មន្ត្រីសិទ្ធិមនុស្ស ជំរុញឱ្យតុលាការខេត្តតាកែវ ដោះលែងបុរសពិការជើង លោក ភុន យុទ្ធ ដែលគេស្គាល់ថា ជាអ្នកហ៊ានរិះគន់ការដឹកនាំរបស់លោក ហ៊ុន សែន និងលោក ហ៊ុន ម៉ាណែត ពីបញ្ហាអភិបាលកិច្ច អយុត្តិធម៌សង្គម និងបញ្ហាព្រំដែនជាដើម។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត ថ្លែងប្រាប់វីអូឌីនៅថ្ងៃទី៣០ ខែមីនា ដោយជំរុញឱ្យតុលាការពិចារណាដោះលែងជនពិការពីកំណើតរូបនេះវិញ ដើម្បីឱ្យលោក ភុន យុទ្ធ អាចជួយផ្គត់ផ្គង់ជីវភាពគ្រួសារដែលកំពុងតែពិបាកខ្លាំង។
លោកថា៖ «យើងគ្រាន់តែសង្ឃឹមថា សាលាដំបូងនឹងដោះលែងលោក ភុន យុទ្ធ ឱ្យមានសេរីភាពវិញ ដោយសារលោកជាជនពិការជើងទាំងពីរ។ លោកមានកូនដែលកំពុងតែរៀន មានប្រពន្ធ ហើយជីវភាពក្រីក្រតោកយ៉ាក ដូច្នេះគឺត្រូវការលោក ដើម្បីជួយផ្គត់ផ្គង់ក្នុងជីវភាពគ្រួសារណាបាទ»។
នៅម៉ោងជាង ១១ព្រឹកថ្ងៃទី៣០ ខែមីនា សាលាដំបូងខេត្តតាកែវ បានបញ្ចប់សវនាការជាលើកដំបូងលើសកម្មជននយោបាយ លោក ភុន យុទ្ធ ពីបទ «មិនរាងចាលក្នុងបទមជ្ឈិម បន្ទាប់ពីការផ្ដន្ទាទោសបទមជ្ឈិម» និងបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» ដោយមានមេធាវីរបស់អង្គការលីកាដូជួយការពារក្ដី។ បន្ទាប់ពីសវនាការរួច តុលាការក៏លើកពេលប្រកាសសាលក្រមផ្ដន្ទាទោស លោក ភុន យុទ្ធ ទៅថ្ងៃទី២៨ ខែមេសា ឆ្នាំ២០២៦។
វីអូឌី ពុំអាចសុំការពន្យល់បន្ថែមពីប្រធានសាលាដំបូងខេត្តតាកែវ នៅថ្ងៃទី៣០ ខែមីនា បានទេ។
ទោះជាយ៉ាងណា បើតាមមាត្រាច្បាប់ ៤៩៤-៤៩៥ នៃក្រមព្រហ្មទណ្ឌ ជុំវិញបទចោទញុះញង់ដ៏ពេញនិយមដែលរដ្ឋាភិបាលប្រើបង្ក្រាបសំឡេងជំទាស់នោះ លោក ភុន យុទ្ធ អាចនឹងត្រូវផ្ដន្ទាទោស ១៨ខែ។
ភរិយាលោក ភុន យុទ្ធ គឺអ្នកស្រី វ៉ិត មុំ ថ្លែងនៅមុខសាលាដំបូងខេត្តតាកែវ ក្រោយចូលស្ដាប់សវនាការ ដោយទឹកមុខភ័យខ្លាច និងបង្ហើបថា ក្នុងសវនាការ មន្ត្រីតុលាការបានស្រែកសម្លុតស្វាមីអ្នកស្រីយ៉ាងខ្លាំង។ ទោះយ៉ាងណាអ្នកស្រីនៅតែទទូចដល់តុលាការដោះលែងស្វាមីឱ្យមានសេរីភាពវិញ។
អ្នកស្រីថា៖ «និយាយរួមទៅគ្រួសារខ្ញុំ ហើយខ្ញុំឈឺផងអីផង! ប្ដីខ្ញុំក៏ឈឺ ហើយកូនខ្ញុំក៏រៀន។ ណាមួយយើងជាជនពិការផង យើងក្រីក្រផង និងរកអីមិនបានអ៊ីចឹងទៅ វាពិបាកភ្នែកមើលណាស់! សូមតុលាការបន្ថយទោសឱ្យគាត់ (ភុន យុទ្ធ) ឆាប់ចេញមក»។
ទាក់ទងករណីនេះ អតីតតំណាងរាស្ត្រគណបក្សសង្គ្រោះជាតិ និងជាអនុប្រធានគណបក្សឆន្ទៈខ្មែរលោក សុន ឆ័យ បានជំរុញឱ្យរដ្ឋាភិបាលដោះលែង លោក ភុន យុទ្ធ ជាបន្ទាន់។ លោកចាត់ទុកការរិះគន់របស់ជនពិការរូបនេះថា ជាការបញ្ចេញមតិ ហើយបើទោះបីជាប៉ះពាល់ដល់រដ្ឋាភិបាល ក៏អាជ្ញាធរពុំគួរចាប់ឃុំគាត់មួយដងជាពីរដងនោះទេ។ លោកលើកហេតុផលថា រដ្ឋាភិបាលមានប្រព័ន្ធផ្សព្វផ្សាយ ឆ្លើយបំភ្លឺចំពោះរាល់ការរិះគន់ពីពលរដ្ឋ ហើយលោកហៅការបន្តឃុំខ្លួន លោក ភុន យុទ្ធ ថា ជាការធ្វើទុក្ខបុកម្នេញដល់ប្រពន្ធ និងកូន ហើយបង្ហាញពីភាពអយុត្តិធម៌សម្រាប់ពលរដ្ឋឱ្យឈឺចាប់ជាមួយថែមទៀតផង។
លោក សុន ឆ័យ ថ្លែងថា៖ «គួរលែងគាត់ទៅ ហើយបើទោះជាយ៉ាងណាក៏ដោយ ការលែងគាត់ឲ្យមានសេរីភាពនេះ វាអាចចាត់ទុកថារដ្ឋាភិបាលហាក់ដូចជាយល់ឃើញកំហុសរបស់ខ្លួន ហើយធ្វើយ៉ាងម៉េចឲ្យមានការបង្ហាញអំពីរបៀបដោះស្រាយមួយ ដែលឲ្យពលរដ្ឋអាចទទួលយកបានផងដែរ»។
លោក ភុន យុទ្ធ ត្រូវបានចាប់ខ្លួនលើកទី៣ កាលពីថ្ងៃទី២៩ ខែតុលា ឆ្នាំ២០២៥ ក្រោមបទញុះញង់ដដែល ដោយសារលោកបន្តរិះគន់ពីភាពអសកម្មរបស់លោក ហ៊ុន ម៉ាណែត ជុំវិញបញ្ហាព្រំដែន ក្រោយការឈ្លានពានរបស់ថៃ។ លើកទី១ លោកជាប់ឃុំ ៦ខែ ហើយលើកទី២ លោក ភុន យុទ្ធ ត្រូវបានតុលាការផ្ដន្ទាទោសឱ្យជាប់ពន្ធនាគារ ១៨ខែ ពីបទញុះញង់ ដែលរដ្ឋាភិបាលតែងប្រើជាប្រចាំ ដើម្បីបំបិទមាត់អ្នកមាននិន្នាការផ្ទុយពីរដ្ឋាភិបាល៕
