រដ្ឋមន្រ្តីក្រសួងវប្បធម៌ថៃ និងរដ្ឋមន្រ្តីក្រសួងការពារជាតិ បានរៀបចំពិធីសែនព្រេនដូនតា ដើម្បីត្រៀមរៀបចំជួសជុលប្រាសាទតាក្របីឡើងវិញ ដើម្បីទាក់ទាញភ្ញៀវទេសចរជាតិ និងអន្តរជាតិ ឱ្យមកទស្សនាប្រាសាទមួយនេះឡើងវិញ ខណៈតំបន់នោះថៃអះអាងថា ជាទឹកដីរបស់ថៃ និងបានស្ងប់សុខហើយ។
នៅថ្ងៃទី២២ ខែមេសា ឆ្នាំ២០២៦នេះ រដ្ឋមន្ត្រីក្រសួងវប្បធម៌ថៃ អ្នកស្រី ឆាប៊ីដា ថៃសេដ្ឋ និងឧត្តមសេនីយ៍ឯក អឌុល ប៊ុនថាំឆារើន រដ្ឋមន្ត្រីក្រសួងការពារជាតិ រួមជាមួយគណៈប្រតិភូជាច្រើននាក់ទៀត បានធ្វើដំណើរទៅកាន់ស្រុកភ្នំដុងរ៉ាក ខេត្តសុរិន្ទ ដើម្បីចូលរួមក្នុងពិធីដាក់កម្រងផ្កានៅវិមានអ្នកការពារជាតិថៃ នៅប្រាសាទតាក្វាយ។
បើយោងតាមសារព័ត៌មាន Thai Press News ឱ្យដឹងថា ភាគីថៃកំពុងពន្លឿនជួសជុលប្រាសាទតាក្របី ដែលបានបែកបាក់សម័យសង្រ្គាម ២១ថ្ងៃជាមួយកម្ពុជា កាលពីកន្លងទៅ ដើម្បីស្តារស្ថានភាពឡើងវិញសម្រាប់ទាក់ទាញភ្ញៀវទេសចរជាតិ និងអន្តរជាតិ ចូលមកទស្សនា ខណៈតំបន់ជាប់ព្រំដែនមួយចំនួនបានស្ងប់សុខនិងសន្តិភាពហើយ។
ប្រភពនិយាយថា រដ្ឋមន្រ្តីក្រសួងវប្បធម៌ថៃ និងក្រសួងការពារជាតិថៃ បានដឹកនាំគណៈប្រតិភូ ឡើងទៅប្រាសាទតាក្វាយ ដើម្បីដាក់កម្រងផ្កា រំលឹកដល់ការលះបង់របស់វីរៈភាពទាហានក្លាហានក្នុងការការពារអធិបតេយ្យជាតិ។
ក្នុងពិធីសែនព្រេននេះផងដែរ រដ្ឋមន្រ្តីក្រសួងវប្បធម៌ថៃ អ្នកស្រី ឆាប៊ីដា ថៃសេដ្ឋ បាននិយាយថា ថៃនឹងពន្លឿនសាងសង់ ជួសជុលប្រាសាទនេះឡើងវិញឱ្យបានឆាប់សម្រាប់ភ្ញៀវទេសចរ។
ក្នុងពិធីនោះផងដែរ គេសង្កេតឃើញមានការសម្តែងរបាំប្រពៃណីបែបខ្មែរសុរិន្រ្ទដ៏អស្ចារ្យ ដោយមានអ្នកសម្តែងជាង ២០០នាក់ រាំរបាំបង្ហាញពីវប្បធម៌ស្រុកសុរិន្រ្ទដែលឆ្លុះបញ្ចាំងពីជំនឿសាសនា និងសន្តិភាពតាមព្រំដែន។
រដ្ឋមន្រ្តីក្រសួងវប្បធម៌ថៃ អ្នកស្រី ឆាប៊ីដា បានអះអាងថា ប្រាសាទតាក្វាយ គឺជាបេតិកភណ្ឌវប្បធម៌ដ៏មានតម្លៃ ដែលឆ្លុះបញ្ចាំងពីការរីកចម្រើននៃអរិយធម៌ខ្មែរសុរិន្រ្ទបុរាណ ស្ថិតនៅតំបន់ភាគខាងត្បូង-ឥសានប្រទេសថៃ។
អ្នកស្រីសង្កត់ធ្ងន់ថា រដ្ឋាភិបាលថ្មីកំពុងផ្តោតយ៉ាងសំខាន់លើការស្តារឡើងវិញនូវប្រាសាទតាក្វាយមួយនេះ ដើម្បីប្រែក្លាយទៅជាមជ្ឈមណ្ឌលសិក្សាជាតិ និងឆ្លុះបញ្ចាំងពីវីរៈភាពដែលទាហានថៃបានពលី ដើម្បីទាមទារមកវិញ។
អ្នកស្រីបន្តថា នាយកដ្ឋានវិចិត្រសិល្បៈថៃ និងសហការជាមួយអ្នកជំនាញខាងផ្នែកបុរាណវិទ្យា នឹងរៀបចំផែនការជួសជុលឡើងវិញតាមស្តង់ដារវិជ្ជាជីវៈ ដើម្បីរក្សាអត្តសញ្ញាណដើមរបស់ប្រាសាទតាក្វាយឱ្យដូចសភាពដើមវិញ។
អ្នកស្រីបង្ហាញការសោកស្តាយថា ក្រោយបញ្ចប់សង្រ្គាមថៃ-កម្ពុជា ប្រាសាទនេះ បានរងផលប៉ះពាល់យ៉ាងខ្លាំង ខូចខាតនូវរចនាសម្ព័ន្ធបុរាណ គឺចម្លាក់បុរាណត្រូវរងការខូចខាតយ៉ាងធ្ងន់ធ្ងរ។
