មន្ត្រីជាន់ខ្ពស់នៅខេត្តព្រះសីហនុ បានទម្លាយឱ្យដឹងថា ត្រឹមរយៈពេល២ថ្ងៃចុងសប្តាហ៍នេះ សមត្ថកិច្ចជំនាញបានចាប់ឃាត់ខ្លួនជនសង្ស័យចំនួន ១២១នាក់ ដែលភាគច្រើនជាជនជាតិចិន ពាក់ព័ន្ធនឹងបទឧក្រិដ្ឋឆបោកតាមអនឡាញនៅក្នុងខេត្តនេះ។
ប្រភពនោះបង្ហាញក្តីសង្ឃឹមថា តាមរយៈវិធានចុះបង្ក្រាបបទល្មើសនេះ ខេត្តព្រះសីហនុ ដែលជាតំបន់ប៉ូលសេដ្ឋកិច្ចរបស់កម្ពុជាមួយនេះ នឹងអាចបោសសម្អាតឧក្រិដ្ឋកម្មអនឡាញ អស់ត្រឹមបំណាច់ខែមេសានេះ តាមការប្តេជ្ញារបស់រដ្ឋាភិបាល ។
យ៉ាងណា អ្នកឃ្លាំមើល មិនជឿថា ខេត្តធ្លាប់ល្បីឈ្មោះថា ជាសំបុកឧក្រិដ្ឋជននេះអាចធ្វើទៅបានទេ បើគ្មានការចូលរួមពីភាគីពាក់ព័ន្ធ រួមទាំងអ្នកសារព័ត៌មាន ដើម្បីទប់ស្កាត់អំពើពុករលួយរបស់មន្ត្រីអនុវត្តច្បាប់នោះ។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានឲ្យដឹងថា ត្រឹមរយៈពេល២ថ្ងៃ គឺនៅថ្ងៃទី៥និងទី៦ ខែមេសានេះ សកម្មភាពចុះបបង្ក្រាបបទល្មើស Scam Online ដោយគណៈបញ្ជាការឯកភាព រដ្ឋបាលខេត្តព្រះសីហនុ ឃាត់ខ្លួនជនសង្ស័យបានចំនួន១២១នាក់ មាន៩សញ្ជាតិ។ នេះបើតាមការចុះផ្សាយរបស់កាសែតក្នុងស្រុក កាលពីថ្ងៃទី៦ខែមេសានេះ។
ប្រភពនោះ ឱ្យដឹងទៀតថា ការចាប់ខ្លួនជនសង្ស័យ ក្រោយពីបន្តចុះពិនិត្យឆែកឆេរទីតាំងស្នាក់នៅ និងប្រមូលផ្តុំមួយកន្លែង ក្នុងសង្កាត់៤ ក្រុងព្រះសីហនុ និងទីតាំងផ្សេងទៀត។
យ៉ាងណា អ្នកសិក្សាស្រាវជ្រាយពីការអភិវឌ្ឍសង្គម លោក បណ្ឌិត មាស នី ហាក់មានជំនឿតិចតួចលើការអះអាងរបស់មន្ត្រីអ្នកនាំពាក្យខេត្តព្រះសីហនុរូបនេះ លើយន្តការបោសសម្អាតឧក្រិដ្ឋអនឡាញឱ្យអស់ត្រឹមបំណាច់ខែមេសានេះ។
លោកនិយាយថា រដ្ឋាភិបាល អាចត្រូវការពេលវេលាយូរក្នុងការបោសសំអាត ឬបង្ក្រាបបទល្មើស Scam Online ដែលបានចាក់ស្រែះនៅកម្ពុជា។ ហើយថា គម្រោងបិទបញ្ចប់មិនឲ្យមាន Scam Online នៅកម្ពុជា ត្រឹមបំណាច់ខែមេសានេះ ទំនងជាមិនអាចទៅរួចទេ ដ្បិតនៅខ្វះកិច្ចសហប្រតិបត្តិការគ្នា ឬការចូលរួមពីផ្នែកអ្នកពាកព័ន្ធឲ្យបានទូលំទូលាយ។
