សាលាឧទ្ធរណ៍បាត់ដំបង នឹងបើកសវនាការលើសំណើរសុំនៅក្រៅឃុំរបស់អ្នកសារព័ត៌មាន លោក ហែម វណ្ណា នៅថ្ងៃទី២៦ ខែមីនាស្អែកនេះ ក្រោយអ្នកសារព័ត៌មានរូបនេះ ត្រូវបានតុលាការខេត្តបន្ទាយមានជ័យ បង្គាប់ឱ្យឃុំខ្លួនជាបណ្តោះអាសន្ន ក្រោមបទចោទ ញុះញង់ ក្រោយលោកបានរាយការណ៍ព័ត៌មានពីបញ្ហាការឆបោកតាមប្រព័ន្ធអនឡាញ (Online Scammer)។
សមាគមអាដហុក ឱ្យដឹងនៅលើទំព័រហ្វេសប៊ុករបស់ខ្លួនថា សាលាឧទ្ធរណ៍បាត់ដំបង នឹងបើកសវនាការជំនុំជំរះលើសំណុំរឿងសភាស៊ើបសួររបស់អ្នកកាសែតមកពីស្ថាប័ន HVNN ឈ្មោះ ហែម វណ្ណា នៅព្រឹកថ្ងៃទី២៦ ខែមីនាស្អែកនេះ។
លោក ហែម វណ្ណា ត្រូវបានលោក ស៊ឺង វុទ្ធី ចៅក្រមស៊ើបសួរសាលាដំបូងខេត្តបន្ទាយមានជ័យ ចេញដីកាសម្រេចមិនអនុញ្ញាតឲ្យនៅក្រៅឃុំ កាលពីថ្ងៃទី១៨ ខែកុម្ភៈ ឆ្នាំ២០២៦ បន្ទាប់ពីមេធាវីបានដាក់ពាក្យសុំឲ្យកូនក្តីរបស់ខ្លួន បាននៅក្រៅឃុំជាបណ្តោះអាសន្ន កាលពីថ្ងៃទី១១ ខែកុម្ភៈ ឆ្នាំ២០២៦។
លោក ហែម វណ្ណា មានតួនាទីជាចាងហ្វាងកាសែត HVNN ត្រូវបានតុលាកាសាលាដំបូងខេត្តបន្ទាយមានជ័យ សម្រេចឃុំបណ្តោះខ្លួនជាអាសន្ននៅពន្ធនាគារ កាលពីរសៀលថ្ងៃទី០៤ ខែកុម្ភៈ ឆ្នាំ២០២៦ ដោយជាប់ចោទពីបទ «ញុះញង់ឱ្យប្រព្រឹត្តបទឧក្រិដ្ឋ» និងបទ «ស្តាប់ឫថតពាក្យសម្ងាត់ឯកជន» បន្ទាប់ពីលោកចុះផ្សាយព័ត៌មានពាក់ព័ន្ធថា “ជនជាតិបរទេស ៤ ទៅ៥នាក់ រងនូវអំពើហិង្សាពីសំណាក់មនុស្សមួយក្រុមផ្សេងទៀត ដែលគេដឹងថា ជាអ្នកបម្រើការនៅក្នុងបរិវេណអាគារបិទខ្ទប់ ជាទីអាថ៍កំបាំង នៅខាងក្រោយបន្ទាយកងរាជអាវុធហត្ថ ក្រុងប៉ោយប៉ែត។ ករណីនេះ ត្រូវបានគេសង្ស័យថាអាចជាការបង្ខាំងមនុស្សខុសច្បាប់ បង្ខំឲ្យធ្វើការឆបោកតាមប្រព័ន្ធអនឡាញ (Online Scammer)” ។
កាលពីអំឡុងខែកុម្ភៈ ឆ្នាំ២០២៦ អ្នកសម្របសម្រួលសមាគមអាដហុកប្រចាំនៅខេត្តបន្ទាយមានជ័យ ធ្លាប់បានដាក់លិខិតស្នើទៅកាន់ប្រធានសាលាដំបូងខេត្តបន្ទាយមានជ័យ ឱ្យពិចារណា និងជួយអន្តរាគមន៍ដោះលែង លោក ហែម វណ្ណា ឱ្យមានសេរីភាពវិញ ដោយសារអ្នកសារព័ត៌មានរូបនេះ បានចូលរួមយ៉ាងសកម្មជាមួយរដ្ឋាភិបាល ក្នុងការកំចាត់អំពើឆបោកតាមអនឡាញចេញពីកម្ពុជា ស្របតាមប្រតិបត្តិការ XXL (ប្រតិបត្តិការបោសសម្អាត Online Scam ខ្នាតធំ) ខណៈការចុះផ្សាយព័ត៌មានរបស់គាត់ ស្របទៅតាមក្រមសីលធម៌ វិជ្ជាជីវៈ តែមានកំហុសបច្ចេកទេស ដោយសារតែយកសំដីរបស់គេមកដាក់ក្នុងការផ្សាយ ដោយមិនបានសុំការអនុញ្ញាត។
ចំណែក អង្គការសង្គមស៊ីវិលជាតិ និងអន្តរជាតិចំនួន ២២ស្ថាប័ន ក៏ធ្លាប់បានអំពាវនាវកាលពីថ្ងៃទី០៩ ខែកុម្ភៈ ឆ្នាំ២០២៦ ឱ្យដោះលែងលោក ហែម វណ្ណា ផងដែរ ដោយថា ការចាប់ខ្លួនអ្នកសារព័ត៌មានរូបនេះ ហាក់បង្ហាញពីនិន្នការរបស់រដ្ឋាភិបាល ក្នុងការរឹតត្បិតសំឡេងសមាជិកអ្នកសារព័ត៌មាន តាមរយៈការប្រើប្រាស់ក្រមព្រហ្មទណ្ឌ ជំនួសពីការប្រើប្រាស់យន្តការច្បាប់ស្តីពីរបបសារព័ត៌មាន។
ពួកគេបានស្នើឱ្យប្រើប្រាស់ច្បាប់ស្តីពីរបបសារព័ត៌មាន ក្នុងការដោះស្រាយវិវាទដែលពាក់ព័ន្ធនឹងការងារសារព័ត៌មាន ជំនួសឱ្យការប្រើប្រាស់បទចោទព្រហ្មទណ្ឌ និងការពារសេរីភាពសារព័ត៌មាន ព្រមទាំងធានាថា អ្នកសារព័ត៌មានអាចអនុវត្តភារកិច្ចវិជ្ជាជីវៈរបស់ខ្លួន ដោយគ្មានការភ័យខ្លាចចំពោះការរំខាន ការគំរាមកំហែង ការរឹតត្បិត ឬការចោទប្រកាន់តាមផ្លូវច្បាប់៕
