ប្រជាពលរដ្ឋរស់នៅឃុំជ្រេស ស្រុកជុំគិរី ខេត្តកំពត បានអះអាងថា រាល់ថ្ងៃនេះ មូលដ្ឋានរបស់ពួកគាត់មិនមានសុវត្ថិភាពទេ ខណៈបទល្មើសជាច្រើនបន្តកើនឡើង ដូចជា ចោរលួចកាត់ខ្សែភ្លើងតាមដងផ្លូវ ក្មេងទំនើង ល្បែងស៊ីសងជាដើម ដែលថា មន្ត្រីជំនាញមិនអាចទប់ស្កាត់បាន។
ពលរដ្ឋមួយចំនួន ឲ្យដឹងថា បង្គោលភ្លើងបំភ្លឺផ្លូវ ឬបង្គោលសឡា ដែលសប្បុរសជនឧបត្ថម្ភ និងយកមកតម្លើងជូនពលរដ្ឋ ឬសាធារណជន សម្រាប់បំភ្លឺផ្លូវ ចាប់ពីផ្លូវបំបែកផ្លូវជាតិលេខ៣ ឆ្ពោះទៅរម្មណីយដ្ឋានធម្មជាតិម្លេច ក៏ដូចជាមជ្ឈមណ្ឌលកែប្រែ និងបន្សាបគ្រឿងញៀន ត្រូវចោរលួចកាត់អស់រាប់សិបបង្គោល។ ពួកគេថា ជារៀងរាល់យប់ ទាំងពលរដ្ឋក្នុងមូលដ្ឋាន និងអ្នកដំណើរឆ្លងកាត់តំបន់ខាងលើនេះ មានការភ័យខ្លាច ក្នុងការធ្វើដំណើរ ដ្បិតស្ថានភាពផ្លូវស្ងាត់ ងងឹតគ្មានភ្លើងបំភ្លឺ និងមានក្រុមក្មេងទំនើងប្រមូលផ្តុំគ្នាជក់គ្រឿងញៀន ព្រមទាំងរង់ចាំស្ទាក់ផ្លូវពលរដ្ឋ នៅពេលយប់ថែមទៀត។
អ្នកស្រី ឌៀប ផាវី រស់នៅឃុំច្រេស ឲ្យដឹងនៅថ្ងៃទី១៣ខែមេសានេះថា គាត់សោកស្តាយ ដែលអំពូលភ្លើងបំភ្លឺផ្លូវ ដែលសប្បុរសជនជួយឧប្បត្ថម្ភ និងតម្លើងបំភ្លឺនៅតាមផ្លូវស្ងាត់ ជាប់នឹងជួរភ្នំនារាយណ៍ រាប់សិបដើម ត្រូវចោរលួចអស់គ្មានសល់។
ស្រ្តីរូបនេះ ឱ្យដឹងទៀតថា ចោរកម្មខាងលើនេះ គ្មានការទប់ស្កាត់ឱ្យមានប្រសិទ្ធភាពពីសំណាក់មន្ត្រីពាក់ព័ន្ធនៅក្នុងមូលដ្ឋាននេះទេ ដែលថានេះជាមូលដ្ឋានចម្បងបង្កការភ័យខ្លាចក្នុងជីវភាពរស់នៅប្រចាំថ្ងៃ។
អ្នកស្រីថា៖ «ផ្ទាំងសឡាភ្លើងបំភ្លឺផ្លូវហ្នឹងឥឡូវចោរលួចអស់ហើយ។ ចាប់ពីមេអំប៉ៅមកដល់ខ្លោងទ្វារវត្តបាក់នឹងនៅសល់មួយដើម ពីខាងកើតផ្លូវហ្នឹង។ បើគិតពីទ្វារទៅត្បូងកាច់អស់ហើយ គឺនៅសល់តែពីខាងត្បូងរោងចក្រទឹកកកពីខាងកើតផ្លូវ នៅសល់ភ្លើងសឡាមួយដើមទៀតដែរ។ ក្រៅពីហ្នឹងកាត់អស់ហើយ ហើយគ្មានសមត្ថកិច្ចឬអាជ្ញាធរណាខ្វល់ទេ។ ចោរលួចកាត់អស់ហើយ។ ពីមុនចាប់តាំងពីមេអំបៅ ពីភ្នំនារាយណ៍មក គឺគេដាំបង្គោលសឡាហ្នឹង ចន្លោះៗគ្នា ឥឡូវគេលួចកាច់អស់ហើយ។ បង្គោលខ្លះគេឡើងយកទាំងគ្រឹះបេតុងថែមទៀតផង ហើយបើកាច់យកតែបង្គោលសឡា ក៏កាត់ដល់គ្រឹះដែរ។ ហើយចំណុចទីតាំងជើងភ្នំនារាយណ៍ គឺជាកន្លែងមានក្មេងជក់ថ្នាំច្រើន ខ្ញុំ និងអ្នកដំណើរដទៃទៀត ខ្លាចរអារមិនហ៊ានជិះម៉ូតូឆ្លងកាត់នៅពេលយប់ទៀតទេ»។
ចំណែក លោក ឌីណា ជាកសិករម្នាក់ទៀត រស់នៅឃុំច្រេស បញ្ជាក់ថា បញ្ហាទាំងនេះ វាបានកើតឡើង រីករាលដាល់ខ្លាំង ប៉ុន្មានខែដើមឆ្នាំ២០២៦នេះ។ ហើយថា អំពើចោរកម្មនេះ បានកើតឡើងស្របពេលដែលមានការកើនឡើងចំនួនក្មេងជក់គ្រឿងញៀន ។
លោកថា៖ «បង្គោលសឡាហ្នឹងចោរលួចអស់ហើយ។ គេឧបត្ថម្ភឲ្យដាក់បំភ្លឺតាមផ្លូវ ពីមេអំបៅ ផ្លូវបែកចេញពីផ្លូវជាតិលេខ៣ ឆ្ពោះមកទ្វារបាក់នឹម ក្បែរការាស់សាំងច្រកទ្វារហ្នឹង ត្រូវចោរលួចកាត់អស់ហើយ។ ឥឡូវផ្លូវហ្នឹងងងឹតឈឹង ព្រោះបង្គោលសឡាបំភ្លឺផ្លូវហ្នឹង ត្រូវចោរលួចកាច់អស់ហើយ»។
វីអូឌី មិនទាន់អាចទាក់ទង អធិការស្រុកជុំគិរី និងស្នងការនគរបាលខេត្តកំពត ដើម្បីបញ្ជាក់ជុំវិញ ការលើកឡើងរបស់ប្រជាពលរដ្ឋនេះបានទេ។ ប៉ុនែ្ត លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពត ធ្លាប់ប្រកាសឲ្យប្រជាពលរដ្ឋជួយផ្តល់ព័ត៌មានមកកម្លាំងសមត្ថកិច្ច ជុំវិញបទល្មើសអ្វីមួយ ដែលកើតមានក្នុងមូលដ្ឋានរបស់ខ្លួន ដើម្បីបញ្ជូនកម្លាំងចុះបង្ក្រាបឲ្យបានទាន់ពេល។
ទាក់ទិនបញ្ហានេះដែរ លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ មើលឃើញថា ការទុកបណ្តោយឲ្យកើតមានបទល្មើសផ្សេងៗ បន្តកើតមាន នៅក្នុងមូលដ្ឋានឃុំច្រេស បង្ហាញពីការខ្ជីខ្ជារ ឬមិនយកចិត្តទុកដាក់អនុវត្តបទបញ្ជារបស់់រដ្ឋាភិបាល ជាពិសេសធ្វើឲ្យពលរដ្ឋអស់ជំនឿទៅលើអាជ្ញាធរ។
