លោក Emmanuel Macron បានមានប្រសាសន៍ថា ការលើកឡើងរបស់ លោក Donald Trump អំពីអាពាហ៍ពិពាហ៍របស់លោកគឺ «មិនមានភាពថ្លៃថ្នូរ និងមិនគ្រប់ស្តង់ដារឡើយ» បន្ទាប់ពីប្រធានាធិបតីសហរដ្ឋអាមេរិកបានធ្វើត្រាប់តាមសំឡេង និងចំអកឱ្យសមភាគីបារាំងរូបនេះ រួមទាំងភរិយារបស់លោក ក្នុងអំឡុងពេលអាហារថ្ងៃត្រង់ឯកជនមួយនៅទីក្រុងវ៉ាស៊ីនតោន។
បន្ទាប់ពីបានធ្វើដំណើរទៅដល់ប្រទេសកូរ៉េខាងត្បូង កាលពីថ្ងៃទី៣ខែមេសា លោក Macron បានបង្ហាញយ៉ាងច្បាស់នូវការមិនពេញចិត្តចំពោះការលើកឡើងរបស់លោក Trump ដែលបានលេចឡើងក្នុងរយៈពេលខ្លីនៅក្នុងវីដេអូនៅលើឆានែល YouTube របស់សេតវិមាន មុនពេលត្រូវបានលុបចេញវិញ។
លោក Macron បានប្រាប់អ្នកយកព័ត៌មានថា៖ «ដូច្នេះ ខ្ញុំនឹងមិនឆ្លើយតបទៅនឹងសម្តីទាំងនោះទេ វាគ្មានតម្លៃនឹងឱ្យឆ្លើយតបឡើយ»។
មានការខឹងសម្បារយ៉ាងខ្លាំងនៅក្នុងប្រទេសបារាំង បន្ទាប់ពីលោក Trump ហាក់ដូចជាបានធ្វើការចំអកឱ្យលោក Macron និងភរិយារបស់លោក ក្នុងអំឡុងពេលអាហារថ្ងៃត្រង់កាលពីថ្ងៃទី១ខែមេសា ដែលមានការចូលរួមពីថ្នាក់ដឹកនាំសាសនា និងមន្ត្រីរដ្ឋាភិបាលនៅទីក្រុងវ៉ាស៊ីនតោន ខណៈដែលលោកបានរិះគន់សម្ព័ន្ធមិត្តណាតូ (Nato) ចំពោះការមិនចូលរួមក្នុងសង្គ្រាមប្រឆាំងនឹងប្រទេសអ៊ីរ៉ង់។
តាមរយៈការធ្វើត្រាប់តាមសំឡេងបែបបារាំង លោក Trump បាននិយាយថា ភរិយារបស់លោក Macron គឺលោកស្រី Brigitte «ប្រព្រឹត្តចំពោះលោកអាក្រក់ខ្លាំងណាស់»។ ថ្លែងអំពីការស្នើសុំឱ្យបារាំងជួយក្នុងបញ្ហាអ៊ីរ៉ង់ លោក Trump បាននិយាយថា៖ «យើងមិនត្រូវការពួកគេទេ ប៉ុន្តែខ្ញុំនៅតែសួរដដែល»។
លោកបានបន្ថែមថា៖ «ខ្ញុំបានទូរសព្ទទៅបារាំង ទៅ Macron ដែលប្រពន្ធរបស់គាត់ប្រព្រឹត្តដាក់គាត់អាក្រក់ខ្លាំងណាស់។ នៅមិនទាន់សះស្បើយពីការរងទង្គិចត្រង់ថ្គាមនៅឡើយទេ»។
លោក Trump ហាក់ដូចជាចង់សំដៅទៅលើវីដេអូកាលពីខែឧសភា ឆ្នាំ២០២៥ ដែលបង្ហាញថា លោកស្រី Brigitte Macron បានរុញមុខស្វាមីរបស់លោកស្រី នៅពេលដែលពួកគេរៀបចុះពីលើយន្តហោះ ក្នុងដំណើរទស្សនកិច្ចផ្លូវការទៅកាន់ប្រទេសវៀតណាម។
វីដេអូនោះ ថតដោយអ្នកថតកាមេរ៉ារបស់ទីភ្នាក់ងារសារព័ត៌មាន Associated Press បានបង្ហាញលោក Macron លេចមុខនៅមាត់ទ្វារយន្តហោះ នាដើមដំណើរទស្សនកិច្ចទៅកាន់ទីក្រុងហាណូយ។ ដៃរបស់ភរិយាលោកហាក់ដូចជាបានរុញលោក ដែលធ្វើឱ្យលោកឈានថយក្រោយមួយជំហាន មុនពេលរក្សាលំនឹងបានវិញ និងគ្រវីដៃ។ នៅពេលនោះ លោក Macron បានបដិសេធរាល់ «ជម្លោះក្នុងគ្រួសារ» ជាមួយភរិយា ដោយនិយាយថា ពួកគេគ្រាន់តែ «លេងសើចដូចដែលធ្លាប់ធ្វើជាធម្មតា» ប៉ុណ្ណោះ។
នៅក្នុងពេលអាហារថ្ងៃត្រង់នោះ លោក Trump បានបន្តថា៖ «ហើយខ្ញុំបាននិយាយថា Emmanuel យើងចង់បានជំនួយខ្លះនៅតំបន់ឈូងសមុទ្រ ទោះបីជាយើងកំពុងបំបែកកំណត់ត្រាក្នុងការកម្ចាត់មនុស្សអាក្រក់ និងកម្ចាត់មីស៊ីលផ្លោងក៏ដោយ យើងចង់បានជំនួយខ្លះ។ បើលោកអាចធ្វើបាន សូមមេត្តាបញ្ជូននាវាទៅភ្លាម»។
បន្ទាប់មក លោក Trump ហាក់ដូចជាព្យាយាមធ្វើសំឡេងបែបបារាំង ដើម្បីធ្វើត្រាប់តាមចម្លើយរបស់លោក Macron ថា៖ «’ទេ ទេ ទេ ដូណាល់ យើងមិនអាចធ្វើបែបនោះបានទេ។ យើងអាចធ្វើបាន បន្ទាប់ពីសង្គ្រាមត្រូវបានឈ្នះ’»។ លោក Trump និយាយថា៖ «ខ្ញុំក៏និយាយថា ទេ ទេ Emmanuel ខ្ញុំមិនត្រូវការបន្ទាប់ពីសង្គ្រាមត្រូវបានឈ្នះនោះទេ»៕
