សហរដ្ឋអាមេរិក និងអ៊ីរ៉ង់ បានយល់ព្រមលើបទឈប់បាញ់តាមលក្ខខណ្ឌរយៈពេលពីរសប្តាហ៍ កាលពីល្ងាចថ្ងៃទី៧ខែមេសា បន្ទាប់ពីមានអន្តរាគមន៍ការទូតនៅនាទីចុងក្រោយ ដឹកនាំដោយប្រទេសប៉ាគីស្ថាន ដែលបានធ្វើឱ្យការកំណត់ឱសានវាទរបស់ លោក ដូណាល់ ត្រាំ ឱ្យអ៊ីរ៉ង់ចុះចាញ់ ឬប្រឈមមុខនឹងការបំផ្លិចបំផ្លាញរីករាលដាល ត្រូវបានលុបចោលវិញ។
ការប្រកាសរបស់លោក ត្រាំ អំពីកិច្ចព្រមព្រៀងបទឈប់បាញ់នេះ បានធ្វើឡើងក្នុងរយៈពេលមិនដល់ពីរម៉ោងផង មុនពេលដល់ឱសានវាទម៉ោង ៨ យប់ (ម៉ោងនៅតំបន់ភាគខាងកើត) ដែលប្រធានាធិបតីអាមេរិករូបនេះ បានកំណត់ខ្លួនឯង ដើម្បីទម្លាក់គ្រាប់បែកលើរោងចក្រអគ្គិសនី និងស្ពាននានារបស់អ៊ីរ៉ង់ ដែលជាទង្វើដែលអ្នកប្រាជ្ញច្បាប់ ក៏ដូចជាមន្ត្រីមកពីប្រទេសជាច្រើន និងសម្តេចប៉ាប បានព្រមានថាអាចជាបទល្មើសសង្គ្រាម។
ត្រឹមតែប៉ុន្មានម៉ោងមុននេះ លោក ត្រាំ បានសរសេរនៅលើបណ្តាញសង្គម Truth Social ថា៖ «អរិយធម៌ទាំងមូលនឹងត្រូវរលាយសាបសូន្យនៅយប់នេះ ហើយនឹងមិនអាចវិលត្រឡប់មកវិញឡើយ។ ខ្ញុំមិនចង់ឱ្យរឿងនោះកើតឡើងទេ ប៉ុន្តែវាប្រហែលជានឹងកើតឡើង»។
មានសេចក្តីរាយការណ៍ថា យន្តហោះទម្លាក់គ្រាប់បែក B-52 កំពុងហោះឆ្ពោះទៅកាន់ប្រទេសអ៊ីរ៉ង់ មុនពេលកិច្ចព្រមព្រៀងបទឈប់បាញ់ត្រូវបានប្រកាស។
ប៉ុន្តែនៅល្ងាចថ្ងៃទី៧ខែមេសា លោក ត្រាំ បានប្រកាសថា កិច្ចព្រមព្រៀងបទឈប់បាញ់មួយត្រូវបានសម្របសម្រួលតាមរយៈប្រទេសប៉ាគីស្ថាន ដែលនាយករដ្ឋមន្ត្រីលោក Shehbaz Sharif បានស្នើសុំសន្តិភាពរយៈពេលពីរសប្តាហ៍ ដើម្បី «ទុកឱ្យវិស័យការទូតដំណើរការទៅតាមលំដាប់លំដោយ»។
លោក ត្រាំ បានសរសេរក្នុងសារបង្ហោះមួយថា «ដោយផ្អែកលើការយល់ព្រមរបស់សាធារណរដ្ឋអ៊ីស្លាមអ៊ីរ៉ង់ ចំពោះការបើកច្រកសមុទ្រ Hormuz ឡើងវិញដោយពេញលេញ ភ្លាមៗ និងប្រកបដោយសុវត្ថិភាព ខ្ញុំយល់ព្រមផ្អាកការទម្លាក់គ្រាប់បែក និងការវាយប្រហារលើអ៊ីរ៉ង់ក្នុងរយៈពេលពីរសប្តាហ៍»។
ក្នុងរយៈពេលពីរសប្តាហ៍នេះ លោក ត្រាំ បានមានប្រសាសន៍ថា លោកជឿជាក់ថា សហរដ្ឋអាមេរិក និងអ៊ីរ៉ង់ អាចចរចាលើសំណើ ១០ ចំណុចដែលធ្វើឡើងដោយទីក្រុងតេហេរ៉ង់ ដែលនឹងអនុញ្ញាតឱ្យបទឈប់បាញ់ត្រូវបាន «បញ្ចប់ជាស្ថាពរ និងសម្រេចបានជោគជ័យ»។
លោកបានបន្តថា៖ «នេះនឹងក្លាយជាបទឈប់បាញ់ពីរកង! មូលហេតុដែលធ្វើបែបនេះ គឺដោយសារតែយើងបានសម្រេច និងលើសពីគោលដៅយោធាទាំងអស់រួចទៅហើយ ហើយយើងកំពុងឈានទៅមុខយ៉ាងខ្លាំងជាមួយនឹងកិច្ចព្រមព្រៀងច្បាស់លាស់ ទាក់ទងនឹងសន្តិភាពរយៈពេលវែងជាមួយអ៊ីរ៉ង់ និងសន្តិភាពនៅមជ្ឈិមបូព៌ា»។
រដ្ឋមន្ត្រីការបរទេសអ៊ីរ៉ង់ លោក Abbas Araghchi បានចេញសេចក្តីថ្លែងការណ៍មួយភ្លាមៗ បន្ទាប់ពីការប្រកាសរបស់លោក ត្រាំ ដោយនិយាយថា អ៊ីរ៉ង់បានយល់ព្រមលើបទឈប់បាញ់នេះ។
លោកបានសរសេរថា៖ «ក្នុងរយៈពេលពីរសប្តាហ៍ ការធ្វើដំណើរដោយសុវត្ថិភាពតាមច្រកសមុទ្រ Hormuz នឹងអាចប្រព្រឹត្តទៅបាន តាមរយៈការសម្របសម្រួលជាមួយកងកម្លាំងប្រដាប់អាវុធរបស់អ៊ីរ៉ង់»។
ការផ្លាស់ប្តូរជំហរភ្លាមៗនេះ នឹងអនុញ្ញាតឱ្យ លោក ត្រាំ ដកថយវិញ ខណៈដែលសង្គ្រាមអាមេរិកនៅអ៊ីរ៉ង់បានអូសបន្លាយអស់រយៈពេលប្រាំសប្តាហ៍ ដោយមានសញ្ញាតិចតួចថាទីក្រុងតេហេរ៉ង់ត្រៀមខ្លួនចុះចាញ់ ឬលែងគ្រប់គ្រងលើច្រកសមុទ្រ Hormuz ដែលជាផ្លូវដឹកជញ្ជូនថាមពលមួយភាគប្រាំនៃពិភពលោក៕
