ពលរដ្ឋជាង ១០០នាក់ នៅខេត្តព្រះវិហារ នៅថ្ងៃទី៣០ខែមីនា បានលើកគ្នាមកដាក់ញត្តិសុំកិច្ចអន្តរាគមន៍ពីលោកនាយករដ្ឋមន្ត្រី ហ៊ុន ម៉ាណែត នៅរាជធានីភ្នំពេញ ក្រោយពីអាជ្ញាធរខេត្តព្រះវិហារគំរាមបណ្ដេញអ្នកភូមិជិត ៤០០ (៣៩៧)គ្រួសារ ចេញពីដីស្រែចម្ការ ដើម្បីយកដីប្រគល់ឱ្យក្រុមហ៊ុនចិនវិនិយោគ។
ពលរដ្ឋទាំងនោះរស់នៅស្រុកសង្គមថ្មី និងស្រុករវៀង ខេត្តព្រះវិហារ កំពុងកើតទុក្ខមិនសុខចិត្ត ពីទង្វើរបស់អាជ្ញាធរខេត្តព្រះវិហារ ដែលបង្ខំឱ្យអ្នកភូមិជិត ៤០០ គ្រួសារ ចាកចេញពីដីស្រែចម្ការរបស់ខ្លួនជាបន្ទាន់ បើពុំដូច្នេះទេអាជ្ញាធរនឹងមានវិធានការច្បាប់។ អ្នកភូមិថា អាជ្ញាធរខេត្តនេះ បានដាក់សម្ពាធឱ្យពលរដ្ឋទទួលយកសំណងមិនសរម្យ។
ពលរដ្ឋដែលឡើងទៅតវ៉ានៅរាជធានីភ្នំពេញ រស់នៅស្រុកសង្គមថ្មី អ្នកស្រី ឡា យ៉ុម ប្រាប់វីអូឌីនៅថ្ងៃទី៣០ ខែមីនាថា ក្រុមពលរដ្ឋបានដាក់ញត្តិនៅទីស្តីការគណៈរដ្ឋមន្ត្រី និងក្រសួងដែនដីរួចហើយ ក្នុងបំណងឱ្យស្ថាប័នទាំងនេះ ជួយកាត់ឆ្វៀលដីជូនពលរដ្ឋអាស្រ័យផលចិញ្ចឹមជីវិត។
អ្នកស្រីថា គ្រួសារអ្នកស្រីមានដី ៩ ហិកតា ធ្វើចម្ការជិត ១០ឆ្នាំមកហើយ ចាប់តាំងពីឆ្នាំ២០១៧ រហូតមកទល់ពេលនេះ អាជ្ញាធរបានគំរាមរឹបអូសដីរបស់គាត់ ដើម្បីប្រគល់ឱ្យក្រុមហ៊ុនវិនិយោគវិញ។
អ្នកស្រីបញ្ជាក់ថា ជីវភាពរបស់ពលរដ្ឋពឹងផ្អែកលើដីស្រែចម្ការដាំដុះចិញ្ចឹមជីវិត។
អ្នកស្រី ឡា យ៉ុម និយាយថា៖ «ដកហូតដីខ្ញុំឱ្យតែថ្លៃពលកម្មមួយលានម្ភៃម៉ឺន តែពួកខ្ញុំអត់មានដីអីសោះ មានតែប៉ុណ្ណឹង ខ្ញុំចង់ឡើងមកជួយសម្ដេចម៉ែ សម្តេចឪ ជួយកូន ព្រោះខ្ញុំមានតែប៉ុណ្ណឹងឯង»។
កាលពីថ្ងៃទី២៧ ខែមីនា ឆ្នាំ២០២៦ អភិបាលខេត្តព្រះវិហារស្តីទី លោក មិន ស៊ីថា បានចេញសេចក្តីជូនដំណឹងមួយទុកពេលឱ្យពលរដ្ឋ ១៥ថ្ងៃ គិតចាប់ពីថ្ងៃទី៣០ ខែមីនា រហូតដល់ថ្ងៃទី១៣ ខែមេសា ឆ្នាំ២០២៦ ជាកំហិត តម្រូវឱ្យពលរដ្ឋទាំងអស់ ចាកចេញពីដីដែលរដ្ឋាភិបាលវិនិយោគឱ្យក្រុមហ៊ុនចិនឈ្មោះ ឆាយណាហ្គេត ខស (ខេមបូឌា) អ៊ិនវេសមេន។ អាជ្ញាធរអះអាងថា ពលរដ្ឋដែលចូល មករំលោភកាន់កាប់ដីរដ្ឋ ដែលចុះបញ្ជីរួចរាល់នេះ ក្រុមហ៊ុននឹងផ្តល់សំណងក្នុង ១ហិកតា ៣០០ដុល្លារអាមេរិក ឬ១លាន ២សែនរៀល (១.២០០.០០០ ) ជាថ្នូរនឹងការចាកចេញ ដើម្បីទុកលទ្ធភាពឲ្យក្រុមហ៊ុនវិនិយោគតាមផែនការមេ។
វីអូឌី មិនទាន់អាចទាក់ទង អភិបាលខេត្តព្រះវិហារស្តីទី លោក មិន ស៊ីថា ដើម្បីសុំការបំភ្លឺបន្ថែមជុំវិញរឿងនេះបាននៅឡើយទេ គិតត្រឹមម៉ោងផ្សាយនេះ។
