កម្មករនៅរោងចក្រ ML Intimate Apparel (Cambodia) Ltd ក្នុងតំបន់សេដ្ឋកិច្ចពិសេសក្រុងប៉ោយប៉ែត ប្រកាសបិទទ្វារ នៅថ្ងៃចន្ទនេះ ធ្វើឱ្យកម្មកររាប់សឹបនាក់បារម្ភបាត់បង់ប្រាក់ឈ្នួលកន្លះខែ និងប្រាក់អត្ថប្រយោជន៍ផ្សេងទៀត បន្ទាប់ពីក្រុមហ៊ុនសន្យារយៈពេល៣ខែក្រោយ បានទូទាត់ឱ្យ។
មជ្ឈមណ្ឌលសម្ព័ន្ធភាពការងារនិងសិទ្ធិមនុស្ស បានអះអាងលើគេហទំព័ររបស់ខ្លួននៅថ្ងៃទី២៧ខែមេសានេះថា ក្រុមកម្មករនៅរោងចក្រនេះប្រមាណជិត ៥០០ នាក់ បានធ្វើការជួបប្រជុំនៅមុខរោងចក្រ ស្ថិតនៅក្នុងតំបន់សេដ្ឋកិច្ចពិសេស អូរនាង សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ដើម្បីសួរនាំករណីពន្យាពេល ក្នុងការបើកប្រាក់ឈ្នួលជូនកម្មករ និងព័ត៍មានក្រៅផ្លូវការដែលរោងចក្រ គ្រោងបិទទ្វារក្នុងពេលដ៏ខ្លីខាងមុខ។
អ្នកស្រី រស់់ ស្រីនាង ឱ្យវីអូឌីដឹងថា ភាគីរោងចក្របានប្រកាសបិទទ្វារជាផ្លូវការហើយ គិតចាប់ពីថ្ងៃទី២៧ខែមេសានេះទៅ ក្រោយប្រកាសឱ្យពួកគេឈប់សម្រាកនៅថ្ងៃបុណ្យចូលឆ្នាំ ទោះធ្លាប់ប្រាប់ថាពួកគេត្រូវត្រឡប់មកធ្វើនៅថ្ងចន្ទនេះវិញ។
អ្នកស្រីបន្តថា ភាគីក្រុមហ៊ុន អះអាងថា មូលហេតុនៃការប្រទេសបិទទ្វាររោងចក្រឈប់ដំណើរនេះដោយភាគីក្រុមហ៊ុនសំអាងពីជួបញ្ហាហិវត្ថុវត្តុធ្ងន់ធ្ងរមិនអាចដំណើរទៅទៀតបាន ប៉ុន្តែថា ក្រុមហ៊ុនសន្យា៣ខែទៀតទើបទូទាត់ប្រាក់អត្ថប្រយោជន៍មួយចំនួនជូនកម្មករ។
យ៉ាងណា អ្នកស្រីថា កម្មករទាំងអស់បារម្ភខ្លាចបាត់បង់ប្រាក់ខែកន្លះខែ ដែលក្រុមហ៊ុនមិនទាន់បានបើកឱ្យ រួមទាំងប្រាក់អត្ថប្រយោជន៍ដែលត្រូវទទួលបាន បើគ្មានការធានាពីក្រសួងពាក់ព័ន្ធទេនោះ។
អ្នកស្រីថា៖ «ខ្ញុំអត់មានសំណើរអីច្រើនទេ ខ្ញុំគ្រាន់តែសំណើរចង់ឱ្យក្រុមហ៊ុនជួយដោះស្រាយរឿងលុយ អាលុយសំណងសងយើង ឱ្យនៅសល់រយៈពេលខ្លី កុំឱ្យរយៈពេលយូ ព្រោះអីយើងមានកូនតូចផង ជីវៈភាពយើងខ្វះខាត ណាមួយយើងចង់ទៅរកការងារអីផ្សេងទៀត វាទៅអត់រួច អត់ទាន់គិតអីចេញ ព្រោះសេដ្ឋកិច្ចឥឡូវវាពិបាក ហើយខ្ញុំនៅជាយដែន វាសុទ្ធតែមានផលពិបាកដល់ពេលចឹងត្រូវការលុយហ្នឹង ដើម្បីធ្វើដំណើរទៅរកការងារផ្សេងៗទៀត»។
