ពលរដ្ឋ និងមន្ត្រីសង្គមស៊ីវិល ជំរុញឱ្យរដ្ឋាភិបាលបង្ក្រាបក្រុមឧក្រិដ្ឋជន (Scam online) ឱ្យចំគោលដៅ ដោយចាត់វិធានការអ្នកជួលអគារទៅឱ្យក្រុមស្គេមអនឡាញ ខណៈពួកគេសង្ស័យថា បច្ចុប្បន្នអគារមួយចំនួនក្នុងក្រុងបាវិតនៅបន្តបើកដំណើរ និងតំបន់កាស៊ីណូខ្លះ បានផ្តល់ទីតាំងឱ្យក្រុមឧក្រិដ្ឋជនទាំងនេះ។
ពលរដ្ឋរស់នៅក្រុងបាវិតស្នើសុំឱ្យហៅឈ្មោះក្រៅថា លោក ជិត មករា ប្រាប់វីអូឌីនៅថ្ងៃទី២២ ខែមេសាថា រដ្ឋាភិបាលត្រូវបង្ក្រាបទីតាំងស្គេមអនឡាញ (Scam online) ក្នុងក្រុងបាវិតឱ្យអស់ ដែលកំពុងបន្តធ្វើសកម្មភាពដោយលាក់បាំង ក្នុងអគារធំៗ និងខ្លះជ្រកក្រោមដំបូលកាស៊ីណូ (Casino)មួយចំនួនដែលម្ចាស់ជាជនបរទេស។
លោកថា រដ្ឋាភិបាលគួរតែអនុវត្តច្បាប់ដល់ម្ចាស់កាស៊ីណូ និងម្ចាស់អគារទាំងឡាយណា ដែលផ្តល់ទីតាំងឱ្យក្រុមឧក្រិដ្ឋជន (Scam Online) ខុសច្បាប់ក្នុងក្រុងបាវិត។
លោក ជិន មករា និយាយថា៖ «វាអាចនៅក្រោមឆត្ររបស់កាស៊ីណូណាមួយ ដូច្នេះអាជ្ញាធរគួរតែសិក្សាស្រាវជ្រាវរកឃើញស្គេមអនឡាញនៅទីតាំងណា គួរតែបង្ក្រាបទីតាំងនោះឱ្យបានទាំងអស់ ហើយអាគារ កាស៊ីណូគាត់ជាប់ពាក់ព័ន្ធស្គេមអនឡាញ ដែលមានលាក់បាំងស្គេមអនឡាញ នៅក្រោមឆ័ត្ររបស់គាត់ រដ្ឋាភិបាលគួរដកអាជ្ញាបណ្ណចោល»។
លោក ជិន មករា ស្នើឱ្យរដ្ឋាភិបាលត្រូវតែអនុវត្តច្បាប់លើមន្ត្រីណា ដែលមានជាប់ពាក់ព័ន្ធនឹងក្រុមឧក្រិដ្ឋជនស្គេមអនឡាញ (Scam online) មកផ្ដន្ទាទោសតាមច្បាប់ ទើបអាចដោះស្រាយបញ្ហានេះបាន។ លោកបារម្ភថា ចាប់តាំងពីកើតមានស្គេមអនឡាញនៅក្រុងបាវិត បង្កកើតឱ្យមានអសន្តិសុខសង្គម គ្រោះថ្នាក់ចរាចរណ៍ និងប៉ះពាល់ដល់ភ្ញៀវទេសចរជាដើម។
លោកថា៖ «អាជ្ញាធរណាដែលជាប់ពាក់ព័ន្ធនឹងស្គេមអនឡាញ ត្រូវតែយកគាត់មកអនុវត្តច្បាប់ បានទាំងអស់គ្នា ទើបការបង្ក្រាបស្គេមអនឡាញមានប្រសិទ្ធភាព។ ប្រសិនជាអ្នកពាក់ព័ន្ធជនជាតិខ្មែរ និងអ្នកមានលុយមានអំណាចគ្មានប្រសិទ្ធភាពដែលវានៅតែបន្តមានរហូត»។
បន្ទាប់ពីរដ្ឋាភិបាលផ្តើមយុន្ធនាការបង្ក្រាបក្រុមឧក្រិដ្ឋជនប្រតិបត្តិបង្ក្រាបបទល្មើស Online Scams នេះ អគារមួយចំនួនក្នុងក្រុងបាវិត ហាក់ស្ងប់ស្ងាត់បន្តិច ដោយអាគារខ្លះទុកចោល និងអគារខ្លះទៀត ព័ទ្ធរបងជិតដោយមានសន្តិសុខយាមកាមយ៉ាងតឹងរ៉ឹង។
អ្នកសារព័ត៌មានវីអូឌី បានចុះស៊ើបអង្កេត និងស្រាវជ្រាវដោយផ្ទាល់ជុំវិញរឿងនេះ ដោយសម្ភាសន៍ពលរដ្ឋក្នុងក្រុងបាវិតរកឃើញថា អាគារកាស៊ីណូខ្លះ ពលរដ្ឋសង្ស័យថា ផ្តល់ទីតាំងឱ្យក្រុមឧក្រិដ្ឋជនស្គេមអនឡាញដោយលាក់លៀម ដោយមានពាក់ព័ន្ធនឹងអាជ្ញាធរមានអំណាចកាងការពារពីក្រោយខ្នង។
ពលរដ្ឋ អះអាងថា ម្ចាស់អាគារមួយចំនួនជាអ្នកមានលុយ បានជួលអគារឱ្យជនបរទេសបង្កើតទីតាំងស្គេមអនឡាញ ក្នុងតម្លៃចន្លោះ ៣ពាន់ដុល្លារ(៣០០០) ដល់ជាង ១ ម៉ឺនដុល្លារ(១០០០០)ក្នុងមួយខែ។
