នាយករដ្ឋមន្ត្រី លោក ហ៊ុន ម៉ាណែត បានចេញបញ្ជាផ្ទាល់មាត់ជាថ្មីទៀត រំឭកមន្ត្រីពីប្រសិទ្ធភាពបង្ក្រាបឧក្រិដ្ឋកម្មអនឡាញ ក្រោយពីរងសម្ពាធពីសហគមន៍អន្តរជាតិ ដែលគេរកឃើញថា កម្ពុជាជាសំបុកពួកឧក្រិដ្ឋជន ដែលត្រូវតែបោសសម្អាត ដើម្បីស្តារមុខមាត់កម្ពុជាលើឆាកអន្តរជាតិ។
ការណ៍នេះ ជំរុញឱ្យមានការលើកឡើងថា សារមេដឹកនាំរូបនេះ គ្រាន់តែជារូបភាពឆ្លើយតបទៅនឹងសម្ពាធរបស់អន្តរជាតិ ដើម្បីបញ្ចៀសការដាក់ទណ្ឌកម្មសេដ្ឋកិច្ច និងទប់ស្កាត់ការធ្លាក់ចុះលំហូរវិនិយោគប៉ុណ្ណោះ គ្មានប្រសិទ្ធភាពដល់ការបោសសម្អាតមេខ្លោងដែលជាសាច់ញាតិ និងមន្ត្រីគ្រាក់ៗដែលជាបង្អែកហិរញ្ញវត្ថុជួយពង្រឹងអំណាចគណបក្សកាន់អំណាចនោះទេ។
លោក ហ៊ុន ម៉ាណែត ថ្លែងពីខេត្តស្វាយរៀង នៅថ្ងៃទី២៦ខែមីនានេះ បានលើកឡើងថា ដើម្បីទាក់ទាញឱ្យមានការវិនិយោគចូលមកកម្ពុជាឱ្យបានកាន់តែច្រើន ជារឿងសំខាន់បំផុត ដែលទាមទារឱ្យអាជ្ញាធរ ខេត្តក្រុង ត្រូវតែពង្រឹង និងសកម្មបំផុត គឺត្រូវបង្កើនការការពារសន្តិសុខ សណ្ដាប់ធ្នាប់ឱ្យល្អបំផុតក្នុងតំបន់។
លោកគូសបញ្ជាក់ថា បញ្ហាការឆបោកតាមប្រព័ន្ធអ៊ីនធឺណិត វាជាបញ្ហាដ៏ធំរបស់កម្ពុជា ដែលជះផលអវិជ្ជមានដល់វិស័យសេដ្ឋកិច្ច ឧហ្សាករណ៍ និងការវិនិយោគមានការជាប់គាំង។
លោកថា៖ «បញ្ហាឆបោកអនឡាញនេះ មិនមែនជាបញ្ហាដាច់ដោយឡែករបស់កម្ពុជាទេ តែជាបញ្ហាតំបន់ ប៉ុន្តែដើម្បីបោសសម្អាត វាទាល់តែយើងក៏ចេះកែខ្លួនឯង អ៊ីចឹងនៅក្នុងកិច្ចការងារនេះ កម្ពុជាបានប្ដេជ្ញាចិត្តហើយក៏មិនមែនតែធ្វើក្នុងរយៈពេលខ្លី យើងនឹងបន្តធ្វើវាជាកត្តាចាំបាច់ក្នុងការរៀបចំកម្ពុជាឲ្យក្លាយទៅជាប្រទេសអភិវឌ្ឍន៍មួយ»។
យ៉ាងណាអ្នកជំនាញភូមិសាស្ត្រនយោបាយ លោក សេង វណ្ណលី និយាយថា សាររបស់លោក ហ៊ុន ម៉ាណែត ជាញឹកញាប់មកនេះ ជាយុទ្ធសាស្រ្តដើម្បីឆ្លើយតបទៅនឹងសម្ពាធអន្តរជាតិ ពិសេសសហរដ្ឋអាមេរិក និងប្រទេសមួយចំនួន ដែលកំពុងដាក់សម្ពាធឱ្យកម្ពុជាសម្អាតឋានសួរឧក្រិដ្ឋកម្មអនឡាញ ដើម្បីបញ្ចៀសការដាក់ទណ្ឌកម្មសេដ្ឋកិច្ច និងការធ្លាក់ចុះនៃលំហូរវិនិយោគ។
