លោកប្រធានាធិបតី ដូណាល់ ត្រាំ បានមានប្រសាសន៍ថា សហរដ្ឋអាមេរិកអាចបញ្ចប់ការវាយប្រហារយោធារបស់ខ្លួនលើប្រទេសអ៊ីរ៉ង់ក្នុងរយៈពេលពី ២ ទៅ ៣ សប្តាហ៍ទៀត ហើយទីក្រុងតេហេរ៉ង់មិនចាំបាច់ធ្វើកិច្ចព្រមព្រៀងណាមួយជាលក្ខខណ្ឌមុន ដើម្បីឱ្យជម្លោះនេះថយចុះកម្តៅនោះទេ។
ការថ្លែងនេះ បានបញ្ជាក់យ៉ាងច្បាស់នូវសេចក្តីថ្លែងការណ៍ដែលផ្លាស់ប្តូរ និងជួនកាលមានភាពផ្ទុយគ្នាពីទីក្រុងវ៉ាស៊ីនតោន អំពីរបៀបដែលសង្រ្គាមដែលឥឡូវនេះឈានចូលដល់សប្តាហ៍ទី៥ អាចនឹងបញ្ចប់ទៅ។
លោក ត្រាំ បានប្រាប់អ្នកយកព័ត៌មាននៅសេតវិមានកាលពីថ្ងៃទី៣១ខែមីនាថា៖ «យើងនឹងចាកចេញក្នុងពេលឆាប់ៗនេះ» ដោយលោកបានបន្តថា ការចាកចេញនេះអាចនឹងកើតឡើង «ក្នុងរយៈពេលពីរអាទិត្យ ឬបីអាទិត្យទៀត»។
នៅពេលត្រូវបានសួរថា តើជោគជ័យផ្នែកការទូតជាមួយអ៊ីរ៉ង់គឺជាលក្ខខណ្ឌមុនសម្រាប់សហរដ្ឋអាមេរិកក្នុងការបញ្ចប់ប្រតិបត្តិការដែលខ្លួនបានដាក់ឈ្មោះថា «Operation Epic Fury» ឬយ៉ាងណា? លោក ត្រាំ បានឆ្លើយថា វាមិនមែនជាលក្ខខណ្ឌនោះទេ។
លោកបានមានប្រសាសន៍ថា៖ «អ៊ីរ៉ង់មិនចាំបាច់ធ្វើកិច្ចព្រមព្រៀងទេ គឺមិនបាច់ទេ។ ពួកគេមិនចាំបាច់ធ្វើកិច្ចព្រមព្រៀងជាមួយខ្ញុំទេ»។
ក្រោយមក សេតវិមានបានប្រកាសថា លោក ត្រាំ នឹងថ្លែងសុន្ទរកថាទៅកាន់ប្រជាជាតិអាមេរិក «ដើម្បីផ្ដល់ព័ត៌មានថ្មីដ៏សំខាន់ស្តីពីប្រទេសអ៊ីរ៉ង់» នៅវេលាម៉ោង ៩ យប់ម៉ោងនៅអាមេរិកនាថ្ងៃទី១ខែមេសា។
ពីមុន ទីក្រុងវ៉ាស៊ីនតោន ធ្លាប់បានគំរាមបង្កើនប្រតិបត្តិការយោធា ប្រសិនបើទីក្រុងតេហេរ៉ង់មិនព្រមទទួលយកក្របខ័ណ្ឌបទឈប់បាញ់ ១៥ ចំណុចរបស់សហរដ្ឋអាមេរិក ដែលមានតម្រូវការស្នូលក្នុងចំណោមនោះ គឺអ៊ីរ៉ង់ត្រូវប្តេជ្ញាមិនស្វែងរកអាវុធនុយក្លេអ៊ែរ បញ្ឈប់រាល់ការចម្រាញ់អ៊ុយរ៉ាញ៉ូម និងបើកច្រកសមុទ្រ Hormuz ឡើងវិញទាំងស្រុង។
