ប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី បានថ្កោលទោសការសម្រេចចិត្តរបស់សហរដ្ឋអាមេរិក ក្នុងការបន្តរយៈពេលដែលរុស្ស៊ីត្រូវបានអនុញ្ញាតឱ្យលក់ប្រេង ទោះបីជាមានទណ្ឌកម្មពីបស្ចិមប្រទេសក៏ដោយ។
ការសម្រេចចិត្តនេះ មានន័យថា បណ្តាប្រទេសនានាអាចទិញប្រេង និងផលិតផលប្រេងរបស់រុស្ស៊ី ដែលបានផ្ទុកនៅលើនាវារួចហើយនៅតាមសមុទ្រ រហូតដល់ថ្ងៃទី១៦ ខែឧសភា។
សហរដ្ឋអាមេរិក បានលើកឡើងថា ការលើកលែងនេះ មានគោលបំណងកាត់បន្ថយការខ្វះខាតការផ្គត់ផ្គង់ថាមពល ដែលបង្កឡើងដោយសង្រ្គាមរវាងសហរដ្ឋអាមេរិក-អ៊ីស្រាអែល និងអ៊ីរ៉ង់។
ប៉ុន្តែនៅក្នុងសុន្ទរកថាកាលពីថ្ងៃទី១៩ខែមេសា លោក ហ្សេឡេនស្គី បានមានប្រសាសន៍ថា ទណ្ឌកម្មយ៉ាងទូលំទូលាយត្រូវបានអនុវត្តប្រឆាំងនឹងរុស្ស៊ី ចាប់តាំងពីប្រធានាធិបតី វ្ល៉ាឌីមៀ ពូទីន បានបើកការឈ្លានពានពេញទំហឹងលើប្រទេសជិតខាងមួយនេះ កាលពីខែកុម្ភៈ ឆ្នាំ២០២២។
ការវាយប្រហារយ៉ាងខ្លាំងក្លារបស់សហរដ្ឋអាមេរិក និងអ៊ីស្រាអែលទៅលើប្រទេសអ៊ីរ៉ង់ បានជំរុញឱ្យប្រទេសនេះសងសឹកមិនត្រឹមតែប្រឆាំងនឹងអ៊ីស្រាអែល និងមូលដ្ឋានយោធាអាមេរិកនៅឈូងសមុទ្រប៉ុណ្ណោះទេ ប៉ុន្តែថែមទាំងប្រឆាំងនឹងហេដ្ឋារចនាសម្ព័ន្ធថាមពល និងទីតាំងស៊ីវិលដទៃទៀតនៅតាមបណ្តាប្រទេសអារ៉ាប់ដែលជាសម្ព័ន្ធមិត្តរបស់សហរដ្ឋអាមេរិកក្នុងតំបន់ផងដែរ។
លើសពីនេះ អ៊ីរ៉ង់បានបិទច្រកសមុទ្រ Hormuz ស្ទើរតែទាំងស្រុង ដែលជាផ្លូវតូចចង្អៀតដែលប្រេង និងឧស្ម័នធម្មជាតិរាវ (LNG) ប្រហែល ២០% នៃពិភពលោកតែងតែដឹកជញ្ជូនឆ្លងកាត់។
នេះបាននាំឱ្យមានភាពចលាចលនៅក្នុងទីផ្សារថាមពល ដោយមានការព្រួយបារម្ភថាវិបត្តិសេដ្ឋកិច្ចពិភពលោកអាចនឹងកើតឡើង ប្រសិនបើវាត្រូវបានបើកឡើងវិញមិនទាន់ពេល។
ការសម្រេចចិត្តរបស់សហរដ្ឋអាមេរិកក្នុងការបន្ធូរបន្ថយទណ្ឌកម្មលើរុស្ស៊ីកាលពីថ្ងៃទី១៣ ខែមីនា ត្រូវបានថ្កោលទោសយ៉ាងទូលំទូលាយដោយលោក ហ្សេឡេនស្គី ក៏ដូចជាសម្ព័ន្ធមិត្តអឺរ៉ុបរបស់លោក។
