អ៊ីរ៉ង់ បានព្រមានថា ខ្លួននឹងវាយប្រហារលើហេដ្ឋារចនាសម្ព័ន្ធថាមពល និងទឹកនៅទូទាំងតំបន់ឈូងសមុទ្រ ប្រសិនបើប្រធានាធិបតីសហរដ្ឋអាមេរិក លោក Donald Trump អនុវត្តតាមការគំរាមកំហែងរបស់លោក ក្នុងការវាយប្រហារលើបណ្តាញអគ្គិសនីរបស់ខ្លួន ដែលបង្កឱ្យមានការភ័យខ្លាចចំពោះការរំខានទ្រង់ទ្រាយធំនៅក្នុងតំបន់ ដែលពឹងផ្អែកខ្លាំងលើការបន្សុទ្ធទឹកសមុទ្រសម្រាប់ប្រើប្រាស់ជាទឹកពិសារ។
លោក Trump បានកំណត់ឱសានវាទនៅត្រឹមម៉ោងប្រហែល ៧:៤៥នាទីយប់ ម៉ោងនៅភាគខាងកើតសហរដ្ឋអាមេរិកនាថ្ងៃទី២៣ខែមីនា ដោយបានព្រមានកាលពីយប់ថ្ងៃទី២១ខែមីនាថា សហរដ្ឋអាមេរិកនឹងវាយប្រហាររោងចក្រអគ្គិសនីរបស់អ៊ីរ៉ង់ លុះត្រាតែទីក្រុងតេអេរ៉ង់បើកច្រកសមុទ្រ Hormuz ឡើងវិញទាំងស្រុងក្នុងរយៈពេល ៤៨ ម៉ោង។
លទ្ធភាពនៃការវាយប្រហារសងសឹកគ្នាទៅវិញទៅមកលើហេដ្ឋារចនាសម្ព័ន្ធស៊ីវិល បានធ្វើឱ្យទីផ្សារប្រេងកាន់តែមានភាពមិនប្រាកដប្រជា ដោយតម្លៃប្រេងបានចាប់ផ្តើមមានការប្រែប្រួលខ្លាំងនៅក្នុងការជួញដូរដំបូងនៅតំបន់អាស៊ី។
បន្ទាប់ពីការទម្លាក់គ្រាប់បែកយ៉ាងខ្លាំងក្លាអស់រយៈពេលជាងបីសប្តាហ៍ ពីសំណាក់សហរដ្ឋអាមេរិក និងអ៊ីស្រាអែល ដែលមន្ត្រីនានាលើកឡើងថា បានកាត់បន្ថយសមត្ថភាពមីស៊ីលរបស់អ៊ីរ៉ង់យ៉ាងខ្លាំងនោះ ទីក្រុងតេអេរ៉ង់ នៅតែបន្តបង្ហាញពីសមត្ថភាពរបស់ខ្លួនក្នុងការវាយបកវិញ។ សំឡេងស៊ីរ៉ែនប្រកាសអាសន្នការវាយប្រហារតាមអាកាស បានបន្លឺឡើងនៅពាសពេញផ្នែកខ្លះនៃភាគខាងជើង និងកណ្តាលនៃប្រទេសអ៊ីស្រាអែល រួមទាំងទីក្រុងទែលអាវីវ (Tel Aviv) និងតំបន់វេសប៊ែង (West Bank) ដែលកំពុងស្ថិតក្រោមការកាន់កាប់ កាលពីយប់ថ្ងៃ២២មីនា ដើម្បីព្រមានពីមីស៊ីលដែលបាញ់មកពីប្រទេសអ៊ីរ៉ង់។
ប៉ុន្មានម៉ោងមុននេះ យោធាអ៊ីស្រាអែលបានបញ្ជាក់ថា ខ្លួនបានបញ្ចប់រលកនៃការវាយប្រហារលើទីក្រុងតេអេរ៉ង់ ដែលមានគោលដៅលើមូលដ្ឋានទ័ព ក៏ដូចជាទីតាំងផលិត និងស្តុកទុកអាវុធផងដែរ។
