តាមផ្លូវក្រវាត់ព្រំដែនចាប់ពីភូមិធ្លក សង្កាត់ច្រកម្ទេស ក្រុងបាវិត ស្រុកស្វាយទាប រហូតដល់ស្រុករំដួលខេត្តស្វាយរៀង ដែលមានប្រវែងជាង ២០ គីឡូម៉ែត្រ ជាប់នឹងព្រំដែនប្រទេសវៀតណាម ទិដ្ឋភាព ដីកសិកម្មរាប់សែនហិកតានៅតំបន់នោះ ពលរដ្ឋខ្មែរនៅតែបន្តជួលឱ្យជនជាតិវៀតណាមធ្វើកសិកម្មដដែលជាច្រើនឆ្នាំមកហើយ។
អ្នកយកព័តមានវីអូឌី បានចុះស្រាវជ្រាវរឿងនេះក្នុងខែមេសានេះ ដោយសួរអ្នកភូមិរស់នៅតំបន់នោះ ភាគច្រើនពួកគាត់មិនហ៊ានបញ្ចេញមតិជុំវិញរឿងនេះទេ ដោយខ្លាចក្រែងអាជ្ញាធរចាប់ដាក់គុក។ ពលរដ្ឋខ្លះបានផ្តល់ព័តមាននេះ តែក្នុងលក្ខណខណ្ឌមិនបង្ហាញឈ្មោះ ព្រោះបារម្ភពីសុវត្ថិភាព ប្រាប់វីអូឌីនៅថ្ងៃទី២៤ ខែមេសាថា ពលរដ្ឋខ្មែរបានជួលដីឱ្យវៀតណាម ឋិតក្នុងឃុំចំនួន៣ ក្នុងស្រុកស្វាយទាប គឺឃុំព្រៃតាអី ឃុំពពែត និងឃុំមនោរម្យ។
លើសពីនេះ ដីដែលវៀតណាមជួលពីពលរដ្ឋខ្មែរ មានបណ្ដាញប្រព័ន្ធទឹក និងអគ្គិសនីខ្វាត់ខ្វែង ដោយផ្នែកខ្លះគេឃើញមានប្រឡាយទឹកស្រោចស្រពតភ្ជាប់ពីប្រឡាយមេធំពីប្រទេសវៀតណាម។
ពលរដ្ឋរស់នៅស្រុកស្វាយទាបស្នើសុំហៅឈ្មោះហៅក្រៅថា ទូច តារា ប្រាប់វីអូឌីនៅថ្ងៃទី២៤ ខែមេសាថា ដីខ្មែររាប់សែនហិកតា ដែលពលរដ្ឋខ្មែរ និងមន្ត្រីមួយចំនួនជួលឱ្យវៀតណាមមានតម្លៃចន្លោះពី ៥០ម៉ឺនរៀល ដល់ជាង ១លានរៀល ក្នុងមួយហិកតា រយៈពេល១ឆ្នាំ ហើយធ្វើកុងត្រារៀងរាល់ ៤ ឆ្នាំម្តង។
លោកថា សកម្មភាពក្រុមឈ្មួញប្រើល្បិចយកឈ្មោះ ស្មៀនឃុំពពែត ឈ្មោះ គុយ សារ៉េត ធ្វើជាតំណាងក្រុមហ៊ុនខ្មែរ ដើម្បីងាយស្រួលលាក់បាំងការពិត និងភូតភរថ្នាក់ដឹកនាំ។
លោកបន្ថែមថា នៅពេលដែលដីខ្មែរជួលឱ្យជនបរទេស ការប្រើប្រាស់ជីកសិកម្ម ថ្នាំកសិកម្ម និងគ្រឿងចក្រ បម្រើឱ្យវិស័យកសិកម្មទាំងអស់នាំចូលពីវៀតណាម។
