ជនជាតិដើមភាគតិចព្នង ២នាក់ នៅខេត្តមណ្ឌលគិរី ក្នុងចំណោមពលរដ្ឋជាង ៥០គ្រួសារ ព្រួយបារម្ភពីសុវត្ថិភាព ក្រោយពីបុគ្គលមានលុយមានអំណាចលួចធ្វើប្លង់រឹងដោយស្ងាត់ៗ រំលោភយកដីធ្លីអាស្រ័យផលបែបប្រពៃណីរបស់ពួកគាត់ ហើយថែមទាំងប្ដឹងពួកគាត់ទៀត។
ជនជាតិដើមភាគតិចព្នង ២នាក់ រស់នៅភូមិពូលុ ឃុំប៊ូស្រា ស្រុកពេជ្រាដា គឺលោក ក្រើង តុលា និង អ្នកស្រី ស្រុប សាញ់ បានវិលត្រឡប់ទៅផ្ទះវិញហើយ បន្ទាប់ពីឆ្លើយបំភ្លឺនៅស្នងការដ្ឋាននគរបាលខេត្តមណ្ឌលគិរី ពេញមួយព្រឹកនៅថ្ងៃទី២៧ ខែមេសានេះ។
ការឆ្លើយបំភ្លឺនេះ ក្រោយពីអ្នកភូមិបានបង្ហោះសារតាមបណ្ដាញសង្គមថ្មីៗនេះ មិនពេញចិត្តនឹងអាជ្ញាធរធ្វើប្លង់កម្មសិទ្ធិដីធ្លី ត្រួតគ្នាលើដីរបស់ជនជាតិដើមភាគតិចដែលអាស្រ័យផលបែបប្រពៃណី និងដីតំបន់ខ្លះជាដីកេរឪពុកម្ដាយរបស់ពួកគាត់។
ជនជាតិដើមភាគតិចព្នង អ្នកស្រី ស្រុប សាញ់ វ័យ២៨ឆ្នាំ ប្រាប់វីអូឌីថា ដីរបស់អ្នកស្រីជាង ៤ហិកតា ត្រូវគេលួចធ្វើប្លង់រឹងដោយស្ងាត់ៗរំលោភយកទាំងមូល ហើយជនបង្កបានប្តឹងអ្នកស្រីទៅស្នងការនគរបាលថែមទៀត។ អ្នកស្រីថា ដីនេះជាដីកេរឪពុកម្តាយ មានដំណាំស្រូវ និងដំឡូង ដែលអាស្រ័យជាច្រើនឆ្នាំមកហើយ ប្រសិនបើបាត់បង់ពួកគាត់នឹងគ្មានដីបង្កបង្កើនផលទៀតទេ។
អ្នកស្រីបន្ថែមថា មកទល់ពេលនេះ អ្នកស្រីមិនទាន់ដឹងថា បុគ្គលរូបណាទេជាជនបង្ករំលោភយកដីរបស់អ្នកស្រី។
អ្នកស្រី ស្រុប សាញ់ និយាយថា៖ «គេយកអស់ ៤ហិកតា ៤អា ពេលគេយក ខ្ញុំខ្លាចគេប្ដឹងដល់ណាដល់ណី ខ្ញុំផ្ទេរដីហ្នឹងឱ្យគេវិញទៅបង។ ដីហ្នឹងយូរហើយ ម៉ែឳគាត់ចែកឱ្យ»។
ប្រជាសហគមន៍ ឱ្យដឹងថា មកទល់ពេលនេះ អ្នកភូមិពូលុ និងភូមិឡាំម៉េះ ហោចណាស់ជាង ៥០ គ្រួសារ កំពុងព្រួយបារម្ភពីសុវត្ថិភាពដីធ្លី ដោយសារដីស្រែចម្ការ ដែលពួកគាត់កំពុងអាស្រ័យផលទំហំជិត ១០០ ហិកតា នៅចំណុចអូតូយទាមអូរស្រាយក្នុ្ងងភូមិពូលុ ឃុំប៊ូស្រា ត្រូវបុគ្គលមានលុយមានអំណាចគប់គិតជាមួយអាជ្ញាធរលួចធ្វើប្លង់រឹងដោយស្ងាត់ៗ។
មកទល់ពេលនេះ មានពលរដ្ឋ ២គ្រួសារ កំពុងជាប់បណ្ដឹងពីបទ «បរិហារកេរ្តិ៍ និងខ្លែងឯកសារ» ។
សហគមន៍ម្នាក់ទៀតដែលកំពុងជាប់បណ្ដឹង គឺលោក ក្រើង តុលា ប្រាប់វីអូឌីថា ដីរបស់លោកជាង ១ហិកតា ក៏ត្រូវគេលួចធ្វើប្លង់រឹងរំលោភយកដែរ ខណៈដែលដីចម្ការរបស់លោកមានដំណាំកាហ្វេដែលអាចប្រមូលផលបាន និងគ្រប់គ្រងតាំងពីទសវត្សរ៍ទី៩០។ លោកថា ទង្វើនេះជាអំពើពុករលួយជាប្រព័ន្ធ និងគំរាមកំហែងអ្នកភូមិតាមប្រព័ន្ធតុលាការ។