លោកថា៖ «ខ្ញុំមើលមិនទាន់ឃើញថា រឿងស្កេមអនឡាញនេះ វាចប់សព្វគ្រប់នៅក្នុងខែមេសានេះទេ ព្រោះរឿងនៅស្រុកយើងមានរឿងស្មុគស្មាញច្រើន ហើយបើនិយាយពីស្កេមអនឡាញហ្នឹង និយាយមែនទែនទៅ វាទាក់ទិនដល់ក្រសួងគមនាគមន៍ផង។ បើនិយាយឲ្យស៊ីជំរៅមែនទែន ហើយអីក៏ក្រសួងគមនាគមន៍មិនអាចត្រួតពិនិត្យបានទៅលើប្រព័ន្ធនៃការប្រើប្រាស់ស្កេមអនឡាញហ្នឹងបាន?។ អាហ្នឹងបើនិយាយឲ្យស៊ីជំរៅ គឺវាប៉ះពាល់ដល់ក្រសួងគមនាគមន៍ថែមទៀត»។
លោកគូសបញ្ជាក់ថា ក្រសួងគមនាគមន៍គួរដើរតួនាទីសំខាន់ ក្នុងការចូលរួមចំណែកលើការងារបង្ក្រាប ឬបោសសំអាតស្កេមអនឡាញនៅកម្ពុជា។ លោកមើលឃើញថា រាល់សកម្មភាពបង្ក្រាបបទល្មើសអ្វីមួយ ដែលបានដាក់ចេញដោយប្រមុខដឹកនាំរដ្ឋាភិបាលកម្ពុជា កន្លងមក គឺមិនដែលបានអនុវត្តជោគជ័យ ឬបានពេញលេញម្តងណាទេ ដោយធ្វើឡើងតាមរយៈភ្លើងចំបើង ឆេះមួយភ្លេតហើយក៏រលត់ទៅវិញ?។
លោកថា៖ «អញ្ចឹងវាមិនអាចទៅដើរចាប់តែបញ្ហាដែលមាន ប៉ុន្តែអ្នកដែលបង្ក អ្នកដែលផ្តល់ឱកាស ផ្តល់នូវលទ្ធភាពដែលជាមូលហេតុដើមហ្នឹង យើងអត់បានធ្វើ អាហ្នឹងយើងទៅកាត់ស្មៅ កាត់ហើយដុះវិញដូចគ្នាដែរ។ វាថយចុះ ប៉ុន្តែបើថាឲ្យជោគជ័យ ឲ្យបាត់ទាំងស្រុង ខ្ញុំគិតថា សម្រាប់ប្រពៃណីនៃការកំចាត់អំពើឧក្រិដ្ឋកម្មនៅស្រុកខ្មែរយើងនេះ វាអត់ដែលបានបាត់រហូតនោះទេ គឺគ្រាន់តែថយចុះ ហើយស្ងាត់ត្រចៀកបន្តិច ក៏វិលមកវិញដដែល»។
លើសពីនេះ លោក អំ សំអាត នាយកទទួលបន្ទុកកិច្ចការទៅអង្គការការពារសិទ្ធិមនុស្សលីកាដូ បង្ហាញការយល់ឃើញថា ដើម្បីឱ្យយុទ្ធនាការបំបាត់ Scam Online មានប្រសិទ្ធភាព គឺទាមទារឲ្យមានការចូលរួមពីផ្នែកពាក់ព័ន្ធទាំងអស់ រាប់ទាំងប្រជាពលរដ្ឋ និងអ្នកសារព័ត៌មានជាដើម។ ប៉ុន្តែលោកថា បើការផ្តល់ព័ត៌មានពីចំណុចអវិជ្ជមាន ផ្តើមចេញពីសមត្ថកិច្ចចុះការបង្ក្រាបបទល្មើសនេះ បែរជាអ្នកផ្តល់ព័ត៌មានបែរជាទទួលបាននូវការបំភិតបំភ័យ ឬរងនូវការគំរាមកំហែង ប្តឹងផ្តល់ពីអាជ្ញាធរនោះ គឺទំនងជាមិនទទួលបានលទ្ធផលល្អទេ។