លោក ទូច តារា និយាយថា៖ «ស្នើឱ្យរដ្ឋាភិបាលក៏ដូចជាក្រសួងមហាផ្ទៃ ត្រូវចាត់វិធានការការជួលតាមខ្សែបន្ទាត់ព្រំដែនហ្នឹងឱ្យបានម៉ឹងមាត់។ ឈប់ឱ្យមានការជួលដីបន្តទៀត ឱ្យប្រទេសជិតខាង ហើយមួយទៀត ត្រូវរៀបចំប្រព័ន្ធធារាសាស្ត្រឱ្យបានល្អ ហើយរកទីផ្សារឱ្យកសិករខ្មែរយើងធ្វើវិញ ហើយផ្ដល់ទុនឱ្យកសិករខ្មែរធ្វើវិញ»។
បច្ចុប្បន្នទិដ្ឋភាពដីស្រែចម្ការរបស់ពលរដ្ឋខ្មែរ តាមបណ្ដោយព្រំដែន ក្នុងស្រុកស្វាយទាប ក្នុងស្រុករំដួល រហូតដល់សង្កាត់ច្រកម្ទេស ក្រុងបាវិត ខេត្តស្វាយរៀង សម្បូរដោយចម្ការអំពៅ ដំឡូងមី និងដំណាំផ្សេងៗ រាប់សែនហិកតាធំល្វឹងល្វើយដាច់កន្ទុយភ្នែក។ អ្នកភូមិថា ឈ្មួញវៀតណាមធ្វើកសិកម្មប្រើប្រាស់ជីគីមីច្រើន និងគ្រឿងចក្រ តំបន់ខ្លះពួកគេជួលកម្មករខ្មែរដោយមានមេការជាជនជាតិវៀតណាម។
ផ្នែកខ្លះនៅតាមដងផ្លូវ ឃើញមានផ្ទះរបស់ជនជាតិវៀតណាមក្នុងដីខ្មែរមួយៗ ដែលគេសង់ដើម្បីដាក់គ្រឿងចក្រធ្វើកសិកម្ម និងតំបន់ខ្លះទៀតមានរថយន្ត និងម៉ូតូស្លាកលេខវៀតណាមចេញចូលលើដីខ្មែរជាប្រចាំ ដោយគ្មានការពិនិត្យពីនគរបាលប៉ុស្តិ៍ព្រំដែនខ្មែរនោះទេ។
កាលពីថ្ងៃទី១៣ ខែវិច្ឆិកា ឆ្នាំ២០២៤ រដ្ឋមន្ត្រីក្រសួងមហាផ្ទៃ លោក ស សុខា បានចេញសេចក្ដីជូនដំណឹងមួយស្នើឱ្យអភិបាលខេត្តជាប់ព្រំដែនប្រទេសជិតខាងទាំងអស់ ចាត់វិធានការម៉ឺងម៉ាត់រាល់សកម្មភាពពលរដ្ឋខ្មែរ និងអាជ្ញាធរមូលដ្ឋានលក់ ឬជួលដីស្រែចម្ការតាមបណ្ដោយព្រំដែនទៅឱ្យពលរដ្ឋប្រទេសជិតខាង។
រីឯអតីតរដ្ឋមន្ត្រីក្រសួងមហាផ្ទៃ លោក ស ខេង ក៏ធ្លាប់បានណែនាំទៅអាជ្ញាធរនៅតាមព្រំដែនទាំងអស់ ត្រូវហាមពលរដ្ឋកុំឱ្យជួលដីស្រែឱ្យទៅវៀតណាមបន្តទៀត ដោយលោកបារម្ភប៉ះពាល់បូរណភាពទឹកដី។
លោក ស ខេង ថ្លែងថា៖ «អាហ្នឹងបូរណភាពដែលវាអាចទាក់ទង គឺថា ពលរដ្ឋគាត់ជួលដីនៅតាមព្រំដែន គាត់ធ្វើទេ គាត់ជួលយកលុយវាស្រួល។ តែវាក៏មិនស្រួលដែរ តែយូរទៅ គាត់ថា នៅលើដីហ្នឹងយូរហើយ ដោះមិនងាយចេញទេ។ នេះហើយជាបញ្ហា»។
