សំណុំរឿងប្តឹងទាស់ដ៏ចម្រូងចម្រាស់របស់ លោក កឹម សុខា ប្រធានគណបក្សសង្គ្រោះជាតិ ដែលតុលាការកំពូលរំលាយជិត១០ឆ្នាំមកនេះ នឹងត្រូវប្រកាសនៅថ្ងៃទី៣០ខែមេសា ក្រោយពីសាលាឧទ្ធរណ៍ភ្នំពេញបានបញ្ចប់ការជំនុំជម្រះកាលពីដើមខែមេសានេះ។
នេះបើតាមលិខិតជូនដំណឹងរបស់សាលាឧទ្ធរណ៍ភ្នំពេញ ស្តីពីការប្រកាសសាលដីកាដែលសហមេធាវីការពារក្តីឱ្យលោក កឹម សុខា គឺលោក ផែង ហេង បានបង្ហោះនៅលើបណ្តាញសង្គម នៅថ្ងៃទី២១ ខែមេសា ឆ្នាំ២០២៦នេះ។
សាលាឧទ្ធរណ៍បានបញ្ជាក់ថា៖ «សំណុំរឿងព្រហ្មទណ្ឌលេខ៥៥៦ ចុះថ្ងៃទី៥ ខែឧសភា ឆ្នាំ២០២៣ ដែលមានជនជាប់ចោទ ឈ្មោះ កឹម សុខា ជាប់ចោទពីបទ សន្និដ្ឋិភាពជាមួយបរទេស ក្រោយពីបានបញ្ចប់ការជំនុំជម្រះនៅថ្ងៃទី៩ ខែមេសា ឆ្នាំ២០២៦ ក្រុមប្រឹក្សាជំនុំជម្រះ កំណត់យក ថ្ងៃទី៣០ ខែមេសា ឆ្នាំ២០២៦ វេលាម៉ោង ៨:៣០នាទីព្រឹក នៅបន្ទប់សវនាការទី១ ដើម្បីប្រកាសសាលដីកា»។
កាលពីថ្ងៃទី៩ខែមេសា សហមេធាវីបានប្រាប់អ្នកសារព័ត៌មានក្រៅបន្ទប់សវនាការថា លោក កឹម សុខា បានសំណូមពរឱ្យសាលាឧទ្ធណ៍ទម្លាប់បទចោទ ចុះថ្ងៃទី០៣ ខែមីនា ឆ្នាំ២០២៣ របស់សាលាដំបូងរាជធានីភ្នំពេញទាំងស្រុង។
បើតាមមេធាវីលោក កឹម សុខា បានប្រាប់សាលាឧទ្ធរណ៍ថា លោកសូមអះអាងជាឱឡារិកថា មិនក្បត់ជាតិខ្មែរជាដាច់ខាត ហើយថា ក៏មិនបានគប់គិតជាមួយអាមេរិក អឺរ៉ុប ឬបរទេសណានោះដែរ។
លើសពីនេះ លោកថា ហើយក៏គ្មានបរទេសណាមកគប់គិតជាមួយលោក ដែលធ្វើឲ្យប្រជាពលរដ្ឋខ្មែរបាត់បង់ជីវិត ឬធ្វើឲ្យបាត់បង់ទឹកដីខ្មែរឡើយ។ ហើយពិតជាមិនបានប្រព្រឹត្តនូវអំពើត្រូវរ៉ូវគ្នាដោយសម្ងាត់ជាមួយរដ្ឋបរទេសឬភ្នាក់ងារបរទេសណា ដើម្បីបង្កើតឲ្យមានអំពើប្រទូស្តរ៉ាយ ឬឲ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា ដូចការចោទប្រកាន់ តាមមាត្រា៤៤៣ នៃក្រមព្រហ្មទណ្ឌ នៃព្រះរាជាណាចក្រកម្ពុជានោះឡើយ។
ហើយក៏គ្មានរដ្ឋបរទេស ឬភ្នាក់ងារបរទេសណា ត្រូវរ៉ូវគ្នាជាមួយលោកដោយសម្ងាត់ មកបង្កើតឲ្យមានអំពើប្រទូស្តរ៉ាយ ឬឲ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជាឡើយ។
មួយវិញទៀត លោកថា តុលាការសម្រេចចោទប្រកាន់ និងផ្តន្ទាទោសលោក ដោយមិនមានធាតុផ្សំបទល្មើសគ្រប់គ្រាន់ ទោះបីបានប្រើរយៈពេលនៃការស៊ើបអង្កេត ជំនុំជម្រះជិតមួយទស្សវត្សរ៍ក៏ដោយ ជាពិសេសមិនមាន និងមិនបានបង្ហាញភស្តុតាងត្រឹមត្រូវ ច្បាស់លាស់ ។
