ការសម្រេចចិត្តរបស់ក្រសួងរតនាគារសហរដ្ឋអាមេរិក តាមរយៈការិយាល័យគ្រប់គ្រងទ្រព្យសម្បត្តិបរទេស (OFAC) នៅថ្ងៃទី២៣ ខែមេសា ឆ្នាំ២០២៦ ក្នុងការដាក់បញ្ចូលឈ្មោះ លោក កុក អាន ដែលជាសមាជិកព្រឹទ្ធសភាដែលមានឥទ្ធិពលមួយរូបរបស់គណបក្សប្រជាជនកម្ពុជា ទៅក្នុងបញ្ជីទណ្ឌកម្មសកល គឺជាព្រឹត្តិការណ៍នយោបាយ និងសេដ្ឋកិច្ចដ៏រង្គោះរង្គើបំផុតមួយ សម្រាប់រដ្ឋាភិបាលលោក ហ៊ុន ម៉ាណែត។
យោងតាមសេចក្តីប្រកាសព័ត៌មានលេខ SB0469 របស់ក្រសួងរតនាគារអាមេរិក វិធានការនេះ មិនត្រឹមតែផ្តោតលើបុគ្គលម្នាក់នោះទេ ប៉ុន្តែបានគ្របដណ្តប់លើអង្គភាព និងបុគ្គលចំនួន ២៨ ផ្សេងទៀត ដែលនៅមិនទាន់បានបញ្ចេញឈ្មោះ ដែលត្រូវបានរកឃើញថាមានការពាក់ព័ន្ធនឹងបណ្តាញឆបោកតាមប្រព័ន្ធឌីជីថល និងការជួញដូរមនុស្សដ៏ធំសម្បើមនៅអាស៊ីអាគ្នេយ៍។
ចំណាត់ការនេះ គឺជាការបញ្ជូនសារយ៉ាងច្បាស់ពីទីក្រុងវ៉ាស៊ីនតោនថា របាំងការពារនយោបាយរបស់គណបក្សប្រជាជនកម្ពុជាលែងជាខែល ដែលអាចទប់ទល់នឹងយុត្តិធម៌អន្តរជាតិបានទៀតហើយ ជាពិសេសនៅពេលដែលសកម្មភាពឧក្រិដ្ឋកម្មទាំងនោះ បានបង្កការខូចខាតយ៉ាងធ្ងន់ធ្ងរដល់ប្រជាពលរដ្ឋអាមេរិក ដែលត្រូវបានប៉ាន់ប្រមាណថាបានបាត់បង់ថវិការហូតដល់ ១០ ប៊ីលានដុល្លារក្នុងឆ្នាំ២០២៤ តែមួយគត់។
របាយការណ៍ដដែលបានបង្ហាញឱ្យឃើញនូវរចនាសម្ព័ន្ធដ៏ស្មុគស្មាញនៃអាណាចក្រឆបោករបស់ លោក កុក អាន ដែលត្រូវបានពណ៌នាថាជាមេខ្លោងនៃបណ្តាញឆបោកនៅកម្ពុជា។
លោក កុក អាន ត្រូវបានចោទប្រកាន់ថាបានប្រើប្រាស់អចលនទ្រព្យរបស់ខ្លួន រួមមាន កាស៊ីណូ រីសត និងសួនឧស្សាហកម្មនៅតាមតំបន់ព្រំដែន ដូចជា ប៉ោយប៉ែត បាវិត និងក្រុងព្រះសីហនុ ដើម្បីកែប្រែទៅជាទីតាំងសម្រាប់ប្រតិបត្តិការឆបោក។
អ្វីដែលគួរឱ្យបារម្ភបំផុតនោះ គឺការរកឃើញថា លោកបានប្រើប្រាស់ក្រុមហ៊ុនសន្តិសុខឯកជន អានកូ ប្រាឌ័រ (Anco Brothers Co Ltd) ដើម្បីផ្តល់កម្លាំងយាមកាមការពារដល់ក្រុមឧក្រិដ្ឋជនដែលជួលទីតាំងរបស់លោក។ នេះបង្ហាញពីការប្រើប្រាស់អំណាចនយោបាយ និងធនធានអាជីវកម្មដើម្បីការពារ និងជំរុញសកម្មភាពខុសច្បាប់ដោយផ្តល់និទណ្ឌភាពដល់ឧក្រិដ្ឋជនទាំងនោះ។