ពលរដ្ឋរស់នៅស្រុកស្វាយទាប លោក ទូច តារា បន្ថែមថា មិនមែនត្រឹមតែពលរដ្ឋខ្មែរប៉ុណ្ណោះទេ ជួលដីឱ្យវៀតណាម អតីតស្នងការនគរបាលខេត្តស្វាយរៀង លោក កឹង ឃន, មន្ត្រីយោធា, ឧកញ៉ា និងមន្ត្រីធំៗមួយចំនួនទៀតក៏ជួលដីរបស់ខ្លួនឱ្យវៀតណាមធ្វើកសិកម្មដែរ។
លោកថា មូលហេតុដែលពលរដ្ឋជួលដីឱ្យវៀតណាម ដោយសារកសិករខ្មែរខ្វះលទ្ធភាពធ្វើកសិកម្មក្នុងតំបន់នោះ ខ្វះប្រព័ន្ធធារាសាស្ត្រ អគ្គិសនី និងគ្មានទីផ្សារកសិផល។
លោក ទូច តារា និយាយថា៖ «សកម្មភាពជូលដីនេះ ជាក់ស្តែងនៅតែមាន គេឃើញអំពៅនៅតែដាំដុះទាំងអស់ហ្មង គ្រាន់តែគេយកបុគ្គលខ្មែរម្នាក់ ស្មៀនឃុំ ពពែត ឈ្មោះ គុយ សារ៉េន ធ្វើជាដំណាងក្រុមហ៊ុនរបស់ខ្លួន។ ហើយមានបុគ្គល២នាក់ទៀត ធ្វើជាដំណាងក្រុមហ៊ុនថាជាក្រុមហ៊ុនរបស់ខ្លួន តែធាតុពិតឃើញហើយ ជីកសិកម្មនាំចូលពីវៀតណាម»។
វីអូឌី បានព្យាយាមទាក់ទងអ្នកនាំពាក្យក្រសួងមហាផ្ទៃ លោក ទូច សុខៈ តាមបណ្តាញសង្គមតេឡេក្រាម(Telegram) តែលោកមិនឆ្លើយតបនៅថ្ងៃទី២៤ ខែមេសា។ រីឯអ្នកនាំពាក្យរដ្ឋបាលខេត្តស្វាយរៀង និងជាអភិបាលរងខេត្ត លោក ម៉ែន អេង ក៏មិនទាន់អាចទាក់ទងបានដែរគិតត្រឹមម៉ោងផ្សាយនេះ។
តែយ៉ាងណា អាជ្ញាធរខេត្តរូបនេះ ធ្លាប់ចុះទៅតំបន់ព្រំដែន ក្រោយពីមានប្រតិកម្មតាមបណ្ដាញសង្គមពាក់ព័ន្ធបញ្ហានេះ ហើយលោកបានបដិសេធចំពោះការលើកឡើងរបស់ពលរដ្ឋថា មានសកម្មភាពជួលដីឱ្យវៀតណាម។
ពលរដ្ឋម្នាក់ទៀតថ្លែងសុំមិនបង្ហាញឈ្មោះព្រោះបារម្ភពីសុវត្ថិភាព បារម្ភថា នៅពេលដែលជនជាតិវៀតណាមធ្វើកសិកម្មលើដីខ្មែរយូរទៅ បង្កើតកូនពូនជាចៅច្រើន និងសង់ផ្ទះលើដីខ្មែរ ពិបាកនឹងបណ្ដេញពួកគេចេញ បូកផ្សំមន្ត្រីខ្លះប្រព្រឹត្តអំពើពុករលួយផង បន្លំធ្វើអត្តសញ្ញាណបណ្ណសញ្ជាតិខ្មែរ។
លោកថា ការធ្វើអត្តសញ្ញាណបណ្ណឱ្យជនបរទេស ជារឿងងាយសម្រាប់មន្ត្រីខិលខូច ហើយនៅពេលជនជាតិវៀតណាមមានអត្តសញ្ញាណបណ្ណសញ្ជាតិខ្មែរ ពួកគេនឹងធ្វើប្លង់រឹងកាន់កាប់ដីខ្មែរជាក់ស្តែង។
