គណៈប្រតិភូអ៊ុយក្រែន និងសហរដ្ឋអាមេរិក បានបញ្ចប់កិច្ចពិភាក្សាថ្ងៃទីពីរនៅក្នុងរដ្ឋផ្លរីដា ស្តីពីការស្វែងរកមធ្យោបាយបញ្ចប់សង្គ្រាមរយៈពេលបួនឆ្នាំជាមួយរុស្ស៊ី។ នេះបើយោងតាមប្រសាសន៍របស់ប្រធានាធិបតី Volodymyr Zelenskiy កាលពីថ្ងៃទី២២ខែមីនា។
តំណាងភាគីរុស្ស៊ី មិនមានវត្តមាននៅក្នុងកិច្ចពិភាក្សា ដែលបានចាប់ផ្តើមនៅក្នុងរដ្ឋផ្លរីដា កាលពីថ្ងៃទី២១ខែមីនានោះទេ។ កាលពីដើមឡើយ ពួកគេត្រូវបានរំពឹងថានឹងចូលរួមក្នុងកិច្ចចរចា ដែលគ្រោងនឹងប្រព្រឹត្តទៅនៅក្នុងទីក្រុងអាប៊ូដាប៊ី (Abu Dhabi)។
លោក Zelenskiy បានមានប្រសាសន៍នៅក្នុងសន្ទរកថានាពេលល្ងាចថ្ងៃទី២២ខែមីនាថា៖«វាច្បាស់ណាស់ថាការយកចិត្តទុកដាក់របស់ភាគីសហរដ្ឋអាមេរិកនាពេលបច្ចុប្បន្ន គឺផ្តោតជាចម្បងលើស្ថានភាពជុំវិញប្រទេសអ៊ីរ៉ង់ និងតំបន់ទាំងមូល ប៉ុន្តែសង្គ្រាមរបស់រុស្ស៊ីប្រឆាំងនឹងអ៊ុយក្រែន ក៏ត្រូវតែឈានដល់ទីបញ្ចប់ផងដែរ»។
លោកបានបន្ថែមថា៖ «មានសញ្ញាបង្ហាញថា ការដោះដូរ (អ្នកទោសសង្គ្រាម) បន្ថែមទៀត អាចនឹងកើតឡើង ដែលពិតជាព័ត៌មានដ៏ល្អ និងជាការបញ្ជាក់ថាវិស័យការទូតកំពុងមានប្រសិទ្ធភាព។ យើងសង្ឃឹមថា រឿងនេះនឹងលេចចេញជារូបរាងឡើង»។
លោក Zelenskiy មិនបានបញ្ជាក់ថា តើកិច្ចពិភាក្សានឹងបន្តទៀតឬយ៉ាងណា ពេលណា ឬកន្លែងណាដែលពួកគេអាចនឹងជួបគ្នា ឬក្នុងទម្រង់បែបណានោះទេ។
កាលពីព្រឹកថ្ងៃទី២២ខែមីនា លោកបានជំរុញឱ្យបណ្តាសម្ព័ន្ធមិត្តបន្តរក្សាសម្ពាធទណ្ឌកម្មលើរុស្ស៊ី និងបានអំពាវនាវឱ្យមានចំណាត់ការតឹងរ៉ឹងជាងមុន ប្រឆាំងនឹងអ្វីដែលគេហៅថា ក្រុមនាវាដឹកប្រេងស្រមោលរបស់រុស្ស៊ី ដែលត្រូវបានប្រើប្រាស់ដើម្បីគេចពីទណ្ឌកម្ម និងដើម្បីរារាំងទីក្រុងមូស្គូមិនឱ្យទទួលបានចំណូលពីប្រេង។
