មន្ត្រីជំនាញ ទម្លាយឱ្យដឹងថា ជនសង្ស័យ២០នាក់ថ្មីទៀតត្រូវបានចាប់ខ្លួន កាលពីថ្ងៃចន្ទ នៅភូមិគ្រឹះមួយកន្លែងស្ថិតក្នុងសង្កាត់លេខ៤ ក្រុងព្រះសីហនុ ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា ខណៈរដ្ឋាភិបាលបង្ហាញការតាំងចិត្តថា នឹងបោសសម្អាតបទឧក្រិដ្ឋនេះឱ្យអស់ត្រឹមខែមេសាខាងមុខ។
គេហទំព័ររបស់រដ្ឋបាលខេត្តព្រះសីហនុ បានឱ្យដឹងថា វិធានការចុះបង្ក្រាបករណី Scam Online នេះធ្វើឡើងនៅរសៀលថ្ងៃទី២៣ ខែមីនា ឆ្នាំ២០២៦។ វិធាននេះ ឃាត់ខ្លួនជនបរទេសបានចំនួន២០នាក់ ក្នុងនោះខ្មែរចំនួន៣នាក់ កុំព្យូទ័រ ២៤ គ្រឿង និងទូរស័ព្ទចំនួន ៣៨៩គ្រឿង។ បច្ចុប្បន្នជនបរទេស និងវត្ថុតាង ត្រូវបានសមត្ថកិច្ចបញ្ជូនទៅស្នងការដ្ឋានដើម្បីបន្តនីតិវិធី។
បើតាមរដ្ឋបាលខេត្ត ប្រតិបត្តិការនេះ ជាការគ្រប់គ្រងជនបរទេសដែលស្នាក់នៅខុសច្បាប់ ស្របទៅនឹងការអនុវត្តខ្លឹមសារអនុក្រឹត្យលេខ០៣ របស់រាជរដ្ឋាភិបាល។ ហើយនេះ «ក៏ជាសារមួយយ៉ាងច្បាស់ដល់ក្រុមជនល្មើសថា សមត្ថកិច្ចកម្ពុជាមិនអត់ឱនចំពោះសកម្មភាពខុសច្បាប់ទាំងនេះឡើយ»។
ក្រសួងមហាផ្ទៃ ធ្លាប់អះអាងថា រដ្ឋាភិបាលនឹងបោសសម្អាតឧក្រិដ្ឋកម្មអនឡាញនេះ ឱ្យអស់ត្រឹមខែមេសាដែលនៅសល់ជាង១ខែទៀតនេះ។
ការបង្ហាញការតាំងចិត្តរបស់រដ្ឋាភិបាល លោក ហ៊ុន ម៉ាណែត នេះ ក្រោយពីអន្តរជាតិរកឃើញថា មេដឹកនាំកម្ពុជា ជាអ្នកការពារបណ្តាញឧក្រិដ្ឋកម្មឆ្លងដែន គំរាមកំហែងដល់សន្តិសុខដល់ពិភពលោក និងតំបន់។
យ៉ាងណា មេឧក្រិដ្ឋជនមួយចំនួន ដែលសហគមន៍អន្តរជាតិចង្អុលមុខចំៗ ពាក់ព័ន្ធនឹងបទឧក្រិដ្ឋលាងលុយកខ្វក់ និងស្គែមអនឡាញនេះ ដូចជា អ្នកឧកញ៉ា ហ៊ុន តូ ឧកញ៉ា លី យ៉ុងផាត់ និងលោក ទ្រី ភាព ជាដើម ដែលជាមនុស្សស្និទ្ធនឹងមេដឹកនាំ ពួកគេមិនទាន់ត្រូវបានចាប់ខ្លួននៅឡើយទេ គិតត្រឹមថ្ងៃទី២៤ ខែមីនានេះ បើទោះបីរដ្ឋាភិបាលអះអាងថា យុទ្ធនាការនេះ ត្រូវកាត់ផ្តាច់បណ្តាញមេខ្លោង និងបណ្តាញបញ្ជារបស់មេឧក្រិដ្ឋជនក៏ដោយ៕
