តម្លៃមាសបានហក់ឡើងខ្ពស់នៅថ្ងៃទី២៥ខែមីនានេះ ខណៈដែលការធ្លាក់ចុះនៃតម្លៃប្រេងបានជួយកាត់បន្ថយការព្រួយបារម្ភអំពីអតិផរណាដែលកំពុងបន្តកើតមាន បន្ទាប់ពីមានសេចក្តីរាយការណ៍ថា ទីក្រុងវ៉ាស៊ីនតោនកំពុងរៀបចំសេចក្តីស្នើដើម្បីបញ្ចប់ជម្លោះនៅមជ្ឈិមបូព៌ា។
តម្លៃមាស Spot បានកើនឡើង ២,៥៦% ដល់ ៤.៥៨៨ ដុល្លារក្នុងមួយអោន ខណៈដែលតម្លៃមាសសម្រាប់ចែកចាយក្នុងខែមេសា បានកើនឡើងជាង ៤% ដល់ ៤.៥៩៧,៧ ដុល្លារក្នុងមួយអោន។
ប្រធានាធិបតីអាមេរិក លោក ដូណាល់ ត្រាំ បានមានប្រសាសន៍កាលពីថ្ងៃទី២៤ខែមីនាថា សហរដ្ឋអាមេរិក និងអ៊ីរ៉ង់ កំពុងស្ថិតក្នុង “ការចរចានាពេលឥឡូវនេះ” ហើយបានបង្ហាញថា ទីក្រុងតេហេរ៉ង់ចង់សម្រេចបាននូវកិច្ចព្រមព្រៀងសន្តិភាព ទោះបីជាសាធារណរដ្ឋឥស្លាមមួយនេះ បានបដិសេធថា ខ្លួនមិនបានស្ថិតក្នុងការពិភាក្សាផ្ទាល់ជាមួយទីក្រុងវ៉ាស៊ីនតោនក៏ដោយ។
ថ្លែងនៅក្នុងការិយាល័យ Oval លោក ត្រាំ បានបញ្ជាក់ថា លោកបានសម្រេចចិត្តដកថយពីការគំរាមកំហែងនាពេលថ្មីៗនេះ ក្នុងការបញ្ជាឱ្យមានការវាយប្រហារលើហេដ្ឋារចនាសម្ព័ន្ធថាមពលរបស់អ៊ីរ៉ង់ “ផ្អែកលើការពិតដែលថា យើងកំពុងចរចា”។ លោក ត្រាំ បានលើកឡើងនៅពេលសួរឱ្យពន្យល់បន្ថែមអំពីការផ្លាស់ប្តូរជំហរនេះថា “ពួកគេកំពុងនិយាយជាមួយយើង ហើយពួកគេកំពុងនិយាយដោយហេតុផល”។
តម្លៃប្រេងបានធ្លាក់ចុះបន្ទាប់ពីការអត្ថាធិប្បាយរបស់លោក ត្រាំ។ តម្លៃប្រេងឆៅ Brent ដែលជាសន្ទស្សន៍គោលអន្តរជាតិ បានធ្លាក់ចុះប្រហែល ៦% មកនៅត្រឹម ៩៨,៣១ ដុល្លារក្នុងមួយបារ៉ែល ខណៈដែលតម្លៃប្រេងឆៅ West Texas Intermediate របស់សហរដ្ឋអាមេរិក ក៏បានធ្លាក់ចុះប្រហែល ៥% មកនៅត្រឹម ៨៧,៦៥ ដុល្លារក្នុងមួយបារ៉ែលផងដែរ។ សន្ទស្សន៍ប្រាក់ដុល្លារ ដែលវាស់វែងភាពខ្លាំងនៃរូបិយប័ណ្ណអាមេរិកធៀបនឹងកញ្ចប់រូបិយប័ណ្ណផ្សេងៗ បានធ្លាក់ចុះ ០,១៧% នៅដើមម៉ោងជួញដូរក្នុងតំបន់អាស៊ី។
ទោះជាយ៉ាងណាក៏ដោយ តម្លៃមាសនៅតែមានកម្រិតទាបជាងប្រហែល ១៧% បើធៀបនឹងតម្លៃខ្ពស់បំផុតកាលពីចុងខែមករា។
ធនាគារ Goldman Sachs បានលើកឡើងថា ការធ្លាក់ចុះនៃតម្លៃមាសនាពេលថ្មីៗនេះ គឺភាគច្រើនស្របទៅនឹងគំរូប្រវត្តិសាស្ត្រ ដោយចាត់ទុកថាការរំពឹងទុកនៃអត្រាការប្រាក់ខ្ពស់ និងការប្រែប្រួលទីផ្សារ គឺជាកត្តាជំរុញដ៏សំខាន់នៅពីក្រោយការធ្លាក់ចុះនេះ។
លោក Daan Struyven សហប្រធានផ្នែកស្រាវជ្រាវទំនិញសកលនៃធនាគារខាងលើ បានមានប្រសាសន៍នៅថ្ងៃទី២៥ខែមីនានេះថា “យើងមិនគិតថាការធ្លាក់ចុះនេះជារឿងគួរឱ្យភ្ញាក់ផ្អើលនោះទេ បើពិនិត្យតាមក្របខ័ណ្ឌតម្លៃដែលមានស្រាប់របស់យើង”។ លោកបានកត់សម្គាល់ថា ការកើនឡើងនៃការរំពឹងទុកលើអត្រាការប្រាក់ បានដាក់សម្ពាធលើតម្រូវការរបស់វិនិយោគិន ជាពិសេសតាមរយៈមូលនិធិមាស (ETFs) ដែល “ងាយរងគ្រោះខ្លាំងចំពោះអត្រាការប្រាក់”។
លោក Struyven ក៏បានប្រាប់ប្រព័ន្ធផ្សព្វផ្សាយផងដែរថា ស្ថានភាពតានតឹងខ្លាំងនៃទីផ្សារ ក៏អាចដាក់សម្ពាធលើមាសផងដែរ ដោយសារតែវិនិយោគិនដែលប្រឈមនឹងការហៅបង់ប្រាក់បន្ថែម (margin calls) មាននិន្នាការលក់មាសរួមជាមួយទ្រព្យសម្បត្តិផ្សេងទៀត។
លោកក៏បានលើកឡើងផងដែរថា ការងើបឡើងវិញនៃតម្លៃមាសនាពេលចុងក្រោយនេះ បានហក់ឡើងហួសពីកត្តាមូលដ្ឋាន ដោយផ្នែកខ្លះនៃការកែតម្រូវតម្លៃនេះ បានឆ្លុះបញ្ចាំងពី “ការវិលមករកភាពប្រក្រតីវិញបន្តិចបន្តួច”។ ទោះជាយ៉ាងណាក៏ដោយ Goldman នៅតែរក្សាទស្សនវិស័យសុទិដ្ឋិនិយម ដោយព្យាករណ៍ថា មាសនឹងឡើងដល់ ៥.៤០០ ដុល្លារនៅដាច់ឆ្នាំនេះ ដែលគាំទ្រដោយការបន្តទិញរបស់ធនាគារកណ្តាលនានា ខណៈដែលបណ្តាប្រទេសទាំងនោះស្វែងរកការធ្វើពិពិធកម្មទៅក្នុងទ្រព្យសម្បត្តិដែលមាន “ហានិភ័យភូមិសាស្ត្រនយោបាយ និងហានិភ័យហិរញ្ញវត្ថុទាប”៕
