វិបត្តិបំណុល ត្រូវបានអះអាងមកថា បានធ្វើឱ្យពលរដ្ឋខ្មែរមួយចំនួន ត្រូវបង្ខំចិត្តលួចឆ្លងដែនទៅរកការងារ ទោះដឹងថាប្រឈមនឹងការចាប់ខ្លួនពីអាជ្ញាធរថៃក្តី ដែលការប្រថុយប្រថានបែបនេះ ហាក់ផ្ទុយគ្នាទៅនឹងការដែលរដ្ឋាភិបាលកម្ពុជា ធ្លាប់លើកឡើងពីការ ធានាផ្តល់ឱកាសទីផ្សារការងារឱ្យពលករដែលសម្រេចវិលត្រឡប់ពីប្រទេសថៃ ក្រោយថៃបើកការឈ្លានពានកម្ពុជា។
មន្ត្រីសិទ្ធិការងារទទួលបន្ទុកផ្នែកពលករចំណាកស្រុករបស់អង្គការសង់ត្រាល់ (Central) ប្រចាំប្រទេសថៃ លោក លឹង សុផុន ឱ្យវីអូឌីដឹងថា គោលនយោបាយរដ្ឋាភិបាលកម្ពុជា បន្តបរាជ័យក្នុងការផ្ដល់ការងារដល់ពលករវិលពីប្រទេសថៃ ខណៈការងារមួយចំនួនពុំសមស្របនឹងចំណេះជំនាញរបស់ពួកគេដែលធ្លាប់ធ្វើការនៅថៃនោះទេ។ លោកជំរុញឱ្យរដ្ឋាភិបាលស្វែងយល់ពីចំណេះជំនាញរបស់ពលរដ្ឋ និងងាយស្រួលផ្ដល់ការងារដល់ពួកគាត់ ដើម្បីធានាថា ពលរដ្ឋមានការងារបានប្រាក់សងត្រឡប់ទៅធនាគារវិញបាន។
លោក លឹង សុផុន ថ្លែងថា៖ «ភាគច្រើនគឺគាត់លើកឡើងពីបញ្ហាបំណុល បាទ! បញ្ហាបំណុល គាត់ថានៅខ្មែរគាត់អត់អាចរកលុយបង់បំណុលធនាគារអីបានអីចឹង ហើយគាត់មានការប្រៀបធៀបនៅពេលដែលជួបពួកគាត់ ហើយយើងបានសម្ភាសន៍សាកសួរអីចឹង គាត់ថានៅខ្មែរគាត់ដូចថារត់មិនរួច ហើយចំណាយច្រើន ហើយមានបំណុលផង គឺមិនអាចនៅបានទេ អីចឹងមានតែរកវិធីសាស្ត្រមកថៃអីចឹង»។
កាលពីថ្ងៃទី២០ ខែមេសា ពលករខ្មែរចំនួន ១៦នាក់ ត្រូវបានទាហានឈុតខ្មៅថៃ នៅស្រុកអារញ្ញ ខេត្តស្រះកែវ ចាប់ខ្លួនយកទៅឃុំឃាំងដើម្បីបន្តនីតិវិធី ខណៈពួកគេបានលួចឆ្លងដែនខុសច្បាប់ចូលប្រទេសថៃ។
ចំណែកនៅខេត្តចន្ទបុរី មានការចាប់ខ្លួនពលករខ្មែរ ១៤នាក់ និងខេត្តត្រាត ក៏មានចាប់ខ្លួនពលករខ្មែរជាច្រើននាក់ផ្សេងទៀត។ ក្រោយចាប់ខ្លួនអាជ្ញាធរថៃបានសាកសួរ និងបញ្ជូនពលករខ្មែរទាំងនោះទៅឃុំដើម្បីបន្តនីតិវិធី។
វីអូឌី មិនអាចទាក់ទងអ្នកនាំពាក្យក្រសួងការងារ លោក ស៊ុន មេសា ដើម្បីសុំការឆ្លើយបំភ្លឺជុំវិញករណីនេះបានទេ នៅថ្ងៃទី២២ ខែមេសា។ ប៉ុន្តែកន្លងមក ក្រសួងការងារ ធ្លាប់បានលើកឡើងពីការផ្តល់ឱកាសការងារច្រើនពាន់កន្លែង សម្រាប់ជួយដោះស្រាយបន្ទុកពលករខ្មែរ ដែលបានត្រឡប់ពីប្រទេសថៃ។