កាលពីព្រឹកថ្ងៃទី៣១ខែមីនា រដ្ឋមន្ត្រីការពារជាតិអាមេរិក លោក Pete Hegseth បាននិយាយថា លោក ត្រាំ មានឆន្ទៈក្នុងការធ្វើកិច្ចព្រមព្រៀងជាមួយអ៊ីរ៉ង់ ដើម្បីបញ្ចប់សង្រ្គាមដែលបានសម្លាប់មនុស្សរាប់ពាន់នាក់ រីករាលដាលពេញតំបន់ រំខានដល់ការផ្គត់ផ្គង់ថាមពល និងគំរាមកំហែងធ្វើឱ្យសេដ្ឋកិច្ចពិភពលោកធ្លាក់ចុះដុនដាប។
កាសែត Wall Street Journal បានរាយការណ៍កាលពីយប់ថ្ងៃ៣១មីនាថា សហព័ន្ធអារ៉ាប់រួម (UAE) កំពុងរៀបចំជួយសហរដ្ឋអាមេរិក និងសម្ព័ន្ធមិត្តក្នុងការបើកច្រកសមុទ្រ Hormuz ដោយប្រើកម្លាំងបាយ ក្នុងកិច្ចខិតខំប្រឹងប្រែងដើម្បីបញ្ចប់ការបិទផ្លូវនាវាចរណ៍ដែលជាកន្លែងឆ្លងកាត់ប្រមាណមួយភាគប្រាំនៃប្រេង និងឧស្ម័នធម្មជាតិរាវរបស់ពិភពលោកជារៀងរាល់ថ្ងៃ។
យោងតាមរបាយការណ៍ដដែល សហព័ន្ធអារ៉ាប់រួមកំពុងស្វែងរកសេចក្តីសម្រេចពីក្រុមប្រឹក្សាសន្តិសុខអង្គការសហប្រជាជាតិសម្រាប់សកម្មភាពនេះ ហើយបានស្នើឱ្យសហរដ្ឋអាមេរិកកាន់កាប់កោះយុទ្ធសាស្ត្រនានា។
ខណៈពេលដែលសហរដ្ឋអាមេរិកបាននិយាយថា ការចរចាជាមួយអ៊ីរ៉ង់កំពុងបន្ត រដ្ឋមន្ត្រីការបរទេសអ៊ីរ៉ង់ លោក Abbas Araqchi បាននិយាយកាលពីថ្ងៃទី៣១ខែមីនាថា លោកបានទទួលសារផ្ទាល់ពីបេសកជនពិសេសរបស់សហរដ្ឋអាមេរិក លោក Steve Witkoff ប៉ុន្តែសារទាំងនោះមិនមែនជា «ការចរចា» នោះទេ។ នេះបើយោងតាមទូរទស្សន៍ Al Jazeera របស់ប្រទេសកាតាដែលបានដកស្រង់សម្តីលោក។
លោកបានបន្ថែមថា សារទាំងនោះរួមមានការគំរាមកំហែង ឬការផ្លាស់ប្តូរទស្សនៈដែលផ្ញើតាមរយៈ «មិត្តភក្តិ»។
កងឆ្មាំបដិវត្តន៍អ៊ីរ៉ង់ កាលពីថ្ងៃទី៣១ខែមីនា បានឆ្លើយតបវិញជាមួយនឹងការគំរាមកំហែងថ្មីប្រឆាំងនឹងក្រុមហ៊ុនអាមេរិកនៅក្នុងតំបន់ ចាប់ពីថ្ងៃទី១ខែមេសាតទៅ។
អ៊ីរ៉ង់បានរាយបញ្ជីអាជីវកម្មចំនួន ១៨ រួមមាន Microsoft, Google, Apple, Intel, IBM, Tesla និង Boeing ដែលនឹងក្លាយជាគោលដៅ ចាប់ពីម៉ោង ៨ យប់ ម៉ោងនៅទីក្រុងតេហេរ៉ង់៕
