ប្រទេសអ៊ុយក្រែន បានបញ្ជាក់ថា ខ្លួនបានចាប់ផ្តើមបង្ហូរប្រេងរបស់រុស្ស៊ី តាមបំពង់បង្ហូរប្រេងទៅកាន់ប្រទេសហុងគ្រី និងស្លូវ៉ាគីឡើងវិញហើយ ដែលនេះជាការបញ្ចប់ភាពទាល់ច្រកអស់រយៈពេលជាច្រើនខែជុំវិញកម្ចីចំនួន ៩០ ពាន់លានអឺរ៉ូ ដែលត្រូវបានគេចាត់ទុកថាជាជំនួយដ៏សំខាន់របស់សហភាពអឺរ៉ុបសម្រាប់ទីក្រុងគីវ (Kyiv)។
មន្ត្រីបាននិយាយថា ភ្លាមៗបន្ទាប់ពីនោះ ឯកអគ្គរដ្ឋទូតសហភាពអឺរ៉ុបដែលបានជួបប្រជុំគ្នានៅទីក្រុងព្រុចសែល បានផ្តល់ការយល់ព្រមបឋមលើប្រាក់កម្ចីនេះ ក៏ដូចជាកញ្ចប់ទណ្ឌកម្មទី២០ លើប្រទេសរុស្ស៊ីផងដែរ។ គេរំពឹងថា កិច្ចព្រមព្រៀងនេះ នឹងត្រូវចុះហត្ថលេខាសម្រេចនៅថ្ងៃទី២៣ខែមេសា។
ទោះបីជាថវិកានេះត្រូវបានព្រមព្រៀងគ្នាកាលពីខែធ្នូឆ្នាំមុនក៏ដោយ ក៏លោក Viktor Orbán នាយករដ្ឋមន្ត្រីហុងគ្រី បានប្រើសិទ្ធិវ៉េតូ (Veto) រារាំងការទូទាត់កាលពីខែកុម្ភៈ បន្ទាប់ពីអ៊ុយក្រែនបាននិយាយថា ការខូចខាតបង្កឡើងដោយការវាយប្រហាររបស់រុស្ស៊ី បានធ្វើឱ្យការផ្គត់ផ្គង់ត្រូវអាក់ខាន។
ប្រភពពីវិស័យប្រេង និងរដ្ឋាភិបាលអ៊ុយក្រែន បានប្រាប់មន្ត្រីក្នុងប្រទេសហុងគ្រី និងស្លូវ៉ាគីថា ការបង្ហូរប្រេងបានចាប់ផ្តើមឡើងវិញហើយ តែប៉ុន្មានម៉ោងប៉ុណ្ណោះបន្ទាប់ពីឯកអគ្គរដ្ឋទូតសហភាពអឺរ៉ុប បានចាប់ផ្តើមពិភាក្សាអំពីប្រាក់កម្ចី។
លោក Orbán បានទាមទារឱ្យមានការបង្ហូរប្រេងឡើងវិញជាមុនសិន ទើបអាចបើកប្រាក់កម្ចីបាន ហើយអ៊ុយក្រែនបានបញ្ជាក់ថា ការជួសជុលត្រូវបានបញ្ចប់កាលពីថ្ងៃទី២១ខែមេសា។
ការបរាជ័យក្នុងការបោះឆ្នោតរបស់លោកកាលពីថ្ងៃទី១៩ខែមេសា ក៏បានជួយសម្រួលដល់បរិយាកាសសម្រាប់សហភាពអឺរ៉ុបផងដែរ ដោយបញ្ចប់អាណត្តិ ១៦ឆ្នាំ របស់លោកក្នុងនាមជានាយករដ្ឋមន្ត្រី។ មេដឹកនាំបន្ទាប់របស់ហុងគ្រី គឺលោក Péter Magyar បានផ្តល់អាទិភាពដល់ការស្តារទំនាក់ទំនងដ៏សៅហ្មងរវាងទីក្រុងប៊ុយដាប៉ែស និងទីក្រុងព្រុចសែលឡើងវិញ។
ប្រធានគោលនយោបាយការបរទេសសហភាពអឺរ៉ុប លោកស្រី Kaja Kallas បានមានប្រសាសន៍មុនកិច្ចប្រជុំឯកអគ្គរដ្ឋទូតថា៖ «អ៊ុយក្រែនពិតជាត្រូវការកម្ចីនេះណាស់ ហើយវាក៏ជាសញ្ញាមួយបង្ហាញថា រុស្ស៊ីមិនអាចយកឈ្នះលើការតស៊ូរបស់អ៊ុយក្រែនបានឡើយ»។
ឧបនាយករដ្ឋមន្ត្រីអ៊ុយក្រែន លោក Taras Kachka បានពណ៌នាថា ថវិកាសហភាពអឺរ៉ុបនេះគឺជា “បញ្ហាស្លាប់រស់” សម្រាប់ទីក្រុងគីវ ដោយពីរភាគបីនៃថវិកានេះ នឹងត្រូវចំណាយលើការពង្រឹងតម្រូវការការពារជាតិរបស់អ៊ុយក្រែន ខណៈចំណែកដែលនៅសល់នឹងត្រូវប្រើប្រាស់សម្រាប់ជំនួយហិរញ្ញវត្ថុទូទៅ។
រដ្ឋមន្ត្រីសេដ្ឋកិច្ចស្លូវ៉ាគី លោកស្រី Denisa Sakova បាននិយាយថា លោកស្រីត្រូវបានប្រាប់ដោយប្រតិបត្តិករថាមពល Ukrtransnaft ដែលមើលការខុសត្រូវបំពង់បង្ហូរប្រេង Druzhba ក្នុងប្រទេសអ៊ុយក្រែនថា ការបញ្ចូលសម្ពាធក្នុងបំពង់បង្ហូរបានចាប់ផ្តើមនៅព្រឹកថ្ងៃពុធ ហើយប្រេងឆៅនឹងចាប់ផ្តើមហូរចូលប្រទេសស្លូវ៉ាគីនៅថ្ងៃទី២៣ខែមេសា ដែលជាលើកដំបូងចាប់តាំងពីថ្ងៃទី២៧ ខែមករាមក។
បរិមាណនៃការបង្ហូរប្រេងមិនទាន់ច្បាស់នៅឡើយទេ ប៉ុន្តែប្រភពពីរដ្ឋាភិបាលអ៊ុយក្រែនត្រូវបានដកស្រង់សម្តីថា ការដឹកជញ្ជូនប្រេងបានចាប់ផ្តើមនៅម៉ោង១២:៣៥ ម៉ោងក្នុងស្រុក(០៩:៣៥ GMT)។
ក្រុមហ៊ុនថាមពលហុងគ្រី Mol បាននិយាយថា ខ្លួនរំពឹងថានឹងទទួលបានការផ្គត់ផ្គង់ដំបូងបំផុតត្រឹមថ្ងៃទី២៣ខែមេសា។
រូបភាពពីផ្កាយរណបនៅពេលនោះ បានបង្ហាញពីការខូចខាតយ៉ាងខ្លាំងដល់ធុងផ្ទុកប្រេងដ៏ធំមួយនៅតំបន់ Brody ភាគខាងលិចអ៊ុយក្រែន កាលពីចុងខែមករា ហើយទីក្រុងគីវបានទទូចថា ការជួសជុលនឹងត្រូវចំណាយពេលមួយរយៈ ដោយបន្ថែមថា វិស្វកររបស់ខ្លួនបានរងការវាយប្រហារពីសំណាក់រុស្ស៊ី៕
