សំណើរបស់សហរដ្ឋអាមេរិកសម្រាប់បញ្ចប់ការប្រយុទ្ធគ្នា ដែលបានអូសបន្លាយពេលជិត ៤ សប្តាហ៍ គឺជាសំណើ «លម្អៀងទៅរកភាគីម្ខាង និងអយុត្តិធម៌»។ នេះបើតាមការលើកឡើងរបស់មន្ត្រីជាន់ខ្ពស់អ៊ីរ៉ង់ម្នាក់បានប្រាប់ភ្នាក់ងារសារព័ត៌មាន Reuters កាលពីថ្ងៃទី២៦ខែមីនា ខណៈដែលលោកក៏បានសង្កត់ធ្ងន់ផងដែរថា កិច្ចខិតខំប្រឹងប្រែងផ្នែកការទូតមិនទាន់បញ្ចប់នៅឡើយទេ ទោះបីជាបច្ចុប្បន្ននៅខ្វះខាតផែនការជាក់ស្តែងសម្រាប់កិច្ចចរចាសន្តិភាពក៏ដោយ។
មន្ត្រីរូបនេះ បានបន្តថា សំណើដែលត្រូវបានបញ្ជូនទៅកាន់ទីក្រុងតេអេរ៉ង់ តាមរយៈប្រទេសប៉ាគីស្ថាននោះ «ត្រូវបានពិនិត្យយ៉ាងល្អិតល្អន់កាលពីយប់ថ្ងៃពុធ ដោយមន្ត្រីជាន់ខ្ពស់អ៊ីរ៉ង់ និងតំណាងមេដឹកនាំកំពូលរបស់អ៊ីរ៉ង់»។
មន្ត្រីជាន់ខ្ពស់រូបនេះ បានបន្ថែមថា សំណើនោះខ្វះខាតលក្ខខណ្ឌអប្បបរមា ដើម្បីសម្រេចបានជោគជ័យ ហើយបម្រើតែផលប្រយោជន៍របស់សហរដ្ឋអាមេរិក និងអ៊ីស្រាអែលប៉ុណ្ណោះ។ ទោះជាយ៉ាងណាក៏ដោយ លោកបានបញ្ជាក់ថា ប្រសិនបើទីក្រុងវ៉ាស៊ីនតោនប្រកាន់ខ្ជាប់នូវ «តថភាពនិយម» នោះ «ផ្លូវឆ្ពោះទៅមុខអាចនឹងត្រូវរកឃើញ» ដើម្បីដោះស្រាយវិបត្តិនេះ។
កាលពីព្រឹកថ្ងៃទី២៦ខែមីនា ប្រធានាធិបតីអាមេរិក លោក Donald Trump បានព្រមានទីក្រុងតេអេរ៉ង់ឱ្យ «យកចិត្តទុកដាក់» ចំពោះកិច្ចចរចាដើម្បីបញ្ចប់ជម្លោះ ដែលបានចាប់ផ្តើមឡើងដោយការវាយប្រហាររបស់សហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់ កាលពីថ្ងៃទី២៨ ខែកុម្ភៈ។
លោក Trump បានសរសេរនៅលើបណ្តាញសង្គម Truth Social ថា អ៊ីរ៉ង់កំពុង «អង្វរករ» ចង់បានកិច្ចព្រមព្រៀង បន្ទាប់ពីរដ្ឋមន្ត្រីការបរទេសអ៊ីរ៉ង់ បានលើកឡើងថា សារដែលផ្ញើតាមរយៈអ្នកសម្របសម្រួលមិនមែនជាការសន្ទនាគ្នាដោយផ្ទាល់នោះទេ ហើយអ៊ីរ៉ង់ក៏មិនមានបំណងចរចានៅពេលបច្ចុប្បន្ននេះដែរ។
ដោយហៅអ្នកចរចាអ៊ីរ៉ង់ថា «ខុសប្លែកពីគេ និង ចម្លែក» លោក Trump បានបន្ថែមថា៖ «ពួកគេគួរតែចាប់ផ្តើមយកចិត្តទុកដាក់ឱ្យបានឆាប់ មុនពេលអ្វីៗហួសពេល ព្រោះនៅពេលដែលវាបានកើតឡើងហើយ គឺគ្មានផ្លូវត្រឡប់ក្រោយវិញទេ ហើយលទ្ធផលនឹងមិនល្អមើលឡើយ»។
ក្រោយមក លោក Trump បានពណ៌នាជនជាតិអ៊ីរ៉ង់ថាជា «អ្នកចរចាដ៏ពូកែ» ប៉ុន្តែលោកបាននិយាយថា លោក«មិនប្រាកដថា លោកមានបំណងចង់ធ្វើកិច្ចព្រមព្រៀងជាមួយពួកគេ ដើម្បីបញ្ចប់សង្គ្រាមនោះទេ»។
យោងតាមប្រភពព័ត៌មាន និងរបាយការណ៍នានា សំណើ ១៥ ចំណុចរបស់សហរដ្ឋអាមេរិក ដើម្បីបញ្ចប់ជម្លោះ រួមមាន ការទាមទារតាំងពីការរំសាយកម្មវិធីនុយក្លេអ៊ែររបស់អ៊ីរ៉ង់ ការកាត់បន្ថយសមត្ថភាពមីស៊ីល រហូតដល់ការផ្ទេរការគ្រប់គ្រងច្រកសមុទ្រ Hormuz ជាដើម។
ប្រភពពីអ៊ីរ៉ង់ បានឱ្យដឹងថា ចាប់តាំងពីសង្គ្រាមបានចាប់ផ្តើម អ៊ីរ៉ង់បានពង្រឹងជំហររបស់ខ្លួន ដោយទាមទារឱ្យមានការធានាមិនឱ្យមានសកម្មភាពយោធានៅពេលអនាគត ការសងជំងឺចិត្តចំពោះការបាត់បង់ និងការគ្រប់គ្រងច្រកសមុទ្រជាផ្លូវការ។ ប្រភពក្នុងតំបន់ក៏បានបង្ហើបថា អ៊ីរ៉ង់បានប្រាប់អ្នកសម្របសម្រួលថា ប្រទេសលីបង់ត្រូវតែត្រូវបានបញ្ចូលទៅក្នុងកិច្ចព្រមព្រៀងឈប់បាញ់ណាមួយផងដែរ៕