ទង្វើទាំងនេះ គឺជាការប្រឈមមុខដោយផ្ទាល់ជាមួយរដ្ឋាភិបាលអាមេរិក ក្នុងការតាមប្រមាញ់ក្រុមឆបោក ទោះបីជាពួកគេមានខ្នងបង្អែករឹងមាំកម្រិតណាក៏ដោយ ដូចដែលលោក ស្កត បេសសិន (Scott Bessent) រដ្ឋលេខាធិការក្រសួងរតនាគារអាមេរិក បានបញ្ជាក់នៅក្នុងសេចក្តីថ្លែងការណ៍របស់លោក។
ក្រៅពីលោក កុក អាន ទណ្ឌកម្មនេះ ក៏បានលាតត្រដាងពីបណ្តាញសហការីជិតស្និទ្ធ ដូចជា លោក រិទ្ធី រក្សី ដែលជាប្រធានក្រុម K99 Group និងជាអ្នកគ្រប់គ្រងក្រុមហ៊ុន K99 Culture and Media Co Ltd។
តាមរយៈទិន្នន័យពីក្រសួងរតនាគារអាមេរិក ចុះថ្ងៃទី២៣ ខែមេសា ឆ្នាំ២០២៦ ក្រុម K99 នេះបានគ្រប់គ្រងលើទីតាំង ស៊ីង ធាន ឌី (Xing Tian Di) ដែលល្បីល្បាញខាងការឆបោកបែបមនោសញ្ចេតនា និងល្បែងស៊ីសងតាមប្រព័ន្ធពន់ហ្ស៊ី (Ponzi scheme) ព្រមទាំងទីតាំង ណាន ហៃ (Nan Hai) ដែលត្រូវបានគេស្គាល់ថាជាកន្លែងឃុំឃាំងមនុស្សខុសច្បាប់ និងមានករណីស្លាប់បាត់បង់ជីវិត។
លើសពីនេះ បុគ្គលដែលមានដើមកំណើតភូមាដែលបានចូលសញ្ជាតិកម្ពុជា គឺលោក អៃ ប៉ោង (Aik Paung) និងលោក សៃ អ៊ុង លីន (Sai Aung Linn) ក៏ត្រូវបានរកឃើញថា បានប្រើប្រាស់វិស័យសណ្ឋាគារ និងធនាគារ ដូចជា សណ្ឋាគារ ស៊ីហ៊ូ រីសត (Xihu Resort Hotel Co Ltd) និងធនាគារ ហេង ហ្វេង ខេមបូឌា (Heng Feng Cambodia Bank plc) ដើម្បីលាងលុយកខ្វក់ដែលបានមកពីការឆបោក និងការជួញដូរមនុស្ស។
ការប្រើប្រាស់ប្រព័ន្ធធនាគារក្នុងស្រុកដើម្បីសម្រួលដល់សកម្មភាពឧក្រិដ្ឋកម្ម គឺជាចំណុចគ្រោះថ្នាក់បំផុតសម្រាប់ស្ថិរភាពហិរញ្ញវត្ថុរបស់កម្ពុជា ព្រោះវាអាចនាំឱ្យមានការដាក់ទណ្ឌកម្មបន្ទាប់បន្សំ ដែលប៉ះពាល់ដល់វិស័យសេដ្ឋកិច្ចទាំងមូល។
ទិដ្ឋភាពមនុស្សធម៌ដែលត្រូវបានលើកឡើងនៅក្នុងឯកសារយោងលេខ SB0469 គឺពិតជាគួរឱ្យរន្ធត់ចិត្ត។ ជនរងគ្រោះនៃការជួញដូរមនុស្សត្រូវបានអូសទាញតាមរយៈការផ្តល់ការងារក្លែងក្លាយ បន្ទាប់មកត្រូវបានដកហូតលិខិតឆ្លងដែន និងបង្ខំឱ្យធ្វើការឆបោកជនបរទេសក្រោមការគំរាមកំហែង និងអំពើហិង្សា។