លោក ក្រើង តុលា និយាយថា៖ «វារំលោភសិទ្ធិខ្ញុំផ្ទាល់ព្រោះខ្ញុំម្ចាស់ចម្ការ និងម្ចាស់ភូមិ/ឃុំនៅហ្នឹង ហើយខ្ញុំធ្វើចម្ការយូរហើយ អត់ដឹងថា គេមកធ្វើប្លង់លើដីខ្ញុំ លក្ខណៈបច្ចេកទេសមួយ។ រដ្ឋាភិបាលប្រើមន្ត្រីជំនាញសុរិយោដីខ្សោយប្រើប្រាស់មនុស្ស។ អំពើពុករលួយជាប្រព័ន្ធ ព្រោះដីហ្នឹង មានព្រៃខ្លះ និងមានចម្ការពលរដ្ឋ»។
ជនជាតិដើមភាគតិចព្នងម្នាក់ទៀត លោក ហាម សាន់ ឱ្យដឹងថា មន្ត្រីជំនាញបានធ្វើប្លង់រឹងរំលោភយកដីរបស់ពួកគាត់ ៤ ហិកតា ដោយស្ងាត់ៗ ធ្វើឱ្យគ្រួសាររបស់លោកខ្វះខាតដីដាំដុះចិញ្ចឹមជីវិត។ លោកចាត់ទុករឿងនេះអយុត្តិធម៌ និងធ្វើបាបជនជាតិដើមភាគតិច ដែលមានជីវភាពពឹងផ្អែកការប្រកបរបរស្រែចម្ការ។
លោក ហាម សាន់ និយាយថា៖ «គ្មានយុត្តិធម៌ចំពោះខ្ញុំ ខ្ញុំគិតថា អត់សប្បាយចិត្តទេ។ ខ្ញុំមិនមែនឈ្មួញជួញដូរទេ គ្រាន់អាស្រ័យផល។ ដល់ឃើញគាត់ធ្វើប្លង់លួចអ៊ីចឹង»។
វីអូឌី មិនទាន់អាចទាក់ទងសុំការបំភ្លឺរឿងនេះ ពីអ្នកនាំពាក្យសាលាខេត្តមណ្ឌលគិរី លោក នាង វណ្ណៈ និងប្រធានស្តីទីនៃមន្ទីរសុរិយោដីខេត្តនេះ លោក លី សុវណ្ណ បាននៅឡើយទេ គិតត្រឹមម៉ោងផ្សាយនេះ។
ប្រជាសហគមន៍ថា មេភូមិពូលុ លោក ថាច់ ហ៊ីម ប្រាប់ពលរដ្ឋថា ប្រសិនបើអ្នកភូមិមិនព្រមប្រគល់ដីឱ្យគេនោះទេ អាចនឹងប្រឈមផ្លូវតុលាការ។
ជុំវិញរឿងនេះ សកម្មជនសិទ្ធិមនុស្ស និងធនធានធម្មជាតិ លោក ប៊ី វ៉ាន់នី យល់ថា ការធ្វើប្លង់កម្មសិទ្ធិដោយស្ងាត់ៗ លើដីដែលពលរដ្ឋកំពុងអាស្រ័យផលជាក់ស្ដែងជាយូរមកហើយ សង្ស័យមានអំពើពុករលួយ និងមានភាពមិនប្រក្រតីច្រើន។ លោកស្នើឱ្យរដ្ឋាភិបាលអនុវត្តច្បាប់លើមន្ត្រីណាដែលពាក់ព័ន្ធអំពើពុករលួយក្នុងរឿងនេះ។
លោក ប៊ី វ៉ាន់នី ថ្លែងថា៖ «ប្លង់រឹងបើមិនមានការបញ្ជាក់ពីអាជ្ញាធរភូមិ/ឃុំ តើគេអាចចេញប្លង់បានទេ វាមិនអាចចេញបានទេ។ វាសំខាន់បំផុត អាជ្ញាធរភូមិ/ឃុំហ្នឹងហើយ ដីហ្នឹងជារបស់នរណា?»។
លោក ប៊ី វ៉ាន់នី បន្ថែមថា អាជ្ញាធរតែងតែយកលេសឆ្លើយដោះសារ គេចពីការទទួលខុសត្រូវ ខណៈដែលនីតិវិធីធ្វើប្លង់កម្មសិទ្ធិ ឬប្លង់រឹង មិនអាចរំលងអាជ្ញាធរភូមិ និងឃុំបានទេ។ លោកទទូចឱ្យរដ្ឋាភិបាលពង្រឹងប្រសិទ្ធភាពការងាររបស់មន្ត្រីសុរិយោដីខេត្តមណ្ឌលគិរី និងអាជ្ញាធរមូលដ្ឋាន ដែលពលរដ្ឋរិះគន់ថា គ្មានភាពស្មោះត្រង់ដោះស្រាយបញ្ហាដីធ្លី និងការពារសុវត្ថិភាពដីធ្លីរបស់ពួកគាត់៕
