លោកប្រធានាធិបតីសហរដ្ឋអាមេរិក ដូណាល់ ត្រាំ បានមានប្រសាសន៍ថា លោកនឹងបន្តពន្យារពេលការវាយប្រហារលើរោងចក្រថាមពលរបស់អ៊ីរ៉ង់រហូតដល់ខែមេសា ហើយការចរចាជាមួយអ៊ីរ៉ង់កំពុងដំណើរការទៅមុខ “យ៉ាងល្អប្រសើរ”។
កាលពីថ្ងៃទី២៦ខែមីនា លោក ត្រាំ បានគំរាមក្នុងអំឡុងកិច្ចប្រជុំគណៈរដ្ឋមន្ត្រីនៅសេតវិមានថា នឹងបង្កើនសម្ពាធលើអ៊ីរ៉ង់ ប្រសិនបើមិនមានកិច្ចព្រមព្រៀងណាមួយកើតឡើងទេ មុនពេលដែលលោកបានបង្ហោះលើបណ្តាញសង្គមនៅពេលក្រោយមកថា លោកនឹងផ្អាកការវាយប្រហារលើរោងចក្រថាមពលរបស់អ៊ីរ៉ង់រយៈពេល ១០ ថ្ងៃ រហូតដល់ថ្ងៃទី៦ ខែមេសា ឆ្នាំ២០២៦ វេលាម៉ោង ៨ យប់ (ម៉ោងនៅសហរដ្ឋអាមេរិក)។
លោកបានបន្ថែមនៅក្នុងការបង្ហោះលើបណ្តាញ Truth Social របស់លោកថា៖ «ការចរចាកំពុងបន្តធ្វើឡើង ហើយទោះបីជាមានសេចក្តីថ្លែងការណ៍មិនពិត ពីសំណាក់ប្រព័ន្ធផ្សព្វផ្សាយព័ត៌មានក្លែងក្លាយ (Fake News Media) និងអ្នកផ្សេងទៀតក៏ដោយ ក៏ការចរចានេះកំពុងដំណើរការទៅមុខយ៉ាងល្អ»។
ដោយឡែក អ៊ីរ៉ង់បានបញ្ជាក់ថា ខ្លួនមិនបានចូលរួមក្នុងការចរចាជាមួយទីក្រុងវ៉ាស៊ីនតោននោះទេ។ លោក ត្រាំ មិនបានបញ្ជាក់អត្តសញ្ញាណថា តើសហរដ្ឋអាមេរិកកំពុងចរចាជាមួយនរណានៅក្នុងប្រទេសអ៊ីរ៉ង់នោះទេ ខណៈដែលមន្ត្រីជាន់ខ្ពស់ជាច្រើនរូបត្រូវបានសម្លាប់នៅក្នុងសង្គ្រាម។
កាលពីថ្ងៃទី២៣ ខែមីនា លោក ត្រាំ បានប្រកាសបញ្ឈប់រាល់ការវាយប្រហារលើរោងចក្រអគ្គិសនី និងហេដ្ឋារចនាសម្ព័ន្ធថាមពលក្នុងរយៈពេល ៥ ថ្ងៃ ប៉ុន្តែឥឡូវនេះលោកបានពន្យារពេលដល់ ១០ ថ្ងៃវិញ។
កាសែត Wall Street Journal បានស្រង់សម្តីអ្នកសម្របសម្រួលការចរចាសន្តិភាពថា អ៊ីរ៉ង់មិនបានស្នើសុំឱ្យមានការផ្អាកការវាយប្រហារលើរោងចក្រថាមពលរយៈពេល ១០ ថ្ងៃនោះទេ។
លោក ត្រាំ បានប្រាប់កម្មវិធី “The Five” របស់ប៉ុស្តិ៍ Fox News ថា ភាគីអ៊ីរ៉ង់បានស្នើសុំផ្អាកការវាយប្រហារលើរោងចក្រថាមពលរយៈពេល ៧ ថ្ងៃ។ ទោះជាយ៉ាងណា មិនទាន់មានប្រតិកម្មភ្លាមៗពីទីក្រុងតេអេរ៉ង់នៅឡើយទេ។