ប្រសិនបើកម្មករឆបោកទាំងនោះ មិនអាចបំពេញតាមកិច្ចសន្យា ឬគោលដៅដែលបានកំណត់ទេ ពួកគេនឹងត្រូវប្រឈមមុខនឹងការធ្វើទារុណកម្មលើរាងកាយ។ នៅក្នុងករណីរបស់ លោក ឡៅ ហុង (Luo Hong) ដែលជាស្ថាបនិកក្រុមហ៊ុន ប៉ូឡៃ (Bolai) ភ្នាក់ងារសម្ងាត់អាមេរិកបានរកឃើញថា មានទឹកប្រាក់យ៉ាងហោចណាស់ ១,៣ លានដុល្លារ ពីជនរងគ្រោះត្រូវបានផ្ទេរចូលទៅក្នុងគណនីធនាគាររបស់គាត់។
ការដែលថវិកាដ៏ច្រើនសន្ធឹកសន្ធាប់ត្រូវបានលាងសម្អាតតាមរយៈកាស៊ីណូ និងក្រុមហ៊ុនសំបកក្រៅក្នុងកម្ពុជា បានធ្វើឱ្យកម្ពុជាជាប់ឈ្មោះជាជម្រកសម្រាប់ឧក្រិដ្ឋជនឆ្លងដែន ដែលចំណុចនេះគឺជាអ្វីដែលរដ្ឋាភិបាល លោក ហ៊ុន ម៉ាណែត ត្រូវតែដោះស្រាយជាបន្ទាន់បំផុត។
ប្រសិនបើយើងក្រឡេកមើលកាលប្បវត្តិនៃការដាក់ទណ្ឌកម្ម ចាប់តាំងពីការដាក់ទណ្ឌកម្មលើលោក លី យ៉ុងផាត់ នៅខែកញ្ញា ឆ្នាំ២០២៤ រហូតដល់ការដាក់ទណ្ឌកម្មលើក្រុម Prince Group និងចុងក្រោយគឺលោក កុក អាន នៅខែមេសា ឆ្នាំ២០២៦នេះ យើងឃើញថាវិសាលភាពនៃទណ្ឌកម្មកំពុងរីកធំទៅៗ និងកាន់តែខិតជិតទៅរកស្នូលនៃអំណាចសេដ្ឋកិច្ចរបស់បក្សកាន់អំណាច។
ជារួម ទណ្ឌកម្មលើ លោក កុក អាន គឺជាការដាស់តឿនចុងក្រោយសម្រាប់រដ្ឋាភិបាល លោក ហ៊ុន ម៉ាណែត។ ការបន្តរក្សាទុកបុគ្គលដែលរងការចោទប្រកាន់ពីបទឧក្រិដ្ឋកម្មកម្រិតអន្តរជាតិ នៅក្នុងជួររដ្ឋាភិបាល និងព្រឹទ្ធសភា នឹងធ្វើឱ្យកម្ពុជាកាន់តែឯកោពីប្រព័ន្ធហិរញ្ញវត្ថុសកល និងបំផ្លាញជំនឿចិត្តរបស់អ្នកវិនិយោគដែលមានតម្លាភាព។ លោក ហ៊ុន ម៉ាណែត ត្រូវតែជ្រើសរើសរវាងការការពារផលប្រយោជន៍របស់មហាសេដ្ឋីមួយក្តាប់តូច ឬការការពារអនាគតសេដ្ឋកិច្ចរបស់ប្រជាពលរដ្ឋរាប់លាននាក់។
វិធានការច្បាប់ក្នុងស្រុកដែលម៉ឺងម៉ាត់ ការស៊ើបអង្កេតដោយឯករាជ្យ និងការផ្តាច់ខ្លួនចេញពីបណ្តាញឧក្រិដ្ឋកម្មទាំងនេះ គឺជាផ្លូវតែមួយគត់ដែលកម្ពុជាអាចស្តារកេរ្តិ៍ឈ្មោះ និងស្ថិរភាពរបស់ខ្លួនឡើងវិញបាននៅលើឆាកអន្តរជាតិ ស្របតាមទិន្នន័យ និងអង្គហេតុដែលក្រសួងរតនាគារអាមេរិកបានលាតត្រដាងនៅថ្ងៃទី២៣ ខែមេសា ឆ្នាំ២០២៦នេះ៕
