លោក រ៉ុង ឈុន ដែលស្គាល់ថាសកម្មជំរុញតម្លាភាពសង្គម និងបញ្ហាព្រំដែន បាននិយាយថា លោកនឹងបន្តប្តឹងទៅតុលាការកំពូល ប្រឆាំងនឹងបទចោទទោះដឹងថាមិនឈ្នះក្តីក៏ដោយ តែថាមហាជននឹងផ្តល់យុត្តិធម៌ឱ្យលោក ខណៈសាលាឧទ្ធរណ៍ តម្កល់ទោស និងដកសិទ្ធិធ្វើនយោបាយលោកជាអចិន្ត្រៃយ៍ក៏ដោយ។
ក្នុងសន្និសីទសារព័ត៌មាន នៅក្នុងរាជធានីភ្នំពេញ នៅថ្ងៃទី១ ខែមេសានេះ លោក រ៉ុង ឈុន បាននិយាយថា តាមច្បាប់លោកមានសិទ្ធិប្តឹងឱ្យសាលាឧទ្ធរណ៍ ឱ្យកាត់ក្តីសំណុំរឿងនេះឡើងវិញ ដោយថា ការតម្កល់បទចោទនេះ ឧទ្ធរណ៍ធ្វើឡើងកំបាំងមុខ ដែលលោកមានសិទ្ធិទាមទារឱ្យកាត់ឡើងវិញ។
លោកបន្តថា បើឧទ្ធរណ៍នៅតែកាត់ឱ្យលោកចាញ់ក្តី លោកនឹងបន្តប្តឹងទៅតុលាការកំពូលទៀត ប្រឆាំងនឹងបទចោទនេះ ដើម្បីបញ្ជាក់ថា លោកមិនបានធ្វើអ្វីខុសដូចការចោទប្រកាន់ ទោះលោកដឹងមុនថា មិនអាចឈ្នះក្តី ក្នុងសំណុំរឿងនេះក៏ដោយ។
សមា្រប់លោក រ៉ុង ឈុន ច្បាប់នៅស្រុកខ្មែរ មិនអាក្រក់ទេ តែអ្នកកាត់ក្តីទេ ដែលមិនបានធ្វើតាមវិជ្ជាជីវៈ ដែលលោកថា ហាក់បីដូចទទួលឥទ្ធិពលនយោបាយ។
តែយ៉ាងណា លោកគិតថា មហាជននឹងផ្តល់យុត្តិធម៌ឱ្យលោក ដោយសំអាងអ្វីដែលលោកបានធ្វើ គឺដើម្បី សិទ្ធិសេរីភាព ប្រជាធិបតេយ្យ សិទ្ធិការងារ និងជំរុញការលើកកម្ពស់ជីវភាពកសិករ មិនបានបំផ្លាញជាតិ ទោះទេ។
លោកថា៖ «បើទោះបីប្រព័ន្ធច្បាប់មិនផ្តល់យុត្តិធម៌ឱ្យខ្ញុំ ខ្ញុំនៅតែសង្ឃឹមថា ប្រជាពលរដ្ឋលោកនឹងផ្តល់យុត្តិធម៌ឱ្យខ្ញុំ ទោះបីគាត់មិនចេញស្តីក៏ដោយ ប៉ុន្តែបេះដូងរបស់គាត់រាប់សិបម៉ឺនលាននាក់ គាត់នឹងផ្តល់យុត្តិធម៌ឱ្យខ្ញុំ ដោយសារតែគាត់មើលឃើញថា ខ្ញុំធ្វើដើម្បីឧត្តមប្រយោជន៍ជាតិ ធ្វើដើម្បីពួកគាត់ ពីព្រោះយើងអត់ដែលទៅបំផ្លាញជាតិបន្តិចណាទេ»។
លោកសង្កត់ធ្ងន់ដែរថា គណបក្សប្រឆាំងមានតួនាទីសំខាន់ចូលរួមចង្អុលបង្ហាញភាពខ្វះចន្លោះ រាល់បញ្ហាដែលបានកើតឡើងក្នុងសង្គម ដើម្បីឱ្យរដ្ឋាភិបាលបំពេញកាតព្វកិច្ចបម្រើពលរដ្ឋ និងប្រទេសជាតិ ។
លោកថា៖ «ដូចករណីឈ្លានពានពីប្រទេសថៃអីចឹង យើងមើលឃើញថា រដ្ឋាភិបាលត្រូវប្រើប្រាស់យន្តការច្បាប់អន្តរជាតិ ត្រូវប្រើប្រាស់ស្មារតីកិច្ចព្រមព្រៀងទីក្រុងប៉ារីស ស្តីពីដំណោះស្រាយកម្ពុជា។ អាហ្នឹងបក្សប្រឆាំងយើងបានជូនប៉ុណ្ណឹង ហើយរឿងសម្រេចអនុវត្តមិនអនុវត្តគឺជាកាតព្វកិច្ចរបស់អ្នកដឹកនាំរដ្ឋ ប៉ុន្តែបក្សប្រឆាំងយើងត្រូវធ្វើឱ្យអស់លទ្ធភាព»។