លើសពីនេះ មិនមានភស្តុតាងជាឯកសារនៃកិច្ចព្រមព្រៀងរវាងលោក និងបរទេសនោះ សូម្បីតែមួយសន្លឹកក្នុងករណីនេះ។ មួយវិញទៀត សាលាដំបូងរាជធានីភ្នំពេញ ក៏មិនបានបង្ហាញឬបញ្ជាក់ឲ្យបានច្បាស់លាស់ ថាលោកនិងបរទេសនោះ បានត្រូវរ៉ូវគ្នាជាសម្ងាត់ប្រព្រឹត្តិនៅទីកន្លែងណា(ភូមិ ឃុំ ស្រុក ខេត្ត ឬប្រទេសណា)? នៅពេលវេលាណា(ម៉ោង ថ្ងៃ ខែ ឆ្នាំណា?)ជាដើម។
តែយ៉ាងណា ក្នុងសវនាការពេលនោះ តំណាងអយ្យការសាលាឧទ្ធរណ៍ បានការពារបណ្តឹងឧទ្ធរណ៍របស់តំណាងអយ្យការសាលាដំបូងរាជធានីភ្នំពេញ ហើយបានធ្វើសេចក្តីសន្និដ្ឋានដោយស្នើទៅក្រុមប្រឹក្សាជំនុំជម្រះ ឱ្យផ្តន្ទាទោស ដកសិទ្ធិធ្វើនយោបាយ ក៏ដូចជាសុំឱ្យឃុំខ្លួនលោក កឹម សុខា នៅពន្ធនាគារឡើងវិញជាដើម។
សម្រាប់សង្គមស៊ីវិលចាត់ទុកសំណុំរឿងចោទប្រកាន់ លោក កឹម សុខា មានចរិតនយោបាយ ដែលចាំបាច់ត្រូវស្រាយ តាមយន្តការចរចានយោបាយ ទើបរកច្រកចេញរួម។
លោក កឹម សុខា ត្រូវបានសមត្ថកិច្ចប្រដាប់ដោយអាវុធ ឆ្មក់ចូលចាប់ខ្លួនទាំងកណ្តាលយប់ ឈានចូលថ្ងៃទី៣ ខែកញ្ញា ឆ្នាំ២០១៧ ក្រោយពីគណបក្សប្រឆាំងរបស់លោក ហក់ឡើងប្រជាប្រិយភាព ទទួលបានសន្លឹកឆ្នោតគាំទ្រជិតពាក់កណ្តាលប្រទេស ប្រហាក់ប្រហែលនឹងគណបក្សកាន់អំណាច។
ប្រមាណជា៣ខែបន្ទាប់ គណបក្សសង្គ្រោះជាតិរបស់លោក ត្រូវបានតុលាការកំពូលរំលាយ តាមបណ្តឹងរបស់គណបក្សប្រជាជនកម្ពុជា ដែលចោទថា លោកបានគប់គិតជាមួយសហរដ្ឋអាមេរិក ចង់ផ្តួលរំលំរដ្ឋាភិបាលរបស់លោក ហ៊ុន សែន ។
យ៉ាងណា ភ្លាមៗ ក្រោយតុលាការប្រកាសសាលក្រមផ្តន្ទាទោស លោក កឹម សុខា សហរដ្ឋអាមេរិកតាមរយៈស្ថានទូតប្រចាំកម្ពុជា បានចាត់ទុកសាលក្រមផ្តន្ទាទោសនេះថា ដំណើរការច្រើនឆ្នាំ ដើម្បីបំបិទសំឡេង លោក កឹម សុខា ដោយផ្អែកលើបទសមគំនិត ប្រឌិត គឺជាបរាជ័យនៃប្រព័ន្ធយុត្តិធម៌។ ហើយថា ការបដិសេធសេរីភាពក្នុងការបញ្ចេញមតិ និងធ្វើនយោបាយរបស់ លោក កឹម សុខា និងអ្នកនយោបាយផ្សេងទៀត ធ្វើឲ្យប៉ះពាល់ដល់រដ្ឋធម្មនុញ្ញកម្ពុជា បំណងអន្តរជាតិ និងវឌ្ឍនភាពកន្លងមក ដើម្បីក្លាយជាសង្គមពហុបក្សប្រកបដោយបរិយាបន្នមួយ៕
