កាតាបានថ្លែងកាលពីថ្ងៃទី១៨ខែមីនាថា មីស៊ីលរបស់អ៊ីរ៉ង់បានបង្កឱ្យមាន «ការខូចខាតយ៉ាងធ្ងន់ធ្ងរ» នៅទីក្រុងឧស្សាហកម្ម Ras Laffan ដែលជាទីតាំងនៃរោងចក្រនាំចេញឧស្ម័នធម្មជាតិរាវ (LNG) ដ៏ធំបំផុតនៅក្នុងពិភពលោក។
ក្រសួងការបរទេសកាតាបានថ្កោលទោសការវាយប្រហារនេះថាជា «ការបង្កើនជម្លោះដ៏គ្រោះថ្នាក់ ការរំលោភបំពានយ៉ាងធ្ងន់ធ្ងរលើអធិបតេយ្យភាពរដ្ឋ និងជាការគំរាមកំហែងដោយផ្ទាល់ដល់សន្តិសុខជាតិរបស់ខ្លួន ក៏ដូចជាស្ថិរភាពក្នុងតំបន់»។
នៅក្នុងសេចក្តីថ្លែងការណ៍មួយ ក្រសួងការបរទេសបានបញ្ជាក់ថា កាតារក្សាសិទ្ធិក្នុងការឆ្លើយតបស្របតាមសិទ្ធិការពារខ្លួន ដែលត្រូវបានធានាក្រោមច្បាប់អន្តរជាតិ។
តម្លៃប្រេងឆៅប្រភេទ Brent ដែលជាសន្ទស្សន៍តម្លៃអន្តរជាតិ បានហក់ឡើងខ្ពស់ជាង ៧% រហូតដល់ ១១១,២៣ ដុល្លារ ត្រឹមម៉ោង ៤:៥២ នាទីល្ងាច (ម៉ោងនៅតំបន់ភាគខាងកើតសហរដ្ឋអាមេរិក) ថ្ងៃទី១៨ខែមីនា។ រីឯតម្លៃប្រេងឆៅ West Texas Intermediate របស់សហរដ្ឋអាមេរិក បានកើនឡើងប្រហែល ៤% ក្នុងតម្លៃ ១០០,០៤ ដុល្លារ។
ឆ្មាំបដិវត្តន៍របស់អ៊ីរ៉ង់បានគំរាមកំហែងវាយប្រហារលើមូលដ្ឋានថាមពលនានាក្នុងប្រទេសកាតា អារ៉ាប៊ីសាអូឌីត និងអេមីរ៉ាតអារ៉ាប់រួម បន្ទាប់ពីអ៊ីស្រាអែលបានទម្លាក់គ្រាប់បែកលើរោងចក្រកែច្នៃឧស្ម័នធម្មជាតិមួយនៅក្នុងប្រទេសអ៊ីរ៉ង់។
យោងតាមការបង្ហោះលើបណ្តាញសង្គមពីក្រុមហ៊ុនរដ្ឋ QatarEnergy ក្រុមការងារសង្គ្រោះបន្ទាន់ត្រូវបានដាក់ពង្រាយដើម្បីគ្រប់គ្រងអគ្គិភ័យនៅ Ras Laffan។ មិនមានសេចក្តីរាយការណ៍អំពីអ្នករងគ្រោះថ្នាក់ឡើយ។ ក្រោយមក ក្រសួងមហាផ្ទៃកាតា បានឱ្យដឹងថា អគ្គិភ័យនៅទីតាំងនោះត្រូវបានគ្រប់គ្រងបានជាជំហានដំបូងហើយ។
កាតាបានផ្អាកផលិតកម្ម LNG កាលពីថ្ងៃទី២ ខែមីនា ដោយសារការវាយប្រហារដោយដ្រូនរបស់អ៊ីរ៉ង់នៅ Ras Laffan និងទីក្រុងឧស្សាហកម្ម Mesaieed។ ប្រទេសនៅតំបន់ឈូងសមុទ្រមួយនេះ គឺជាអ្នកនាំចេញ LNG ធំបំផុតទីពីរនៅលើពិភពលោក បន្ទាប់ពីសហរដ្ឋអាមេរិក។ យោងតាមទិន្នន័យពីក្រុមហ៊ុនប្រឹក្សាយោបល់ផ្នែកថាមពល Kpler កាតាគ្របដណ្តប់ជិត ២០% នៃការនាំចេញ LNG សកល។
ការកើនឡើងនៃការវាយប្រហារលើហេដ្ឋារចនាសម្ព័ន្ធប្រេង និងឧស្ម័ននៅមជ្ឈិមបូព៌ា កំពុងគំរាមកំហែងដល់ការបង្កើនការរំខានការផ្គត់ផ្គង់ថាមពលយ៉ាងធ្ងន់ធ្ងរ ដែលបង្កឡើងដោយសង្រ្គាមអ៊ីរ៉ង់។
ចរាចរណ៍នាវាដឹកប្រេងតាមច្រកសមុទ្រ Hormuz បានធ្លាក់ចុះយ៉ាងខ្លាំង ដោយសារការវាយប្រហាររបស់អ៊ីរ៉ង់លើនាវាពាណិជ្ជកម្ម។ ច្រកសមុទ្រនេះ គឺជាចំណុចយុទ្ធសាស្ត្រពាណិជ្ជកម្មប្រេងដ៏សំខាន់បំផុត ដែលមានការផ្គត់ផ្គង់ប្រហែល ២០% នៃពិភពលោកឆ្លងកាត់មុនពេលសង្រ្គាមផ្ទុះឡើង។
អ្នកវិភាគមកពី Citigroup បានប្រាប់អតិថិជននៅក្នុងរបាយការណ៍មួយកាលពីថ្ងៃទី១៨មីនាថា តម្លៃប្រេង Brent អាចនឹងឡើងដល់មធ្យមភាគ ១៣០ ដុល្លារក្នុងត្រីមាសទី ២ និងទី ៣ ប្រសិនបើមានការវាយប្រហារទ្រង់ទ្រាយធំលើហេដ្ឋារចនាសម្ព័ន្ធថាមពល ហើយច្រកសមុទ្រនេះនៅតែបន្តបិទទ្វារក្នុងរយៈពេលយូរ៕
