ប្រជាសហគមន៍ព្រៃឡង់ខេតុ្តស្ទឹងត្រែង ស្នើឱ្យរដ្ឋាភិបាលពិនិត្យពីប្រសិទ្ធភាពការងារឆ្មាំអភិរក្សរបស់ក្រសួងបរិស្ថានមួយចំនួន ដែលកំពុងឈរជើងការពារព្រៃឡង់ថា មិនបានបំពេញតួនាទីស្មោះត្រង់ ថែរក្សាកេរមរតកដូនតាឱ្យគង់វង្សនោះទេ តែផ្ទុយទៅវិញ ពួកគេនៅតែប្រព្រឹត្តអំពើពុករលួយ បណ្ដែតបណ្ដោយឱ្យមានសកម្មភាពកាប់បំផ្លាញព្រៃឡង់។
សំណើនេះ ធ្វើឡើងក្រោយពីពួកគេរកឃើញបទល្មើសជាថ្មីទៀត នៅថ្ងៃចូលឆ្នាំខ្មែរ រហូតដល់ថ្ងៃទី១៨ ខែមេសា នៅចំណុចក្បាលពើង ស្រុកថាឡាបរិវ៉ាត់ ខេត្តស្ទឹងត្រែង និងចំណុចជាំអង្គប់ ស្រុកជ័យសែន ខេត្តព្រះវិហារ។
សកម្មជនការពារបរិស្ថាន លោក អ៊ុក ម៉ៅ ប្រាប់វីអូឌីនៅថ្ងៃទី២០ ខែមេសាថា ក្រុមជនល្មើសនៅតែលួចអារឈើធំៗ មានអាយុកាលរាប់រយឆ្នាំ ធ្វើអាជីវកម្មអស់ជាច្រើនដើមជាថ្មីទៀត នៅសល់តែគល់។
លោកបន្ថែមថា លោកបានផ្តល់ដំណឹងនេះទៅអភិបាលខេត្តស្ទឹងត្រែង លោក សរ សុពុត្រា ហើយអភិបាលខេត្តរូបនេះបានបញ្ជាឱ្យមន្ត្រីជំនាញចុះអនុវត្តច្បាប់ ដោយរឹបអូសឈើរក្សាទុក ក៏ប៉ុន្តែក្រុមជនល្មើស និងមន្ត្រីពាក់ព័ន្ធដែលបណ្ដែតបណ្ដោយឱ្យកើតមានបទល្មើសព្រៃឈើនេះ នៅមិនទាន់ស៊ើបអង្កេតមកផ្ដន្ទាទោសនៅឡើយទេ។
លោកស្នើឱ្យអភិបាលខេត្តរូបនេះ អនុវត្តច្បាប់មន្ត្រីខិលខូច ទើបអាចការពារព្រៃគង់វង្ស។
លោក អ៊ុក ម៉ៅ និយាយថា៖ «កាប់រុករានដីយកធ្វើជាកម្មសិទ្ធិមូយប៉ែកទៅមួយរយៈពេលចូលឆ្នាំនេះ។ មួយក្រុមផ្សេងទៀតអារឈើ អារឈើវែងៗ។ ខ្ញុំសូមណូមពរទៅលោក អភិបាលខេត្តម្តងទៀត ពង្រឹងមន្ត្រីខិលខូចគប់គិតបំផ្លាញធនធានធម្មជាតិសូម ទប់ស្កាត់ពួកហ្នឹងឱ្យបាន។ បើលោកអភិបាលខេត្តមិនទប់ស្កាត់ មន្ត្រីខិលខូចមួយចំនួន ធនធានធម្មជាតិនឹងបាត់បង់»។
កាលពីថ្ងៃទី១៨ ខែមេសា លោក អ៊ុក ម៉ៅ និងសកម្មជនការពារព្រៃឈើមួយក្រុមទៀត បានចុះល្បាតព្រៃនៅចំណុចក្បាលពើង ក្នុងស្រុកថាឡាបរិវ៉ាត់ ប្រទះឃើញឈើធំៗ ដែលជាជម្រកយ៉ាងសំខាន់របស់សត្វព្រៃ ត្រូវគេកាប់នៅសល់តែគល់។ រីឯចម្រៀកឈើជាច្រើនទៀត ត្រូវគេអារជាបន្ទះក្ដារ ត្រៀមដឹកតាមគោយន្តចេញក្រៅ ឆ្លងកាត់ស្នាក់ការមន្ត្រីបរិស្ថាន។ ពួកគេបានថតរូបភាព និងវីដេអូ បង្ហោះតាមបណ្ដាញសង្គម ដើម្បីឱ្យមហាជនកុំភ្លេចព្រៃឡង់ នៅកៀកនឹងភូមិកំណើតរបស់ពួកគាត់កំពុងរស់នៅ។
សកម្មជនការពារព្រៃឡង់ម្នាក់ទៀត លោក សឹម សុច បានថ្លែងក្នុងវីដេអូបង្ហោះតាមបណ្តាញសង្គមថា មន្ត្រីបរិស្ថានដែលមានតួនាទីការពារព្រៃកំពុងសម្ងំស្ងៀម ខណៈដែលសកម្មភាពអារឈើមានតម្លៃបន្តកើតមានយ៉ាងពេញទំហឹង។
