ប្រធានាធិបតី វូឡូឌីមៀ ហ្សេឡេនស្គី បានមានប្រសាសន៍ថា លោកចាត់ទុកការធ្វើទស្សនកិច្ចរបស់ប្រេសិតសហរដ្ឋអាមេរិក លោក ស្ទីវ វីតខូហ្វ (Steve Witkoff) និងលោក ចារេដ គូស្នឺ (Jared Kushner) ទៅកាន់ទីក្រុងមូស្គូ ដោយមិនមកទីក្រុងគីវ គឺជា «ការមិនផ្តល់តម្លៃ»។
អ្នកទាំងពីរបានធ្វើដំណើរទៅកាន់រដ្ឋធានីរបស់រុស្ស៊ី កាលពីចុងឆ្នាំមុន និងម្តងទៀតនៅក្នុងខែមករា ខណៈដែលការចរចាបទឈប់បាញ់ក្នុងគោលបំណងបញ្ចប់សង្គ្រាមនៅអ៊ុយក្រែន កំពុងមានសន្ទុះខ្លាំង។ លោក វីតខូហ្វ ដែលបានទៅទីក្រុងមូស្គូចំនួន ៨ ដង បានជួបពិភាក្សាជាមួយ លោក វ្ល៉ាឌីមៀ ពូទីន ជាច្រើនលើកច្រើនសារ។ ទោះជាយ៉ាងណាក៏ដោយ ទាំងលោក វីតខូហ្វ និងលោក គូស្នឺ មិនដែលបានមកបំពេញទស្សនកិច្ចនៅទីក្រុងគីវក្នុងតួនាទីផ្លូវការម្តងណាឡើយ។
លោក ហ្សេឡេនស្គី បានប្រាប់ប្រព័ន្ធផ្សព្វផ្សាយអ៊ុយក្រែននៅក្នុងបទសម្ភាសន៍មួយថា៖ «វាគឺជាការមិនផ្តល់តម្លៃសម្រាប់ពួកគេដែលមកទីក្រុងមូស្គូ ប៉ុន្តែមិនមកទីក្រុងគីវ វាពិតជាការមិនផ្តល់តម្លៃមែន»។
លោកបានបន្ថែមថា៖ «ខ្ញុំយល់ថា យើងមានភាពស្មុគស្មាញខាងភស្តុភារ… ប្រសិនបើពួកគេមិនចង់មកទីនេះ យើងអាចជួបគ្នានៅប្រទេសផ្សេងទៀតក៏បាន»។
លោក វីតខូហ្វ ដែលជាអតីតមហាសេដ្ឋីអចលនទ្រព្យ គឺជាប្រេសិតពិសេសរបស់ លោក ដូណាល់ ត្រាំ ហើយលោក គូស្នឺ គឺជាកូនប្រសាររបស់ប្រធានាធិបតីអាមេរិករូបនេះ។ កាលពីដើមខែមេសា លោក ហ្សេឡេនស្គី បាននិយាយថា អ្នកទាំងពីរមានគម្រោងមកទស្សនកិច្ចនៅអ៊ុយក្រែន ប៉ុន្តែដំណើរនោះមិនបានលេចចេញជារូបរាងឡើងវិញទេ ចំពេលមានសង្គ្រាមរវាងអាមេរិក-អ៊ីស្រាអែល ជាមួយអ៊ីរ៉ង់។
កិច្ចប្រជុំកំពូលត្រីភាគីចុងក្រោយបង្អស់រវាងរុស្ស៊ី សហរដ្ឋអាមេរិក និងអ៊ុយក្រែន បានប្រព្រឹត្តទៅកាលពីពាក់កណ្តាលខែកុម្ភៈ។ មិនដល់ពីរសប្តាហ៍ក្រោយមក សហរដ្ឋអាមេរិក និងអ៊ីស្រាអែល បានចាប់ផ្តើមវាយប្រហារលើអ៊ីរ៉ង់ ដែលធ្វើឱ្យការយកចិត្តទុកដាក់ងាកចេញពីការបញ្ចប់សង្គ្រាមនៅអ៊ុយក្រែន ដែលបានអូសបន្លាយអស់រយៈពេលជាង ៤ ឆ្នាំមកហើយ។