នៅពេលបន្តការលើកលែងនៅថ្ងៃទី១៧ខែមេសា សហរដ្ឋអាមេរិក បាននិយាយថា ខ្លួនចង់ “ធានាថាប្រេងមានសម្រាប់អ្នកដែលត្រូវការវា” ខណៈពេលដែលការចរចាដើម្បីបញ្ចប់សង្រ្គាម “កំពុងពន្លឿន”។
មេដឹកនាំអ៊ុយក្រែនរូបនេះ បាននិយាយថា រុស្ស៊ីមាននាវាដឹកប្រេងជាង ១១០ គ្រឿងដែលស្ថិតក្នុង “កងនាវាស្រមោល” របស់ខ្លួន ដែលជានាវាដែលមានភាពស្រពិចស្រពិលខាងកម្មសិទ្ធិ ដើម្បីជួយឱ្យរុស្ស៊ីគេចផុតពីទណ្ឌកម្ម ដោយមានប្រេង “ជាង ១២ លានតោន”។
លោកបានបន្ថែមថា ការលក់ប្រេងទាំងនេះនឹងនាំមកនូវទឹកប្រាក់ ១០ ពាន់លានដុល្លារ (៧,៤ ពាន់លានផោន) ចូលទៅក្នុងឃ្លាំងទ្រព្យសម្បត្តិរបស់ទីក្រុងមូស្គូ ក្នុងនាមជា “ធនធានដែលត្រូវបានបំប្លែងដោយផ្ទាល់ទៅជាការវាយប្រហារថ្មីៗប្រឆាំងនឹងអ៊ុយក្រែន”។
មេដឹកនាំអ៊ុយក្រែនមិនបានពន្យល់ថា តួលេខទាំងនោះផ្អែកលើអ្វីនោះទេ។
ប៉ុន្តែលោកបានបន្ថែមថា ក្នុងរយៈពេលតែមួយសប្តាហ៍កន្លងទៅនេះ រុស្ស៊ីបានបាញ់ “ដ្រូនវាយប្រហារជាង ២,៣៦០ គ្រឿង គ្រាប់បែកផ្លូវអាកាសដឹកនាំដោយរ៉ាដាជាង ១,៣២០ គ្រាប់ និងមីស៊ីលជិត ៦០ គ្រាប់គ្រប់ប្រភេទ មកលើទីក្រុង និងសហគមន៍របស់យើង”។
ក្នុងនោះរួមមានទាំងការវាយប្រហារដ៏សាហាវបំផុតប្រឆាំងនឹងអ៊ុយក្រែនក្នុងរយៈពេលជាច្រើនខែ កាលពីថ្ងៃទី១៥ ខែមេសា ដែលក្នុងនោះដ្រូន និងមីស៊ីលជាង ៧០០ គ្រាប់ត្រូវបានប្រើប្រាស់ក្នុងរលកជាច្រើនក្នុងមួយយប់ ដោយបានសម្លាប់មនុស្សយ៉ាងហោចណាស់ ១៨ នាក់។
អ៊ុយក្រែនក៏បានវាយប្រហាររុស្ស៊ីផងដែរ ដោយផ្តោតជាសំខាន់លើហេដ្ឋារចនាសម្ព័ន្ធថាមពល។
ទោះជាយ៉ាងណាក៏ដោយ ទោះបីជាមានការវាយប្រហារជាបន្តបន្ទាប់ក៏ដោយ ក៏សង្រ្គាមនៅអ៊ុយក្រែនបានឈានដល់ភាពជាប់គាំង ដោយរុស្ស៊ីគ្រប់គ្រងទឹកដីអ៊ុយក្រែនប្រហែល ២០%។
កិច្ចខិតខំប្រឹងប្រែងដែលដឹកនាំដោយសហរដ្ឋអាមេរិកដើម្បីបញ្ចប់សង្រ្គាម ត្រូវបានផ្អាកជាលទ្ធផលនៃសង្រ្គាមនៅអ៊ីរ៉ង់៕