ប៉ុន្តែលោកថា ការខ្វះចំណាត់ការលើមេខ្លោងពិតប្រាកដ ពាក់ព័ន្ធសាច់ញាតិ និងមន្ត្រីគ្រាក់ៗ ដែលជាខ្នងបង្អែកផ្នែកហិរញ្ញវត្ថុ និងនយោបាយដ៏រឹងមាំរបស់គណបក្សកាន់អំណាចនោះ លោក ហ៊ុន ម៉ាណែត គ្មានសមត្ថភាពវះកាត់សាច់ស្អុយទំាងនោះឡើយ ដែលជាក្តីបារម្ភថា កម្ពុជាមិនអាចរើខ្លួនពីជម្រកពួកឧក្រិដ្ឋជនបាននោះទេ។
លោកថា៖ «ដោយសារលោកបារម្ភពីការរង្គោះរង្គើដល់ស្ថិរភាពផ្ទៃក្នុងនៃក្រុមគ្រួសារ និងបក្ខពួក បន្ថែមពីនេះប្រព័ន្ធយុត្តិធម៌ និងស្ថាប័នអនុវត្តច្បាប់នៅកម្ពុជា ហាក់នៅតែបន្តស្ថិតនៅក្រោមឥទ្ធិពលនៃបុគ្គលដែលមានអំណាច ដែលធ្វើឲ្យវិធានការនានាត្រូវបានអនុវត្តតែទៅលើកូនចៅថ្នាក់ក្រោម ដើម្បីបង្គ្រប់កិច្ចតែមានរូបភាព ការបង្ក្រាបប៉ុណ្ណោះ»។
សម្រាប់លោក សេង វណ្ណលី បញ្ហាឆបោកតាមប្រព័ន្ធអនឡាញ បានក្លាយជាវិបត្តិរួមក្នុងតំបន់ និងសកលលោកក៏ពិតមែន ប៉ុន្តែចំណុចរសើបបំផុតដែលសាធារណជនកំពុងតាមដាន គឺភាពខុសគ្នារវាងរបៀបដោះស្រាយរបស់ប្រទេសដទៃ និងកម្ពុជា។
លោកសង្កត់ធ្ងន់ថា ភាពបរាជ័យក្នុងការបំបែកបណ្តាញពុករលួយលក្ខណៈប្រព័ន្ធបែបនេះ មិនត្រឹមតែធ្វើឱ្យពាក្យសន្យារបស់ លោក ហ៊ុន ម៉ាណែត ប្រែជាគ្មានតម្លៃប៉ុណ្ណោះទេ ប៉ុន្តែវាក៏បានបង្ហាញឱ្យឃើញថា អំណាចពិតប្រាកដប្រហែលជាមិនស្ថិតនៅលើច្បាប់នោះឡើយ គឺវាស្ថិតនៅលើផលប្រយោជន៍របស់ក្រុមបក្ខពួក ដែលកំពុងគ្របដណ្តប់លើជោគវាសនារបស់ប្រទេសជាតិទាំងមូល។
ស្ថានភាពបែបនេះ បង្ហាញថា របាំងការពារពីអ្នកមានអំណាចនៅតែជាឧបសគ្គរាំងស្ទះដល់ការលុបបំបាត់បទល្មើសទាំងស្រុង ហើយប្រសិនបើការបង្ក្រាបនៅតែធ្វើឡើងក្នុងលក្ខណៈ «វាយតែបង្គួយ មិនហ៊ានវាយពស់» នោះកម្ពុជានឹងពិបាកក្នុងការស្តារមុខមាត់លើឆាកអន្តរជាតិ ក៏ដូចជាការដកខ្លួនចេញពីបញ្ជីខ្មៅនៃក្រុមប្រទេស ដែលមានហានិភ័យខាងលាងលុយកខ្វក់ និងឧក្រិដ្ឋកម្មឆ្លងដែន។