កន្លងទៅ លោកនាយករដ្ឋមន្ត្រី ហ៊ុន ម៉ាណែត បានបង្កើតយុទ្ធនាការបោសសម្អាតឧក្រិដ្ឋកម្មឆបោកតាមអនឡាញ (Online Scams) ដោយបញ្ជាឱ្យមន្ត្រីចាត់វិធានការច្បាប់ និងតាមដានទីតាំងសង្ស័យ ដើម្បីលុបបំបាត់មជ្ឈមណ្ឌលទាំងនោះឱ្យអស់ ក្នុងបំណងលើកកម្ពស់កិត្តិយសជាតិ និងសន្តិសុខសង្គម។
រដ្ឋមន្ត្រីក្រសួងយុត្តិធម៌ លោក កើត រិទ្ធ បានថ្លែងក្នុងសន្នីសិទ្ធសារព័ត៌មានមួយស្តីពី «ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា» កាលព្រឹកថ្ងៃទី៣ ខែមេសា ឆ្នាំ២០២៦ សង្កត់ធ្ងន់ថា បញ្ហានេះជារឿងសន្តិសុខជាតិទាំងមូលដែលលោកថា ទាំងអស់គ្នាត្រូវរួមគ្នាប្រឆាំងស្គេមអនឡាញ ស្របពេលរាជរដ្ឋាភិបាលកំពុងបោសសម្អាតឱ្យអស់ ដើម្បីកុំឱ្យមាននៅកម្ពុជាទៀត។
លោកថា បញ្ហាស្គេមអនឡាញ វាលលុកចូលមកកម្ពុជា មានបណ្តាប្រទេសជាច្រើន នាំគ្នាវាយប្រហារមកលើកម្ពុជា ប៉ះពាល់ធ្ងន់ធ្ងរ ខុសពីបញ្ហាគ្រឿងញៀន និងបញ្ហាជួញដូរមនុស្ស។
លោក កើត រិទ្ធ ថ្លែងថា៖ «តែរឿងបញ្ហាស្គេមនេះ វារាលដាលចេញពីបញ្ហាសន្តិសុខ និងសណ្តាប់ធ្នាប់សាធារណៈ ទៅជារឿងសេដ្ឋកិច្ច ទៅជារឿងប៉ះពាល់កិត្តិយស និងសេចក្ដីថ្លៃថ្នូររបស់កម្ពុជា ជារឿងរបស់ប្រជាជាតិទាំងមូល ដែលយើងត្រូវរួមគ្នា ធ្វើការប្រឆាំងស្គេមអនឡាញនេះ»។
ជុំវិញរឿងនេះ ប្រធានអង្គការប្រជាធិបតេយ្យខ្មែរនៅប្រទេសអូស្ត្រាលី លោក ស៊ឹង សែនករុណា សង្កេតឃើញថា ចំណាត់ការរបស់រដ្ឋាភិបាលនៅតែមិនទាន់ចំគោលដៅនៅឡើយទេ ខណៈដែលក្រុមឧកញ៉ា មន្ត្រីធំៗ និងអ្នកមានអំណាចនៅពីក្រោយខ្នង មិនទាន់ឃើញអនុវត្តច្បាប់នៅឡើយទេ។
លោកថា៖ «ពាក់ព័ន្ធនឹងអ្នកមានអំណាចហ្នឹងឯង គ្រួសារមេដឹកនាំក្តី និងអ្នកមានអំណាចផ្សេងៗនៅពីក្រោយខ្នងក្តី ត្រូវមានវិធានការ។ ឧកញ៉ាមួយចំនួនសង្ស័យពាក់ព័ន្ធបោកប្រាស់អនឡាញ ក៏អត់ទាន់បានចាត់វិធានការដែល វាទាល់តែមានការចាត់វិធានការចំមេខ្លោង ចំគោលដៅ ទើបការបោកប្រាស់អនឡាញអាចស្ងប់ស្ងាត់បាន»។
របាយការណ៍របស់ការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម ឱ្យដឹងថា មានមនុស្សយ៉ាងហោចណាស់ ១០ម៉ឺននាក់ ធ្វើការក្នុងឧស្សាហកម្មឆបោកអនឡាញនៅកម្ពុជា ចាប់តាំងពីអំឡុងឆ្នាំ២០២៣ ដែលប្រព័ន្ធការងារនេះ ផ្តល់អត្ថប្រយោជន៍ភ្ជាប់គ្នា ទៅដល់វិស័យសេដ្ឋកិច្ចកម្ពុជា ជាពិសេសសេដ្ឋកិច្ចក្រៅប្រព័ន្ធ ដូចជា សេវាផ្តល់ម្ហូបអាហារ និងភេសជ្ជៈ សេវាដឹកជញ្ជូន និងសេវាកម្សាន្តផ្សេងៗទៀត។
ចាប់តាំងពីឆ្នាំ២០២៦ មកទល់ពេលនេះ អាជ្ញាធរបានបណ្តេញជនបរទេសជាង ២១ម៉ឺននាក់ ដែលជាប់សង្ស័យពាក់ព័ន្ធទៅនឹងអំពើឆបោកតាមអនឡាញ បានចាកចេញពីកម្ពុជាដោយការស្ម័គ្រចិត្ត បន្ទាប់ពីអាជ្ញាធរបើកយុទ្ធនាការបង្ក្រាបបទល្មើសឆបោកតាមប្រព័ន្ធបច្ចេកវិទ្យា៕
