លោក កាក់ កុម្ភារ និង លោក ហេង ច័ន្ធសុទ្ធី ជាសកម្មជនគណបក្សសង្គ្រោះជាតិ ដែលតុលាការរំលាយ ត្រូវបានសាលាឧទ្ធរណ៍កាត់ឱ្យបន្តឃុំខ្លួន បើទោះពួកគេទទួលទោសជិតគ្រប់ចំនួន ជុំវិញការចោទពីបទរួមគំនិតក្បត់ និងបទញុះញង់ ដោយសារតែសកម្មប្រើប្រាស់សិទ្ធិក្នុងជីវភាពនយោបាយ។
អង្គការការពារសិទ្ធិមនុស្សលីកាដូ បាននិយាយលើគេហទ័ពរបស់ខ្លួន នៅថ្ងៃទី១ ខែមេសានេះថា កាលពីថ្ងៃទី៣០ ខែមីនា ឆ្នាំ២០២៦ សាលាឧទ្ធរណ៍ភ្នំពេញ បានតម្កល់សាលក្រមផ្តន្ទាទោស លោក កាក់ កុម្ភារ អាយុ៦០ឆ្នាំ និង លោក ហេង ច័ន្ទសុទ្ធី អាយុ៦៤ឆ្នាំ តាមការចោទរបស់សាលាដំបូង។
ពួកគេ ជាប់ចោទពីបទ “ញុះញង់ឱ្យប្រព្រឹត្តបទឧក្រិដ្ឋជាអាទិ៍” និងបទ “រួមគំនិតក្បត់” តាមបញ្ញត្តិមាត្រា ៤៩៤ ៤៩៥ និង៤៥៣ នៃក្រមព្រហ្មទណ្ឌ ដែលបទចោទនេះ ត្រូវសាលាដំបូងរាជធានីភ្នំពេញផ្តន្ទាទោស ដាក់ពន្ធនាគារ៦ឆ្នាំ អំឡុងខែមិថុនា ឆ្នាំ២០២២។
បើតាមលីកាដូ ថ្នាក់ដឹកនាំ និងអ្នកគាំទ្រគណបក្សសង្គ្រោះជាតិ ចំនួនយ៉ាងតិច ៥០រូប ក៏ត្រូវបានចោទប្រកាន់ពីបទចោទនេះដូចគ្នាអំឡុងពេលនោះ ដែលថា ការចោទប្រកាន់ និងចាប់ខ្លួនអ្នកទាំងនោះ បានកើតឡើងក្នុងអំឡុងពេលដែល លោក សម រង្ស៊ី បរាជ័យក្នុងការវិលត្រឡប់មកប្រទេសកម្ពុជា។
បើតាមប្រភពដដែល ជាលើកដំបូង ដែលសាលាឧទ្ធរណ៍សម្រេចបើកសវនាការលើសំណុំរឿងរបស់លោក កុម្ភារ និង លោក ច័ន្ទសុទ្ធី បន្ទាប់ពីលោកទាំងពីរកំពុងអនុវត្តទោសជិត ៦ ឆ្នាំទៅហើយ ហើយុថាអ្នកទាំងពីរនាក់នេះ នឹងត្រូវបានដោះលែងឱ្យមានសេរីភាពវិញ ក្នុងខែឧសភា និងខែមិថុនា ឆ្នាំ២០២៦នេះ ក្រោយទទួលទោសចប់។
បច្ចុប្បន្ន លោក ច័ន្ទសុទ្ធី កំពុងជាប់ឃុំខ្លួនក្នុងពន្ធនាគារខេត្តពោធិ៍សាត់។ ចំណែកលោក កុម្ភារ កំពុងឃុំខ្លួននៅពន្ធនាគារខេត្តព្រះវិហារ។ សកម្មជនគណបក្សសង្រ្គោះជាតិទាំង២រូបនេះ ស្ថិតក្នុងចំណោមអ្នកទោសដែលប្រើសិទ្ធិ ចំនួន ៩៨ នាក់ ដែលកំពុងជាប់ឃុំ ដោយសារការប្រើប្រាស់សិទ្ធិ និងដែលត្រូវបានចងក្រងដោយអង្គការលីកាដូ៕
