ក្នុងរបាយការណ៍ប្រចាំឆ្នាំ២០២៥ ចេញផ្សាយនៅខែមីនានេះ សមាគមសម្ព័ន្ធអ្នកសារព័ត៌មាន ហៅកាត់ ខេមបូចា បានកត់ត្រាករណីរំលោភសិទ្ធិមនុស្សសរុបចំនួន៦១ កើតឡើងលើអ្នកសារព័ត៌មានចំនួន ៥៧នាក់ ក្នុងនោះមានអ្នកសារព័ត៌មានស្ត្រី ៥នាក់។
តួលេខនេះ កើនឡើងចំនួន៣នាក់ បើធៀបនឹងឆ្នាំ២០២៤ ដែលមានករណីអ្នកសារព័ត៌មានស្ត្រីរងគ្រោះចំនួន២នាក់។ ក្នុងចំណោមការរំលោភបំពាននៅឆ្នាំ២០២៥ ខេមបូចា បានកត់ត្រាករណីអំពើហិង្សាផ្អែកលើយេនឌ័រចំនួន ១ករណី ដែលអ្នកសារព័ត៌មានស្រ្តីម្នាក់ ដែលបានជួបប្រទះការយាយីផ្លូវភេទ ទាំងផ្លូវកាយ និងពាក្យសំដី ពីអ្នកគ្រប់គ្រងជាបុរសនៅកន្លែងធ្វើការ។
ករណីនេះ ខេមបូចា បានផ្ដល់ការគាំទ្រផ្នែកឌីជីថលដល់អ្នកសារព័ត៌មាននោះ និងបានបញ្ជូនទៅអង្គការដៃគូដើម្បីទទួលបានជំនួយផ្នែកច្បាប់ និងសុខុមាលភាពផ្លូវចិត្តទៅតាមសំណើរបស់នាង។
យោងតាមរបាយការណ៍ ខេមបូចា ក្នុងរយៈពេល៥ឆ្នាំចុងក្រោយ មានស្ត្រីអ្នកសារព័ត៌មានរងគ្រោះចំនួន ២៣នាក់ ឬស្មើនឹង៧ភាគរយនៃអ្នកសារព័ត៌មាន ដែលរងការយាយីក្នុងពេលបំពេញការងារ។ ក្នុងនោះឆ្នាំ២០២២ គឺជាឆ្នាំដែលមានស្ត្រីអ្នកសារព័ត៌មានរងគ្រោះច្រើនជាងគេដល់ទៅ៨នាក់។
ក្រៅពីរងការបំពាននៅក្នុងកន្លែងធ្វើការ ការគំរាមកំហែងពេលចុះបំពេញការងារមូលដ្ឋាន ការប្រើប្រាស់វិធានការច្បាប់ព្រហ្មទណ្ឌ និងការឃាត់ខ្លួនបណ្ដោះអាសន្នយកទៅឃុំឃាំងនៅពន្ធនាគារ ក៏បានក្លាយជាឧបសគ្គសម្រាប់អ្នកសារព័ត៌មានស្ត្រីប្រឡូកក្នុងវិស័យនេះផងដែរ។
ចាងហ្វាងគេហទំព័រសារព័ត៌មានសំឡេងចៅកម្សត់ អ្នកស្រី ធី សុផល ប្រាប់វីអូឌីនៅថ្ងៃទី៣១ ខែមីនា ថា អ្នកស្រីត្រូវបានសមត្ថកិច្ចឃាត់ខ្លួន និងយកទៅឃុំឃាំងបណ្ដោះអាសន្នក្នុងពន្ធនាគារអស់រយៈពេល ៣យប់ ក្រោមបទចោទកំហែងទារប្រាក់ ក្រោយអ្នកស្រីផ្សព្វផ្សាយអត្ថបទមួយ កាលពីខែមីនា ឆ្នាំ២០២៥។ អ្នកស្រីបន្តថា អ្វីដែលកាន់តែឈឺចាប់ គឺគេបានដាក់ឃុំអ្នកស្រីជាមួយអ្នកទោសគ្រឿងញៀន និងបង្ហាញពីវិសមភាពនៃការទទួលបានសិទ្ធិរបស់អ្នកជាប់ឃុំ។ ករណីនេះ បានធ្វើឱ្យអ្នកស្រីបាក់ស្បាតលែងហ៊ានរាយការណ៍រឿងក្ដៅតទៅទៀត។
អ្នកស្រី ធី សុផល និយាយថា៖ «តាំងពីខ្ញុំបាក់ស្បាតនឹងបញ្ហានោះមួយទៅ ខ្ញុំក៏លែងអានព័ត៌មានក្ដៅ លែងធ្វើ ចង់និយាយថា យើងបាក់កន្លែងនោះមួយទៅ យើងធ្វើតែព័ត៌មានអ្វីដែលត្រជាក់ ធ្វើជាព័ត៌មានពិធីការ ទទួលអានព័ត៌មាន ទទួលកាត់តវីដេអូនៅផ្ទះអញ្ចឹងទៅ។ តាំងពីនោះមក យើងឈប់ទៅ»។
ជាការកត់សម្គាល់ អ្នកសារព័ត៌មានអនឡាញ ជាពិសេសអ្នកដែលផ្សព្វផ្សាយលើបណ្តាញសង្គមហ្វេសប៊ុក ប្រឈមមុខនឹងការយាយីជាងអ្នកសារព័ត៌មានដែលធ្វើការនៅតាមអង្គភាពបែបប្រពៃណី ដូចជា កាសែត និងស្ថានីយ៍ទូរទស្សន៍ និងវិទ្យុ។