ពលរដ្ឋមិនបង្ហាញឈ្មោះ និយាយថា៖ «អត្តសញ្ញាណបណ្ណនេះ កើតក្នុងបរិបទក្នុងសង្គមមានអំពើពុករលួយ គេមិនគិតពីជាតិជាធំទេ។ គេគិតធ្វើយ៉ាងណាបានលុយនៅខោប៉ាវ។ ខ្ញុំមានការព្រួយបារម្ភច្រើនដែរ ជនជាតិយួនកាន់តែរស់នៅច្រើនទៅៗហើយឃើញ»។
ឆ្លើយតបរឿងនេះ អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន យល់ថា បញ្ហានេះជាហានិភ័យជាតិនៅថ្ងៃអនាគត ដោយសារវៀតណាមប្រើហេតុផលទាំងនេះ ដើម្បីរំកិលព្រំដែនចូលមកកម្ពុជា និងប្រើលេសធ្វើកសិកម្ម រួចសង់ផ្ទះសម្បែងរស់នៅលើដីខ្មែរ។ លោកថា រដ្ឋាភិបាលគួរតែដកតំណែង និងពិន័យរដ្ឋបាលមន្ត្រីណាដែលអសកម្មមិនដោះស្រាយរឿងនេះ និងជាប់ពាក់ព័ន្ធជួលដីខ្មែរឱ្យវៀតណាមខុសពីបម្រាមក្រសួងមហាផ្ទៃ។
លោក អ៊ុំ សំអាន ថ្លែងថា៖ «ជនជាតិវៀតណាម នឹងសាងសង់ផ្ទះសម្បែង សំណង់រឹងលើដីខ្មែរ កើតកូនពូនជាចៅ ថ្ងៃក្រោយកើតជាភូមិម្ករមានមេភូមិ និងមេឃុំវៀតណាម បង្កើតជាហេដ្ឋារចនាសម្ព័ន្ធលើដីខ្មែរ។ យើងនឹងអាចបាត់បង់ទឹកដី ដូចបាត់ទឹកដីកម្ពុជាក្រោម និងប្រទេសចំប៉ា»។
ជុំវិញរឿងនេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត យល់ថា អំពើពុករលួយជាដើមចម ធ្វើឱ្យបទបញ្ជារបស់ក្រសួងមហាផ្ទៃ ពុំមានប្រសិទ្ធភាពនោះទេ ហើយរដ្ឋាភិបាលក៏គ្មានវិធានការជាក់ស្ដែង ដើម្បីចាត់វិធានការលើមន្ត្រីខិលខូចនោះដែរ។ លោកថា រដ្ឋបាលរបស់លោក ហ៊ុន ម៉ាណែត នឹងបង្កហានិភ័យខ្ពស់ដល់បូរណភាពទឹកដី។
លោក ម៉ែន ណាត ថ្លែងថា៖ «ដើម្បីដោះស្រាយបញ្ហានេះ បញ្ហាអំពើពុករលួយសូកប៉ាន់ វាធ្ងន់ធ្ងរណាស់ វាមានការគប់គិតគ្នាជាចំហ ហើយអត់មានវិធានការជាក់ស្ដែងស៊ីសំណូកសូកប៉ាន់»។
កម្ពុជាមានព្រំដែនជាប់នឹងប្រទេសថៃ ឡាវ និងវៀតណាម ហើយកន្លងទៅបញ្ហាជួលដីទៅឱ្យប្រទេសជិតខាង ភាគច្រើនកើតឡើងនៅតាមបណ្តាខេត្តជាប់ព្រំដែនរវាងកម្ពុជា និងវៀតណាម។ ពលរដ្ឋទទូចឱ្យអាជ្ញាធរពង្រឹងការអនុវត្តច្បាប់ឱ្យបានតឹងរ៉ឹង បើពុំនោះទេការបាត់បង់បូរណភាពទឹកដីនៅតែមានជាបន្តបន្ទាប់៕