យ៉ាងណា អ្នកស្រីថា ក្រសួងវប្បធម៌ថៃ និងសហការអនុវត្តជាមួយអង្គការរដ្ឋបាលថ្នាក់មូលដ្ឋាន និងអ្នកជំនាញផ្នែកបុរាណវិទ្យា ដើម្បីអភិវឌ្ឍន៍ហេដ្ឋារចនាសម្ព័ន្ធ ជួសជុល ធ្វើឱ្យប្រសើរឡើងនូវតំបន់នេះ ដែលជាគោលដៅទេសចរណ៍ប្រវត្តិសាស្ត្រ ដើម្បីទាក់ទាញភ្ញៀវទេសចរជាតិ និងអន្តរជាតិ ជាពិសេសដើម្បីជួយស្វែងរកការងារបន្ថែម និងប្រាក់ចំណូលបន្ថែមទៀត ដល់ពលរដ្ឋថៃនៅខេត្តសុរិន្រ្ទ ឱ្យមានមុខរបរការងារធ្វើ សម្រាប់បានប្រាក់ចំណូលចិញ្ចឹមជីវភាពគ្រួសារផងដែរ។
បន្ថែមពីនេះ រដ្ឋមន្រ្តីក្រសួងវប្បធម៌ អ្នកស្រី ឆាប៊ីដា អះអាងថា ទាំងតំបន់ប្រាសាទតាក្វាយ និងតំបន់ភ្នំ ៣៥០ ជាទឹកដីរបស់ថៃ ហើយថៃនឹងមិនប្រគល់វាទៅឱ្យប្រទេសជិតខាងទៀតនោះទេ គឺថៃនឹងគ្រប់គ្រងវារហូតតជំនាន់។
អ្នកស្រីសង្កត់ធ្ងន់ទៀតថា ក្រោយជួសជុលប្រាសាទតាក្វាយរួច ថៃនឹងបន្តអភិវឌ្ឍន៍តំបន់ភ្នំ៣៥០ និងទីតាំងជាច្រើនទៀត ដែលយោធាកំពុងគ្រប់គ្រង ដោយអ្នកស្រីសំអាងថា តំបន់ទាំងនោះជាដែនអធិបតេយ្យរបស់ថៃ។
បន្ថែមលើនេះ រដ្ឋមន្រ្តីក្រសួងការពារជាតិថៃ លោក អឌុល ប៊ុនថាំឆារើន និយាយថា នេះជាកម្មវិធីសែនព្រេនដូនតា ដើម្បីរំលឹកគុណដូនតា និងវីរភាពទាហានថៃក្លាហាន ដែលបានលះបង់ជីវិត ទាមទារទឹកដីថៃត្រឡប់មកវិញ។
លោកសង្កត់ធ្ងន់ថា ការអភិវឌ្ឍ ឬជួសជុលតំបន់ប្រាសាទតាក្របីនេះ ជាការឆ្លុះបញ្ចាំងពីសន្តិភាព សណ្តាប់ធ្នាប់ និងភាពអស្ចារ្យរបស់ថៃ ជាពិសេសដើម្បីទុកឱ្យមនុស្សជំនាន់ក្រោយ ចូលទៅមើលទីតាំងប្រវត្តិសាស្ត្រមួយនេះ។
លោកបាននិយាយថា៖ «ការរួមបញ្ចូលគ្នារវាងក្រសួងវប្បធម៌ និងក្រសួងការពារជាតិនេះ គឺជាជំហានដ៏សំខាន់មួយក្នុងការប្រែក្លាយតំបន់ជម្លោះទៅជាកន្លែងសន្តិភាព និងជាកន្លែងសិក្សាប្រវត្តិសាស្ត្របុរាណដ៏មានតម្លៃ ស្របតាមគោលនយោបាយថៃ ក្នុងការលើកកម្ពស់អត្តសញ្ញាណថៃទៅកាន់ពិភពលោក»។
ប្រាសាទតាក្របីរបស់ខ្មែរ ត្រូវបានធ្លាក់ទៅក្នុងដៃថៃគ្រប់គ្រង ក្រោយថៃធ្វើសង្គ្រាមឈ្លានពានបូរណភាពទឹកដីខ្មែរជាលើកទី២អំឡុងខែធ្នូ ឆ្នាំ២០២៥ រួមទាំងទីតាំងរាប់សឹបទីតាំងផ្សេងទៀតនៅក្នុងខេត្តមួយចំនួន រួមមាន ខេត្តពោធិ៍សាត់ បន្ទាយមានជ័យ ឧត្តរមានជ័យ និងព្រះវិហារ ដែលថៃឈ្លានពានយក។
យ៉ាងណា រដ្ឋាភិបាលកម្ពុជា បានបញ្ជាក់ជំហរម្តងហើយម្តងទៀតថា កម្ពុជាមិនទទួលស្គាល់ដាច់ខាតខ្សែបន្ទាត់ព្រំដែន ដែលថៃបានពង្រីកកាន់កាប់ដោយខុសច្បាប់នេះ ហើយកម្ពុជាជំរុញឱ្យថៃងាកទៅគោរពកិច្ចព្រមព្រៀងដែលមានស្រាប់ រួមទាំងអនុសញ្ញា និងសន្ធិសញ្ញាបារាំង-សៀម ឆ្នាំ១៩០៤ និង១៩០៧ ដែលជាខ្សែបន្ទាត់ព្រំដែន ទទួលស្គាល់ដោយអន្តរជាតិ រវាងកម្ពុជា និងថៃ៕
