូ (NATO) ភាគច្រើនថា ពួកគេមិនចង់ចូលពាក់ព័ន្ធក្នុងប្រតិបត្តិការយោធារបស់ប្រទេសនេះនៅក្នុងប្រទេសអ៊ីរ៉ង់នោះទេ ដែលជាទង្វើមួយលោកបានពណ៌នាថាជា “កំហុសដ៏ឆោតល្ងង់បំផុត”។
ប៉ុន្តែលោក ត្រាំ មិនបានផ្តល់សញ្ញាណាមួយថា លោកមានគម្រោងដាក់ទណ្ឌកម្មលើសម្ព័ន្ធមិត្តណាតូចំពោះជំហររបស់ពួកគេនោះទេ ខណៈដែលលោកបានឆ្លើយសំណួររបស់អ្នកយកព័ត៌មាន នៅក្នុងការិយាល័យ Oval Office ក្នុងអំឡុងពេលដំណើរទស្សនកិច្ចនៃទិវា St. Patrick របស់នាយករដ្ឋមន្ត្រីអៀរឡង់ លោក Micheal Martin។
លោក ត្រាំ បាននិយាយថា បណ្តាប្រទេសណាតូបានគាំទ្រសង្គ្រាមរួមគ្នារវាងសហរដ្ឋអាមេរិក និងអ៊ីស្រាអែល ដែលឥឡូវនេះបានឈានចូលដល់សប្តាហ៍ទីបីហើយ បើទោះបីជាពួកគេមិនចង់ចូលរួមពាក់ព័ន្ធក៏ដោយ។
លោក ត្រាំ បានមានប្រសាសន៍ថា៖ «ខ្ញុំគិតថា ណាតូកំពុងប្រព្រឹត្តកំហុសដ៏ឆោតល្ងង់បំផុត។ មនុស្សគ្រប់គ្នាឯកភាពជាមួយយើង ប៉ុន្តែពួកគេមិនចង់ជួយទេ។ ហើយយើងដូចដែលអ្នកដឹងស្រាប់ហើយ ក្នុងនាមជាសហរដ្ឋអាមេរិក យើងត្រូវតែចងចាំរឿងនោះ ពីព្រោះយើងគិតថាវាជារឿងដែលគួរឱ្យភ្ញាក់ផ្អើលបំផុត»។
ចំពោះសំណួរដែលថា តើលោកនឹងសងសឹកសម្ព័ន្ធមិត្តណាតូចំពោះការដកថយនេះដែរឬទេ លោក ត្រាំ បានឆ្លើយថា លោក “មិនទាន់មានអ្វីនៅក្នុងចិត្តនៅឡើយទេ”។
កន្លងមក ប្រធានាធិបតីរូបនេះ ធ្លាប់បានគំរាមដកសហរដ្ឋអាមេរិកចេញពីអង្គការណាតូ ប៉ុន្តែលោកមិនបានលើកឡើងពីរឿងនេះទេ កាលពីថ្ងៃទី១៧ខែមីនា។
លោក ត្រាំ បានអំពាវនាវឱ្យបណ្តាប្រទេសនានាជួយយាមល្បាតនៅច្រកសមុទ្រ Hormuz ដែលជាកន្លែងដឹកជញ្ជូនប្រេង ២០% របស់ពិភពលោក បន្ទាប់ពីអ៊ីរ៉ង់បានឆ្លើយតបទៅនឹងការវាយប្រហាររបស់សហរដ្ឋអាមេរិក និងអ៊ីស្រាអែល ដោយប្រើប្រាស់ដ្រូន មីស៊ីល និងមីន ដើម្បីបិទច្រកសម្រាប់នាវាដឹកប្រេងយ៉ាងមានប្រសិទ្ធភាព។
ប៉ុន្តែសម្ព័ន្ធមិត្តរបស់សហរដ្ឋអាមេរិកមួយចំនួនបាននិយាយកាលពីថ្ងៃទី១៦ខែមីនាថា ពួកគេមិនមានគម្រោងភ្លាមៗក្នុងការបញ្ជូននាវាទៅជួយបើកច្រកសមុទ្រឡើងវិញនោះទេ ដែលនេះគឺជាការបដិសេធយ៉ាងដាច់អហង្ការចំពោះការអំពាវនាវសុំការគាំទ្រផ្នែកយោធារបស់លោក ត្រាំ។
កាលពីព្រឹកថ្ងៃទី១៦ខែមីនា លោក ត្រាំ បានសរសេរនៅលើបណ្តាញសង្គម Truth Social ថា៖ «ដោយសារតែការពិតដែលថាយើងទទួលបានជោគជ័យផ្នែកយោធាយ៉ាងខ្លាំង យើងមិន ‘ត្រូវការ’ ឬប្រាថ្នាចង់បានជំនួយពីបណ្តាប្រទេសណាតូទៀតទេ យើងមិនដែលត្រូវការឡើយ!»។ លោកក៏បានបញ្ជាក់ចំៗឈ្មោះប្រទេសជប៉ុន អូស្ត្រាលី និងកូរ៉េខាងត្បូងផងដែរ៕
