ខណៈជនបង្កគ្រោះថ្នាក់ចរាចរណ៍សម្លាប់មនុស្ស៦នាក់ មិនទាន់បានចាប់ខ្លួននៅឡើយនោះ កម្លាំងសមត្ថកិច្ចខេត្តបាត់ដំបង បែរជាសស្រាក់សស្រាំចាប់ផ្សឹកព្រះសង្ឃមួយអង្គ សកម្មលើកឡើងពីបញ្ហាសង្គម និងរឿងថៃឈ្លានពានទឹកដី។
ព្រះសង្ឃគង់នៅវត្តធម្មនិមិត្តរាជបុប្ផារាម ហៅវត្តបច្ឆា ព្រះនាម ជា វុទ្ធី ត្រូវបានអាជ្ញាធរឯកសណ្ឋានស៊ីវិលរុញចូលឡានភ្លាមៗ បន្ទាប់ពីព្រះអង្គចេញពីជួបព្រះចៅអធិការវត្តពោធិ៍វាល នៅប្រហែលម៉ោង៨ព្រឹក។
បើតាមព្រះសង្ឃមួយអង្គស្ថិតក្នុងហេតុការណ៍ព្រឹកនេះ បានបញ្ជាក់ថា អាជ្ញាធរពុំបានបង្ហាញដីកា ឬប្រាប់ពីមូលហេតុនៃការចាប់ព្រះកាយព្រះអង្គ ជា វុទ្ធី ឡើយ ហើយក៏មិនបានប្រាប់ថានឹងនាំព្រះកាយទៅទីណា រហូតដល់មានដំណឹងថាព្រះអង្គត្រូវបានចាប់ផ្សឹកនៅម៉ោងប្រហែល៩ព្រឹក។
ព្រះសង្ឃអង្គនោះមានសង្ឃដីកាថា៖ «មិននឹកស្មានថាគេឱ្យលោកឡើងឡានហើយចាប់ផ្សឹកអ៊ីចឹង[…] ឡានរបស់អាជ្ញាធរ មានម៉ូតូផង មានឡានផង ច្រើនដែរប្រហែលបួនដប់នាក់នោះ។ […] ដូចអត់មានប្រាប់អីផង គេគ្រាន់តែនិមន្តលោកឱ្យឡើងឡាន ហើយអាត្មាខំជិះតាមឡានដែរ ប៉ុន្តែអត់ឃើញឡាន រហូតដល់លេចឮដំណឹងថាចាប់ផ្សឹកបាត់ហើយ»។
អនុប្រធានផ្នែកសិទ្ធិមនុស្ស និងដីធ្លី នៃសមាគមការពារសិទ្ធិមនុស្សអាដហុក (ADHOC) លោក យិន ម៉េងលី បានបញ្ជាក់ប្រាប់វីអូឌីថា ព្រះតេជព្រះគុណ ជា វុទ្ធី ពិតជាត្រូវបានផ្សឹកពិតមែន ខណៈអាជ្ញាធរក៏បានបញ្ជូនលោកទៅតុលាការខេត្តបាត់ដំបងផងដែរ។
លោកថា៖ «លោកត្រូវបានផ្សឹក ហើយបញ្ជូនទៅតុលាការហើយ»។
ព្រះតេជព្រះគុណ ជា វុទ្ធី គឺជាសកម្មជនភេទសង្ឃមួយអង្គដែលតែងតែបញ្ចេញមតិឈឺឆ្អាល នឹងបញ្ហាសង្គមជាតិ ខណៈព្រះអង្គក៏ជាពលរដ្ឋអ្នកសារព័ត៌មានសកម្មផងដែរ។
ពលរដ្ឋនៅខេត្តបាត់ដំបង ធ្លាប់សាងផ្នួសជាង១០វស្សា គឺលោក ព្រហ្ម សិលា រិះគន់ទង្វើអាជ្ញាធរខេត្តបាត់ដំបង ថាទុរយស និងអគុណធម៌ ជាន់ឈ្លីទាំងច្បាប់ជាតិ និងពុទ្ធវិន័យ។ លោកបានពន្យល់ថា ការចាប់ផ្សឹកអាចធ្វើបាន លុះត្រាព្រះសង្ឃអង្គនោះ ប្រព្រឹត្តខុសនឹងបរាជិកទាំង៤ ដែលមានចែងក្នុងព្រះត្រៃបិដក។
លោក ព្រហ្ម សិលា និយាយថា៖ «ការចាប់ផ្សឹកព្រះសង្ឃនៅបាត់ដំបងហ្នឹង គឺមិនត្រឹមត្រូវតាមព្រះវិន័យទេ ដោយសារព្រះសង្ឃអង្គនោះ មិនត្រូវបានគេរកឃើញថា ត្រូវទោសបរាជិក រហូតដល់ថ្នាក់អស់ភេទជាព្រះសង្ឃទេ ហើយការចាប់ផ្សឹកបែបនេះ គឺជាការចាប់ផ្សឹកដោយបង្ខំ ហើយប្រសិនបើបុគ្គលដែលគេត្រូវបង្ខំឱ្យផ្សឹកហ្នឹង នៅអាឡោះអាល័យភេទជាព្រះសង្ឃ គឺនៅតែហៅថា ជាព្រះសង្ឃដដែល ទោះបីជាគេបង្ខំឱ្យស្លៀកពាក់ខោអាវក៏ដោយ»។