លោកបានបន្ថែមថា៖ «ក្រុមនាវាស្រមោលរបស់រុស្ស៊ីមិនត្រូវមានអារម្មណ៍ថា មានសុវត្ថិភាពនៅក្នុងដែនទឹកអឺរ៉ុប ឬកន្លែងណាផ្សេងទៀតឡើយ។ នាវាដឹកប្រេងដែលបម្រើឱ្យកញ្ចប់ថវិកាសង្គ្រាម អាចនឹងត្រូវតែបញ្ឈប់ និងរារាំង មិនមែនគ្រាន់តែបណ្តោយឱ្យទៅនោះទេ»។
ទីក្រុងវ៉ាស៊ីនតោន បានដកទណ្ឌកម្មមួយចំនួនលើប្រេងរុស្ស៊ីជាបណ្តោះអាសន្ន ដើម្បីជួយដោះស្រាយបញ្ហាកង្វះការផ្គត់ផ្គង់ដែលបង្កឡើងដោយសង្គ្រាមនៅអ៊ីរ៉ង់។ ចំណែកឯបណ្តាប្រទេសនៅអឺរ៉ុបមិនទាន់បានធ្វើដូច្នេះនៅឡើយទេ។
ផែនការសន្តិភាពមួយដែលកំពុងត្រូវបានជំរុញដោយសហរដ្ឋអាមេរិក នឹងតម្រូវឱ្យមានការបោះឆ្នោតប្រធានាធិបតីនៅក្នុងប្រទេសអ៊ុយក្រែន រួមជាមួយការធ្វើសម្បទានទឹកដីផងដែរ។ លោក Zelenskiy ដែលអាណត្តិរបស់លោកបានផុតកំណត់ទៅហើយនោះ កំពុងស្ថិតក្រោមសម្ពាធជាថ្មីពីលោក Trump ឱ្យរៀបចំការបោះឆ្នោត ខណៈដែលទីក្រុងវ៉ាស៊ីនតោនកំពុងរុញច្រានទីក្រុងគីវ (Kyiv) ឆ្ពោះទៅរកកិច្ចព្រមព្រៀងសន្តិភាព។
ច្បាប់របស់អ៊ុយក្រែនហាមឃាត់ការបោះឆ្នោតក្នុងអំឡុងពេលសង្គ្រាម ប៉ុន្តែលោក Zelenskiy មានប្រសាសន៍ថា អ៊ុយក្រែននឹងត្រៀមខ្លួនរួចជាស្រេចក្នុងការរៀបចំការបោះឆ្នោតតាមបែបប្រជាធិបតេយ្យ ប្រសិនបើសហរដ្ឋអាមេរិកធានាបាននូវបទឈប់បាញ់រយៈពេលពីរខែ ដើម្បីទុកពេលរៀបចំហេដ្ឋារចនាសម្ព័ន្ធ និងដាក់ចេញនូវការធានាសន្តិសុខ។
អតីតអគ្គមេបញ្ជាការកងទ័ពអ៊ុយក្រែន លោក Valeriy Zaluzhnyi ដែលបច្ចុប្បន្នជាឯកអគ្គរដ្ឋទូតប្រចាំចក្រភពអង់គ្លេស និងត្រូវបានគេមើលឃើញថាជាបេក្ខជនប្រធានាធិបតីដ៏មានសក្តានុពលម្នាក់ បានលើកឡើងថា អ៊ុយក្រែនមិនត្រូវការការផ្អាកការប្រយុទ្ធគ្នាដើម្បីបោះឆ្នោតនោះទេ។
លោកបានសរសេរនៅក្នុងអត្ថបទមួយដែលចេញផ្សាយកាលពីថ្ងៃទី២២ខែមីនា ដោយសារព័ត៌មានអ៊ុយក្រែន NV ថា៖ «អ្វីដែលអ៊ុយក្រែនត្រូវការ មិនមែនជាពេលវេលាដើម្បីរៀបចំការបោះឆ្នោតនោះទេ ប៉ុន្តែគឺជាសន្តិភាពដែលទទួលបានតាមរយៈសង្គ្រាម ដែលនឹងធានានូវអនាគតសម្រាប់កូនចៅរបស់យើង»៕
