នៅម៉ោង ១៨:៣២ នាទី ម៉ោងនៅទីក្រុងវ៉ាស៊ីនតោន ប្រធានាធិបតី ដូណាល់ ត្រាំ បានបង្ហោះនៅលើបណ្តាញសង្គមរបស់លោកថា សហរដ្ឋអាមេរិក និងអ៊ីរ៉ង់ បានឈានមកដល់ “ដំណាក់កាលឆ្ងាយណាស់ហើយ” ជាមួយកិច្ចព្រមព្រៀងសន្តិភាព “ច្បាស់លាស់” មួយ ហើយលោកបានយល់ព្រមលើបទឈប់បាញ់រយៈពេលពីរសប្តាហ៍ ដើម្បីអនុញ្ញាតឱ្យការចរចាបន្តទៅមុខទៀត។
វាមិនមែនជាការសម្រេចចិត្តនៅនាទីចុងក្រោយបង្អស់នោះទេ ប៉ុន្តែវាបានកើតឡើងយ៉ាងប្រកៀកប្រកិតបំផុត មុនពេលដល់ឱសានវាទម៉ោង ២០:០០ នាទី (ម៉ោងនៅតំបន់ភាគខាងកើត ឬម៉ោង ០០:០០ ម៉ោងសកលនៅថ្ងៃពុធ) ដែលលោក ត្រាំ បានកំណត់ថាត្រូវតែសម្រេចឱ្យបាននូវកិច្ចព្រមព្រៀង បើមិនដូច្នោះទេ សហរដ្ឋអាមេរិកនឹងបើកការវាយប្រហារទ្រង់ទ្រាយធំលើហេដ្ឋារចនាសម្ព័ន្ធថាមពល និងដឹកជញ្ជូនរបស់អ៊ីរ៉ង់។
អ្វីៗទាំងអស់នេះ គឺអាស្រ័យលើការដែលអ៊ីរ៉ង់ក៏ត្រូវផ្អាកអរិភាព និងបើកច្រកសមុទ្រ Hormuz ទាំងស្រុងសម្រាប់ការដឹកជញ្ជូនពាណិជ្ជកម្មផងដែរ ដែលអ៊ីរ៉ង់និយាយថាខ្លួននឹងធ្វើតាម។ ជាមួយនឹងការប្រកាសនេះ លោក ត្រាំ បានសម្រេចនូវគោលដៅចំពោះមុខធំបំផុតរបស់លោក ទោះបីជាអ៊ីរ៉ង់បាននិយាយថាខ្លួននៅតែមាន “អំណាចត្រួតត្រា” លើផ្លូវទឹកនេះក៏ដោយ។
ពេលនេះ សហរដ្ឋអាមេរិក និងអ៊ីរ៉ង់ នឹងចូលរួមក្នុងការចរចាក្នុងរយៈពេលពីរសប្តាហ៍ខាងមុខ ដើម្បីព្យាយាមឈានទៅរកដំណោះស្រាយអចិន្ត្រៃយ៍។ វាទំនងជានឹងមានភាពរដិបរដុប ប៉ុន្តែនៅក្នុងការជួញដូរបន្ទាប់ពីម៉ោងធ្វើការ តម្លៃប្រេងក្នុងមួយបារ៉ែលបានធ្លាក់ចុះក្រោម ១០០ ដុល្លារជាលើកដំបូងក្នុងរយៈពេលប៉ុន្មានថ្ងៃនេះ ហើយផ្សារភាគហ៊ុនអាមេរិកបានហក់ឡើងខ្ពស់។ ហាក់ដូចជាមានសុទិដ្ឋិនិយមថា ស្ថានភាពដ៏អាក្រក់បំផុតបានកន្លងផុតទៅហើយ។
ទោះជាយ៉ាងណា វឌ្ឍនភាពបែបនេះ គឺមិនទាន់មានភាពប្រាកដប្រជាទាល់តែសោះ កាលពីព្រឹកថ្ងៃទី៧ខែមេសា នៅពេលដែលលោក ត្រាំ បានគំរាមកំហែងពីការស្លាប់នៃអរិយធម៌អ៊ីរ៉ង់ ដែល “មិនអាចវិលត្រឡប់មកវិញបានឡើយ”។