លោក វីតខូហ្វ និងលោក គូស្នឺ គឺជាផ្នែកមួយនៃក្រុមចរចារបស់សហរដ្ឋអាមេរិកដែលត្រូវធ្វើដំណើរទៅកាន់ប្រទេសប៉ាកីស្ថាន ដើម្បីចរចាបទឈប់បាញ់ជាមួយអ៊ីរ៉ង់ ហើយលោក ហ្សេឡេនស្គី បានទទួលស្គាល់ថាការយកចិត្តទុកដាក់របស់សហរដ្ឋអាមេរិកគឺកំពុងស្ថិតនៅលើតំបន់មជ្ឈិមបូព៌ា។
លោកបានបន្ថែមថា៖ «ប៉ុន្តែ… ទោះជាយ៉ាងណាក៏ដោយ សម្រាប់យើង វាជារឿងសំខាន់ក្នុងការបន្តកិច្ចសហប្រតិបត្តិការជាមួយជនជាតិអាមេរិក»។
ការចរចាបទឈប់បាញ់បានកើនឡើងក្នុងរដូវស្លឹកឈើជ្រុះឆ្នាំ២០២៥ នៅពេលដែលគេដឹងថាមន្ត្រីរុស្ស៊ី និងអាមេរិក បាននិងកំពុងរៀបចំផែនការបញ្ចប់សង្គ្រាមនៅអ៊ុយក្រែន ដែលហាក់ដូចជាមានលក្ខខណ្ឌមួយចំនួនមិនអំណោយផលដល់ទីក្រុងគីវ។ អ៊ុយក្រែនបានជំរុញឱ្យខ្លួនបានចូលរួមក្នុងការចរចា ហើយកិច្ចប្រជុំរបស់ក្រុមតំណាងនិងកិច្ចប្រជុំកំពូលជាច្រើនក៏បានកើតឡើងជាបន្តបន្ទាប់។
ត្រឹមខែកុម្ភៈ ទាំងទីក្រុងមូស្គូ និងទីក្រុងគីវ បាននិយាយថា ពួកគេបានឈានដល់កិច្ចព្រមព្រៀងលើ «បញ្ហាយោធា» មួយចំនួន រួមទាំងទីតាំងនៃខ្សែត្រៀមជួរមុខ និងការត្រួតពិនិត្យបទឈប់បាញ់។ បញ្ហាផ្សេងទៀតនៅមិនទាន់ដោះស្រាយបានឡើយ រួមទាំងការទាមទាររបស់អ៊ុយក្រែនឱ្យរុស្ស៊ីប្រគល់កុមារអ៊ុយក្រែនដែលខ្លួនបានបញ្ជូនចេញដោយបង្ខំតាំងពីដើមសង្គ្រាមមកវិញ និងការទទូចរបស់ទីក្រុងមូស្គូឱ្យមាន «ការផ្លាស់ប្តូររបប» នៅទីក្រុងគីវ។
ប៉ុន្តែបញ្ហាសំខាន់បំផុតគឺស្ថានភាពនៃតំបន់ដុនបាស (Donbas) នៅភាគខាងកើតអ៊ុយក្រែន។ ការទាមទាររបស់ទីក្រុងមូស្គូលើទឹកដីអធិបតេយ្យភាពរបស់អ៊ុយក្រែន ដើម្បីជាថ្នូរនឹងការបញ្ចប់សង្គ្រាម គឺជាអ្វីដែលទីក្រុងគីវមិនអាចទទួលយកបាន ហើយភាគីទាំងពីរមិនព្រមបន្ទន់ឥរិយាបថឡើយ ដែលធ្វើឱ្យការចរចាស្ថិតក្នុងភាពទាល់ច្រក៕
