ពលរដ្ឋមួយគ្រួសាររស់នៅភូមិក្រពើ ឃុំទួលគ្រើល ស្រុកប្រាសាទបល្ល័ង្ក ខេត្តកំពង់ធំ អំពាវនាវឱ្យមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា ជួយអន្តរាគមន៍ក្នុងករណីមន្ត្រីអាវុធហត្ថម្នាក់នៅខេត្តកំពង់ធំឈ្មោះ រស់ តឿ បានយកលុយពួកគាត់ជាង ១ម៉ឺនដុល្លារ (១៤ ០០០ដុល្លារ) ជាថ្នូររត់ការកូនប្រុសរបស់គាត់ ឱ្យបម្រើការងារក្នុងក្របខណ្ឌក្រសួងការពារជាតិ ក៏ប៉ុន្តែមិនជោគជ័យជិត២ឆ្នាំមកហើយ។
ពលរដ្ឋរស់នៅភូមិក្រពើ ខេត្តកំពង់ធំ អ្នកស្រី អ៊ាវ លា វ័យ ៤៩ ឆ្នាំ លើកដៃសំពះស្នើសុំកិច្ចអន្តរាគមន៍ពីលោក សៅ សុខា ព្រោះថវិកានោះ គ្រួសារអ្នកស្រីបានខ្ចីបុលពីធនាគារ ដោយយកប្លង់ដី និងផ្ទះធ្វើជាទ្រព្យបញ្ចាំ។
អ្នកស្រីអះអាងតាមវីដេអូផ្សព្វផ្សាយតាមបណ្តាញសង្គមថា មកទល់ពេលនេះ អ្នកស្រីពុំមានលទ្ធភាពរកប្រាក់សងបំណុលធនាគារនោះទេ ហើយអ្នកស្រីទទូចឱ្យ លោក រស់ តឿ ត្រូវសងប្រាក់ជូនគ្រួសារលោកវិញ។
អ្នកស្រីថា៖ «គាត់អត់បាត់ទេ លុយខ្ញុំបើកូនខ្ញុំអត់បានកើតការអី គាត់ឱ្យមកវិញ ១០០ លុយខ្មែរក៏អត់បានដែរ ដល់ហេតុអីដល់ខ្ញុំសួរ ដល់គាត់មានគាត់ឱ្យ។ អត់ទាន់មាន គាត់ចាំយកពីគេដែរ តែខ្ញុំអត់ទេ ខ្ញុំដាក់ហ្នឹងគាត់ ខ្ញុំដឹងនឹងគាត់ហ្នឹង»។
លិខិតកិច្ចសន្យា១សន្លឹកដែលវីអូឌីទទួលបានមានស្នាមមេដៃម្ចាស់ប្រាក់ ឈ្មោះ អ៊ាវ លា និងស្នាមមេដៃអ្នកទទួលប្រាក់ ឈ្មោះ រស់ តឿ មុខរបរជាមន្ត្រីអាវុធហត្ថ មានតួនាទីជាប្រធានមន្ទីរទំនាក់ទំនងកិច្ចការសាធារណៈនៃបញ្ជាការដ្ឋានកងរាជអាវុធហត្ថខេត្តកំពង់ធំ។
ខ្លឹមសារក្នុងកិច្ចសន្យានោះ មន្ត្រីអាវុធហត្ថ លោក រស់ តឿ បានទទួលប្រាក់ ១ម៉ឺន ៤ពាន់ដុល្លារ (១៤.០០០) នៅថ្ងៃទី១៣ ខែមិថុនា ឆ្នាំ២០២៤។ ក៏ប៉ុន្តែមកទល់ពេលនេះ កូនប្រុសអ្នកស្រី អ៊ាវ លា និង ស្វាមី គ្មានឈ្មោះក្នុងក្របខណ្ឌក្រសួងការពារជាតិនៅឡើយទេជិត២ឆ្នាំមកហើយ។ ពួកគាត់រៀបរាប់ក្នុងវីដេអូថា ពេលនេះពួកគាត់ទាល់ច្រកគ្មានលទ្ធភាពរកប្រាក់សងបំណុលធនាគារ។
ប្តីអ្នកស្រី អ៊ាវ សា និយាយថា៖ «អាវុធហត្ថលើផ្ទៃប្រទេសជួយដោះស្រាយ ឱ្យ រស់ តឿ រកលុយកាក់ឱ្យខ្ញុំវិញ ព្រោះខ្ញុំរាល់ថ្ងៃកំពុងវេទនា អត់មានលុយបង់អង្គការ(ធនាគារ) ព្រោះខ្ញុំរាល់ថ្ងៃគ្មានមុខរបរ រកអីបានទេ មានតែកាប់ជន្លេន ដើរធ្វើការចម្ការបញ្ចាំគេអស់រលីងហើយ»។