លោកថា៖ «អញ្ចឹងអាជ្ញាធរដែលអនុវត្តហ្នឹងត្រូវតែទី១ ត្រូវបង្កើនការអនុវត្តច្បាប់ឲ្យមានប្រសិទ្ធភាព ទី២ លុបបំបាត់អំពើពុករលួយ ទី៣ ត្រូវមានកិច្ចសហប្រតិបត្តិការល្អ។ ហើយកិច្ចសហប្រតិបត្តិការល្អហ្នឹងគឺមិនមែនត្រឹមអាជ្ញាធរ និងអាជ្ញាធរទេ គឺត្រូវមានការចូលរួមពីប្រជាពលរដ្ឋ ពីសារព័ត៌មាន ពីភាគីពាក់ព័ន្ធផ្សេងទៀត ដើម្បីរួមគ្នាទប់ស្កាត់បង្ក្រាបទៅលើបទល្មើស ស្កេមអនឡាញ ទើបការបង្ក្រាបហ្នឹងអាចមានជោគជ័យ និងមានប្រសិទ្ធភាព»។
ថ្មីៗនេះ រដ្ឋបាលខេត្តនេះ ធ្លាប់ប្តឹងអ្នកសារព័ត៌មានក្នុងខេត្តនេះ គឺលោក យួន ឈីវ ក្រោយរាយការណ៍រឿងអាស្រូវពុករលួយពាក់ព័ន្ធមន្ត្រីចុះអនុវត្តច្បាប់។
ជុំវិញបញ្ហានេះ អ្នកជំនាញភូមិសាស្រ្តនយោបាយ លោក សេង វណ្ណលី ធ្លាប់និយាយថា ករណីបាញ់សម្លាប់មេឧក្រិដ្ឋជន ជនជាតិតៃវ៉ាន់នៅក្រុងព្រះសីហនុនេះ គឺជាការឆ្លុះបញ្ចាំងពីភាពធូររលុងនៃប្រព័ន្ធគ្រប់គ្រងរដ្ឋបាល និងសន្តិសុខក្រោមការដឹកនាំរបស់នាយករដ្ឋមន្ត្រី ហ៊ុន ម៉ាណែត។
លោកគូសបញ្ជក់ថា វត្តមានឧក្រិដ្ឋជនឆ្លងដែន ដែលមានដីកាចាប់ខ្លួន ប៉ុន្តែអាចចូលមកជ្រកកោន និងបន្តអាជីវកម្មបនល្បែងស៊ីសងនៅកម្ពុជាដោយសេរី រហូតឈានដល់មានករណីបាញ់សម្លាប់គ្នានេះ បង្ហាញថា កម្ពុជាកំពុងមានវិបត្តិសន្តិសុខជាតិយ៉ាងធ្ងន់ធ្ងរ។
លោកគូសបញ្ជាក់ថា ករណីនេះ ឆ្លុះបញ្ចាំងថា ប្រព័ន្ធច្បាប់នៅកម្ពុជាគឺត្រូវបានបំផ្លាញដោយឧក្រិដ្ឋជន ដោយសារតែពួកគេបានប្រើប្រាស់ឥទ្ធិពលលុយកខ្វក់ ទិញសិទ្ធិជ្រកកោនលើទឹកដីខ្មែរ និងដើម្បីទទួលបានការការពារពីមន្ត្រីជាន់ខ្ពស់មួយចំនួនក្នុងជួររដ្ឋាភិបាល៕