ថាតើការគំរាមកំហែងដ៏គួរឱ្យភ្ញាក់ផ្អើលបែបនេះពីប្រធានាធិបតីអាមេរិក បានដាក់សម្ពាធឱ្យអ៊ីរ៉ង់យល់ព្រមលើបទឈប់បាញ់ដែលពួកគេធ្លាប់បានបដិសេធពីមុនមកឬយ៉ាងណានោះ គឺមិនទាន់ច្បាស់ឡើយ។ អ្វីដែលច្បាស់នោះគឺថា ការប្រកាសដ៏គួរឱ្យតក់ស្លុត និងមានលក្ខណៈញុះញង់របស់លោក ត្រាំ — ត្រឹមតែពីរថ្ងៃបន្ទាប់ពីការទាមទារតាមរយៈ Truth Social ដែលប្រើពាក្យសម្តីអសុរសស្រដៀងគ្នា — គឺមិនដូចអ្វីដែលប្រធានាធិបតីអាមេរិកសម័យទំនើបធ្លាប់បានធ្វើ ឬបង្ហើបឱ្យដឹងពីមុនមកនោះទេ។
ទោះបីជាបទឈប់បាញ់រយៈពេលពីរសប្តាហ៍នេះ នាំឱ្យមានសន្តិភាពអចិន្ត្រៃយ៍ក៏ដោយ ក៏សង្គ្រាមអ៊ីរ៉ង់ និងសម្តីថ្មីៗរបស់លោក ត្រាំ អាចនឹងផ្លាស់ប្តូរជាមូលដ្ឋាននូវរបៀបដែលពិភពលោកទាំងមូលមើលមកសហរដ្ឋអាមេរិក។
ប្រទេសមួយដែលធ្លាប់ចាត់ទុកខ្លួនឯងថាជាកម្លាំងសម្រាប់ស្ថិរភាពជុំវិញពិភពលោក ឥឡូវនេះកំពុងធ្វើឱ្យរង្គោះរង្គើមូលដ្ឋានគ្រឹះនៃសណ្តាប់ធ្នាប់អន្តរជាតិ។ ប្រធានាធិបតីម្នាក់ដែលហាក់ដូចជាចូលចិត្តការបំបែកបទដ្ឋាន និងប្រពៃណីក្នុងនយោបាយក្នុងស្រុក ឥឡូវនេះកំពុងធ្វើរឿងដដែលនេះនៅលើឆាកពិភពលោក។
សមាជិកគណបក្សប្រជាធិបតេយ្យ បានចេញមកថ្កោលទោសសម្តីរបស់លោកត្រាំ ភ្លាមៗកាលពីថ្ងៃទី៧ខែមេសា ដោយមានអ្នកខ្លះឈានដល់ការអំពាវនាវឱ្យដកលោកចេញពីតំណែងទៀតផង។
សមាជិកសភាលោក Joaquin Castro បានសរសេរលើបណ្តាញសង្គម X ថា៖ «វាច្បាស់ណាស់ថា ប្រធានាធិបតីនៅតែបន្តធ្លាក់ចុះដុនដាប ហើយមិនស័ក្តិសមនឹងដឹកនាំឡើយ»។
លោក Chuck Schumer មេដឹកនាំគណបក្សប្រជាធិបតេយ្យក្នុងព្រឹទ្ធសភាអាមេរិក បាននិយាយថា សមាជិកគណបក្សសាធារណរដ្ឋណា ដែលមិនចូលរួមបោះឆ្នោត ដើម្បីបញ្ចប់សង្គ្រាមអ៊ីរ៉ង់ “ត្រូវទទួលខុសត្រូវរាល់ផលវិបាកនៃអ្វីក៏ដោយដែលកំពុងកើតឡើងនេះ”៕