ទោះបីជាមានការវាយតម្លៃប្រកបដោយសុទិដ្ឋិនិយមរបស់ លោក ត្រាំ ក៏ដោយ ក៏អ៊ីរ៉ង់នៅតែបន្តសងសឹកប្រឆាំងនឹងការវាយប្រហាររបស់សហរដ្ឋអាមេរិក និងអ៊ីស្រាអែល ដោយបានវាយប្រហារលើមូលដ្ឋានទ័ពរបស់អ៊ីស្រាអែល និងសហរដ្ឋអាមេរិក។ អ៊ីរ៉ង់ក៏បានវាយប្រហារលើបណ្តាប្រទេសនៅតំបន់ឈូងសមុទ្រ និងបានរារាំងការនាំចេញប្រេងឥន្ធនៈពីមជ្ឈិមបូព៌ាតាមរយៈច្រកសមុទ្រ Hormuz ដែលជាច្រកដឹកជញ្ជូនប្រេង និងឧស្ម័នធម្មជាតិរាវប្រហែល ២០% នៃពិភពលោក។
កាលពីថ្ងៃទី២៦ខែមីនា លោក ត្រាំ បានផ្តល់យោបល់ឱ្យអ៊ីរ៉ង់អនុញ្ញាតឱ្យនាវាដឹកប្រេងចំនួន ១០ គ្រឿងឆ្លងកាត់ច្រកសមុទ្រ Hormuz ដើម្បីបង្ហាញពីសុឆន្ទៈក្នុងការចរចា រួមទាំងនាវាខ្លះដែលមានដោតទង់ជាតិប៉ាគីស្ថានផងដែរ។
កាសែត Wall Street Journal បានរាយការណ៍កាលពីថ្ងៃទី២៦ខែមីនា ដោយយោងតាមមន្ត្រីមន្ទីរបញ្ចកោណថា ក្រសួងការពារជាតិកំពុងពិចារណាបញ្ជូនកងទ័ពជើងគោកបន្ថែមរហូតដល់ ១០,០០០ នាក់ទៅកាន់មជ្ឈិមបូព៌ា ដើម្បីឱ្យលោក ត្រាំ មានជម្រើសយោធាកាន់តែច្រើន។
មន្ទីរបញ្ចកោណបានប្រាប់ Reuters ថា សហរដ្ឋអាមេរិក បានដាក់ពង្រាយទូកល្បឿនលឿនគ្មានមនុស្សបើក (Drone speedboats) សម្រាប់ល្បាត ដែលជាផ្នែកនៃប្រតិបត្តិការប្រឆាំងនឹងអ៊ីរ៉ង់ ហើយនេះជាលើកដំបូងដែលទីក្រុងវ៉ាស៊ីនតោន បានបញ្ជាក់ពីការប្រើប្រាស់នាវាប្រភេទនេះ នៅក្នុងជម្លោះដែលកំពុងកើតមាន។
លោក ត្រាំ បានព្រមានថា សហរដ្ឋអាមេរិកនឹងក្លាយជា “សុបិនអាក្រក់បំផុត” របស់អ៊ីរ៉ង់ ប្រសិនបើអ៊ីរ៉ង់មិនអនុវត្តតាមការទាមទាររបស់សហរដ្ឋអាមេរិក ដែលរួមមានការបើកច្រកសមុទ្រ Hormuz និងការបញ្ចប់កម្មវិធីនុយក្លេអ៊ែររបស់ខ្លួន។ លោកបានបន្ថែមថា ការគ្រប់គ្រងលើប្រេងរបស់អ៊ីរ៉ង់ គឺជាជម្រើសមួយ ប៉ុន្តែលោកមិនបានផ្តល់ព័ត៌មានលម្អិតនោះទេ៕