វីអូឌី មិនទាន់អាចទាក់ទងសុំការបំភ្លឺជុំវិញការចោទប្រកាន់នេះ ពីមន្ត្រីអាវុធហត្ថ លោក រស់ តឿ បាននៅឡើយទេនៅថ្ងៃទី០១ខែមេសា ដោយទូរសព្ទហៅចូលច្រើនដងតែគ្មានអ្នកលើក។
ចំណែកអ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី ប្រាប់វីអូឌីយ៉ាងខ្លីថា កងអាវុធលើផ្ទៃប្រទេសកំពុងចាត់វិធានការរឿងនេះ ហើយប្រសិនបើរកឃើញថា មន្ត្រីអាវុធហត្ថរូបណាប្រព្រឹត្តល្មើសច្បាប់នឹងចាត់វិធានការតាមច្បាប់។
លោកថា៖ «យើងកំពុងធ្វើហ្នឹងហើយ អាហ្នឹងបើគាត់ធ្វើល្មើសច្បាប់ អនុវត្តច្បាប់»។
ជុំវិញរឿងនេះ នាយកទទួលបន្ទុកកិច្ចការទូទៅអង្គការលីកាដូ លោក អំ សំអាត ពន្យល់ថា ករណីនេះជាអំពើពុករលួយដោយអ្នករត់ការ និងអ្នកទទួលប្រាក់សំណូកត្រូវមានទោសដូចគ្នា ក៏ប៉ុន្តែពលរដ្ឋអាចមានទោសស្រាលជាងដោយសារគាត់អាចមិននឹងដឹងពីច្បាប់។
លោកថា កងរាជរាជអាវុធហត្ថគួរតែពន្លឿនស៊ើបអង្កេតករណីនេះ និងដោះស្រាយ ចៀសវាសងកុំឱ្យកើតមានលើកក្រោយទៀត ព្រោះប៉ះពាល់មុខមាត់កងរាជរាជអាវុធហត្ថ។
លោក អំ សំអាត ថ្លែងថា៖ «បាទ! នៅពេលដែលទទួលព័ត៌មាននេះហើយ ជាពិសេសកងរាជរាជអាវុធហត្ថ ត្រូវមានការបើកការស៊ើបករណីនេះ ដើម្បីស្វែងរកការពិត នឹងចាត់វិធានការច្បាប់ ដើម្បីជាគំរូ ទប់ស្កាត់ករណីនេះ ចៀសវាងកុំឱ្យមានអំពើទាំងអស់នេះកើតឡើងក្រោយទៀត ពលរដ្ឋរងគ្រោះ»។
កន្លងទៅ រដ្ឋមន្ត្រីក្រសួងមុខងារសាធារណៈ លោក ហ៊ុន ម៉ានី បានដាក់ចេញគន្លឹះពង្រឹងធនធានមនុស្ស និងប្រសិទ្ធភាពការងារសាធារណៈ ដោយរួមចំណែកលើកកម្ពស់យុត្តិធម៌សង្គម ជំរុញឱ្យអនុវត្តប្រព័ន្ធជ្រើសរើសមន្ត្រីចូលបម្រើការងាររដ្ឋ ប្រកបដោយគុណភាព តម្លាភាព យុត្តិធម៌ បរិយាបន្ន និងប្រសិទ្ធភាព ស្របតាមនិយាមនីតិវិធីប្រតិបត្តិ។
រីឯការប្រឡងជ្រើសរើសមន្ត្រីរាជការ និងកងកម្លាំងប្រដាប់អាវុធផ្អែកលើសមត្ថភាព ដោយលោក ហ៊ុន ម៉ានី បញ្ជាក់ថា ការប្រឡងប្រជែងជ្រើសរើសមន្ត្រីរាជការ មិនចាំបាច់ត្រូវស្គាល់អ្នកធំ និងមានខ្សែនោះទេ តែចាំបាច់ត្រូវមានសមត្ថភាព។
ក៏ប៉ុន្តែពលរដ្ឋសង្កេតឃើញថា ការអនុវត្តគោលនយោបាយរបស់រដ្ឋាភិបាលនៅមានតិចតួចនៅឡើយ ខណៈដែលអំពើពុករលួយនៅតែកើតមានច្រើន ទាល់តែផ្ទុះរឿងល្បីតាមបណ្តាញសង្គម ទើបអាជ្ញាធរចាត់វិធានការមួយៗ៕