តំណាងកម្មករនៅរោចក្រនេះ គឺលោក គីម តូនិច ឱ្យដឹងដែរថា នៅព្រឹកនេះ មានមន្ត្រីមកពីស្ថាប័នពាក់ព័ន្ធក្នុងខេត្តបន្ទាយមានជ័យ មកជួបតំណាងកម្ម និងភាគីក្រុមហ៊ុន ប៉ុន្តែថា ការផ្តល់ដំណោះស្រាយ លើជម្រើសផ្តល់ប្រាក់អត្ថប្រយោជន៍ អំពីការបិទទ្វាររបស់ក្រុមហ៊ុន ស្ថិតក្នុងភាពមិនច្បាស់លាស់ ដែលធ្វើឱ្យកម្មករមានការព្រួយបារម្ភពីការបិទដំណើរការរោងចក្រនេះ។
លោកថា៖ «ប្រាក់ខែនេះនៅជំពាក់នៅឡើយ នៅជំពាក់កន្លះខែចុងក្រោយ កន្លះខែចុងក្រោយហើយនៅវគ្គទី១ ហើយនិយាយទៅ១ខែបើក២ដង វគ្គទី១មិនទាន់បើកទេ ហើយវគ្គទី២ យើងធ្វើការបានប៉ុន្មានថ្ងៃទៀតនោះ វគ្គទី២ ត្រូវបិទមុនចូលឆ្នាំត្រូវក្រុមហ៊ុនគិតឱ្យដែរអាហ្នឹង ប៉ុន្តែនៅទាំងអស់ក្នុងមួយខែហ្នឹង។
វីអូឌី មិនអាចរកការបំភ្លឺជុំវិញបញ្ហានេះពីភាគីរោងចក្របានទេ ។
ដោយឡែក ប្រធានមន្ទីការងារខេត្តបន្ទាយមានជ័យ លោក ហេង ប្រកប អះអាងថា លោកមិនបានចូលរួមដោះស្រាយរឿងនេះទេ ដោយកំពុងជាប់បេសកកម្ម នៅរាជធានីភ្នំពេញនៅឡើយ។
លោកថា៖ «ហើយការនេះ មានក្រុមការងារអធិការកិច្ចគាត់កំពុងធ្វើការហ្នឹងឯង»។
សម្រាប់អ្នកជំនាញការងារដែលមានបទពិសោធន៍ជាង១០ឆ្នាំ លោក អាត់ ធន់ និយាយថា វិធានដោះស្រាយដោយតម្លាភាព ដើម្បីធានាការថៅកែរោងចក្រមិនគេចវេសពីការទូទាត់សំណងជូនកម្មករ គឺស្ថាប័នពាក់ព័ន្ធ អាចប្រើវិធានបង្កកទ្រព្យសម្បត្តិ ឬដកលិខិតឆ្លងដែនពីថៅកែក្រុមហ៊ុន ដោយរង់ចាំការភាគីក្រុមហ៊ុន ទូទាត់សំណងឱ្យកម្មកររួចរាល់ ចាំប្រគល់ឱ្យវិញ។
តែយ៉ាងណា លោកកត់សម្គាល់ោថា កន្លងមក កម្មករជាច្រើន ត្រូវបានបាត់បង់អត្ថប្រយោជន៍នេះ ដោយសារតែការអនុវត្តច្បាប់នៅមានកម្រិត។
លោកថា៖ «ការគណនាការទូទាត់ការអីផ្សេងៗឱ្យបានត្រឹមត្រូវហ្នឹង គឺជារឿងចាំបាច់ណាស់ ចឹងហើយបានជាកន្លងមក និយោជកតែងតែធ្វើអីផ្តេសផ្តាស ហើយក៏សម្រួលជាមួយហ្នឹងជាមួយខាងក្រសួង ដើម្បីបញ្ចប់ប៉ុន្តែរឿងត្រឹមត្រូវបើនិយោជក ហើយនឹងសហជីពឯករាជ្យធ្វើការជជែកគ្នា ហើយក៏ក្រសួងនៅកណ្តាលក្នុងការជួយសម្រួល ខ្ញុំគិតថា វាឥទ្ធិពលប៉ុន្តែបើសិនជាមិនមានសហជីពឯករាជ្យ មិនមានអ្នកណាតំណងឱ្យកម្មករពិតប្រាកដទេ កន្លងមក យើងតែងតែឃើញខ្វះខាត ហើយមិនដឹងថាគេធ្វើយ៉ាងម៉េចគ្មានតម្លាភាពខ្លាំងទេ ខ្ញុំគិតថា កម្មកររងគ្រោះច្រើន»៕
