អ្នកធ្វើការផ្នែកសិទ្ធិមនុស្ស សាទរចំពោះសាលាឧទ្ធរណ៍បាត់ដំបង ដែលសម្រេចដោះលែងអ្នកសារព័ត៌មានអនឡាញ លោក ហែម វណ្ណា ឱ្យនៅក្រៅឃុំបណ្តោះអាសន្ន និងបានស្នើដល់តុលាការពិចារណាទម្លាក់បទចោទទៅលើរូបគាត់ រួមនិងការដោះលែងអ្នកសារព័ត៌មាន និងអ្នកជាប់ឃុំដោយសារការបញ្ចេញមតិផ្សេងទៀត ដើម្បីស្តារមុខមាត់កម្ពុជាឡើងវិញពីការរិះគន់។
លោក ហែម វណ្ណា មានតួនាទីជាចាងហ្វាងកាសែត HVNN ត្រូវបានតុលាកាសាលាដំបូងខេត្តបន្ទាយមានជ័យ សម្រេចឃុំបណ្តោះខ្លួនជាអាសន្ននៅពន្ធនាគារ កាលពីរសៀលថ្ងៃទី០៤ ខែកុម្ភៈ ឆ្នាំ២០២៦ ដោយជាប់ចោទពីបទ «ញុះញង់ឱ្យប្រព្រឹត្តបទឧក្រិដ្ឋ» និងបទ «ស្តាប់ឫថតពាក្យសម្ងាត់ឯកជន» បន្ទាប់ពីលោកចុះផ្សាយព័ត៌មានពាក់ព័ន្ធថា “ជនជាតិបរទេស ៤ ទៅ៥នាក់ រងនូវអំពើហិង្សាពីសំណាក់មនុស្សមួយក្រុមផ្សេងទៀត ដែលគេដឹងថា ជាអ្នកបម្រើការនៅក្នុងបរិវេណអាគារបិទខ្ទប់ ជាទីអាថ៍កំបាំង នៅខាងក្រោយបន្ទាយកងរាជអាវុធហត្ថ ក្រុងប៉ោយប៉ែត។ ករណីនេះ ត្រូវបានគេសង្ស័យថាអាចជាការបង្ខាំងមនុស្សខុសច្បាប់ បង្ខំឲ្យធ្វើការឆបោកតាមប្រព័ន្ធអនឡាញ (Online Scammer)” ។
អនុប្រធានសមាគមការពារសិទ្ធិមនុស្សអាដហុក លោក យិន ម៉េងលី ឱ្យដឹងនៅថ្ងៃទី០៩ ខែមេសា ឆ្នាំ២០២៦នេះថា លោក ហែម វណ្ណា ត្រូវបានតុលាការសម្រេចដោះលែងឱ្យនៅក្រៅឃុំជាបណ្តោះអាសន្នហើយ នៅថ្ងៃទី០៨ ខែមេសា ក្រោយមេធាវីរបស់គាត់ដាក់ពាក្យស្នើសុំនៅក្រៅឃុំជាថ្មីទៀត នៅសាលាដំបូងខេត្តបន្ទាយមានជ័យ។
លោកបង្ហាញការសាទរចំពោះការដោះលែង លោក ហេង វណ្ណា ឱ្យនៅក្រៅឃុំជាបណ្តោះអាសន្ននេះ ដើម្បីបានជួបជុំគ្រួសារក្នុងឱកាសបុណ្យចូលឆ្នាំនេះ។ យ៉ាងណា លោកនៅតែចង់ឃើញតុលាការទម្លាក់បទចោទទៅលើអ្នកសារព័ត៌មានរូបនេះ និងដោះលែងអ្នកសារព័ត៌មានផ្សេងទៀត រួមទាំងអ្នកជាប់ឃុំដោយសារការបញ្ចេញមតិ និងសកម្មជនការពារសិទ្ធិមនុស្ស ដើម្បីបង្ហាញពីឆន្ទៈបង្រួបបង្រួបជាតិ និងស្តារមុខមាត់កម្ពុជាលើឆាកអន្តរជាតិ។
លោកថា៖ «ហើយយើងក៏ចង់ឃើញថាបទល្មើសរបស់គាត់ ត្រូវបានលើកលែងការចោទប្រកាន់ទៅលើអ្នកសារព័ត៌មាននេះ មិនត្រឹមតែដោះលែងឱ្យនៅក្រៅឃុំជាបណ្តោះអាសន្នទេ។ ជាមួយគ្នានេះដែរ យើងក៏ចង់ឱ្យមានការអនុវត្តទៅលើអ្នកសារព័ត៌មាន ទៅលើអ្នកបញ្ចេញមតិទោះឋិតនៅក្នុងទម្រង់ណាក៏ដោយ ចង់ឱ្យមានការដោះលែងពួកគាត់ឱ្យមានសេរីភាពឡើងវិញ ទោះបីជានៅក្រៅឃុំជាបណ្តោះអាសន្នក្តី ទោះបីជាមិនទាន់ទម្លាក់បទចោទក្តី ព្រោះនៅពេលខាងមុខនេះជារដូវជួបជុំបងប្អូន យើងចង់ឱ្យមានការដោះលែងទាំងអស់»។