លើសពីការបំពានច្បាប់កំពូលរបស់ជាតិ ដែលចែងថា ព្រះសង្ឃក៏មានសិទ្ធិសេរីភាពក្នុងការបញ្ចេញមតិ ពលរដ្ឋខាងលើបន្ថែមថា ករណីចាប់ផ្សឹកព្រះសង្ឃ នៅពេលនេះ គឺស្មើនឹងបំផ្លិចបំផ្លាញព្រះពុទ្ធសាសនា និងជាន់ឈ្លីលើការលះបង់របស់ព្រះសង្ឃ ដែលខំការពារអត្តសញ្ញាណជាតិខ្មែររាប់រយឆ្នាំកន្លងមក។ ករណីនេះ លោកស្នើឱ្យមេដឹកនាំកំពូលកម្ពុជា គឺលោក ហ៊ុន សែន ពិនិត្យលើករណីនេះឡើងវិញ។
លោក ព្រហ្ម សិលា ថ្លែងថា៖ «ជាចុងក្រោយ គឺសូមស្នើដល់មេដឹកនាំកម្ពុជា (លោក ហ៊ុន សែន) ដែលជាអតីតក្មេងវត្ត ធ្លាប់ស៊ីបាយបាត្រ ធ្លាប់បម្រើព្រះសង្ឃ ដឹងទុក្ខធុរៈព្រះសង្ឃហ្នឹង គួរតែយោគយល់ ហើយនិងអធ្យាស្រ័យ ហើយនិងពិនិត្យឡើងវិញចំពោះការធ្វើទុក្ខបុកម្នេញទៅលើព្រះសង្ឃដែលធ្វើការសង្គម ឬក៏មានមនសិការជាតិ។ ហើយបើយើងមើលទៅលើប្រវត្តិដើមវិញ អក្សរសាស្ត្រខ្មែរយើងសព្វថ្ងៃនេះ ដែលអាចគង់វង្សនៅបាន គឺដោយសារតែមានការចូលរួមអភិរក្សដាច់អហង្ការ ពីសំណាក់ព្រះសង្ឃនៅតាមវត្តអារាមហ្នឹង ដែលបានបន្តកេរមរតកវប្បធម៌ អក្សរសាស្ត្រអី ដល់យើងប្រើសព្វថ្ងៃ កុំអីហ្នឹង គឺបារាំងបង្ខំយើងឱ្យប្រើអក្សរឡាតាំងដូចយួន ដូចអីបាត់ទៅហើយ»។
នៅមុនការចាប់ព្រះកាយ ព្រះតេជព្រះគុណ ជា វុទ្ធី ធ្លាប់ប្រាប់ទៅមនុស្សជិតស្និទ្ធព្រះអង្គថា មានអ្នកគំរាមឱ្យព្រះអង្គចុះចូលជាមួយគណបក្សកាន់អំណាច តែព្រះអង្គមិនព្រម រហូតត្រូវបានមន្ទីរធម្មការ និងសាសនាខេត្តបាត់ដំបង និមន្តទៅជួបនៅវត្តពោធិ៍វាល និងឈានដល់ការចាប់ផ្សឹក ហើយវាយខ្នោះបញ្ជូនទៅតុលាការ។
វីអូឌី មិនអាចទាក់ទងស្នងការនគរបាលខេត្តបាត់ដំបង លោក ដាញ់ អេងប៊ុនចាន់ និង ប្រធានមន្ទីរធម្មការ និងសាសនាខេត្តបាត់ដំបង លោក គុណ សម្បត្តិមុនីរតន៍ ដើម្បីសុំការអត្ថាធិប្បាយលម្អិតជុំវិញករណីនេះបានទេ នៅថ្ងៃទី១ ខែមេសា។
នេះមិនមែនជាលើកទីមួយឡើយ ដែលរដ្ឋាភិបាលក្រោមការគ្រប់គ្រងរបស់គណបក្សប្រជាជនកម្ពុជា តែងធ្វើទុក្ខបុកម្នេញទៅលើព្រះសង្ឃ មានទាំងការជេរប្រមាថ ហិង្សា និងចាប់ផ្សឹកដាក់ពន្ធនាគារ រាល់ព្រះសង្ឃអង្គណាដែលចូលរួមសកម្មភាពនយោបាយ និងការបញ្ចេញមតិ។
ស្របពេលដែលកម្ពុជាកំពុងញាំញីដោយបញ្ហាទាំងក្នុងតំបន់ និងសកល ជាពិសេសគឺជនបង្កគ្រោះថ្នាក់ចរាចរណ៍សម្លាប់ជីវិតមនុស្សជាច្រើននាក់ បន្តនៅក្រៅសំណាញ់ច្បាប់ ប្រជាពលរដ្ឋ និងព្រះសង្ឃ ទាមទារឱ្យអាជ្ញាធរខេត្តបាត់ដំបង និងរដ្ឋាភិបាលលោក ហ៊ុន ម៉ាណែត ដោះស្រាយបញ្ហាពិតប្រាកដនៅចំពោះមុខ ជាជាងបិទខ្ទប់សំឡេងរិះគន់ និងការបញ្ចេញមតិដែលគ្រាន់តែមានបំណងចង់កែលម្អសង្គម៕
