កម្មកររោងចក្រ អ៊ីស ឡូយ៉ាល់ ហ្គាម៉ិន (ខេមបូឌា) ក្នុងសង្កាត់ក្រាំងពង្រ ខណ្ឌដង្កោ រាជធានីភ្នំពេញ ត្រូវបានគេអះអាងមកថា មានគ្នាជាង៣០០នាក់ បានផ្ទុះការតវ៉ាប្រឆាំងនឹងការរើសអើងសហជីព ក្រោយភាគីរោងចក្រ បញ្ឈប់តំណាងសហជីពពីការងារ ដោយមិនប្រាប់ពីមូលហេតុ។
លោក អែម ម៉ៅ ធ្វើការនៅរោងចក្រនេះ បានឱ្យដឹងថា ការដែលពួកគេជាង៣០០នាក់ តវ៉ានៅថ្ងៃទី៧ ខែមេសានេះ គឺទាមទារឱ្យភាគីរោងចក្រ យកតំណាងសហជីពចូលធ្វើការវិញ។
លើសពីនេះ ពួកគេទាមទារប្រាក់ធ្វើដំណើរចំនួន ២.៥ ដុល្លារក្នុងមួយខែ ដែលក្រសួងការងារប្រកាសផ្តល់ឱ្យកម្មករ ចាប់ពីដើមខែមេសាទៅ ដែលជាការប៉ះប៉ូវថ្លៃសោហ៊ុយធ្វើដំណើរ ក្រោយតម្លៃប្រេងឡើងថ្លៃ។
លោកថា៖ «កម្មករគាត់តវ៉ា ទី១ គឺដកតំណាងកម្មករ ហើយនិងសហជីពចេញ ដោយអត់មានការជូនដំណឹង ឬក៏អត់មានហេតុផលច្បាស់លាស់ ហើយមួយទៀតគឺតវ៉ាទាមទារយកប្រាក់កម្រៃដែលក្រសួងផ្តល់ឱ្យខាងកម្មករ ខាងរោងចក្រគេអត់អនុវត្តតាមក្រសួងការងារឱ្យទេ ចឹងអាលុយ ២ដុល្លារ៥០សេនហ្នឹង គឺខាងរោងចក្រមិនព្រមឱ្យកម្មករទេ[…] ខ្ញុំសំណូមពរឱ្យរោងចក្រធ្វើការតាមក្រសួងទាំងអស់ ក្រសួងដាក់មកម៉េចគឺតម្រូវឱ្យរោងចក្រធ្វើតាមក្រសួងទាំងអស់ តែរោងចក្រនេះអត់មានតម្រូវតាមក្រសួងទេ»។
កាលពីថ្ងៃទី២០ ខែមីនា ឆ្នាំ២០២៦ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹង ស្តីពីលទ្ធផលនៃកិច្ចប្រជុំបន្ទាន់របស់ក្រុមប្រឹក្សាជាតិប្រាក់ឈ្នួលអប្បបរមា ដោយបានឯកភាពផ្តល់ប្រាក់សោហ៊ុយធ្វើដំណើរបណ្តោះអាសន្នចំនួន ២.៥ ដុល្លារអាមេរិកក្នុងមួយខែ ជូនកម្មករនិយោជិត។ វិធានការថ្មីនឹងចាប់អនុវត្តចាប់ពីថ្ងៃទី១ ខែមេសា ឆ្នាំ២០២៦ តទៅ ដើម្បីជួយបន្ថយបន្ទុកចំណាយលើការធ្វើដំណើររបស់កម្មករ និងនិយោជិត នៅក្នុងបរិបទដែលតម្លៃប្រេងឥន្ធនៈកំពុងមានការឡើងថ្លៃ។
ក្រសួងបានបញ្ជាក់ថា ប្រាក់សោហ៊ុយនេះ គឺត្រូវផ្តល់បន្ថែមលើប្រាក់សោហ៊ុយធ្វើដំណើរ និងស្នាក់នៅ ដែលសហគ្រាស ក្រុមហ៊ុន និងរោងចក្រ កំពុងអនុវត្តស្រាប់ ហើយនឹងបន្តអនុវត្តជាបណ្តោះអាសន្ន រហូតដល់ស្ថានភាពតម្លៃប្រេងឥន្ធនៈវិលត្រឡប់មករកប្រក្រតីភាពវិញ។
អ្នកស្រី លី សុផារី តំណាងសហជីពនៅមូលដ្ឋាន និងជាតំណាងកម្មករ ដែលត្រូវបានរោងចក្របញ្ឈប់ពីការងារ បានលើកឡើងថា ខាងរោងចក្របានហៅអ្នកស្រីទៅប្រាប់ពីការបញ្ឈប់ពីការងារ ដោយពុំមានប្រាប់មូលហេតុ និងជូនដំណឹងជាមុននោះទេ ដោយគ្រាន់តែឱ្យគាត់ទាក់ទងទៅខាងមេធាវីរបស់ក្រុមហ៊ុន។ ចំណែកខាងមេធាវី ក៏មិនបានប្រាប់មូលហេតុដែរ ដោយគ្រាន់តែប្រាប់អ្នកស្រីថា ក្រុមហ៊ុនបានបញ្ចប់កុងត្រាការងារជាមួយអ្នកស្រីហើយ និងបានវេរលុយ ដែលជាប្រាក់ខែចុងក្រោយឱ្យអ្នកស្រី តែអ្នកស្រីបានវេរលុយនោះទៅកាន់ក្រុមហ៊ុនវិញ ដោយទាមទារឱ្យមានដំណោះស្រាយ។
