នាយករដ្ឋមន្ត្រីអេស្ប៉ាញ លោក Pedro Sánchez កាលពីថ្ងៃទី៨ខែមេសា បានចូលរួមជាមួយបណ្តាមេដឹកនាំពិភពលោកក្នុងការស្វាគមន៍ចំពោះការប្រកាសឈប់បាញ់គ្នារវាងសហរដ្ឋអាមេរិក និងអ៊ីរ៉ង់ ប៉ុន្តែលោកបានប្រើសម្តីឌឺដងមិនចំឈ្មោះទៅកាន់រដ្ឋបាលលោក Trump ចំពោះការបង្កឱ្យមានជម្លោះតាំងពីដំបូងមក។
លោក Sánchez បានបង្ហោះសារនៅលើបណ្តាញសង្គមតាមរយៈការបកប្រែថា៖ «ការឈប់បាញ់គ្នាជារឿងល្អជានិច្ច ជាពិសេសប្រសិនបើវាដឹកនាំទៅរកសន្តិភាពដ៏យុត្តិធម៌ និងយូរអង្វែង។ ប៉ុន្តែការធូរស្រាលមួយគ្រានេះ មិនអាចធ្វើឱ្យយើងភ្លេចនូវភាពវឹកវរ ការបំផ្លិចបំផ្លាញ និងការបាត់បង់ជីវិតមនុស្សនោះទេ»។
លោកបានបន្តថា៖ «រដ្ឋាភិបាលអេស្ប៉ាញ នឹងមិនទះដៃអបអរដល់អ្នកដែលដុតបញ្ឆេះពិភពលោក គ្រាន់តែដោយសារតែពួកគេបង្ហាញខ្លួនជាមួយនឹងធុងទឹកនោះឡើយ»។
លោក Sánchez ដែលបានក្លាយជាអ្នករិះគន់ឈានមុខគេមួយរូបនៅក្នុងសហភាពអឺរ៉ុប ប្រឆាំងនឹងការវាយប្រហាររបស់សហរដ្ឋអាមេរិក និងអ៊ីស្រាអែលទៅលើអ៊ីរ៉ង់ បានអំពាវនាវឱ្យមាន «ការប្រើប្រាស់ការទូត ច្បាប់អន្តរជាតិ និងសន្តិភាព» ជាចម្បង។
មតិយោបល់របស់លោកបានធ្វើឡើងភ្លាមៗ បន្ទាប់ពីប្រធានាធិបតីសហរដ្ឋអាមេរិក បានមានប្រសាសន៍ថា លោកបានយល់ព្រមផ្អាកការវាយប្រហារលើហេដ្ឋារចនាសម្ព័ន្ធរបស់អ៊ីរ៉ង់រយៈពេលពីរលើក ដែលបង្កឱ្យមានការងើបឡើងវិញនៃទីផ្សារទ្រព្យសកម្មហានិភ័យ។
មុននេះ លោក Trump បានគំរាមថា «អារ្យធម៌ទាំងមូលនឹងត្រូវរលាយសាបសូន្យនៅយប់នេះ ហើយមិនអាចវិលត្រឡប់មកវិញបានឡើយ» ប្រសិនបើមិនមានកិច្ចព្រមព្រៀងណាមួយត្រូវបានធ្វើឡើងត្រឹមថ្ងៃអង្គារដែលជាឱសានវាទរបស់លោក។
មន្ត្រីអ៊ីរ៉ង់បាននិយាយថា បទឈប់បាញ់បណ្តោះអាសន្ននេះមានន័យថា ការធ្វើដំណើរឆ្លងកាត់ច្រកសមុទ្រហម៉ូស (Hormuz) ដែលមានសារៈសំខាន់ខ្លាំងខាងយុទ្ធសាស្ត្រនឹង «អាចទៅរួច» ដោយផ្អែកលើការសម្របសម្រួលជាមួយកងកម្លាំងប្រដាប់អាវុធរបស់ខ្លួន និង «កម្រិតបច្ចេកទេស» ដែលជាលក្ខខណ្ឌអាចឱ្យទីក្រុងតេហេរ៉ង់មានឱកាសកំណត់ការអនុវត្តតាមលក្ខខណ្ឌផ្ទាល់ខ្លួន។
មេដឹកនាំពិភពលោកបានស្វាគមន៍ចំពោះបទឈប់បាញ់នេះ ទោះបីជាក្រុមអ្នកវិភាគបានចាត់ទុកកិច្ចព្រមព្រៀងនេះថាមានភាពផុយស្រួយ និងបានព្រមានថា កង្វះការទុកចិត្តគ្នាយ៉ាងខ្លាំងពីភាគីទាំងសងខាង នឹងធ្វើឱ្យផ្លូវទៅរកសន្តិភាពយូរអង្វែងមានភាពស្មុគស្មាញ។
លោក Sánchez បានធ្វើឱ្យសេតវិមានខឹងសម្បារជាខ្លាំងជាច្រើនដង ចាប់តាំងពីសហរដ្ឋអាមេរិក និងអ៊ីស្រាអែលបានចាប់ផ្តើមការវាយប្រហារលើអ៊ីរ៉ង់កាលពីថ្ងៃទី ២៨ ខែកុម្ភៈ។
រដ្ឋាភិបាលអេស្ប៉ាញបានបដិសេធមិនអនុញ្ញាតឱ្យប្រើប្រាស់មូលដ្ឋានទ័ពរួមគ្នាពីរនៅក្នុងទឹកដីរបស់ខ្លួនសម្រាប់ការវាយប្រហាររបស់អាមេរិកលើអ៊ីរ៉ង់ឡើយ ហើយក្រោយមកបានបិទដែនអាកាសរបស់ខ្លួនចំពោះយន្តហោះអាមេរិកដែលពាក់ព័ន្ធនឹងការវាយប្រហារ ខណៈដែលខ្លួនបានប្រកាន់ជំហរប្រឆាំងនឹងសង្គ្រាមយ៉ាងម៉ឺងម៉ាត់។
ជាការឆ្លើយតប លោក Trump បានរិះគន់ជាថ្មីចំពោះការចំណាយលើវិស័យការពារជាតិរបស់អេស្ប៉ាញ និងបានគំរាមកាត់ផ្តាច់ទំនាក់ទំនងពាណិជ្ជកម្មទាំងអស់ជាមួយប្រទេសនៅអឺរ៉ុបខាងត្បូងមួយនេះ។
ទន្ទឹមនឹងនាយករដ្ឋមន្ត្រីអេស្ប៉ាញ ប្រធានគណៈកម្មការអឺរ៉ុប លោកស្រី Ursula von der Leyen ក៏បានស្វាគមន៍ចំពោះបទឈប់បាញ់រយៈពេលពីរសប្តាហ៍នេះផងដែរ ដោយលោកស្រីមានប្រសាសន៍ថា វាបាននាំមកនូវ «ការបន្ធូរបន្ថយភាពតានតឹងដែលកំពុងត្រូវការយ៉ាងចាំបាច់»។
ប្រធានគោលនយោបាយការបរទេសរបស់សហភាពអឺរ៉ុប លោកស្រី Kaja Kallas បានពិពណ៌នាកិច្ចព្រមព្រៀងនេះថាជា «ការដកថយមួយជំហានពីមាត់ជ្រោះ ក្រោយភាពតានតឹងដែលបានកើនឡើងជាច្រើនសប្តាហ៍»៕
