រដ្ឋមន្ត្រីក្រសួងការពារជាតិទីក្រុងម៉ាឌ្រីត លោកស្រី ម៉ារហ្គារីតា រ៉ូប្លេស (Margarita Robles) បានមានប្រសាសន៍ថា ប្រទេសអេស្ប៉ាញបានបិទដែនអាកាសរបស់ខ្លួន ចំពោះយន្តហោះអាមេរិកដែលពាក់ព័ន្ធនឹងការវាយប្រហារលើប្រទេសអ៊ីរ៉ង់។
លោកស្រីបានបន្តថា «យើងនឹងមិនអនុញ្ញាតឱ្យប្រើប្រាស់ [មូលដ្ឋានទ័ព] Morón និង Rota សម្រាប់សកម្មភាពណាមួយដែលពាក់ព័ន្ធនឹងសង្រ្គាមក្នុងប្រទេសអ៊ីរ៉ង់នោះទេ» ដោយបន្ថែមថា អេស្ប៉ាញបាន «បញ្ជាក់រឿងនេះយ៉ាងច្បាស់ទៅកាន់រដ្ឋាភិបាលអាមេរិកតាំងពីដំបូងមកម្ល៉េះ»។
រដ្ឋមន្ត្រីការបរទេសលោក José Manuel Albares បានថ្លែងថា គោលបំណងនៃការសម្រេចចិត្តនេះ គឺដើម្បី «មិនធ្វើអ្វីដែលអាចជំរុញឱ្យមានការកើនឡើងនៃសង្រ្គាមនេះ»។
សហរដ្ឋអាមេរិក មិនបានធ្វើការអត្ថាធិប្បាយភ្លាមៗនោះទេ ប៉ុន្តែប្រធានាធិបតី Donald Trump ធ្លាប់បានគំរាមកំហែងដាក់ទណ្ឌកម្មលើការដោះដូរពាណិជ្ជកម្មទាំងស្រុង ប្រឆាំងនឹងប្រទេសអេស្ប៉ាញ ចំពោះការប្រឆាំងនឹងសង្រ្គាមអ៊ីរ៉ង់នេះ។
ចាប់តាំងពីការចាប់ផ្តើមនៃសង្រ្គាមនៅចុងខែកុម្ភៈមក នាយករដ្ឋមន្ត្រីអេស្ប៉ាញ លោក Pedro Sánchez គឺជាអ្នកប្រឆាំងដ៏សកម្មបំផុតម្នាក់ចំពោះការវាយប្រហាររបស់អាមេរិក និងអ៊ីស្រាអែលលើអ៊ីរ៉ង់ ដោយហៅសកម្មភាពទាំងនោះថាជាការ «មិនទទួលខុសត្រូវ» និង «ខុសច្បាប់»។
កាលពីដើមខែមីនា លោក Sánchez បាននិយាយថា អេស្ប៉ាញបានបដិសេធមិនឱ្យអាមេរិកប្រើប្រាស់មូលដ្ឋានទ័ពរួមគ្នាពីរ គឺ Rota និង Morón ដែលស្ថិតនៅក្នុងតំបន់ Andalusia នោះទេ។
កាលពីថ្ងៃទី២៥ខែមីនាសប្តាហ៍មុន លោកក៏បានប្រកាសផងដែរថា៖ «រាល់គម្រោងហោះហើរទាំងអស់ដែលមានការពាក់ព័ន្ធនឹងប្រតិបត្តិការក្នុងប្រទេសអ៊ីរ៉ង់ត្រូវបានបដិសេធ – គឺគ្រប់គម្រោងទាំងអស់ រួមទាំងយន្តហោះចាក់ប្រេងផងដែរ»។
លោកបានមានប្រសាសន៍ថា៖ «យើងជាប្រទេសដែលមានអធិបតេយ្យភាព ដែលមិនប្រាថ្នាចង់ចូលរួមក្នុងសង្រ្គាមខុសច្បាប់ឡើយ»។
យន្តហោះទម្លាក់គ្រាប់បែករបស់អាមេរិកមួយចំនួន ដែលពាក់ព័ន្ធនឹងប្រតិបត្តិការក្នុងប្រទេសអ៊ីរ៉ង់ ត្រូវបានដាក់ពង្រាយនៅមូលដ្ឋាន RAF Fairford ក្នុងតំបន់ Gloucestershire នៃចក្រភពអង់គ្លេស បន្ទាប់ពីនាយករដ្ឋមន្ត្រី Sir Keir Starmer បានប្រកាសកាលពីថ្ងៃទី១ ខែមីនាថា ចក្រភពអង់គ្លេសបានយល់ព្រមតាមសំណើរបស់សហរដ្ឋអាមេរិក។
យន្តហោះដែលហោះចេញពីទីនោះ នឹងត្រូវបង្ខំឱ្យហោះវាងឧបទ្វីបអាយប៊ីរៀ (Iberian) ភាគច្រើន ដោយហោះកាត់មហាសមុទ្រអាត្លង់ទិកខាងកើត ឬប្រទេសបារាំងជំនួសវិញ។
កាសែតអេស្ប៉ាញ El País បានរាយការណ៍ថា យន្តហោះទាំងនោះ អាចធ្វើដំណើរឆ្លងកាត់ដែនអាកាសអេស្ប៉ាញ ឬចុះចតនៅមូលដ្ឋានទ័ពបាន លុះត្រាតែមានករណីអាសន្នប៉ុណ្ណោះ។
នៅក្នុងសុន្ទរកថាតាមទូរទស្សន៍រយៈពេល ១០ នាទីកាលពីថ្ងៃទី៤ ខែមីនា នាយករដ្ឋមន្ត្រីអេស្ប៉ាញ បានរំលឹកដល់សង្រ្គាមនៅអ៊ុយក្រែន និងហ្គាហ្សា ក៏ដូចជាសង្រ្គាមអ៊ីរ៉ាក់កាលពីជាង ២០ ឆ្នាំមុន ហើយបាននិយាយថា ជំហររបស់រដ្ឋាភិបាលអេស្ប៉ាញអាចសង្ខេបបានថា «ទេចំពោះសង្រ្គាម»។
ក្រោយមកនៅក្នុងខែមីនា ស្ថានទូតអ៊ីរ៉ង់ប្រចាំប្រទេសអេស្ប៉ាញបាននិយាយថា ទីក្រុងតេអេរ៉ង់នឹងទទួលយកសំណើពីទីក្រុងម៉ាឌ្រីតទាក់ទងនឹងការឆ្លងកាត់ច្រកសមុទ្រ Hormuz ពីព្រោះអេស្ប៉ាញ «បានប្តេជ្ញាចិត្តចំពោះច្បាប់អន្តរជាតិ»៕
