សាលាឧទ្ធរណ៍បាត់ដំបង តម្កល់សេចក្តីសម្រេចរបស់សាលាដំបូងខេត្តបន្ទាយមានជ័យ ទុកជាបានការ ដោយតម្រូវឱ្យអ្នកសារព័ត៌មានអនឡាញមួយរូប លោក ហែម វណ្ណា នៅជាប់ឃុំក្នុងពន្ធនាគារដដែល ដែលការណ៍នេះ សង្គមស៊ីវិលយល់ថាជាការបន្តរឹតត្បិតសេរីភាពសារព័ត៌មាន ដែលកំពុងតែធ្លាក់ចុះខ្លាំង។
កាលពីថ្ងៃទី២៦ ខែមីនា ឆ្នាំ២០២៦ សាលាឧទ្ធរណ៍បាត់ដំបង បានលើកសវនាការលើនីតិវិធីនៃការស្នើសុំនៅក្រៅឃុំជាបណ្តោះអាសន្ន របស់អ្នកសារព័ត៌មាន លោក ហែម វណ្ណា ហើយប្រកាសសាលដីកា នៅថ្ងៃទី០២ ខែមេសានេះ។
អនុប្រធានសមាគមការពារសិទ្ធិមនុស្សអាដហុក លោក យិន ម៉េងលី បានឱ្យដឹងថា ក្នុងការប្រកាសសាលដីកា នៅព្រឹកនេះ សាលាឧទ្ធរណ៍បាត់ដំបងបានសម្រេចឱ្យលោក ហែម វណ្ណ នៅបន្តជាប់ឃុំជាបណ្តោះអាសន្នដដែល ដូចការសម្រេចរបស់សាលាដំបូងខេត្តបន្ទាយមានជ័យ។
ការណ៍នេះ លោកបង្ហាញការសោកស្តាយចំពោះការសម្រេចរបស់សាលាឧទ្ធរណ៍បាត់ដំបង ខណៈលោកថា អ្នកសារព័ត៌មានរូបនោះ បានបំពេញលក្ខខណ្ឌទៅតាមគោលការណ៍ច្បាប់ក្នុងការស្នើសុំនៅក្រៅឃុំ ដោយមានមុខរបរនិងទីលំនៅច្បាស់លាស់ មានគ្រួសារ និងការសន្យាពីការមិនរត់គេចជាដើម។
លោក យិន ម៉េងលី ថ្លែងថា៖ «ចឹងលក្ខខណ្ឌរបស់អ្នកសារព័ត៌មាននេះ គប្បីតែដោះលែងឱ្យគាត់នៅក្រៅឃុំជាបណ្តោះអាសន្នសិន ហើយទី២ វាជាមុខមាត់របស់តុលាការ ក៏ដូចជារដ្ឋាភិបាលដែរ នៅក្នុងការសម្របស្រួលបញ្ហាអ្នកសារព័ត៌មាននេះ។ យើងចង់ឱ្យរដ្ឋាភិបាលបើកលំហថែមទៀត ពាក់ព័ន្ធនឹងសេរីភាព ទាំងអ្នកសារព័ត៌មាន ទាំងប្រជាពលរដ្ឋដែលគាត់បានបញ្ចេញមតិ»។
លោក ហែម វណ្ណា ជាចាងហ្វាងកាសែត HVNN ត្រូវបានសាលាដំបូងខេត្តបន្ទាយមានជ័យ សម្រេចឃុំបណ្តោះខ្លួនជាអាសន្ននៅពន្ធនាគារ កាលពីរសៀលថ្ងៃទី០៤ ខែកុម្ភៈ ឆ្នាំ២០២៦ ចោទពីបទ «ញុះញង់ឱ្យប្រព្រឹត្តបទឧក្រិដ្ឋ» និងបទ «ស្តាប់ឫថតពាក្យសម្ងាត់ឯកជន» បន្ទាប់ពីលោកចុះផ្សាយព័ត៌មាន ពាក់ព័ន្ធនឹងឧក្រិដ្ឋកម្មអនឡាញ។
លោកបានចុះផ្សាយពេលនោះថា “ជនជាតិបរទេស ៤ ទៅ៥នាក់ រងនូវអំពើហិង្សាពីសំណាក់មនុស្សមួយក្រុមផ្សេងទៀត ដែលគេដឹងថា ជាអ្នកបម្រើការនៅក្នុងបរិវេណអាគារបិទខ្ទប់ ជាទីអាថ៍កំបាំង នៅខាងក្រោយបន្ទាយកងរាជអាវុធហត្ថ ក្រុងប៉ោយប៉ែត។ ករណីនេះ ត្រូវបានគេសង្ស័យថាអាចជាការបង្ខាំងមនុស្សខុសច្បាប់ បង្ខំឲ្យធ្វើការឆបោកតាមប្រព័ន្ធអនឡាញ (Online Scammer)” ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត ឱ្យដឹងដែរថាហេតុផលដែលតុលាការមិនអនុញ្ញាតឱ្យលោក ហែម វណ្ណា នៅក្រៅឃុំជាបណ្តោះអាសន្ននោះ គឺធានាការស៊ើបអង្កេតទៅតាមនីតិវិធីឱ្យបានល្អ ជៀសវាងជនត្រូវចោទធ្វើការគាបសង្កត់ឬត្រូវរ៉ូវជាមួយជនជាប់ចោទដទៃទៀត ខណៈសំណុំរឿងនេះក៏មិនទាន់បិទការស៊ើបសួរនៅឡើយ។
