Social Issues, ព័ត៌មានជាតិ, សង្គម

ក្លិបកម្សាន្តមួយចំនួនក្នុងក្រុងព្រះសីហនុរងការចោទថាមានប្រើប្រាស់គ្រឿងញៀននិងបង្កប់ពេស្យាចារ

កញ្ញា ឃុន ចន្ទដារ៉ារ័ត្ន
| ២៣ មេសា ២០២៦
ម៉ោង ១៩:៥៨

អាណាព្យាបាលមួយចំនួន បង្ហាញការព្រួយបារម្ភ ខ្លាចកូនចៅរបស់ខ្លួនភ្លើតភ្លើនភ្លេចការសិក្សា និងបទល្មើសកើតឡើងកាន់តែច្រើន បណ្តាលមកពីការរីកដុះដាលនៃក្លិបឌីស្កូ ក្លិបម៉ាស្សា និងក្លិបកម្សាន្តការ៉ាអូខេជាដើម ដែលកំពុងធ្វើសកម្មភាពក្នុងមូលដ្ឋានខេត្តព្រះសីហនុ។

អ្នកស្រី លី ធីតា ជាអាណាព្យាបាលម្នាក់ ស្ថិតក្នុងចំណោមឪពុកម្តាយច្រើនទៀត លើកឡើងថា ទន្ទឹមនឹងការរីកសេវាបំរើវិស័យទេសចរណ៍ ក្នុងក្រុងព្រះសីហនុ ក៏ប៉ុន្តែក៏មានលេចឮព័ត៌មានមកថា នៅតាមក្លិបឌីស្កូ ក្លិបខារ៉ាអូខេ ក្លិបហាត់ប្រាណ និងហាងម៉ាស្សាជាដើម មានលួចចែកចាយ និងសេពគ្រឿងញៀន។ ជាងនេះ ក៏មានទីតាំងខ្លះទៀត ក៏មានបើកបំរើសេវាផ្លូវភេទថែមទៀតផង។

ត្រង់ចំណុចនេះ អាណាព្យាបាលទាំងនោះ បានស្នើដល់ថ្នាក់ដឹកនាំក្រសួងពាក់ព័ន្ធថ្នាក់ជាតិ ពិសេសក្រសួងមហាផ្ទៃ ជួយបញ្ជូនមន្ត្រីជំនាញស្អាតស្អំ ចុះស៊ើបអង្កេតជុំវិញភាពអសកម្មទាំងនេះ ដើម្បីឈានទៅមានវិធានការបង្ក្រាបឲ្យមានប្រសិទ្ធភាព ព្រោះកន្លងមក សមត្ថកិច្ចមូលដ្ឋាននេះ ហាក់មិនសូវបានយកចិត្តទុកដាក់លើបញ្ហានេះទេ។

បន្ថែមលើនេះ អ្នកស្រីក៏បានរំលឹកដល់ក្រុមយុវជន ត្រូវជៀសឲ្យឆ្ងាយពីគ្រឿងញៀន ព្រោះថ្នាំឆ្គួតនេះ នឹងបំផ្លាញអនាគតរបស់ពួកគេធ្ងន់ធ្ងរ។

អ្នកស្រីថា៖ «សុំឲ្យមានការត្រួតពិនិត្យ ហើយក៏សូមអំពាវនាវដល់យុវជនយុវនារីទាំងអស់ហ្នឹង ត្រូវតែមានការប្រុងប្រយ័ត្ន សូមកុំសាកល្បងប្រើប្រាស់គ្រឿងញៀនឲ្យសោះ។ បើកាលណាយើងថ្លោះថ្លូយចង់ប្រើប្រាស់ចង់សាកគ្រឿងញៀនទាំងអស់ហ្នឹង គឺជីវិតរបស់យើងនឹងមានបញ្ហាទៅថ្ងៃអនាគត។ ហើយក្នុងករណីចង់ជួយគ្រួសារ ក៏មិនបានជួយអ្វីកើតដែរ គឺមានតែនាំបញ្ហាទុក្ខកង្វល់ទៅឲ្យអ្នកមានគុណរបស់យើងវិញទេ។ ចឹងសូមកុំសាកល្បងប្រើប្រាស់គ្រឿងញៀនឲ្យសោះ»។

