ប្រធានាធិបតី ដូណាល់ ត្រាំ កាលពីថ្ងៃទី១ខែមេសា បានមានប្រសាសន៍ថា ប្រធានាធិបតីអ៊ីរ៉ង់ បានស្នើសុំឱ្យសហរដ្ឋអាមេរិកមានការឈប់បាញ់។ ប៉ុន្តែសហរដ្ឋអាមេរិកនឹង “ពិចារណា” លើសំណើនោះ លុះត្រាតែច្រកសមុទ្រ Hormuz ត្រូវបាន “បើកចំហ មានសេរីភាព និងស្រឡះល្អ”។ នេះបើយោងតាមការបង្ហោះរបស់លោក ត្រាំ លើបណ្តាញសង្គម Truth Social។
លោកបានសរសេរថា៖ «រហូតដល់ពេលនោះ យើងកំពុងកម្ទេចអ៊ីរ៉ង់ឱ្យរលាយសូន្យ ឬដូចដែលពួកគេនិយាយថា ឱ្យត្រឡប់ទៅសម័យយុគថ្មីវិញ!»។
ទីភ្នាក់ងារសារព័ត៌មាន Al Jazeera បានរាយការណ៍នៅព្រឹកថ្ងៃទី១ខែមេសាដដែលនោះ ដោយស្រង់សម្តីមន្ត្រីអ៊ីរ៉ង់មិនបញ្ចេញឈ្មោះម្នាក់ថា ទីក្រុងតេហេរ៉ង់បានបដិសេធចំពោះការស្នើសុំឈប់បាញ់នេះ។
រដ្ឋមន្ត្រីការបរទេសអ៊ីរ៉ង់ លោក Abbas Araghchi បានប្រាប់ Al Jazeera កាលពីថ្ងៃទី៣១ខែមីនា ដោយបញ្ជាក់ជាថ្មីថា ទីក្រុងតេហេរ៉ង់មិនមែនកំពុងស្វែងរកការឈប់បាញ់នោះទេ ប៉ុន្តែគឺកំពុងស្វែងរកការបញ្ចប់សង្គ្រាម។
យោងតាមការបកប្រែ លោក Araghchi បានប្រាប់សារព័ត៌មាននោះក្នុងបទសម្ភាសន៍មួយថា៖ «បច្ចុប្បន្ន មិនមានការចរចាអ្វីឡើយ»។
សេតវិមាន មិនបានឆ្លើយតបភ្លាមៗចំពោះសំណើរបស់ CNBC សម្រាប់ព័ត៌មានបន្ថែមជុំវិញវិវាទលើការចោទប្រកាន់អំពីសំណើសុំឈប់បាញ់នេះទេ។
វាមិនទាន់ច្បាស់នៅឡើយទេថា តើមានសំណើណាមួយត្រូវបានធ្វើឡើងដោយផ្ទាល់ទៅកាន់សហរដ្ឋអាមេរិក ដូចដែលការបង្ហោះរបស់លោក ត្រាំ បានលើកឡើង ឬមួយក៏វាបានមកតាមរយៈអ្នកសម្របសម្រួល ដូចជាប៉ាគីស្ថាននោះទេ។
ទោះបីជាប្រធានាធិបតី Masoud Pezeshkian ពិតជាបានស្នើសុំការឈប់បាញ់ក៏ដោយ ក៏លោកប្រហែលជាមិនមានសិទ្ធិសម្រេចចុងក្រោយដែរ គឺមេដឹកនាំកំពូលរបស់អ៊ីរ៉ង់ មិនមែនប្រធានាធិបតីនោះទេ ដែលមានអំណាចដាច់ខាតនៅក្នុងសាធារណរដ្ឋអ៊ីស្លាមនេះ។
មេដឹកនាំកំពូលបច្ចុប្បន្ន Ayatollah Mojtaba Khamenei បានជៀសវាងការបង្ហាញខ្លួនជាសាធារណៈ ចាប់តាំងពីលោកបានឡើងកាន់តំណែង បន្ទាប់ពីការសម្លាប់ឪពុករបស់លោក គឺអតីត Ayatollah Ali Khamenei ក្នុងការវាយប្រហារតាមអាកាសនៅដើមសង្គ្រាម។
ភាគីទាំងពីរតែងតែមានការអះអាងផ្ទុយគ្នាទៅវិញទៅមក អំពីអត្ថិភាព និងស្ថានភាពនៃកិច្ចពិភាក្សាលើកិច្ចព្រមព្រៀងសន្តិភាព ចាប់តាំងពីសង្គ្រាមបានចាប់ផ្តើមកាលពីថ្ងៃទី២៨ ខែកុម្ភៈ ជាមួយនឹងការវាយប្រហាររបស់សហរដ្ឋអាមេរិក និងអ៊ីស្រាអែលទៅលើអ៊ីរ៉ង់។
ការប្រកាសលើ Truth Social របស់លោក ត្រាំ បានកើតឡើងប៉ុន្មានម៉ោងមុនពេលដែលលោកគ្រោងនឹងផ្តល់ “ព័ត៌មានថ្មីដ៏សំខាន់ស្តីពីអ៊ីរ៉ង់” នៅក្នុងសេចក្តីថ្លែងការណ៍ទៅកាន់ប្រជាជាតិអាមេរិក។ នេះបើយោងតាមសេតវិមាន។
សេចក្តីថ្លែងការណ៍នេះ ត្រូវបានកំណត់ធ្វើឡើងនៅម៉ោង ៩ យប់ (ម៉ោងនៅតំបន់ភាគខាងកើតសហរដ្ឋអាមេរិក)។
សង្គ្រាមដែលអូសបន្លាយពេលជាងមួយខែនេះ បានបង្កឱ្យមានភាពវឹកវរសេដ្ឋកិច្ចយ៉ាងឆាប់រហ័ស និងការប្រែប្រួលយ៉ាងខ្លាំងនៃតម្លៃថាមពលសកល។ ភាពមិនស្ថិតស្ថេរនោះ គឺមានទំនាក់ទំនងយ៉ាងធំធេងទៅនឹងសមត្ថភាពបន្តរបស់អ៊ីរ៉ង់ ក្នុងការបិទច្រកសមុទ្រ Hormuz ប្រកបដោយប្រសិទ្ធភាព ដែលជាផ្លូវទឹកសម្រាប់ការដឹកជញ្ជូនប្រេងដ៏ច្រើនលើសលប់របស់ពិភពលោក។
លោក ត្រាំ បានទទួលស្គាល់ថា ច្រកសមុទ្រនេះនៅតែជាចំណុចជាប់គាំងដ៏សំខាន់នៅក្នុងសង្គ្រាម បើទោះបីជាលោក និងមន្ត្រីរដ្ឋបាលផ្សេងទៀតទទូចថា យោធារបស់អ៊ីរ៉ង់ត្រូវបាន “កម្ទេចចោល” ហើយសហរដ្ឋអាមេរិកកំពុងសម្រេចបាននូវគោលដៅរបស់ខ្លួនយ៉ាងឆាប់រហ័សក៏ដោយ៕