លោកថា៖ «ខ្ញុំចង់ថា មន្ត្រីបរិស្ថានគាត់នៅសម្ងំស្ងៀម ឈើអារពេញព្រៃ យ៉ាងអនាធិបតេយ្យ។ នេះឈើ ឈើមានភស្តុតាងគ្រប់គ្រាន់ មិនមែនថា បំភ្លើសទេ»។
វីអូឌីមិនទាន់អាចទាក់ទងសុំការបំភ្លឺរឿងនេះ ពីប្រធានមន្ទីរបរិស្ថានខេត្តស្ទឹងត្រែង លោក ស្រេង ជាហេង និងលោកអភិបាលស្ទឹងត្រែង លោក សរ សុពុត្រា បាននៅឡើយទេនៅថ្ងៃទី២០ ខែមេសា។
តែយ៉ាងណា អភិបាលខេត្តរូបនេះ បានប្រាប់លោក អ៊ុក ម៉ៅ តាមទូរសព្ទថា លោកនឹងបញ្ជាឱ្យមន្ត្រីរបស់លោកចុះពិនិត្យករណីនេះ និងទប់ស្កាត់បទល្មើសធនធានធម្មជាតិ។
លោក សរ សុពុត្រា ថា អាជ្ញាធរខេត្តស្វាគមន៍កិច្ចសហការជាមួយ លោក អ៊ុក ម៉ៅ ដើម្បីការពារធនធានធម្មជាតិ។
ក្រសួងបរិស្ថាន នៅថ្ងៃទី១៩ ខែមេសា បានព្រមានជាថ្មីទៀត ចំពោះជនណាដែលកាប់ និងជួញដូរឈើក្នុងតំបន់ការពារប្រឈមមុខជាប់ពន្ធនាគារ។ ក្រសួងប្តេជ្ញាថា នឹងលុបបំបាត់បទល្មើសព្រៃឈើ ទូទាំងប្រទេស និងហាមមហាជនមិនឱ្យទិញលក់ និងដឹកជញ្ជូនដើមឈើចេញពីដែនជម្រកសត្វព្រៃ ជាទង្វើល្មើសច្បាប់ដោយត្រូវផ្តន្ទាទោសធ្ងន់ធ្ងរតាមច្បាប់។
សកម្មជនសិទ្ធិមនុស្ស និងធនធានធម្មជាតិ លោក ប៊ី វ៉ាន់នី ជំរុញឱ្យរដ្ឋាភិបាលស៊ើបអង្កេតមន្ត្រីមួយចំនួន ដែលប្រព្រឹត្តអំពើពុករលួយរឿងបទល្មើសព្រៃឈើ មកផ្ដន្ទាទោស ទើបអាចការពារព្រៃបាន។ លោកថា បើគ្មានការបើកដៃពីមន្ត្រីជំនាញនៅតំបន់នោះទេ ក្រុមជនល្មើសមិនហ៊ានចូលព្រៃអារឈើលក់នោះទេ។
លោក ប៊ី វ៉ាន់នី និយាយថា៖ «ស្នើសុំឱ្យមេត្តាស្រាវជ្រាវ ឬក៏ត្រួតពិនិត្យមន្ត្រីអនុវត្តច្បាប់ ជុំវិញតំបន់អភិរក្សនេះឡើងវិញ ហើយបើសិនជាមានកំហុស ឬប្រព្រឹត្តអំពើពុករលួយ យើងស្នើឱ្យចាត់វិធានការច្បាស់លាស់។ មិនមែនធ្វើគ្រាន់តែបង្ហាញឱ្យសាធារណជន នៅជុំវិញតំបន់ហ្នឹងឱ្យតែនបានឮទេ»។
សកម្មជនការពារបរិស្ថាន លោក អ៊ុក ម៉ៅ បន្ថែមថា បទល្មើសព្រៃឈើនាពេលបច្ចុប្បន្ននេះ បើមើលពីខាងក្រៅហាក់ដូចជាទ្រង់ទ្រាយតូចៗ ក៏ប៉ុន្តែវាតែងតែកើតមានឡើងជាទម្លាប់ ធ្វើឱ្យព្រៃឈើបន្តបាត់បង់យ៉ាងលឿនពីរទម្រង់ផ្សេងៗគ្នា រួមមាន ការកាប់ទន្ទ្រានព្រៃយកដីធ្វើជាកម្មសិទ្ធិ និងសកម្មភាពកាប់ដើមឈើធំៗ យកដើម។
ព្រៃឡង់ឋិតក្នុងចន្លោះខេត្តចំនួនបួន គឺខេត្តក្រចេះ ស្ទឹងត្រែង ព្រះវិហារ និងកំពង់ធំ ត្រូវរដ្ឋាភិបាលប្រកាសបង្កើតជាដែនជម្រកសត្វព្រៃ កាលពីថ្ងៃទី៩ ខែឧសភា ឆ្នាំ២០១៦ មានផ្ទៃដីជាង ៤សែនហិកតា (៤៣១.៦៨៣ហិកតា) ដែលឋិតក្រោមការគ្រប់គ្រងរបស់ក្រសួងបរិស្ថាន៕