ស្រដៀងគ្នាដែរ សម្រាប់លោក ចាន់ វិបុល ជាប្រជាពលរដ្ឋរស់នៅក្នុងព្រះសីហនុ បានទទួលស្គាល់ថា ពិតជាមានទីតាំងក្លិបកម្សាន្តរាត្រីមួយចំនួន ដូចជា ក្លិបឌីស្កូ ក្លិបខារ៉ាអូខេ ហាងម៉ាស្សា ឬក៏ក្លិបហាត់ប្រាណជាដើម មានលួចបង្កប់សេវាបំរើផ្លូវភេទ និងចរាចរណ៍គ្រឿងញៀនពិតមែន ហើយភាគច្រើនក្នុងចំណោម ក្លិបទាំងនោះ គឺមានថៅកែជាជនបរទេស។

អាណាព្យាបាលរូបនេះ ស្នើឲ្យសមត្ថកិច្ចជំនាញថ្នាក់ជាតិ ជួយបញ្ជូនមន្ត្រីស្អាតស្អំ ចុះទប់ស្កាត់បទល្មើសទាំងនេះឲ្យបានប្រសើរឡើងវិញ ខណៈទីតាំងបើកបំរើសេវាផ្លូវភេទខ្លះទៀត នៅម្តុំប្លុកភ្នំខៀវ ជាដើម កំពុងបើកបំរើសេវាផ្លូវភេទជាចំហ យ៉ាងអនាធិបតេយ្យ និងមានក្រុមបងធំរង់ចាំកាងការពារ ប្រសិនមានពលរដ្ឋណាម្នាក់ហ៊ានថតរូបភាពនៃទីតាំងពេស្យាចារទាំងនោះ។

លោកថា៖ «នៅភ្នំខៀវហ្នឹងចុចថតទូរសព្ទ ស្រាប់តែមិនដឹងជើងកាងវៀតណាមមកពីណាទេ មកចាប់ទូរសព្ទឲ្យលុបរូបចោល។ ច្រើនណាស់នារីបំរើសេវាផ្លូវភេទនៅម្តុំភ្នំខៀវហ្នឹង សុទ្ធតែវៀតណាម។ នៅតំបន់ភ្នំខៀវ នៅខាងក្រោយមន្ទីរពេទ្យបង្អែកខេត្តព្រះសីហនុ។ មានទាំងខ្មែរ និងវៀតណាម ច្រើនណាស់រង់ចាំបំរើសេវាផ្លូវភេទ»។

វីអូឌី មិនអាចសុំការបញ្ជាក់ពី អភិបាលក្រុងព្រះសីហនុ លោក សរ កក្កដា និងលោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានទេគិតត្រឹមម៉ោងផ្សាយនេះ។

ដោយឡែក លោក តី វិសាល អធិការនគរបាលក្រុងព្រះសីហនុ បានប្រាប់សារព័ត៌មានក្នុងស្រុកថា រូបលោកមិនទាន់ទទួលបានព័ត៌មាននេះទេ។ ហើយស្នើដល់ប្រជាពលរដ្ឋជួយផ្តល់ព័ត៌មាន ដើម្បីចុះអង្កេតនិងចាត់វិធានការ។

សម្រាប់ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា(ANSA) លោក សន ជ័យ និយាយថា ក្លិបកម្សាន្តនានា នៅក្រុងព្រះសីហនុ អាចជាគោលដៅរបស់ក្រុមឧក្រិដ្ឋជនជួញដូរ ឬចែកចាយគ្រឿងញៀន។ ហើយថា បញ្ហាគ្រឿងញៀននេះ កន្លងមក ក៏ធ្លាប់លេចឮព័ត៌មានមកថា បានធ្វើចរាចរណ៍នៅតាមកាស៊ីណូ ហាងខារ៉ាអូខេ ក្លិបឌីស្កូ ឬក្លិបកម្សាន្តរាត្រីមួយចំនួន នៅជាប់មាត់សមុទ្រនៃឆ្នេរអូរឈើទាលពិតមែន។

យ៉ាងណា លោកជំរុញឱ្យមន្ត្រីក្នុងខេត្តនេះ បង្កើនវិធានការទប់ស្កាត់ឱ្យបានទាន់ពេល ដើម្បីបង្កើនជំនឿទុកចិត្តដល់ប្រជាពលរដ្ឋ និងមុខមាត់រដ្ឋាភិបាល។

