អតីតព្រះភិក្ខុ ជា វុទ្ធី ដែលតែងតែបញ្ចេញមតិពីបញ្ហាសង្គម រួមទាំងបញ្ហាព្រំដែន ពាក់ព័ន្ធនឹងថៃឈ្លានពានទឹកដីខ្មែរនោះ ត្រូវបានសាលាដំបូងរាជធានីភ្នំពេញ សម្រេចឱ្យឃុំខ្លួននៅពន្ធនាគារ នៅថ្ងៃព្រហស្បតិ៍នេះ ក្រោយពីកម្លាំងសមត្ថកិច្ចខេត្តបាត់ដំបងចាប់វាយខ្នោះ និងផ្សឹកកាលពីថ្ងៃពុធ។
សមាគមការពារសិទ្ធិមនុស្សអាហុក បាននិយថា នៅរសៀលថ្ងៃទី០២ ខែមេសា ឆ្នាំ២០២៦ អតីតព្រះអង្គ ជា វុទ្ធី ត្រូវបានសាលាដំបូងរាជធានីភ្នំពេញ សម្រេចឃុំខ្លួនបណ្តោះអាសន្ន ដោយចោទពីបទ «ញុះញង់បង្កឲ្យមានភាពវឹកវរដល់សន្តិសុខសង្គម» តាមមាត្រា៤៩៤ និង៤៩៥ នៃក្រមព្រហ្មទណ្ឌព្រះរាជាណាចក្រកម្ពុជា ព្រមទាំងបង្គាប់ឲ្យសមត្ថកិច្ចបញ្ជូនទៅឃុំខ្លួននៅពន្ធនាគាររាជធានីភ្នំពេញ(ប៉េហ្សេ)។
អាដហុក បញ្ជាក់ថា កាលពីវេលាម៉ោងប្រហែល៨ព្រឹក ថ្ងៃទី០១ ខែមេសា ឆ្នាំ២០២៦ ព្រះភិក្ខុព្រះនាម ជា វុទ្ធី គង់នៅវត្តធម្មនិម្មិតរាជបុប្ផារាម ហៅវត្តប៉ាឆា ក្រុងបាត់ដំបង ខេត្តបាត់ដំបង ត្រូវបានជនស្លៀកពាក់ស៊ីវិលមួយក្រុម បានចូលទៅនាំព្រះកាយព្រះអង្គចេញពីវត្តពោធិ៍វាល ក្រុងបាត់ដំបង ដែលជាទីណាត់ជួបរបស់ប្រធានមន្ទីរធម្មការ និងសាសនាខេត្តបាត់ដំបង និងជាសាលាគណៈខេត្ត។
ក្រោយមក ព្រះតេជគុណ ជា វុទ្ធី ត្រូវបានផ្សឹក ដោយមេគុណខេត្តស្តីទីព្រះនាម ហេង សុខន បន្ទាប់មកសមត្ថកិច្ចបានបញ្ជូនអតីតព្រះអង្គ ជា វុទ្ធី មកកាន់ស្នងការដ្ឋាននគរបាលរាជធានីភ្នំពេញ។
នៅព្រឹកថ្ងៃទី២ ខែឆ្នាំដដែល អតីតព្រះអង្គ ជា វុទ្ធី ត្រូវបានសមត្ថកិច្ចនគរបាលរាជធានីភ្នំពេញ បញ្ជូនទៅកាន់សាលាដំបូងរាជធានីភ្នំពេញ ដើម្បីធ្វើការសាកសួរ ។
បើតាមការបញ្ជាក់ពីព្រះអង្គ ជា វុទ្ធី មុនពេលចាប់ខ្លួន និងការបញ្ជាក់ពីក្រុមព្រះសង្ឃដែលរៀននៅសាកលវិទ្យាល័យជាមួយគ្នា ការចាប់ខ្លួននេះអាចទំនងបណ្តាលមកពីសំណេររបស់ព្រះអង្គ ជា វុទ្ធី បានសរសេរលើបណ្តាញសង្គមពាក់ព័ន្ធរឿងបញ្ហាព្រំដែនកម្ពុជា-ថៃ តែយ៉ាងណាសំណេរនោះត្រូវបានលុបវិញកាលពីប៉ុន្មានថ្ងៃមុនពេលចាប់ខ្លួន។
អតីតព្រះសង្ឃអង្គនេះ គឺជាសកម្មសង្ឃ ដែលកន្លងមកតែងតែឈឺឆ្អាលរឿងប្រទេសជាតិ និងចូលរួមសកម្មក្នុងកិច្ចការងារសង្គម។ ព្រះអង្គអាចប្រឈមនឹងការជាប់ពន្ធនាគាររហូតដល់២ឆ្នាំ ប្រសិនបើត្រូវបានតុលាការរកឃើញថាបានប្រព្រឹត្តបទល្មើស ។
ករណីនេះ សមាគមអាដហុក បានជួប និងទទួលការពឹងពាក់ពីញោមស្រីរបស់ព្រះតេជគុណ គឺអ្នកស្រី ចាន់ម៉ៅ រួចសមាគមបានសម្រេចផ្តល់មេធាវីដើម្បីការពារតាមនីតិវិធី ព្រមទាំងបន្តការឃ្លាំមើលដោយយកចិត្តទុកដាក់៕