ជុំវិញបញ្ហានេះ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ យល់ឃើញថា ជាការលំបាកក្នុងការសម្រេចចិត្តភ្លាមៗ ទាំងរដ្ឋាភិបាល ទាំងអាជ្ញាធរ និងពលរដ្ឋ ដោយសារមានគំនាបរៀងៗខ្លួន ប៉ុន្តែលោកថា បើរដ្ឋាភិបាលមានការទទួលខុសត្រូវ និងមានទិន្នន័យច្បាស់លាស់ នោះរដ្ឋអាចសហការរៀបចំទៅតាមចំណេះជំនាញវិជ្ជាជីវៈរបស់ពលរដ្ឋ។ លើសពីនេះលោកជំរុញឱ្យមានការប្ដេជ្ញាចិត្តរួមគ្នា បង្កើតការងារថ្មី ឬក៏ណែនាំការងារដល់ពលរដ្ឋដោយអព្យាក្រឹត និងត្រូវដាក់លើតុជជែកគ្នាដោយតម្លាភាព និងមានក្រសួងការងារដើរតួនាទីសំខាន់ជាមួយគ្រប់ភាគីពាក់ព័ន្ធ ទើបអាចដោះស្រាយបញ្ហានៅចំពោះមុខបាន។
លោកថា៖ «ខ្ញុំមានតែការជំរុញសូមឲ្យគ្រប់ភាគីពាក់ព័ន្ធ មានប្រជាពលរដ្ឋ អង្គការសង្គមស៊ីវិល អាជ្ញាធរ ហើយនិងរដ្ឋាភិបាល គឺត្រូវធ្វើការរួមគ្នាជាកម្លាំងតែមួយ ដើម្បីដោះស្រាយបញ្ហាដែលកំពុងតែជាប់គាំងហ្នឹង ហើយធ្វើម៉េចក៏ដោយគឺបញ្ចប់បញ្ហាទាំងអស់ដោយឈរទៅលើគោលការណ៍ស្មើភាព»។
គិតត្រឹមឆ្នាំ២០២៤ កម្ពុជាមានកិច្ចសន្យាឥណទានខ្នាតតូចសកម្មរហូតដល់ជាង ៣,១ លាន ក្នុងចំណោមគ្រួសារសរុបត្រឹមតែ ៣,៨ លានគ្រួសារ។ អ្វីដែលគួរឱ្យព្រួយបារម្ភបំផុតនោះគឺ ទំហំកម្ចីជាមធ្យមមានចំនួនរហូតដល់ ៥៨០០ ដុល្លារ ដែលតួលេខនេះខ្ពស់ជាង ៤ដង នៃចំណូលមធ្យមសម្រាប់មនុស្សម្នាក់ក្នុងមួយឆ្នាំ (ប្រមាណ ១៤០០ ដុល្លារ ក្នុងឆ្នាំ២០២៣)។
កាលពីថ្ងៃទី១៨ ខែមេសា ពលករខ្មែរចំនួន ១០៦នាក់ ត្រូវអាជ្ញាធរថៃបញ្ជូនត្រឡប់មកកម្ពុជាវិញ តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ដោយរងការចោទថា បានលួចឆ្លងដែន និងរស់នៅក្នុងប្រទេសថៃដោយខុសច្បាប់ ក្នុងនោះរួមមានស្ត្រី ២៥នាក់ និងកុមារចំនួន១៧នាក់។
បើតាមលោក លឹង សុផុន គឺពលករខ្មែរដែលបានលួចឆ្លងដែនចូលប្រទេសថៃ ភាគច្រើនទៅធ្វើការនៅកន្លែងការងារចាស់ ហើយពួកគេត្រូវបង់ថ្លៃឱ្យមេខ្យល់នាំផ្លូវជាដើម ខណៈប័ណ្ណការងាររបស់ពលករខ្មែរប្រមាណ ១សែននាក់ អស់សុពលភាព កាលពីចុងខែមីនា។
មន្ត្រីតស៊ូមតិផ្នែកសិទ្ធិការងាររូបនេះស្នើរដ្ឋាភិបាលកម្ពុជា ត្រូវមានយន្តការច្បាស់លាស់ទប់ស្កាត់ការចំណាកស្រុករបស់ពលរដ្ឋខ្មែរចូលទៅថៃដោយខុសច្បាប់ឱ្យមានប្រសិទ្ធភាព តាមរយៈការពន្យល់ពលរដ្ឋឲ្យយល់ដឹងពីការស្វែងរកការងារនៅកម្ពុជាឲ្យច្បាស់លាស់ ជាពិសេសការចុះឈ្មោះ និងដាក់ពាក្យស្វែងរកការងារ ដោយត្រូវផ្ដល់ភាពជាក់ស្ដែង ដើម្បីដោះស្រាយឲ្យពលរដ្ឋឱ្យមានភាពងាយស្រួល និងឆាប់ទទួលបានការងារតាមរយៈប្រព័ន្ធបច្ចេកវិទ្យាជាដើម៕
