ក្រោយពលរដ្ឋភៀសសឹកផ្ទុះការតវ៉ា រដ្ឋបាលខេត្តបន្ទាយមានជ័យបានចេញបំភ្លឺថា ការផ្តល់ផ្ទះឱ្យអ្នករងគ្រោះពីការឈ្លានពានរបស់ថៃ ធ្វើឡើងជាជំហានៗ តាមរយៈនៃការចាប់ឆ្នោតតាមលំដាប់លំដោយ រវាងអ្នកចុះឈ្មោះមុននិងអ្នកចុះឈ្មោះក្រោយ។
រដ្ឋបាលខេត្តបន្ទាយមានជ័យ បាននិយាយក្នុងលិខិតចុះថ្ងៃទី៨ ខែមេសា ឆ្នាំ២០២៦ថា ប្រជាពលរដ្ឋដែលរងគ្រោះដោយសារថៃហ៊ុំព័ទ្ធលួសបន្លា ដាក់ទូកុងតឺន័រយកដីធ្លី ផ្ទះសម្បែង ដែលមិនអាចចូលទៅរស់នៅលើទីតាំងដីរបស់ខ្លួនបាន រដ្ឋាភិបាលតែងតែគិតគូរ និងយកចិត្តទុកដាក់ទាំងការរស់នៅនិងជីវភាព ពិសេសភូមិជោគជ័យ ភូមិព្រៃចាន់ ស្ថិតនៅឃុំអូរបីជាន់ ស្រុកអូរជ្រៅ និងភូមិសាមគ្គី ភូមិត្រពាំងសំរោង ភូមិផ្លូវបំបែក និងភូមិបន្ទាយមានឬទ្ធិ ស្ថិតនៅឃុំគោករមៀត ស្រុកថ្មពួក ខេត្តបន្ទាយមានជ័យ។
បើតាមប្រភពនោះស្ថាប័នពាក់ព័ន្ធ កំពុងរៀបចំដីធ្លីជាគម្រោងរបស់សមាគមអតីតយុទ្ធជន ដើម្បីសាងសង់ ផ្ទះសម្រាប់ផ្តល់ជូននៅភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ លើផ្ទៃដីទំហំ៤០០ ហិកតា និងមានហេដ្ឋារចនាសម្ព័ន្ធនានាគ្រប់គ្រាន់។ ហើយថា បច្ចុប្បន្ន ក្រុមការងារ កំពុងដំណើរការ សាងសង់ផ្ទះបានមួយចំនួន និងផ្តល់ជូន ដើម្បីចូលទៅរស់នៅជាបណ្តោះអាសន្ន«ទៅតាមជំហានៗ តាមរយៈនៃការចាប់ឆ្នោតយកលេខក្បាលដីឡូត៍»។
ប្រភពដដែល បញ្ជាក់ថា ថ្មីៗនេះ ក្រុមការងាររៀបចំដីឡូត៍បានរៀបចំកម្មវិធីចាប់ឆ្នោតយកផ្ទះ និងដីឡូត៍ជូនជនភៀសសឹក ដើម្បីចូលទៅរស់នៅបណ្តោះអាសន្ន ប៉ុន្តែនៅមានបងប្អូនជនភៀសសឹកមួយចំនួន ដែលបានចុះឈ្មោះ ក្រោយជាបន្តបន្ទាប់ ហើយពុំទាន់ទទួលបានផ្ទះ និងដីឡូត៍ មានការព្រួយបារម្ភខ្លាចអត់ទទួលបានផ្ទះ និងដីឡូត៍។
ត្រង់ចំនុចនេះ រដ្ឋបាលខេត្តបន្ទាយមានជ័យ បញ្ជាក់ថា ការដោះស្រាយជូននឹងរៀបចំស្របតាមបែបបទ និងនីតិវិធីទៅតាមលំដាប់ដៃការចុះឈ្មោះរបស់ជនភៀសសឹក។
កាលពីថ្ងៃទី៦ខែមេសា ដើមសប្តាហ៍នេះ ពលរដ្ឋភៀសសឹក នៅភូមិបន្ទាយមានឫទ្ធិ ឃុំគោករមៀត ស្រុកថ្មពួក ខេត្តបន្ទាយមានជ័យ ត្រូវបានគេអះអាងថា ប្រមាណជា១០០នាក់ បានផ្ទុះការតវ៉ា ដោយចោទអាជ្ញាធរថា ការបែងចែកផ្ទះ ស្នាក់នៅបណ្តោះអាសន្នរបស់ស្ថាប័ន្ធពាក់ព័ន្ធ ធ្វើឡើងខ្វះតម្លាភាព ប្រកាន់បក្ខពួក ខណៈជនភៀសសឹកខ្លះចាប់លេខបានផ្ទះចូលស្នាក់នៅជាបន្តបន្ទាប់រួចហើយ។
បញ្ហានេះ សង្គមស៊ីវិល និងគណបក្សប្រឆាំង ជំរុញរដ្ឋាភិបាលពិនិត្យឡើងវិញ ដើម្បីបង្ហាញតម្លាភាពដល់ជនភៀសសឹក កុំឱ្យគេជួបវិបត្តិផ្ទួនៗ ក្រោយរងគ្រោះពីថៃឈ្លានពាន ដែលរដ្ឋាភិបាលមិនមានសមត្ថភាពទប់ស្កាត់ការឈ្លានពាននេះឱ្យមានប្រសិទ្ធភាព។
បើតាម ក្រសួងមហាផ្ទៃ គិតត្រឹមថ្ងៃទី៧ ខែមេសា នៅមានពលរដ្ឋភៀសសឹកជាង ៣ម៉ឺន (៣៤,៨៧០) នាក់ មិនទាន់អាចត្រឡប់ទៅកាន់ផ្ទះរបស់ខ្លួនវិញ ក្នុងនោះ ស្ត្រីជិត ២ម៉ឺន (១៩,១០៥)នាក់ និងកុមារជាង ១ម៉ឺន (១១,៥៨៥)នាក់ ក្រោយថៃបើកការឈ្លានពានកម្ពុជា អំឡុងខែធ្នូ ឆ្នាំ២០២៥៕