ភាពស្ទាក់ស្ទើរក្នុងការចាត់ការមន្ត្រីគ្រាក់ៗ ដែលគប់គិតជាមួយក្រុមឆបោក មិនត្រឹមតែធ្វើឱ្យប៉ះពាល់ដល់ជំនឿចិត្តរបស់ប្រជាពលរដ្ឋក្នុងស្រុកប៉ុណ្ណោះទេ ប៉ុន្តែវាក៏ជាសញ្ញាអវិជ្ជមានដល់វិនិយោគិនបរទេស ដែលចង់ឃើញបរិយាកាសធុរកិច្ចមួយប្រកបដោយតម្លាភាព និងនីតិរដ្ឋពិតប្រាកដ។
ជុំវិញបញ្ហានេះ មេឧក្រិដ្ឋជនឆបោកជនជាតិតៃវ៉ាន់ម្នាក់ និងជាថៅកែកាស៊ីណូមួយនៅខេត្តព្រះសីហនុ ត្រូវបានគេបាញ់សម្លាប់នៅយប់ថ្ងៃទី២៣ ខែមីនា ឆ្នាំ២០២៦នេះ ដែលសមត្ថកិច្ចមិនទាន់រកឃើញខ្មាន់កាំភ្លើងនៅឡើយ។
ជុំវិញបញ្ហានេះ លោក សេង វណ្ណលី និយាយថា ករណីឃាតកម្មនេះ ឆ្លុះបញ្ចាំងពីភាពធូររលុងនៃប្រព័ន្ធគ្រប់គ្រងរដ្ឋបាល និងសន្តិសុខក្រោមការដឹកនាំរបស់លោក ហ៊ុន ម៉ាណែត។
ក្នុងន័យនេះ លោកពន្យល់ថា វត្តមានរបស់ឧក្រិដ្ឋជនឆ្លងដែនដែលមានដីកាចាប់ខ្លួនពីអន្តរជាតិ ប៉ុន្តែអាចរស់នៅ និងធ្វើសកម្មភាពដោយសេរីលើទឹកដីកម្ពុជា រហូតទាល់តែមានករណីឃាតកម្មបាញ់សម្លាប់គ្នាយ៉ាងរន្ធត់ ទើបធ្លាយរឿងចេញមក គឺជាកញ្ចក់ឆ្លុះបញ្ចាំងយ៉ាងច្បាស់ពីវិបត្តិដ៏ជ្រៅនៃប្រព័ន្ធគ្រប់គ្រងរដ្ឋបាល និងសន្តិសុខជាតិ។
បញ្ហានេះបង្ហាញថា បូរណភាពនៃស្ថាប័នអនុវត្តច្បាប់ កំពុងរងការច្រេះស៊ីយ៉ាងធ្ងន់ធ្ងរដោយសារអំពើពុករលួយជាប្រព័ន្ធ ដែលអនុញ្ញាតឱ្យក្រុមឧក្រិដ្ឋជនប្រើប្រាស់ឥទ្ធិពលទឹកប្រាក់ ដើម្បីទិញយកនូវ «ភាពរស់រាន» និង «ការការពារ» ពីសំណាក់មន្ត្រីមានអំណាចមួយចំនួន។
លោកបញ្ជាក់ថា នៅពេលដែលឧក្រិដ្ឋជនកម្រិតធ្ងន់អាចជ្រកកោនក្រោមរូបភាពជាអ្នកវិនិយោគ ឬមានខ្នងបង្អែករឹងមាំ វាមិនត្រឹមតែជាការបរាជ័យនៃផ្នែកចារកម្ម និងនគរបាលយុត្តិធម៌ប៉ុណ្ណោះទេ ប៉ុន្តែវាគឺជាការដាក់សញ្ញាសួរទៅលើឆន្ទៈនយោបាយពិតប្រាកដរបស់រដ្ឋាភិបាលក្នុងការសម្អាតផ្ទះខ្លួនឯង។
លោកថា ស្ថានភាពនេះ បានប្រែក្លាយកម្ពុជាឱ្យទៅជាជម្រកប្រកបដោយសុវត្ថិភាព សម្រាប់មេខ្លោងឧក្រិដ្ឋកម្ម ដែលវាមិនមែនជារឿងចៃដន្យឡើយ ប៉ុន្តែវាជាលទ្ធផលនៃប្រព័ន្ធគ្រប់គ្រងដែលផ្តល់អាទិភាពលើផលប្រយោជន៍សេដ្ឋកិច្ចកខ្វក់ និងបណ្តាញបក្សពួកនិយម ជាងការរឹតបន្តឹងយន្តការត្រួតពិនិត្យជនបរទេស និងការអនុវត្តច្បាប់អន្តោប្រវេសន៍៕