អ្នកស្រីថា៖ «ចឹងខាងក្រុមហ៊ុនតែងតែបំពាននៅលើច្បាប់ មិនអនុវត្តច្បាប់ ហើយអ្វីដែលកម្មករស្នើអ្វីដែលកម្មករទាមទារហ្នឹង គឺពួកគាត់មានតំណាងកម្មករនៅក្នុងរោងចក្រហ្នឹង ហើយគាត់តែងតែរកតំណាងឱ្យចូលរួមដោះស្រាយ ស្នើសុំពីលក្ខខណ្ឌការងារមួយចំនួន ស្នើសុំឱ្យពួកគាត់ ចឹងទៅប្រហែលជាមូលហេតុដែលខាងតំណាងយើងតែងតែទាមទារតវ៉ាឱ្យកម្មករ ពាក់ព័ន្ធជាមួយសំណើរកន្លងមកចំនួនពីរលើកហ្នឹង ដែលក្រុមហ៊ុនមិនអនុវត្តហ្នឹង តែងតែទាមទារ តែងតែស្នើសុំនេះស្នើសុំនោះ ចឹងទៅបានខាងក្រុមហ៊ុនហ្នឹង មានការមិនពេញចិត្តជាមួយតំណាងហ្នឹង ព្រមទាំងមានការរើសអើងកម្មករ បានជាបញ្ឈប់តំណាងកម្មករ»។
បើតាមតំណាងកម្មកររូបនេះ កន្លងមក កម្មករធ្លាប់បានតវ៉ាចំនួន ២លើកមកហើយ ដោយសារតែខាងរោងចក្រកាត់លុយពេលដែលកម្មករឈឺបើទោះជាមានសំបុត្រពេទ្យ កាត់លុយកម្មករដែលមកយឺតត្រឹម៤ទៅ៥នាទី និងបញ្ឈប់កម្មករដោយគ្មានមូលហេតុជាដើម។
វីអូឌី មិនអាចសុំការអត្ថាធិប្បាយជុំវិញបញ្ហានេះពីខាងតំណាងរោងចក្រអ៊ីស ឡូយ៉ាល់ ហ្គាម៉ិន និងប្រធានមន្ទីរការងារ និងបណ្តុះបណ្តាលវិជ្ជាជីវៈរាជធានីភ្នំពេញ លោក អេង សុវិចិត្រ បានទេនៅរសៀលថ្ងៃអង្គារនេះ។
អគ្គលេខាធិការសហជីពឯករាជ្យ ហៅកាត់ថា អ៊ិនទូហ្វី លោក នេត តារា មានប្រសាសន៍ថា ការបញ្ឈប់តំណាងកម្មករពីការងារនេះ ក្រោយពីតំណាងរូបនោះ បានចូលរួមជាមួយសហជីពក្នុងការការពារសិទ្ធិកម្មករនៅក្នុងរោងចក្រ ដែលនេះបង្ហាញពីការរើសអើងសហជីព ខណៈការបញ្ចប់កិច្ចសន្យាការងារនោះទៀតសោត មិនមានការជូនដំណឹងជាមុន ដែលផ្ទុយនឹងច្បាប់។
ការណ៍នេះ លោកជំរុញឱ្យក្រសួងស្ថាប័នពាក់ព័ន្ធ សម្របសម្រួលនិងពន្លឿនការដោះស្រាយវិវាទការងារនេះ ដើម្បីជៀសវាងប៉ះពាល់ដល់ផលប្រយោជន៍ផ្សេងៗរបស់កម្មករ។
លោកថា៖ «ខ្ញុំចង់ស្នើសុំឱ្យគាត់ជួយពន្លឿនការដោះស្រាយ ដើម្បីទីមួយឱ្យកម្មករបានចូលធ្វើការបម្រើការនៅហ្នឹងទាំងអស់គ្នាវិញ ទី១ កុំឱ្យស្ទះសង្វាក់ផលិតកម្ម ទី២ វាជិតដល់ចូលឆ្នាំហើយ ចឹងបានធ្វើការទៅបើកលុយបានទៅផ្ទះទាំងអស់គ្នា ឱ្យសប្បាយចិត្តចឹងណា ហើយចំណុចសំខាន់បំផុត ស្នើសុំឱ្យគាត់យកថ្នាក់ដឹកនាំសហជីពចូលធ្វើការ ហើយជាចុងក្រោយសុំឱ្យរោងចក្រអ៊ីសឡូយ៉ាល់ហ្នឹងគាត់គោរពច្បាប់ការងារផង ព្រោះគាត់អត់សូវគោរពច្បាប់ការងារទេ ទី១គ្រាន់តែកម្មករទៅបន្ទប់ទឹកអីចឹង គាត់ទៅតាមកម្មករដល់បន្ទប់ទឹក តាមមើល ចឹងវារំលោភឯកជនភាព»។
បើតាមក្រុមកម្មករ និងសហជីព រោងចក្រអ៊ីស ឡូយ៉ាល់ ហ្គាម៉ិន មានកម្មករនិយោជិតធ្វើការសរុបប្រមាណ ៦០០នាក់៕