ពលរដ្ឋម្នាក់ទៀតរស់នៅស្រុករវៀង លោក អ៊ុ យីន ប្រាប់វីអូឌីថា ពលរដ្ឋជិត ៤០០គ្រួសារ មិនសុខចិត្តចំពោះសេចក្តីសម្រេចរបស់អាជ្ញាធរនោះទេ ព្រោះពលរដ្ឋខ្លះបានផ្លាស់ទីលំនៅពីខេត្តបាត់ដំបង កំពង់ចាម និងកំពង់ធំ មករស់នៅតំបន់នេះ ពឹងផ្អែកលើដីកសិកម្មចិញ្ចឹមជីវិត ដើម្បីរកប្រាក់ដោះបំណុលជាង ១០ឆ្នាំមកហើយ។
លោកថា ពលរដ្ឋមានដីក្នុងតំបន់នោះចាប់ ៣ ហិកតា ដល់ជាង ១០ ហិកតា ដោយដាំដុះជាបន្តបន្ទាប់តាំងពីឆ្នាំ ២០១៣។
លោក អ៊ុ យីន និយាយថា៖ «បួនដប់ឆ្នាំជាងទៅហើយ ទើបមកបណ្ដេញគាត់ ហើយបើដីហ្នឹងដីក្រុមហ៊ុនម្តេចបានឱ្យគាត់មករស់នៅបានយូរដល់ម្ល៉ឹង។ គាត់លក់ដីស្រែចម្ការ មករស់នៅនេះយូរមកហើយ បងប្អូនយើងអត់ព្រម»។
ខ្លឹមសារញត្តិដែលមានស្នាមមេដៃពលរដ្ឋចំនួន ១៩៦នាក់ ក្នុងចំណោមពលរដ្ឋ ៣៩៧ គ្រួសារ ដែលមានដីអាស្រ័យផល ឋិតក្នុងឃុំស្តៅ, ឃុំចម្រើន ស្រុកសង្គមថ្មី និងពលរដ្ឋខ្លះទៀតរស់នៅក្នុងឃុំរមទម ស្រុករវៀង ខេត្តព្រះវិហារ មានទំហំសរុបជាង ២ពាន់ហិកតា។ ពួកគាត់ស្នើឱ្យលោកនាយករដ្ឋមន្ត្រី ហ៊ុន ម៉ាណែត កាត់ឆ្វៀលដីជូនពលរដ្ឋ ចេញពីក្រុមហ៊ុន ឆាយណាហ្គេត ខស (ខេមបូឌា) អ៊ិនវេសមេន។
អនុប្រធានផ្នែកសិទ្ធិមនុស្ស និងដីធ្លី នៃសមាគមការពារសិទ្ធិមនុស្សអាដហុក លោក យិន ម៉េងលី យល់ថា អាជ្ញាធរខេត្តគួរតែសម្របសម្រួលដោះស្រាយរឿងនេះជាមួយពលរដ្ឋឱ្យបានសមរម្យ ចៀសវាងគំរាមកំហែង និងប្រើប្រព័ន្ធច្បាប់ដាក់សម្ពាធពលរដ្ឋ ខណៈដែលអ្នកភូមិភាគច្រើនជំពាក់បំណុលធនាគារ។
លោកថា៖ «កាលដែលពលរដ្ឋស្វះស្វែងរកកិច្ចអន្តរាគមន៍ថ្នាក់ក្រសួង បានន័យថា ពលរដ្ឋអត់មានជំនឿលើថ្នាក់ក្រោមជាតិទៀតទេ។ គាត់អស់ជំនឿហើយ សូមក្រសួងពាក់ព័ន្ធ កុំបង្វែររឿងនេះទៅវិញ។ យើងកុំមើលលិខិតបទដ្ឋានគតិយុត្តិជាគោល យើងមើលការកាន់កាប់ជាក់ស្តែងផង»។
កាលពីថ្ងៃទី ២៤ ខែកុម្ភៈ ឆ្នាំ២០១២ រាជរដ្ឋាភិបាលបានចេញអនុក្រឹត្យផ្តល់ដីសម្បទានសេដ្ឋកិច្ចទំហំ ជិត ៦ ពាន់ហិកតា (៥៩៨០ហិកតា) ឱ្យក្រុមហ៊ុនចិនឈ្មោះ ឆាយណាហ្គេត ខស (ខេមបូឌា) អ៊ិនវេសមេន ស្ថិតក្នុងភូមិសាស្ត្រស្រុករវៀង និងស្រុកសង្គមថ្មី ខេត្តព្រះវិហារដោយវិនិយោគដាំណាំកសិឧស្សាហកម្មរួមមាន កៅស៊ូ, សូត្រ និង ដើមមន។ ក្រោយមកទៀត ក្រុមហ៊ុនចិនមួយនេះ ទទួលសិទ្ធិវិនិយោគដាំដំណាំឧស្សាហកម្មក្នុងឆ្នាំ២០១៧ និងបានចុះបញ្ជីដីរដ្ឋចំនួន ០៧ប័ណ្ណ លើផ្ទៃដីទំហំជិត ៦ ពាន់ហិកតា(៥ ៨៧១ហិកតា)។
នៅល្ងាចថ្ងៃដដែល ក្រុមពលរដ្ឋតវ៉ាជាង ១០០នាក់ បានវិលត្រឡប់ទៅផ្ទះវិញជាបន្តបន្ទាប់ ហើយពួកគាត់ពុំទាន់ទទួលដំណឹង ពីប្រមុខរដ្ឋាភិបាល លោកហ៊ុន ម៉ាណែត នៅឡើយទេថា អាជ្ញាធរជាតិនឹងចុះដោះស្រាយបញ្ហាជូនពលរដ្ឋនៅពេលណា? ៕