លោកថា៖ «បង្ហាញពីការមិនទទួលខុសត្រូវរបស់អាជ្ញាធរ ជាពិសេសគឺសមត្ថកិច្ច។ បើកាលណាវែករកមុខអ្នកបំផ្លាញទ្រព្យសម្បត្តិសាធារណៈអត់បាន មានន័យថា ពួកគាត់ មិនមានការទទួលខុសត្រូវទេ។ ត្រង់ចំណុចនេះ បង្ហាញថា ពួកគាត់មិនបានយកចិត្តទុកដាក់ចំពោះគោលនយោបាយ របស់រដ្ឋាភិបាល និងក្រសួងមហាផ្ទៃទេ។ ហើយគឺជាសញ្ញាមួយធ្វើឲ្យប្រជាពលរដ្ឋលែងមានទំនុកចិត្តទៅលើអាជ្ញាធរ ហើយក៏មិនផ្តល់តម្លៃទៅឲ្យសមត្ថកិច្ច និងរដ្ឋាភិបាលដែរ»។
ជាងនេះ លោក សុជាតិ យល់ថា ការទុកបណ្តោយឲ្យមានបទល្មើសផ្សេងៗកើតមាន និងធ្វើសកម្មភាពនៅនឹងមុខ ហើយបែរជាសមត្ថកិច្ចនគរបាល ឬអាជ្ញាធរឃុំច្រេស គ្មានសមត្ថភាពទប់ស្កាត់ គឺបង្ហាញពីភាពកម្សោយនៃការដឹកនាំ។ ហើយរដ្ឋមន្ត្រីក្រសួងមហាផ្ទៃ ក៏គួរពិនិត្យកែសម្រួលសមាសភាពដឹកនាំមូលដ្ឋាននេះឡើងវិញ ប្រយោជន៍ដើម្បីស្អំចិត្តពលរដ្ឋ។
លោកបន្តថា៖ «ពីព្រោះរដ្ឋាភិបាល ក៏ដូចជាក្រសួងមហាផ្ទៃ មានគោលការណ៍ច្បាស់លាស់ ក៏ប៉ុន្តែបែរជាមន្ត្រីអសមត្ថភាព។ នេះគឺជារូបភាពអវិជ្ជមានធ្ងន់ធ្ងរមែនទែន បើសិនជាបង្ហាញជាសាធារណៈថា ពួកគាត់ពិតជាមិនបានដឹងថានរណាជាបំផ្លាញបង្គោលសឡា ហើយមិនអាចកំណត់មុខសញ្ញាជនល្មើសមិនបាន នេះជាបរាជ័យធ្ងន់ធ្ងរ។ បើតាមការយល់ឃើញរបស់ខ្ញុំ នៅក្នុងមូលដ្ឋានខេត្តកំពតមួយហ្នឹងបាទ»។
គោលនយោបាយ “ភូមិ ឃុំ សង្កាត់ មានសុវត្ថិភាព” គឺត្រូវបានរដ្ឋាភិបាល ដាក់ចេញ ដើម្បីឲ្យអាជ្ញាធរគ្រប់ជាន់ថ្នាក់ នៅតាមរាជធានី ខេត្តនានា អនុវត្តឲ្យមានប្រសិទ្ធភាព ប្រយោជន៍ឲ្យមូលដ្ឋាននីមួយៗ មានសន្តិសុខ សុវត្ថិភាព និងសុខមាលភាពល្អសម្រាប់ប្រជាពលរដ្ឋ។
គោលនយោបាយនេះ ផ្តោតសំខាន់លើ៧ចំណុច រួមទាំអផ្តល់សេវាសាធារណៈល្អ ទប់ស្កាត់បទល្មើស លួច ឆក់ ប្លន់ គ្រឿងញៀន ល្បែងស៊ីសង សណ្ដាប់ធ្នាប់សាធារណៈ គ្មានការជួញដូរមនុស្ស និងក្មេងទំនើងជាដើម។
យ៉ាងនេះក្តី គោលនយោបាយនេះ ត្រូវបានប្រជាពលរដ្ឋរស់នៅឃុំច្រេស ស្រុកជុំគិរី ខេត្តកំពត អះអាងថា មកដល់ពេលនេះបញ្ហាគ្រឿងញៀន ក្មេងទំនើង និងអំពើចោរកម្មជាដើមនៅតែជា ជាការគំរាមកំហែងដល់ជីវភាពរស់នៅប្រចាំថ្ងៃរបស់អ្នកភូមិ៕