ជុំវិញភាពចម្រូងចម្រាសនេះ លោកបណ្ឌិត មាស នី ជាអ្នកតាមដានស្ថានការណ៍នយោបាយមួយរូប មើលឃើញថា បញ្ហាដែលបានកើតឡើងលើ លោក រ៉ុង ឈុន អាចមកពីរដ្ឋាភិបាលបារម្ភពីការប្រកួតប្រជែងដោយស្មើភាពច្រើនជាង ដែលថាដូចករណីដែលបានចោទប្រកាន់ លោក កឹម សុខា ។
មួយវិញទៀត លោកថា ក្នុងការលៈទេសដែលរដ្ឋាភិបាលកំពុងរងការរិះគន់ខ្លាំងពីបញ្ហាព្រំដែន ដូចនេះ វិធានទប់ស្កាត់ចរន្តខាងក្នុង ជាជ្រុងមួយទៀត ដែលរដ្ឋាភិបាលព្រួយបារម្ភ។
លោកថា៖ «ខ្ញុំគិតថា គណបក្សកាន់អំណាច គាត់នៅតែមានការប្រុងប្រយ័ត្នខ្ពស់ ព្រោះបញ្ហាទាំងពីរនេះវាអត់អាចចែកគ្នាឲ្យដាច់បានទេ ព្រោះបើកាលណាបញ្ហាព្រំដែននៅតែក្តៅ គឺការប្រុងប្រយ័ត្នសម្រាប់កម្លាំងនៃការរិះគន់ខាងក្នុងក៏នៅតែកាន់តែខ្ពស់។ អញ្ចឹងសម្រាប់ខ្ញុំ អ្វីដែលជាការសម្រេចរបស់តុលាការទៅលើ លោក រ៉ុង ឈុន នេះ វាមិនមានអីចម្លែកទេ។ រឿងនយោបាយត្រូវហើយ បើកាលណារឿងនយោបាយមិនទាន់ត្រជាក់ រឿងហ្នឹងក៏នៅតែបន្ត តទៅទៀតដែរ។ នេះជាការយល់ឃើញរបស់ខ្ញុំទេ!»។
សាលាឧទ្ធរណ៍ភ្នំពេញ បានសម្រេចតម្កល់សាលក្រមសាលាដំបូងរាជធានីភ្នំពេញ ដែលបានផ្តន្ទាទោស លោក រ៉ុង ឈុន ពីបទ ញុះញង់បង្កឱ្យមានភាពវឹកវរធ្ងន់ធ្ងរ ដល់សន្តិសុខសង្គម ដែលបានធ្វើឡើងកាលពី ខែឧសភា ឆ្នាំ២០២៥។ ហើយពេលនេះ បានបន្ថែមការផ្តន្ទាទោសលើ លោករ៉ុង ឈុន ដោយបានដកហូតសិទ្ធិនយោបាយជាអចិន្រ្តៃយ៍ តាមបញ្ញតិ្តមាត្រា ៤៩៨ នៃក្រមព្រហ្មទណ្ឌ។
ទាក់ទិនបញ្ហានេះដែរ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត បានចាត់ទុកសេចក្តីសម្រេច របស់សាលាឧទ្ធរណ៍ បានបង្ហាញកាន់តែច្បាស់ថា រដ្ឋាភិបាល លោក ហ៊ុន ម៉ាណែត គ្មានបំណងផ្សះផ្សាជាតិ តាមបំណងរបស់ប្រជាពលរដ្ឋ ដើម្បីរួមគ្នាទាមទារទឹកដីពីថៃឈ្លានពាននោះទេ។
មួយវិញទៀត លោកថា វិធានរបស់តុលាការនេះ ក៏ឆ្លុះបញ្ចាំងផងដែរថា មេដឹកនាំបក្សកាន់អំណាចខ្លាចស្រមោលខ្លួនឯង មិនហ៊ានប្រកួតអំណាចតាមគន្លងប្រជាធិបតេយ្យ ព្រោះបានសាងកំហុសជាច្រើន រួមទាំងធ្វើឱ្យបាត់បង់ទឹកដីទៅប្រទេសជិតខាង មានវៀតណាម និងថៃថ្មីៗនេះជាដើម៕
