រុស្ស៊ីបានបើកការវាយប្រហារដ៏ធំដោយប្រើប្រាស់ដ្រូនជិត ១ ០០០ គ្រឿង មកលើអ៊ុយក្រែន ដែលបានសម្លាប់មនុស្សយ៉ាងហោចណាស់ ៧ នាក់ ខណៈដែលទីក្រុងមូស្គូហាក់កំពុងបង្កើនការវាយលុកក្នុងរដូវផ្ការីក ក្នុងបំណងបំបែកការតស៊ូរបស់អ៊ុយក្រែននៅតាមខ្សែត្រៀមជួរមុខ។
មន្ត្រីអ៊ុយក្រែន បាននិយាយថា ទីក្រុងមូស្គូបានបាញ់ដ្រូនរយៈចម្ងាយឆ្ងាយជិត ៤០០ គ្រឿង និងគ្រាប់មីស៊ីលគ្រុយ (cruise) ចំនួន ២៣ គ្រាប់ នៅពេលយប់ បន្ទាប់មកបង្ហោះដ្រូនចំនួន ៥៥៦ គ្រឿងទៀត នៅក្នុងការវាយប្រហារពេលថ្ងៃដ៏កម្រមួយកាលពីថ្ងៃទី២៤ខែមីនា ដោយបានវាយប្រហារចំទីក្រុងនានានៅទូទាំងភាគខាងលិចនៃប្រទេស។
សរុបមក ការបាញ់ស្រោចនេះ គឺជាការទម្លាក់គ្រាប់បែកតាមអាកាសដ៏ធំបំផុតមួយមកលើអ៊ុយក្រែន ចាប់តាំងពីការចាប់ផ្តើមនៃការឈ្លានពានពេញទំហឹងកាលពីជាង ៤ ឆ្នាំមុន។
អាជ្ញាធរមូលដ្ឋាន បានឱ្យដឹងថា ដ្រូនរុស្ស៊ីមួយគ្រឿងបានវាយប្រហារចំវត្ត Bernardine ដែលជាព្រះវិហារសតវត្សរ៍ទី១៦ ស្ថិតក្នុងមជ្ឈមណ្ឌលមជ្ឈិមសម័យនៃទីក្រុង Lviv ដែលចុះបញ្ជីដោយអង្គការយូណេស្កូ (Unesco) បណ្តាលឱ្យមានការខូចខាត។
វីដេអូដ៏រន្ធត់ដែលចែកចាយតាមអ៊ីនធឺណិត បានបង្ហាញពីដ្រូនអត្តឃាត (kamikaze) ដ៏ធំមួយបានធ្លាក់ចំផ្លូវដ៏មមាញឹកក្នុងទីក្រុង Lviv ។
ប្រធានាធិបតីអ៊ុយក្រែន លោក Volodymyr Zelenskyy បានមានប្រសាសន៍ថា ការបាញ់ស្រោចនេះបានបង្កឱ្យមានការខូចខាតនៅក្នុងតំបន់ចំនួន១១ ហើយលោកបានបន្តអំពាវនាវដល់សម្ព័ន្ធមិត្តឱ្យផ្តល់គ្រាប់រំសេវការពារអាកាសបន្ថែមដល់ទីក្រុង Kyiv ជាបន្ទាន់។ លោកបានបញ្ជាក់ដដែលៗថា អ៊ុយក្រែនដែលពឹងផ្អែកលើសហរដ្ឋអាមេរិកសម្រាប់ប្រព័ន្ធការពារ ដែលអាចស្ទាក់ចាប់គ្រាប់មីស៊ីលបាលីស្ទិក កំពុងប្រឈមនឹងកង្វះខាត ខណៈដែលការយកចិត្តទុកដាក់របស់ទីក្រុងវ៉ាស៊ីនតោន នៅតែផ្តោតលើជម្លោះរវាងសហរដ្ឋអាមេរិក-អ៊ីស្រាអែល ជាមួយប្រទេសអ៊ីរ៉ង់។
ប្រទេសជិតខាងគឺម៉ុលដាវី ក៏បាននិយាយផងដែរថា ខ្សែបណ្តាញអគ្គិសនីដ៏សំខាន់ដែលតភ្ជាប់ប្រទេសខ្លួនទៅកាន់អឺរ៉ុប ត្រូវបានខូចខាតនៅក្នុងការវាយប្រហារពេលយប់របស់រុស្ស៊ី ហើយបានជំរុញឱ្យប្រជាពលរដ្ឋកាត់បន្ថយការប្រើប្រាស់អគ្គិសនីក្នុងអំឡុងពេលម៉ោងដែលមានតម្រូវការខ្ពស់។
បន្ទាប់ពីបានឆ្លងកាត់រដូវរងាដែលមានការកាត់ផ្តាច់ចរន្តអគ្គិសនី និងកម្តៅយ៉ាងទូលំទូលាយ អ៊ុយក្រែនកំពុងត្រៀមខ្លួនសម្រាប់ការរុញច្រានជាថ្មីពីរុស្ស៊ី។ សង្គ្រាមបង្ហិនកម្លាំងរបស់ទីក្រុងមូស្គូ ជាធម្មតាតែងតែបង្កើនអាំងតង់ស៊ីតេនៅក្នុងរដូវផ្ការីក នៅពេលដែលលក្ខខណ្ឌអាកាសធាតុមានភាពប្រសើរឡើង។ កងកម្លាំងរុស្ស៊ីដែលមានចំនួនច្រើនជាងទ័ពអ៊ុយក្រែនប្រហែល ៣ ទល់នឹង ១ កំពុងស្វែងរកការវាយដណ្តើមយកទឹកដីនៅតាមខ្សែត្រៀមជួរមុខភាគខាងកើត និងភាគខាងត្បូង។
កងទ័ពរុស្ស៊ីបានបន្តការរំកិលទៅមុខយឺតៗនៅក្នុងតំបន់ Donetsk ភាគខាងកើតក្នុងអំឡុងពេលរដូវរងា ដោយបានខិតជិតទៅរកទីក្រុងសំខាន់ Sloviansk ពីទិសខាងជើង និងខាងកើត។ ពួកគេកំពុងកាន់កាប់ទីតាំងដែលមានចម្ងាយប្រហែល ១២ ម៉ាយ (២០ គីឡូម៉ែត្រ) ពីជាយក្រុង។ អ្នកវិភាគព័ត៌មានបើកចំហ (open-source) ក៏បានរាយការណ៍ពីការវាយដណ្តើមបានទឹកដីរបស់រុស្ស៊ីនៅជិត Zaliznychne ក្នុងតំបន់ Zaporizhzhia ផងដែរ។
វិទ្យាស្ថានសម្រាប់ការសិក្សាសង្គ្រាម (ISW) បានឱ្យដឹងកាលពីយប់ថ្ងៃ២៣មីនាថា វិមានក្រឹមឡាំងបានផ្លាស់ប្តូរគ្រឿងចក្រធុនធ្ងន់ និងកងទ័ពបន្ថែមទៅកាន់ខ្សែត្រៀមជួរមុខ៕
