រដ្ឋមន្រ្តីក្រសួងបរិស្ថាន បានចាត់ឱ្យមន្ត្រីជំនាញចុះស៊ើបអង្កេតរកការពិត ករណីសង្ស័យមន្ត្រីបរិស្ថានខេត្តកំពង់ស្ពឺចំនួន ២រូប បានទារលុយពីថៅកែរោងចក្រដំណាប់ស្វាយ នៅខេត្តកំពង់ស្ពឺ ក្រោយពីមន្ទីរបរិស្ថានខេត្តនេះ ចេញមុខច្រានចោលការបដិសេធការចោទ។
ចំណាត់ការរបស់ក្រសួង បានធ្វើឡើងក្រោយពីមានករណីបែកធ្លាយវីដែអូលើបណ្តាញសង្គមហ្វេសប៊ុក កាលពីពេលថ្មីៗនេះ ដែលគេឃើញមានបុរសពីរនាក់ពាក់អាវក្រហម ជាមន្ត្រីបរិស្ថានខេត្តកំពង់ស្ពឺ បានទៅទារលុយចំនួន ១៥០០ដុល្លារ ចុះនៅត្រឹម ៦០០ដុល្លារ ពីថៅកែរោងចក្រជាជនជាតិចិន ស្ថិតនៅក្នុងស្រុកភ្នំស្រួច ខេត្តកំពង់ស្ពឺ។
ក្នុងវីដេអូនោះដែរ មន្ត្រីបរិស្ថានទាំង២រូបនេះ បានប្រាប់ទៅថៅកែរោងចក្រ ចេញលិខិតបំភ្លឺមួយសន្លឹកសរសេរថា ពួកគេទៅទីនោះ ដើម្បីបំពេញបេសកកម្មការងារ ពុំមែនទៅទារលុយនោះទេ។
បើតាមទំព័រហ្វេសប៊ុករបស់ក្រសួងបរិស្ថាន នៅថ្ងៃទី០៧ ខែមេសា ឆ្នាំ២០២៦នេះ បានឱ្យដឹងថា រដ្ឋមន្ត្រីក្រសួងបរិស្ថាន លោក អ៊ាង សុផល្លែត បានចាត់មន្ត្រីជំនាញឱ្យចុះទៅស្រាវជ្រាវករណីនេះ នៅថ្ងៃទី០៦ ខែមេសា ម្សិលមិញ។
ក្រសួងបន្តថា មន្រ្តីនៃក្រសួងបរិស្ថាន បានចុះទៅដល់ទីតាំងរោងចក្រខ្នាតតូច កែច្នៃដំណាប់ស្វាយ ឈ្មោះ ហុង ចេងហ្វាង ដែលមានទីតាំងនៅក្នុងភូមិខ្នងក្រាំង ឃុំតាំងសំរោង ស្រុកភ្នំស្រួច ខេត្តកំពង់ស្ពឺ ដោយបានជួបតំណាងក្រុមហ៊ុន ជាជនជាតិចិន និងអ្នកបកប្រែចំនួន២នាក់ ដោយបានសួរនូវសំណួរស៊ើបអង្កេតជាច្រើន ដើម្បីស្វែងរកការពិត និងរកភាពស្អាតស្អំជូនភាគីម្ចាស់ក្រុមហ៊ុន ក៏ដូចជាភាគីមន្ត្រីបរិស្ថាន។
តែយ៉ាងណា ក្រសួងមិនបានបញ្ជាក់ពីលទ្ធផលនៃការចុះស្រាវជ្រាវនោះនៅឡើយទេ ដោយគ្រាន់តែស្រង់សម្តីរបស់រដ្ឋមន្ត្រីក្រសួងបរិស្ថាន លោក អ៊ាង សុផល្លែត កាលពីថ្ងៃទី០៤ ខែមេសាថា៖ «ក្រសួងបរិស្ថាននឹងមិនទុកឱ្យករណីនេះចប់ ដោយមិនដឹងខុសត្រូវ ហើយមិនមានអ្នកទទួលខុសត្រូវនោះទេ។ ក្រសួងបរិស្ថាន មិនអនុញ្ញាតឱ្យមន្ត្រីប្រព្រឹត្តអំពើខុសឆ្គងនោះទេ។ មន្ត្រីប្រព្រឹត្តខុសនឹងទទួលខុសត្រូវ តែបើមិនបានប្រព្រឹត្តខុសទេ នឹងទទួលបានយុត្តិធម៌»។
ក្រោយពីបែកធ្លាយវីដេអូនេះដែរ មន្ទីរបរិស្ថានខេត្តកំពង់ស្ពឺ កាលពីថ្ងៃទី០៤ ខែមេសា ក៏បានចេញលិខិតបំភ្លឺ ដោយបង្ហាញពីភាពស្អាតស្អំរបស់មន្ត្រីខ្លួនថា ពួកគេមិនបានប្រព្រឹត្តអំពើពុករលួយដូចការចោទប្រកាន់នោះឡើយ។ មន្ទីរបរិស្ថានចោទលើអ្នករិះគន់មន្ត្រីថា បង្ហោះព័ត៌មានបំផ្លើស ញុះញង់ ទុច្ចរិត ធ្វើឲ្យសាធារណជនយល់ច្រឡំ ប៉ះពាល់កិត្តិយសអង្គភាពមន្ទីរបរិស្ថានខេត្តកំពង់ស្ពឺ។
មន្ត្រីសង្គមស៊ីវិល មើលឃើញថា ការចេញលិខិតបដិសេធការចោទប្រកាន់ភ្លាមៗរបស់មន្ត្រីបរិស្ថានខេត្តកំពង់ស្ពឺ ដោយមិនបានស៊ើបអង្កេតប្រកបដោយតម្លាភាព នឹងមិនអាចដោះស្រាយរកឫសគល់អំពើពុករលួយបាននោះទេ ផ្ទុយទៅវិញអំពើពុករលួយនៅតែជាជំងឺមហារីកក្នុងសង្គម៕