លោកថា៖ «តាមពិតទៅក្លិបកម្សាន្តគឺជាមុខសញ្ញារបស់ពួកជូញដូរគ្រឿងញៀនដែរ អញ្ចឹងអាជ្ញាធរគួរតែកំណត់មុខសញ្ញា ដើម្បីធានាថាក្លិបកម្សាន្តទាំងឡាយ នឹងមិនពាក់ព័ន្ធគ្រឿងញៀន ហើយមិនមែនជាមធ្យោបាយសម្រាប់ការជួញដូរ និងប្រើប្រាស់គ្រឿងញៀន»។

ចំណែក អ្នកប្រឹក្សាយោបល់ផ្នែកអភិវឌ្ឍផ្នត់គំនិត និងស្រាវជ្រាវ លោក សេក សុជាតិ មានប្រសាសន៍ថា មានការចែកចាយគ្រឿងញៀន ឬអំពើពេស្យាចារ ដែលអាចធ្វើសកម្មភាពនៅតាមក្លិបកម្សាន្ត ឬហាងម៉ាស្សាក្នុងមូលដ្ឋាននានា បង្ហាញពីបរាជ័យរបស់អាជ្ញាធរមូលដ្ឋានទាំងនោះ ក្នុងការអនុវត្តគោលនយោបាយភូមិឃុំសង្កាត់មានសុវត្ថិភាព ដែលរដ្ឋាភិបាល ឬក្រសួងមហាផ្ទៃ បានដាក់ចេញ។ ហើយករណីនេះ អាចនឹងធ្វើឲ្យពលរដ្ឋអស់ជំនឿ ទៅលើប្រសិទ្ធភាពដឹកនាំរបស់អាជ្ញាធរថែមទៀតផង។

លោកបន្តថា៖ «ត្រង់ចំណុចនេះ បង្ហាញថា ពួកគាត់មិនបានយកចិត្តទុកដាក់ចំពោះគោលនយោបាយ របស់រដ្ឋាភិបាល និងក្រសួងមហាផ្ទៃទេ។ ហើយជាសញ្ញាមួយធ្វើឲ្យប្រជាពលរដ្ឋលែងមានទំនុកចិត្តទៅលើអាជ្ញាធរ ហើយក៏មិនផ្តល់តម្លៃទៅឲ្យសមត្ថកិច្ច ហើយនិងរដ្ឋាភិបាលដែរ ពីព្រោះរដ្ឋាភិបាល និងក្រសួងមហាផ្ទៃ មានគោលការណ៍ច្បាស់លាស់ ក៏ប៉ុន្តែបែរជាមន្ត្រីអសមត្ថភាព។ នេះគឺជារូបភាពអវិជ្ជមានធ្ងន់ធ្ងរមែនទែន»។

គោលនយោបាយភូមិឃុំសង្កាត់មានសុវត្ថិភាព គឺបានផ្តោតសំខាន់ រួមមាន ផ្តល់សេវាសាធារណៈល្អ មានគុណភាព តម្លាភាព និងប្រជាពលរដ្ឋជឿទុកចិត្ត គ្មានបទល្មើស លួច ឆក់ ប្លន់ គ្រឿងញៀន គ្មានអំពើអនាចារ និងគ្មានក្មេងទំនើងជាដើម។

ទោះជាបែបនេះក្តី អាណាព្យាបាលរស់នៅខេត្តព្រះសីហនុ បានអះអាងថា មូលដ្ឋាននេះតែងកើតមានឃាតកម្ម បទល្មើសចោរកម្ម ចែកចាយគ្រឿងញៀន ពេស្យាចារ បាញ់បោះសេរី ក្រុមក្មេងទំនើង និងល្បែងស៊ីសងគ្រប់ប្រភេទ បានធ្វើសកម្មភាពរាល់ថ្ងៃ និងមានរូបភាពកាន់តែធ្ងន់ធ្ងរពីមួយថ្ងៃទៅមួយថ្ងៃ។ ជាពិសេសបទល្មើសគ្រឿងញៀន គឺបានរីករាលដាលដល់គ្រប់មូលដ្ឋានទូទាំងខេត្តព្រះសីហនុ ទោះបីសង្កេតឃើញថា សមត្ថកិច្ចពាក់ព័ន្ធបានចុះបង្ក្រាប និងចាប់បញ្ជូនជនល្មើសជាច្រើនករណីទៅកាន់តុលាការផ្តន្ទាទោសបែបណាក្តី៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។