អ្នកសារព័ត៌មានម្នាក់ទៀតមកពីវិទ្យុស្ត្រី កញ្ញា មាស ដា លើកឡើងថា ការរាយការណ៍ពីបញ្ហាសេរីភាពបញ្ចេញមតិ សិទ្ធិមនុស្ស វិវាទព្រំដែន និងបញ្ហាពាក់ព័ន្ធនឹងអ្នកមានអំណាចតែងតែធ្វើឱ្យកញ្ញាព្រួយបារម្ភពីសុវត្ថិភាព ទោះបីបានគោរពទៅតាមវិជ្ជាជីវៈក្ដី។ កញ្ញាបន្តថា កញ្ញាក៏ធ្លាប់រងការប៉ះទង្គិចផ្លូវចិត្ត ក្រោយឃើញការបញ្ចេញមតិជេរប្រទេចនៅក្រោមស្នាដៃព័ត៌មានរបស់កញ្ញា ដែលបង្ហោះលើបណ្ដាញសង្គម។
កញ្ញា មាស ដា និយាយថា៖ «ដល់ពេលខ្លះឱ្យខ្ញុំឃើញរូបភាពហ្នឹងវាច្រើន ដូចជាការខំមិនអីផ្សេងៗ បើទោះបីជាគេមិនឆាត ឬក៏មិនទាក់ទងមកជេរមកស្តីយើងដោយផ្ទាល់អីក៏ដោយ ក៏ប៉ុន្តែយើងឃើញបែបប្រយោលៗនៅតាមខំមិនហ្នឹង ពេលយូរៗទៅយើងមានអារម្មណ៍ថាវាស៊ាំ វាលែងអី ក៏ប៉ុន្តែខ្ញុំនៅតែទទូចអត់ចង់ឱ្យមានរូបភាពបែបហ្នឹងបន្តទៀតទេ មកកាន់ស្រ្តីដែលជាអ្នកសារព័ត៌មានដែលក្នុងនាមយើងជាស្ត្រី»។
តាមរបាយការណ៍ក្រសួងព័ត៌មាន អ្នកសារព័ត៌មានជាស្ត្រីមានចំនួនប្រមាណ ១៣% នៃចំនួនអ្នកសារព័ត៌មានសរុបចំនួន ៨ ៧៣២ នាក់ ដែលក្រសួងព័ត៌មានបានផ្តល់បណ្ណសម្គាល់អ្នកសារព័ត៌មានជូន គិតត្រឹមខែតុលា ឆ្នាំ២០២៥។ ចំនួននេះមានការកើនឡើង ៦% បើធៀបក្នុងឆ្នាំ២០២៤។
ក្រសួងព័ត៌មាន ធ្លាប់បានលើកទឹកចិត្តដល់អ្នកសារព័ត៌មានស្ត្រី ឱ្យអនុវត្តការងារ សម្របខ្លួនទៅនឹងការវិវត្តក្នុងសង្គម ដោយគោរពនិយាមវិជ្ជាជីវៈ និងក្រមសីលធម៌ស្របតាមធម្មនុញ្ញវិជ្ជាជីវៈសារព័ត៌មាន។ ក្រៅពីផ្ដល់ការបណ្តុះបណ្តាល និងឱកាសការងារ ក្រសួងក៏បានលើកឡើងថា ការគាំពារសុវត្ថិភាព និងសម្របសម្រួលការដោះស្រាយបញ្ហាប្រឈមរបស់អ្នកសារព័ត៌មានជាស្ត្រីផងដែរ។
វីអូឌី មិនអាចទាក់ទង អនុរដ្ឋលេខាធិការ និងអ្នកនាំពាក្យក្រសួងព័ត៌មាន លោក ទេព អស្នារិទ្ធ ដើម្បីសុំការអត្ថាធិប្បាយបន្ថែមបានទេនៅថ្ងៃទី៣១ ខែមីនានេះ។
ជុំវិញរឿងនេះ នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា(ខេមបូចា) លោក ណុប វី មានប្រសាសន៍ថា លោកមិនទាន់ឃើញរដ្ឋាភិបាលដាក់ចេញគោលការណ៍ គោលនយោបាយ ឬការយកចិត្តទុកដាក់ជាពិសេសណាមួយទៅលើអ្នកសារព័ត៌មានស្ត្រីនៅឡើយទេ ខណៈស្ថាប័នសារព័ត៌មានមួយចំនួន មិនទាន់យល់ដឹងពីគោលការណ៍សមភាពយេនឌ័រ។
ក្នុងន័យនេះ លោកជំរុញឱ្យអ្នកពាក់ព័ន្ធកសាងបរិយាកាស និងទីកន្លែងការងារដែលមានសុវត្ថិភាពសម្រាប់ស្ត្រីជាអ្នកសារព័ត៌មាន។
លោក ណុប វី ថ្លែងថា៖ «ហើយមួយវិញទៀត យើងគួរតែដាក់ចេញនូវគោលនយោបាយ ដើម្បីកសាងគេហៅថា ទីកន្លែងការងារមួយដែលមានសុវត្ថិភាព ដូចជា ការរៀបចំឱ្យមានគោលនយោបាយស្ដីពីសមភាពយេនឌ័រ គោលនយោបាយស្ដីពីដែល sexual harassment មានន័យថា ការប្រឆាំងការបៀតបៀនផ្លូវភេទអីចឹងជាដើម»៕