តែយ៉ាងណា លោកបង្ហាញការសោកស្តាយ ចំពោះវិធានរបស់តុលាការដែលមិនប្រើប្រាស់ច្បាប់ស្តីពីរបបសារព័ត៌មាន ទៅលើលោក ហែម វណ្ណា ដែលមានអាជ្ញាប័ណ្ណ និងបំពេញការងារវិជ្ជាជីវៈជាអ្នកសារព័ត៌មាន តែបែរជាប្រើប្រាស់ក្រមព្រហ្មទណ្ឌដាក់ទោសអ្នកសារព័ត៌មានទៅវិញ ដែលមិនស្របតាមគោលការណ៍ច្បាប់ និងជាការរឹតត្បិតលើលំហសេរីភាពសារព័ត៌មាន។
លោក អំ សំអាត បន្តថា៖ «ការដែលចាប់ ការចោទប្រកាន់ និងការឃុំខ្លួនទៅលើអ្នកសារព័ត៌មាននេះ វាធ្វើឱ្យប៉ះពាល់ធ្ងន់ធ្ងរសម្រាប់សិទ្ធិ និងសេរីភាព ឬក៏លំហសេរីភាពនៃអ្នកសារព័ត៌មានទៅវិញ ហើយវានាំឱ្យការរិះគន់ច្រើនទៅលើរឿងនេះទេ អីចឹងខ្ញុំយល់ឃើញថា រឿងនេះគួរតែអនុវត្តច្បាប់ស្តីពីរបបសារព័ត៌មាន»។
វីអូឌី មិនអាចសុំការអត្ថាធិប្បាយជុំវិញរឿងនេះពីអ្នកនាំពាក្យក្រសួងយុត្តិធម៌ លោក ជិន ម៉ាលីន និងអ្នកនាំពាក្យសាលាឧទ្ធរណ៍បាត់ដំបងបានទេ នៅថ្ងៃព្រហស្បតិ៍នេះ។
កាលពីអំឡុងខែកុម្ភៈ ឆ្នាំ២០២៦ អ្នកសម្របសម្រួលសមាគមអាដហុកប្រចាំនៅខេត្តបន្ទាយមានជ័យ ធ្លាប់បានដាក់លិខិតស្នើទៅកាន់ប្រធានសាលាដំបូងខេត្តបន្ទាយមានជ័យ ឱ្យពិចារណា និងជួយអន្តរាគមន៍ដោះលែង លោក ហែម វណ្ណា ឱ្យមានសេរីភាពវិញ ដោយសារអ្នកសារព័ត៌មានរូបនេះ បានចូលរួមយ៉ាងសកម្មជាមួយរដ្ឋាភិបាល ក្នុងការកំចាត់អំពើឆបោកតាមអនឡាញចេញពីកម្ពុជា ស្របតាមប្រតិបត្តិការ XXL (ប្រតិបត្តិការបោសសម្អាត Online Scam ខ្នាតធំ) ខណៈការចុះផ្សាយព័ត៌មានរបស់គាត់ ស្របទៅតាមក្រមសីលធម៌ វិជ្ជាជីវៈ តែមានកំហុសបច្ចេកទេស ដោយសារតែយកសំដីរបស់គេមកដាក់ក្នុងការផ្សាយ ដោយមិនបានសុំការអនុញ្ញាត។
ចំណែក អង្គការសង្គមស៊ីវិលជាតិ និងអន្តរជាតិចំនួន ២២ស្ថាប័ន ក៏ធ្លាប់បានអំពាវនាវកាលពីថ្ងៃទី០៩ ខែកុម្ភៈ ឆ្នាំ២០២៦ ឱ្យដោះលែងលោក ហែម វណ្ណា ផងដែរ ដោយថា ការចាប់ខ្លួនអ្នកសារព័ត៌មានរូបនេះ ហាក់បង្ហាញពីនិន្នការរបស់រដ្ឋាភិបាល ក្នុងការរឹតត្បិតសំឡេងសមាជិកអ្នកសារព័ត៌មាន តាមរយៈការប្រើប្រាស់ក្រមព្រហ្មទណ្ឌ ជំនួសពីការប្រើប្រាស់យន្តការច្បាប់ស្តីពីរបបសារព័ត៌មាន។
ពួកគេបានស្នើឱ្យប្រើប្រាស់ច្បាប់ស្តីពីរបបសារព័ត៌មាន ក្នុងការដោះស្រាយវិវាទដែលពាក់ព័ន្ធនឹងការងារសារព័ត៌មាន ជំនួសឱ្យការប្រើប្រាស់បទចោទព្រហ្មទណ្ឌ និងការពារសេរីភាពសារព័ត៌មាន ព្រមទាំងធានាថា អ្នកសារព័ត៌មានអាចអនុវត្តភារកិច្ចវិជ្ជាជីវៈរបស់ខ្លួន ដោយគ្មានការភ័យខ្លាចចំពោះការរំខាន ការគំរាមកំហែង ការរឹតត្បិត ឬការចោទប្រកាន់តាមផ្លូវច្បាប់៕