លោក យិន ម៉េងលី ក៏បានសំណូមពរដល់រដ្ឋាភិបាល លើកតម្កើងច្បាប់ស្តីពីររបបសារព័ត៌មានឆ្នាំ១៩៩៥ និងបើកលំហសេរីភាពជាមូលដ្ឋាន ជាពិសេសសេរីភាពបញ្ចេញមតិ ដើម្បីស្តារមុខមាត់កម្ពុជាឡើងវិញ ក្នុងសង្គមប្រជាធិបតេយ្យ។ មួយទៀត លោកក៏ស្នើរដ្ឋាភិបាល ជាពិសេសក្រសួងយុត្តិធម៌ ពិនិត្យឡើងវិញទៅលើក្រមព្រហ្មទណ្ឌមាត្រា ៤៩៤ និង៤៩៥ ពាក់ព័ន្ធនឹងបទញុះញង់ ដែលធ្វើឱ្យប៉ះពាល់ដល់សេរីភាពបញ្ចេញមតិរបស់ពលរដ្ឋ។
ស្របពេលគ្នានេះដែរ អង្គការការពារសិទ្ធិមនុស្សលីកាដូ តាមរយៈទំព័រហ្វេសប៊ុករបស់ខ្លួន ក៏បានអំពាវនាវឱ្យមានការដោះលែងសកម្មជនការពារសិទ្ធិមនុស្ស និងបរិស្ថាន ចំនួន ៧នាក់ផងដែរ ខណៈដែលប្រជាពលរដ្ឋខ្មែរទាំងក្នុង និងក្រៅប្រទេស កំពុងតែរៀបចំពិធីបុណ្យចូលឆ្នាំថ្មីប្រពៃណីជាតិ។
អ្នកទាំង៧រូបដែលលីកាដូស្នើសុំឱ្យដោះលែងនោះ រួមមាន លោក កើត សារ៉ាយ និង លោក ធី ថន ប្រធាន និងអនុប្រធាននៃសមាគមសម្ពន្ធនិស្សិតបញ្ញវន្តខ្មែរ (KSILA) និងសកម្មជននៃចលនាមាតាធម្មជាតិ កញ្ញា ឡុង គន្ធា លោក លី ចាន់ដារ៉ាវុត លោក ថុន រដ្ឋា កញ្ញា ភួន កែវរស្មី និង លោក យីម លាងហ៊ី ។
អ្នកការពារសិទិ្ធមនុស្ស និងសកម្មជនការពារបរិស្ថានទាំង ៧រូប ត្រូវបានចាប់ខ្លួន និងចោទប្រកាន់ ដោយសារភាពសកម្មនិយមរបស់ពួកគេ ទៅលើកិច្ចការងារសិទិ្ធមនុស្ស បរិស្ថាន និងធនធានធម្មជាតិនៅក្នុងប្រទេស។
លីកាដូបានបញ្ជាក់ក្នុងសំណេរដើមថា៖ «យើងខ្ញុំសង្ឃឹមថា តុលាការនឹងពិចារណាក្នុងការទម្លាក់ចោលបទចោទ និងដោះលែងអ្នកការពារសិទ្ធិមនុស្ស និងសកម្មជនការពារបរិស្ថានទាំង ៧ រូប ដោយឥតលក្ខខណ្ឌ ដើម្បីឱ្យពួកគាត់បានជួបជុំក្រុមគ្រួសារក្នុងឱកាសបុណ្យចូលឆ្នាំប្រពៃណីជាតិខាងមុខនេះ និងបន្តភាពសកម្មនិយមក្នុងកិច្ចការពារសិទ្ធិមនុស្ស បរិស្ថាន ធនធានធម្មជាតិ ដីធ្លី វិញ»។
វីអូឌី មិនអាចសុំការឆ្លើយតបបានទេពីអ្នកនាំពាក្យក្រសួងយុត្តិធម៌ លោក សេង ឌីណា នៅថ្ងៃព្រហស្បតិ៍នេះ។
បើតាមការចងក្រងដោយលីកាដូ គិតមកដល់ពេលនេះ មានសកម្មជនសិទ្ធិមនុស្ស បរិស្ថាន អ្នកនយោបាយ អ្នកសារព័ត៌មាន និងពលរដ្ឋចំនួន ៩៨នាក់ហើយ ដែលកំពុងជាប់ឃុំ ដោយសារការប្រើប្រាស់សិទ្ធិ និងភាពសកម្មរបស់ពួកគេក្នុងរឿងសង្គម និងបញ្ហាព្រំដែន៕