ទីភ្នាក់ងារសារព័ត៌មានពាក់កណ្តាលផ្លូវការ Mehr បានរាយការណ៍នៅព្រឹកថ្ងៃទី២៣ខែមីនានេះថា យ៉ាងហោចណាស់មានមនុស្សម្នាក់បានស្លាប់ នៅក្នុងការវាយប្រហារតាមអាកាសលើស្ថានីយ៍វិទ្យុមួយនៅក្នុងកំពង់ផែ Bandar Abbas នៃឈូងសមុទ្រអ៊ីរ៉ង់ ហើយប្រព័ន្ធការពារអាកាសត្រូវបានដំណើរការនៅភាគខាងកើតទីក្រុងតេអេរ៉ង់។
ការព្រមានរបស់លោក Trump បានកើតឡើងមិនដល់មួយថ្ងៃផង បន្ទាប់ពីលោកបានបង្ហាញសញ្ញាថា សហរដ្ឋអាមេរិក អាចនឹងពិចារណាកាត់បន្ថយជម្លោះ បើទោះបីជាកងម៉ារីន និងនាវាដឹកជញ្ជូនធុនធ្ងន់របស់សហរដ្ឋអាមេរិកកំពុងធ្វើដំណើរទៅកាន់តំបន់នោះក៏ដោយ។
យោងតាមប្រព័ន្ធផ្សព្វផ្សាយរដ្ឋ អ្នកនាំពាក្យយោធាអ៊ីរ៉ង់ លោក Ebrahim Zolfaqari បានថ្លែងថា៖ «ប្រសិនបើហេដ្ឋារចនាសម្ព័ន្ធប្រេងឥន្ធនៈ និងថាមពលរបស់អ៊ីរ៉ង់ ត្រូវបានវាយប្រហារដោយសត្រូវ នោះរាល់ហេដ្ឋារចនាសម្ព័ន្ធថាមពល ក៏ដូចជាបច្ចេកវិទ្យាព័ត៌មាន… និងទីតាំងបន្សុទ្ធទឹកសមុទ្ររបស់សហរដ្ឋអាមេរិក និងរបស់ប្រទេសនៅក្នុងតំបន់ នឹងក្លាយជាគោលដៅវាយប្រហារស្របតាមការព្រមានពីមុនៗ»។
ប៉ុន្តែខណៈដែលការវាយប្រហារលើប្រព័ន្ធអគ្គិសនីអាចប៉ះពាល់ដល់អ៊ីរ៉ង់ វាក៏អាចបង្កជាមហន្តរាយដល់ប្រទេសជិតខាងក្នុងតំបន់ឈូងសមុទ្រ ដែលប្រើប្រាស់ថាមពលក្នុងម្នាក់ៗច្រើនជាងអ៊ីរ៉ង់ប្រហែលប្រាំដង។ អគ្គិសនីគឺជាអ្វីដែលធ្វើឱ្យទីក្រុងដ៏ទំនើបៗ នៅកណ្តាលវាលខ្សាច់របស់ពួកគេអាចរស់នៅបាន ដោយផ្នែកខ្លះគឺតាមរយៈការផ្តល់ថាមពលដល់រោងចក្របន្សុទ្ធទឹកសមុទ្រ ដែលផលិតទឹកសម្រាប់ប្រើប្រាស់ ១០០% នៅក្នុងប្រទេសបារ៉ែន និងកាតា។ រោងចក្រទាំងនោះ ប្រើប្រាស់ទឹកសមុទ្រដើម្បីផ្គត់ផ្គង់តម្រូវការទឹកពិសាលើសពី ៨០% នៅក្នុងប្រទេសអារ៉ាប់រួម និង ៥០% នៃការផ្គត់ផ្គង់ទឹកនៅក្នុងប្រទេសអារ៉ាប៊ីសាអូឌីត។
ប្រធានសភាអ៊ីរ៉ង់ លោក Mohammad Baqer Qalibaf បានសង្កត់ធ្ងន់បន្ថែមដោយសរសេរលើបណ្តាញសង្គម X ថា ហេដ្ឋារចនាសម្ព័ន្ធសំខាន់ៗ និងទីតាំងថាមពលនៅក្នុងមជ្ឈិមបូព៌ា អាចនឹងត្រូវ “បំផ្លាញចោលទាំងស្រុងដោយមិនអាចស្តារឡើងវិញបាន” ប្រសិនបើរោងចក្រអគ្គិសនីរបស់អ៊ីរ៉ង់ត្រូវបានវាយប្រហារ៕
